திங்கள், செப்டம்பர் 25, 2017

குயில் பாடும். தவம் செய்யுமா?!

நவராத்திரியின் ஐந்தாவது நாள் வணங்க வேண்டிய பெண் தெய்வம் மகேஸ்வரி. இவள் சப்த கன்னியரில் இரண்டாவது கன்னி. இவள் சிவனின் அம்சம்.  இந்த சக்தியினால்தான் சிவன் தன் சம்ஹாரத்தை நிகழ்த்துகிறான். இவள் வெண்ணிற மேனியனாள். மூன்று கண்களோடு, பிறை சூடிய ஜடா மகுடத்துடன், பாசம், அங்குசம், மணி, சூலம், பரசு, மான், மழு ஏந்தி அபயவரத கரத்தோடு கூடிய பத்து கரங்களோடு ரிஷப வாகனத்தில் வடகிழக்கு திசையான ஈசானிய திசையை நிர்வகிப்பவள். இவள் கோபத்தை குறைக்கும் ஆற்றலை கொண்டவள். கடின உழைப்புக்கு சொந்தக்காரி. தர்மத்தின் திருவுருவம். தன்னை வழிபடுபவருக்கு போகத்தை வழங்கக்கூடியவள்.


சப்த கன்னியர்கள் வழிப்பட்டு சிவன் அருள் பெற்ற தலங்கள் வரிசையில் மகேஸ்வரி சிவனை வழிப்பட்ட தலம் நாகப்பட்டனம் கருங்குயில்நாதன்பேட்டையில் அருள்பாலிக்கும் ஆனந்தவல்லி சமேத சக்திபுரீஸ்வரர் ஆலயம் ஆகும்.  இந்திரன் குயில் உருவங்கொண்டு ஈசனை வழிப்பட்ட தலம் இது.  இங்குள்ள புண்ணிய தீர்த்தத்துக்கு கருணா தீர்த்தம் என்று பெயர். வில்வமரம் இங்கு ஸ்தல விருட்சம்.  தட்சன் சிவனை மதியாது யாகம் செய்தபோது அங்கு வந்த அன்னையால் யாகம் அழியப்பெற்றது. அந்த அழிவிலிருந்து தப்பிக்க எல்லாரும் ஓடியபோது இந்திரன் குயில் உருவங்கொண்டு உயிருக்கு அஞ்சி ஓடினான்.



தன்னையுமறியாமல் சிவநிந்தனைக்கு ஆளானதை எண்ணி வருந்தி, இந்திரன் குருபகவானிடம் யோசனை கேட்க, சப்த கன்னிகையரில் ஒருவளான மகேஸ்வரி  வழிப்பட்டு அருள்பெற்ற  கருணாபுரம் என்ற திருத்தலமொன்று உண்டு. அங்கு சென்று இறைவனை வழிப்பட்டால் உன் பாவம் தீரும் என கூறினார். அதன்படி இந்திரன் வழிப்பட்ட தலம் இது.  இதனாலயே, இந்த ஊருக்கு கருங்குயில்நாதன்பேட்டை என்றும், சிவனின் கருணையினை குறிக்கும் விதமாக கருணாப்பேட்டை என்றும் அழைக்கப்படுது.


மகேஸ்வரி மூல மந்திரம்.... 

ஓம் வ்ருஷத்வஜாயை வித்மஹே:
ம்ருக ஹஸ்தாயை தீமஹி;
தந்நோ ரௌத்ரீ ப்ரசோதயாத்


தமிழ்மணம் ஓட்டுப்பட்டை....
http://tamilmanam.net/rpostrating.php?s=P&i=1472746 நன்றியுடன்,
ராஜி.

ஞாயிறு, செப்டம்பர் 24, 2017

தங்கம் கிடைக்க வணங்க வேண்டிய பெண் தெய்வம்.

