உல்லன் டேபிள் மேட் - கைவண்ணம்

குரங்கிலிருந்து வந்ததாலோ என்னமோ, மனுசங்க மனசு ஒரு விசயத்திலிருந்து இன்னொரு விசயத்துக்கு தாவிக்கிட்டே இருக்கும்.  மத்தவங்களுக்கு எப்படியோ தெரியாது. ஆனா, காலமாற்றம் என்னுள் பெருசா எந்த மாற்றத்தையும் கொண்டுவந்ததில்லை; ஆனா, இந்த கிராஃப்ட் செய்யுற வேலைல மட்டும் ஒருநாளுக்கு இருக்கும் மனசு இன்னொரு நாளு இருக்குறதில்லை.  கொஞ்ச நாளு எம்ப்ராய்டரி, கொஞ்ச நாளு வயர்கூட, இன்னொரு நாளு ஜ்வல்லரி செய்யுறது, இன்னொரு நாளு தையல்ன்னு மாறிக்கிட்டே இருக்கும். அந்த வரிசையில் இந்த வாரம் உல்லன் பக்கம் திரும்பி இருக்கு என் பார்வை...

சும்மா இல்லாம வீட்டுக்காக ஒரு மேட் போட்டுக்கிட்டு இருக்கும்போது எங்க தெருவில் இருக்க அக்கா ஒருத்தங்க  பொங்கல்கூடை மேல போர்த்த ஒரு மேட் கேட்டாங்க. அவங்களுக்காக பின்னதுதான் இது. நூல்லாம் தன்கிட்ட இருந்ததை கொடுத்துட்டாங்க. இதை பார்த்து இன்னும் நாலு பேர் இதேமாதிரி மேட்டும், டிவி மேல போர்த்த ஒரு மேட்டும், வாசப்படியில் போடும் தோரணமும் கேட்டிருக்காங்க.  100 ரூபாயும் நாலு நாளும் செலவழிச்சா ஒரு மேட் வரும். அதை குறைஞ்சது 250ரூபாய்க்கு விக்கலாம். இதுவே, ஆன்லைன்லன்னா இன்னமும் அதிகமா விலை போகும். 

சும்மா இருக்கும் நேரத்துல பின்னது இதுலாம்.  இதை டேபிள், டீபாய் மேல போட்டுக்கலாம். டைனிங்க் டேபிள் ப்ளேஸ்மெண்டாவும் பயன்படுத்தலாம். சின்ன சைஸ்ல பின்னி பூச்சாடி, டீ கோஸ்டராவும் பயன்படுத்தலாம். ஆனா, இதுலாம் ஊரணி பொங்கல்போது  பொங்கக்கூடைமேல் போர்த்திக்க  பின்னி தரச்சொல்லி வாங்கிட்டு போனாங்க.  சில்வர்/வெங்கல அன்னக்கூடையில் பொங்கல் வைக்க தேவையான வரட்டியை அடுக்கி, பொங்கப்பானை, அரிசி, உப்புலாம் வச்சி அடுக்கி அதுமேல போர்த்தி கொண்டு போக இந்த மேட்டை பின்னித்தர சொன்னாங்க. 

கப்போர்ட்ல மேல இருக்கும் கூடையை எடுத்து படமெடுக்க சோம்பேறித்தனம் பட்டுக்கிட்டு படத்தை கூகுள்ல தேடினால் என் படமே கிடைச்சுட்டுது. 2013ல ஒரு திருவிழாவின்போது எடுத்தது.

அந்த படத்தின் பதிவை பார்க்கலாம்ன்னு போனால் என் சின்ன மாமன் கௌதம்  படம் கிடைச்சுது. முதன்முதலாய்  அன்னிக்குதான் கோவில்ல வச்சுதான் அவனை கையில் வாங்கினேன்.  கிட்டத்தட்ட மூணு வருசம் எத்தனை என் பகலை அழகாக்கியவன். இன்னிக்கு வளர்ந்துக்கிட்டு மூஞ்சை திருப்பிக்கிட்டு போகுது! வாழ்க்கை பயணத்தில் வரவும் பிரிவும் சகஜம்தான் போல!

நன்றியுடன்,

ராஜி