எங்க ஊரு திருவிழா

எல்லா ஊருலயும் வருசந்தோறும் ஆடி மாசம் அம்மனுக்கு கூழ் ஊத்துறது போல எங்க ஊருலயும் உண்டு, என்ன கொஞ்சம் ஸ்பெஷல்ன்னா, அன்னிக்கு சாயந்தரம் ஊரணி பொங்கல்ன்னு ஒண்ணு எல்லை அம்மனுக்கு வைப்பாங்க. அங்கிருந்து எல்லோரும் மேளதாளத்தோடு ஊர்வலமா ஊரை சுத்தி வந்து வீட்டுக்கு வருவாங்க.

கூழ் வார்க்கும் கோவில்...,

எல்லை அம்மன்...,

மதியம் வீட்டுல கூழும், கருவாடு இல்லாட்டி காராமணி கத்திரிக்காய் போட்ட குழம்பு(எங்க வீட்டுல அசைவம் படைக்குற பழக்கம் இல்லாததால கத்திரிக்காய் காராமணி கொழம்பு), பொங்கல், முருங்கை கீரை வேர்க்கடலை போட்ட பொறியல், அரைக்கீரை மசியல், கொழுக்கட்டை, வடைன்னு படைச்சு, கோவில்ல கொண்டு போய் ஒரு இலை வச்சுட்டு கூழ் கொண்டு போய் ஊத்திட்டு வருவோம்.

கோவில்ல கூழ் சேர்த்து வச்சு சாமிக்கு படைச்சு எழைகளுக்கு கொடுப்பாங்க. முன்னலாம் வெளி ஊருல இருந்துலாம் வந்து வாங்கி போவாங்க. இப்போ வாசனை வந்து மறுநாள் கீழ ஊத்திடுறதா கேள்வி. அதனால, கோவிலுக்கு எடுத்து போகும் கூழின் அளவு குடத்துல இருந்து சொம்பாகிட்டுது!!

ஒரு மண் பானை இல்லாட்டி செம்பு பானை அலங்கரிச்சு அதன் மேல அம்மன் முகத்தை வச்சு கரகமேந்தி ஊர் ஃபுல்லா சுத்தி வருவாங்க. அப்போ, நீர்மோர், ரஸ்னா, புளிசாதம்ன்னு பிரசாதம் தருவாங்க. கரகத்துக்கு தேங்காய், பூ, பழம் வச்சு கற்பூரம் ஏத்துவாங்க. பெண்கள், கரகமேந்தி வர்றவரை அம்மனா நினைச்சு அவர் காலுக்கு தண்ணி ஊத்தி மஞ்சள், குங்கும், பூ போட்டு வணங்குவாங்க. அவங்களும் பெண்களுக்கும் எலுமிச்சை பழமும், குங்குமமும் குடுத்து வாழ்த்துவாங்க!!

வயக்காட்டு நடுவே ஊர் எல்லை அம்மன் கோவில்...,

பொங்கல் கூடை சுமந்துக்கிட்டு நான். மாவிளக்கு, பூ, பழம், தேங்காயோடு என் மகன் ராம்ஜி.

மாடர்ன் உலகத்துக்கேத்த மாதிரி இப்போலாம் வீட்டுலயே கேஸ் அடுப்புல பொங்கல் வச்சுக்கிட்டு போய் படைச்சுக்கிட்டு வந்துடுறாங்க. ஆனா, என் அம்மா மட்டும் இப்படிதான் கோவில்ல வறட்டி கொண்டு போய் வைக்கனும்ன்னு பிடிவாதமா இருக்காங்க.

பொங்கல்லாம் வச்சு சாமிக்கு படைக்க எல்லோரும் வெயிட்டிங்க். பமபி உடுக்கை காரங்க பாட்டு பாடி யாருக்காவது அருள் வாக்கு வருமான்னு முயற்சி பண்ணுறாங்க.

ரொம்ப சீக்கிரமே ரெண்டு ஆண், ரெண்டு பாட்டிக்கு சாமி வந்துட்டுது. ஒரு பாட்டி சாமியும். ரெண்டு ஆண் சாமிலாம் எலுமிச்சையும், வேப்பிலை சாப்பிட்டு மலை ஏறிட்டுது. ஆனா, ஒரு பாட்டி மேல வந்த சாமி மட்டும் சரக்கு எங்கடா?!ன்னு கேட்டுச்சு. உடனே , சாமி படையல்ல வச்சிருந்த ஒரு சரக்கு பாட்டிலை எடுத்து பாட்டிக்கிட்ட நீட்ட.., பாட்டி வாங்கி ஒரே மூச்சுல ராவா அப்படியே அடிச்சுது.

அது முடிசதும் சுருட்டு எடுத்து கொடுத்தாங்க. அதை வாங்கி ரயில் விட்டப்படியே அருள் வாக்கு சொல்லுச்சு. மழை வரவைக்குறேன், புள்ளை குட்டிகளை காப்பாத்துறேன், ஆனா, எனக்கு கோவில் கட்டுங்க, அடுத்த வருசமாவது சேவல் வெட்டுங்கன்னு சொல்லி அங்கிருந்த பொரி, கடலையை அள்ளி அள்ளி சாப்பிட்டுச்சு, பாட்டி சரக்குக்கு சைட் டிஷ்சா பொரி கடலை சாப்பிடுதுன்னு என் பையன் கமெண்ட் அடிச்சான்.

(ராவா அடிச்ச ரங்கீலா பாட்டி இந்த பச்சை கலர் சேலை கட்டிய பாட்டிதான். எப்படியும் 60 வயசிருக்கும். சும்மா நடந்தாலே மேல் மூச்சு கீழ் மூச்சு வாங்கும். ஆனா, சாமி வந்து பாட்டி போட்ட ஆட்டமிருக்கே! 2 நிமிசம் வீடியோ எடுத்திருக்கேன். ஆனா, பதிவேத்ததான் தெரியலை!!)

எல்லாம் முடிஞ்சு  மேள தாளத்தோட ஊர்வலமா போய் வீட்டுக்கு போய் சேர்ந்தோம்.

கோவில்ல எதிர் வீட்டு குட்டி பையனோட ஆட்டம். 

நைட் சாமி ஊர்வலம் வர்றதோட திருவிழா முடிஞ்சது.

மண்வாசனை மாறாம இன்னமும் சில ஊர்கள் இருக்குது. அதுல எங்க ஊரும் ஒண்ணு.  திருவிழாக்கள் எதுக்கு ஆரம்பிச்சதோ! சாமி இருக்கோ இல்லியோ ஆனா, மக்கள் மனம் மகிழ்ச்சியா இருக்கத்தானே!! அந்த வகையில் எனக்கு பிடிச்ச ஒரு நிகழ்ச்சி இந்த திருவிழா. வீட்டு வேலைகள் படுத்தி எடுத்தாலும் கூட!!