நவராத்திரியின் நாலாவது நாளில் நாம் வணங்கப்போற பெண் தெய்வம் வைஷ்ணவி. இவள் சப்தகன்னிகளில் நாலாவது கன்னி. சங்கு, சக்கரம், கதை, வில்,வாள், சூலம், கத்தி, கேடயம் தாங்கி எட்டு கரங்களுடன், சிவப்பு நிற ஆடையணிந்து கருட வாகனத்தில் காட்சியளிப்பவள்.  இவள் பராசக்தியின் கைகளிலிருந்து பிறந்தவள். விஷ்ணுவின் சக்தி.  பாரிஜாத மலருக்கு மனம் மயங்குபவள், சுக்கு, ஏலக்காய் பொடி தூவிய பானகம், எலுமிச்சை சாதம் இவளது நைவேத்தியம்.  தீயவற்றை சம்ஹரிக்க பிறந்தவள்.  கருடனை வாகனமாக கொண்டவள். வளமான வாழ்வு தருபவர். சகல சவுபாக்கியங்கள்,செல்வ வளம் அனைத்தையும் தருபவளே வைஷ்ணவி. குறிப்பாக தங்கம்  கிடைத்திட வைஷ்ணவியின் அருள் மிக முக்கியம்.  நீல நிற மேனி கொண்டவள். 


தஞ்சை ஐய்யம்பேட்டைக்கு அருகில் நல்லிச்சேரி நந்திமங்கை என்ற ஊரில் வைஷ்ணவிதேவி சிவனை வணங்கி அவன் அருள் பெற்றாள் என்று புராணங்கள் கூறுகின்றது. இங்குள்ள சிவனுக்கு ஜம்புநாதஸ்வாமி என்றும், அம்பாளுக்கு அலங்காரவல்லி என்றும் பெயர்.  இந்த தலத்தில் பஞ்சாட்சரத்தை நந்திபகவான் ஓதி சிவனை பூஜித்ததால் இந்த ஊருக்கு நந்திகேஸ்வரம் என்ற பேரும் உண்டு. இந்த ஊருக்கருகில் வயல் வெளிகள் அதிகம் கொண்டதால் அங்கு விளைந்த நெல்களை இங்கு குமித்து வைத்ததால் நெல்லுச்சேரி என அழக்கப்பட்டு நல்லிச்சேரி என திரிந்ததாகவும் சொல்லப்படுவதுண்டு. 


இந்த கோவில் இருந்த இடம்,முன்பு அடர்ந்த காடாய் இருந்ததாம்.  இந்த கோவிலை மக்கள் அனைவரும் ஒன்றாக சேர்ந்து கட்டியதாக கோவிலில் உள்ள கல்வெட்டுகள் கூறுகின்றன. இந்த கோவிலில்தான் சப்த கன்னிகளில் ஒருவரான வைஷ்ணவி தேவி தனது பதினெட்டு வயதில் சிவ பெருமானையும் அம்பாளையும் ஒரு சேர வழிபட்டார்.  இவளுக்கு நாராயணி என்றும் பெயருண்டு. 

108 சக்தி பீடங்களில் 51வது சக்தி பீடமான ஜம்மு-கஷ்மீர் மாநிலத்தில் உள்ள கட்ராவிலிருந்து அருள்புரியும் வைஷ்ணவிதேவியும், சப்தகன்னியருள் ஒருவரான இந்த வைஷ்ணவிதேவியும் வேறுவேறானவர்கள்., 

வைஷ்ணவிதேவியின் மூலமந்திரம்...

ஓம் ச்யாம வர்ணாய வித்மஹே
சக்ர ஹஸ்தாய தீமஹி
தன்னோ வைஷ்ணவி ப்ரசோதயாத்.

தமிழ்மணம் ஓட்டுப்பட்டை....
நன்றியுடன்,
ராஜி. 

சனி, செப்டம்பர் 23, 2017

இந்திரன் மனைவி இந்திராணியும், சப்த கன்னிகளில் ஒருவரான இந்திராணியும் ஒருவரா?!


நவராத்திரியின் மூன்றாவது நாளில் வணங்க வேண்டிய தெய்வம் இந்திராணி.  இவள் இந்திரனின் சக்தியாகும். இந்திரனின் மனைவியான இந்திராணியும், இவளும் வேறு. இவள் நித்யகன்னி. இந்திரன் மனைவி தெய்வானை, சித்திரகுப்தன், ஜெயந்தனின் தாய்.   இவளுக்கு மாகேந்தரி, சாம்ராஜதாயினி என்றும் பெயருண்டு. சீதைக்கு நிகரான அழகும் குணமும் கொண்டவள். இவள்தான் தேவலோகத்தை ஆட்சி செய்பவள்.  நவரத்தின கற்கள் பதித்த க்ரீடம் அணிந்தவள். வஜ்ராயுதத்தை தாங்கியவள். யானை வாகனம் கொண்டவள். விருத்திகாசுரனை அழித்தவள். ஆயிரம் கண்ணுடையவள். சப்த கன்னிகளில் ஆறாவது சக்தியாகும். 


வேலை கிடைக்க, பதவி உயர்வு, சம்பள உயர்வு, இழந்த பதவி திரும்ப பெற வேண்டுபவர்கள் இவளை வழிப்பட  கைமேல் பலன் கிடைக்கும். மரிக்கொழுந்து, சம்பங்கி மலர்களின் பிரியை. யம பயம் போக்குபவள், திருமண வரம் தருபவளும்கூட. 


சப்த கன்னியர்கள் ஒவ்வொருவரும் ஒவ்வொரு சிவாலயங்களுக்கு சென்று வணங்கி சிவனின் அருளாசி பெற்றனர். அவ்வாறு, இந்திராணி சிவனை வழிப்பட்ட தலம் நாகப்பட்டினம் அருகில் தருமபுரம், அபயாம்பிகை சமேத தருமபுரீஸ்வரர் ஆலயம்.  ஞானசம்பந்தரால் பாடல் பெற்ற தலம் இது. மார்க்கண்டேயன் உயிரை பறிக்க முயன்ற குற்றத்திற்காக சாபத்திற்கு ஆளான எமன், இத்தலத்தில் சிவனை வணங்கி சாப விமோசனம் பெற்றதாய் கூறப்படுது. தருமராஜாவும் இக்கோவிலில் சிவனை வணங்கி சிவனின் அருள் பெற்றுள்ளார். இங்கு துர்க்கை 18 திருக்கரங்களுடன் காட்சி தருகிறாள். சந்திரன் சாபம் நீங்க வழிப்பட்ட தலத்தில் இதுவும் ஒன்று. அனைத்து விதமான கலைகளும் கைவர சந்திரனின் அருள் மிக முக்கியம். அந்த சந்திரனுக்கு அருள்பாலித்த எம்பெருமான் இங்கு சந்திரமௌலீஸ்வரர் என்று அழைக்கப்படுகிறார். இவர் ஒரு சுயம்பு மூர்த்தியாகும். 


இந்திராணிக்கு தாழமங்கை என்றொரு பெயருண்டு. அவள் இங்கு தங்கி சிவனை பூஜித்ததாலேயே இந்த கோவிலுக்கு தாழமங்கை சந்திரமவுலீஸ்வரர் என்று பேச்சு வழக்கில் சொல்லப்படுது. 

இந்திராணியின் மூல மந்திரம்...
ஓம் - கஜத்வஜாயை வித்மஹே;வஜ்ரஹஸ்தாயை தீமஹி;தந்நோ இந்த்ராணி ப்ரசோதயாத்

தமிழ்மணம் ஓட்டுப்பட்டை...
http://tamilmanam.net/rpostrating.php?s=P&i=1472564

நன்றியுடன்,
ராஜி.

வெள்ளி, செப்டம்பர் 22, 2017

ராஜராஜனின் வெற்றிக்கு காரணம் ஒரு பெண் தெய்வமா?!


நவராத்திரியின் இரண்டாவது நாளில் நாம் வணங்க வேண்டியது வராகி அம்மனை.  பன்றி முகமும், பெண் உடலுடனும்,  தெத்துபற்களுடன் காட்சியளிப்பவள். தனது தெத்துபற்களால் பூமிப்பந்தை தாங்கி நிற்பவள். மூன்று கண்கள்,  சங்கு, சக்கரம், கத்தி, உலக்க்கை, கலைப்பை, உடுக்கை போன்ற ஆயுதங்களோடு அபய வரத முத்திரையோடு கூடிய எட்டு திருக்கரங்களுடன் காட்சியளிப்பவள்.  நீல நிற உடலோடு  சிவப்பு நிற ஆடையுடுத்தி சந்திரகலை தரித்த நவரத்தின க்ரீடம் அணிந்து சிம்ம வாகனத்தில் அமர்ந்து அருள்பாளிப்பவள். பஞ்சமீ, தண்டநாதா, சங்கேதா, சமயேஸ்வரி, சமய சங்கேதா, போத்ரிணி, வார்த்தாளி, மகாசேனா,   மங்கள மய நாராயணி, தண்டினி, பகளாமுகின்னு வேற பேர்களும் உண்டு. இவள் பராசக்தியின் படைத்தளபதியாகி பண்டாசுரனை அழித்தவள். ராஜராஜேஸ்வரியின் குதிரைப்படைத்தலைவியாகும்.  ஏவல், பில்லி சூனியம், எதிரிகள் தொல்லையில் இருந்து விடுபட இவளின் அருளைப் பெறுவது அவசியம். சப்த கன்னிகளில் ஐந்தாவது கன்னி இவள். பகைவருக்கு 

மிகுந்த உக்கிரமானவள். ஆனா அன்பு காட்டி ஆதரவளிப்பதில் அன்னைக்கு நிகரானவள்.   எட்டு காட்டு பன்றிகள் இழுக்கும் தேர் இவளது வாகனமாகும்.  இவள் விஷ்ணுவின் வாயிலிருந்து வெளிப்பட்ட தீஜ்ஜுவாலையில் தோன்றியவள். மகா வராகி, ஆதி வராகி, ஸ்வப்னவராகி, லகு வராகி, உன்மத்த வராகி, சிம்ஹாருடா வராகி, மகிஷாருடா வராகி, அச்வாருடா வராகி என்பன இவளது அவதார தோற்றமாகும்.  இவளுக்கென்று தனிக்கோவில் இந்தியாவிம் மொத்தமே இரண்டு இடங்களில்தான் உள்ளது. ஒன்று காசியில். மற்றொன்று தஞ்சையில். ராஜராஜ சோழனின் இஷ்டதெய்வம் இந்த வராகி அம்மன். இவை இரண்டும் மிகப்பழமை வாய்ந்தது. இப்போது அரக்கோணத்துக்கருகில் பள்ளூர் என்ற ஊரிலும் இவளுக்கு ஆலயம் எழுப்பி உள்ளனர். 
பள்ளூரில் இன்றைக்கு வராகி அம்மன் குடியிருக்கும் ஆலயத்தில் அவளுக்கு முன்பாக மந்திரகாளியம்மன் தான் வீற்றிருந்தாள். அரிய வரங்களை பெற்ற மமதையில் மந்திரகாளியம்மனையே தன் மந்திரத்தால் கட்டி வைத்தான். தக்க சமயம் வர அன்னையும் காத்திருந்தாள். தக்க நேரம் வந்ததும் கடும் மழை, புயல், இடியால் ஆற்றில் வெள்ளப்பெருக்கு ஏற்பட்டு வராகி அம்மன் மிதந்து மந்திரகாளியம்மன் கோவிலுக்கருகில் வந்து சேர்ந்தாள்.  தட்டு தடுமாறி எழுந்து ஒதுங்க கோவில் கதவை திறக்க சொல்லி மந்திரகாளியம்மனை வேண்டினாள்.  மந்திரவாதியினால தான் கட்டுண்டதை சொல்லி கதவை திறந்தால் பெரும் அழிவை சந்திக்க வேண்டுமெனவும் எச்சரித்தாள். அண்ட சராசரங்களும் கிடுகிடுக்க வைத்தபடி சிரித்த வராகி உன்னை காப்பேன் என உறுதியளித்து கோவிலுக்குள் சென்று மந்திரவாதிக்கு காத்திருந்தாள். 

நடுநிசியில் கோவிலுக்கு வந்த மந்திரவாதி கோவில் கதவை திறந்திருப்பதை கண்டு ஆத்திரமுற்று ஓங்கி கதவை எட்டி உதைத்தான்.  இதற்காகவே காத்திருந்த வராகி அவனை இரண்டாக கிழித்து  தூக்கி எறிந்தாள். மந்திரகாளியம்மனும் விடுவிக்கப்பட்டாள். வராகி அம்மனிடம், தாங்களே இக்கருவறையில் தங்கி அருள்பாலிக்க வேண்டுமென மந்திரக்காளியம்மன் வேண்ட வராகி அம்மனும் புள்ளலூரிலேயே தங்கி அருள்பாளிக்கிறாள்.
வராகிக்கு பிடித்தது செவ்வரளி மாலை, வராகிக்கு பிடித்தது தாமரைக்கிழங்கு, அல்லிக்கிழங்கு, தண்ணீர்விட்டான் கிழங்கு, மாகாளிகிழங்கு, பனங்கிழங்கு.  மரிக்கொழுந்து, கருந்துளசி, செந்தாழை வாசனைக்கு மயங்குபவள்.இவளுக்கு ஏற்ற நைவேத்தியம் கருப்பு உளுந்து வடை, பாதாம் கேசரி, தயிர்சாதம், பானகமாகும். நம் உடலில் இருக்கும் ஆதார சக்கரமான ஆறு சக்கரங்களில் நெற்றியில் இருக்கும் ஆக்ஞா சக்திக்கு சொந்தக்காரி. நம் எண்ணங்களை ஈடேற்றி தருவதில் அவளுக்கு நிகர் வேறு யாருமில்லை

உலகப்புகழ்பெற்ற தஞ்சை பெரிய கோவில் உருவாக காரணமான ராஜராஜ சோழனின் கண்கண்ட தெய்வம் இந்த வராகி அம்மன்.  பொதுவாக வினாயகரை வணங்கிய பின்னரே எந்த செயலையும் தொடங்குவது தமிழர் பண்பாடு. ஆனா, ராஜராஜன் வராகி அம்மனை வழிப்பட்ட பின்னரே எந்த செயலையும் தொடங்குவார். அந்த வழக்கம் இன்றுவரை தொடருது.

ராஜராஜன் தன்னை தடுத்தாட்கொள்ளும் இறைவனுக்கு பெரிய அளவில் கோவில் எழுப்ப முடிவு செய்தபின் இடம்தேடி எங்கெங்கோ அலைந்தார். இறுதியாக தஞ்சைக்கு வந்து தங்கி இடம்தேடினார்.  ஒருநாள் பொழுதுபோக்காக வேட்டைக்கு  புறப்பட்டு சென்றபோது  ஒரு இடத்தில் அவருக்கு எதிராக பன்றி ஒன்று எதிர்த்து நின்றது. அதனை அவர் துரத்தி சென்றார். ஆனால் அது போக்கு காட்டி பல இடங்களுக்கு சென்று ஒரு பெரிய திடலில் வந்து படுத்துக் கொண்டது. இதனால் வியப்படைந்த ராஜராஜசோழன் அதனை கொல்லாமல் துரத்தினார்.  ஆனால் அது எழுந்து நின்று காலால் பூமியை தோண்டியது. இது குறித்து ராஜராஜசோழன் அரண்மனை ஜோதிடரை அழைத்து விவரம் கேட்டார். அப்போது கோவில் கட்ட இடத்தினை, வராஹி தேவி தேர்ந்தெடுத்து இருப்பதை தெரிவித்தார் ஜோதிடர். அந்த இடத்தில் பெரிய கோவில் கட்டும் முன்பு வெற்றி தேவதை வராஹிக்கு சிறிய கோவில் அமைத்து வழிபட்டு பின்னர் பணியை தொடங்கினார் ராஜராஜன். அன்னையின் அருளால் உலகம் போற்றும் பெரிய கோவிலை கட்டினார் என்பது வரலாறு. 

அன்றிலிருந்து ராஜராஜனி வெற்றி தெய்வமாய் மாறிப்போனாள் இந்த வராகி. அன்றிலிருந்து போருக்கு செல்லும் முன் இங்கு வந்து ஆயுத பூஜை போட்ட பிறகே செல்வார். அதனால்தான், அவருக்கு வெற்றிமேல் வெற்றி கிட்டி, பாரத கண்டம் முழுக்க தன் கட்டுப்பாட்டுக்குள் கொண்டுவந்ததாய் நம்ப்படுது. இப்பவும், தஞ்சையை சுற்றியுள்ள பகுதிகளில் வராகி அம்மன் வழிபாடு பிரசித்தி பெற்றது. 


குழந்தைவரம், கல்வியில் தேர்ச்சி பெற்று வெற்றி பெற வியாழக்கிழமையிலும் வழிபடலாம். வெள்ளிக்கிழமைஅன்று வழிபட்டால் பில்லி, சூனியம், ஏவல், தோஷம் நீங்கும். சனிக்கிழமையன்று வழிபட்டால் நினைத்த காரியம் கைகூடி வெற்றிபெறும். மாதத்தில் வருகிற வளர்பிறை, தேய்பிறை, பஞ்சமி திதியிலும் விரதம் இருந்து வழிபட்டால் நல்லது.
ஓம் ச்யாமளாயை வித்மஹே
ஹல ஹஸ்தாயை தீமஹி
தன்னோ வாராஹி ப்ரசோதயாத்

வராகி தேவியை வழிப்படுவோம். வாழ்வில் எல்லா வளமும் பெறுவோம்....

தமிழ்மணம் ஓட்டுப்பட்டை...
http://tamilmanam.net/rpostrating.php?s=P&i=1472461
நன்றியுடன்,
ராஜி. 

வியாழன், செப்டம்பர் 21, 2017

சகல நன்மைகளையும் அளிக்கும் சாமுண்டி வழிபாடு


நவராத்திரியின் முதல்நாள் வணங்க வேண்டிய பெண் தெய்வம் சாமுண்டி என்கிற சாமுண்டீஸ்வரி. தெத்துப்பல் கொண்ட திருவாயும், முண்டங்களால் ஆன மாலையும் அணிந்து கோரமாய் காட்சி தருபவள். பார்க்க கோவக்காரியாய் இருந்தாலும் இவளது கோவம் தீயவைகளை அழித்து நல்வழிப்படுத்தவே அன்றி அவள் குழந்தைகளை ஒன்றும் செய்யமாட்டாள். 

சப்த கன்னியர்களில் ஒருவள் இந்த சாமுண்டி.  கடுந்தவத்திற்குப் பின் பிரம்மனிடம் இருந்து பெற்ற வரங்களால் திமிரடைந்திருந்த அந்தகாசுரன், தேவர்களைத் துன்புறுத்தத் தொடங்கினான். அவர்கள் சிவனிடம் முறையிட, சிவன் எய்த அம்பினால் காயமுற்ற அசுரன் சிந்திய ஒவ்வொரு துளி உதிரமும் ஒரு அரக்கனாக மாறியது. அவர்களை அடக்க சிவன் தனது வாயைத் திறந்து தீ ஜுவாலையினால் ஒரு பெண்ணுருவைப் படைத்தார். மற்ற கடவுளரும் இவ்வாறே செய்து ஏழு மாதர் உருவாயினர்.  அந்த எழுவரும் அந்தகாசுரனை அடக்கினர். . சாமுண்டி, பிராமி, மகேஸ்வரி, வைஷ்ணவி, வராஹி, கெளமாரி, இந்திராணி இவர்கள்தாம் அந்த சப்த மாதர்கள். சப்த என்றால் ஏழு என்று பொருள்.   இவர்கள் ஆண் கடவுளரின் பெண் உருவங்கள். சிற்ப வடிவில் ஒரு குழுவாக இவர்கள் உருவாக்கப்படும்போது இவர்களுடன் கணேசரும், வீரபத்திரரும் இடம்பெறுவர். ஆக, முழுமையான சப்தகன்னியர் சிற்பத்தில் ஒன்பது உருவங்கள் இடம் பெற்றிருக்கும்.
மைசூர் சாமுண்டீஸ்வரி அம்மன்

ஆதிசிவன் என அழைக்கப்படும் ருத்திரனின் அம்சம் இவள். முத்தலை சூலம், முண்டம், கத்தி, கபாலம் மாதிரியான ஆயுதங்களை தாங்கிய பதினெட்டு கரங்கள், மூன்று கண்கள், கோரைப்பற்களுடன், கருத்த மேனியுடன் புலித்தோல் உடுத்தி முண்டமாலையை அணிந்து பிணத்தின்மீது அமர்ந்து காட்சியளிக்கிறாள்.  சண்டர், முண்டர் என அரக்கர்களை அழிக்க அவதாரம் எடுத்தவள்.
நேபாள நாட்டின் சாமுண்டி சிலை

இந்த சாமுண்டிக்கு பல இடங்களில் கோவில் இருந்தாலும் கர்நாடகாவின் மைசூர் சாமூண்டீஸ்வரி கோவிதான் மிகப்புகழ்பெற்றது.  சாமுண்டி இங்கு சாமூண்டீஸ்வரியாக அருள்பாலிக்கிறாள்.  இந்த கோவில் 1000 ஆண்டுகள் பழமை பெற்றதாகும். கி.பி12ம் நூற்றாண்டை சேர்ந்தது இந்த கோவில். ஹோய்சாள மன்னன் விஷ்ணுவர்த்தன்  இந்த கோவில் திருப்பணி செய்தவர்களில் மிக முக்கியமானவர்.  

1573ம் ஆண்டு  மைசூரை நான்காம் சாமராஜ உடையார் ஆட்சி செய்துக்கொண்டிருந்த நேரம். சாமுண்டீஸ்வரியை தினமும் தரிசிப்பதை வழக்காமாக்கிக்கொண்டிருந்தார்.  ஒருமுறை அம்மனை வழிப்பட்டு திரும்பும்போது பலத்த மழை. இடி, மின்னலென கதிகலங்க வைத்தது.  ஒரு மரத்தின் அடியில்  பல்லக்கை இறக்கி வைத்துவிட்டு மழைக்கு ஒதுங்கி நின்றனர். இனம்புரியா பயம் மன்னன் மனதை சூழ்ந்துக்கொள்ள,  தன்னை காத்தருளும்படி அம்மனை வேண்டியபடி மலைக்கோவிலை பார்த்தார். கோவில் அவர் கண்ணுக்கு தெரியவில்லை. 
பதறி துடித்த  அவர் சில அடி தூரம் நகர்ந்து சென்று பார்த்தார். மரத்தின் அடியில் இருந்தபோது, தெரியாத கோவில் இப்போது தெரிந்தது. அப்போது மின்னலுடன் இடி விழுந்தது. எந்த மரத்தின் அடியில் நின்றிருந்தாரோ, அந்த மரம் தீப்பற்றி எரிந்தது. தன்னைக் காக்கவே, அம்பிகை கோயிலை மறைத்து விளையாடல் நிகழ்த்தியதை எண்ணி மகிழ்ந்தார். அதன் பின், சாமுண்டீஸ்வரி கோயிலைப் பெரிதாக கட்டினார். 

மும்மூர்த்திகளாலும் வெல்ல முடியாத அசுரனான மகிஷாசுரனை வதம் செய்து வெற்றி பெற்ற சாமுண்டீஸ்வரியைப் போற்றும் விதத்தில் நவராத்திரி பிரம்மோற்ஸவம் மைசூரில் மிகச்சிறப்பாக நடத்தப்படுகிறது. 1610ம் ஆண்டு முதல் தசராவிழா நடக்கிறது. தற்போது கர்நாடக அரசு இதை அரசு விழாவாக நடத்துகிறது. தசராவையொட்டி, மைசூரு அரண்மனை மின்விளக்கால் அலங்கரிக்கப்படும். முக்கிய நிகழ்ச்சியாக யானை ஊர்வலத்தின் போது, யானை மீது தங்க சிம்மாசனம் அமைத்து அதில் சாமுண்டீஸ்வரி பவனி வருவதைக் காண பக்தர்கள் கூட்டம் அலைமோதும். தசரா கண்காட்சி, வேளாண் கண்காட்சி, இளைஞர் திருவிழா, கலைத்திறன் போட்டி, கலை விழா, யானை ஊர்வலம், தீப்பந்த பேரணி போன்ற நிகழ்ச்சிகளும் உண்டு. அம்பா விலாஸ் மாளிகையில், மன்னர் பரம்பரையினர் தங்க சிம்மாசனத்தில் அமர்ந்து தர்பார் நடத்துவர். அப்போது வேத பாராயணமும், மன்னருக்கு பாதபூஜையும் நடக்கும். சாமுண்டீஸ்வரியைத் தரிசித்தால், சாதிக்க முடியாததையும் சாதிக்க அருள் செய்வாள். 

சாமுண்டீஸ்வரி தேவியின் மூலமந்திரம்...

ஓம் க்ருஷ்ணவர்ணாய விதமஹே சூல ஹஸ்தாயை திமஹி தந்நோ சாமுண்டா பிரசோதயாத்.

கல்வியாகிய சரஸ்வதி, வீரமான காளி, செல்வமான லட்சுமி இந்த மூன்று தத்துவங்களும் ஒன்று சேர்ந்ததே இந்த சண்டி என்கிற சாமுண்டீஸ்வரியாகும். இவள் ராத்திரி ஸகுக்த்ததால் வணங்கப்படும் ராத்திரி தேவியாகும். இவளுக்கு பிடிச்ச நைவேத்தியம் புளியோதரை. 

சாமுண்டியை வழிப்படுவோம். சகல நன்மைகளையும் பெறுவோம்...

தமிழ்மணம் ஓட்டுப்பட்டை...
http://tamilmanam.net/rpostrating.php?s=P&i=1472383

நன்றியுடன்,
ராஜி

படிப்படியாய் முன்னேற்றம் தரும் நவராத்திரி விரதம்


கணவனான சிவனுக்கு ஒரு இரவு.. அண்ணனான பரந்தாமனுக்கும் ஒரே ஒரு இரவு. ஆனா, அனைத்து உயிர்களுக்கும் படியளிக்கும் அன்னையான பராசக்திக்கு ஒன்பது இரவுகள். அதுதான் நவராத்திரி விழாவாகும். பெண் தெய்வங்களை முன்னிறுத்தி பல விழாக்கள் நம்மூர்ல கொண்டாடப்படுது. அதுல முக்கியமானது நவராத்திரி  விழாவாகும். முழுக்க முழுக்க பெண்களால், பெண்களுக்காக, பெண் தெய்வங்களை முன்னிறுத்தி கொண்டாடப்படுது இந்த விழா...  புரட்டாசி மாதத்தின் பிரதமை திதியிலிருந்து தசமி திதி வரை கொண்டாடப்படுது.  சித்திரையும், புரட்டாசி ஆகிய இரண்டு மாதங்கள் எமனின் கோரப்பற்கள்ன்னு சொல்லப்படுது. இந்த மாசத்துல நோய்த்தொற்று அதிகமா இருக்கும்.  அதனை போக்கவே உடலுக்கு சக்தி கொடுக்க வேண்டி சக்திதேவியை வழிப்படுகிறோம். சித்திரை மாசத்தில் வசந்த நவராத்திரியும், புரட்டாசி மாதத்தில் சாரதா நவராத்திரியும் கொண்டாடப்படுது.


ஒருசில கோவில்களில்  பிரம்மோற்சவ விழான்னு பத்து நாள் கொண்டாடப்படுது. அதேமாதிரி வீட்டுல கொண்டாடும் இந்த பத்து நாள் திருவிழாவை வீட்டின் பிரம்மோற்சவம்ன்னு சொல்லுறதுல தப்பே இல்ல. இந்த நவராத்திரி விழா இந்தியா முழுக்கவும், இந்தியர்கள் இருக்கும் உலகின் பல்வேறு பகுதிகளிலும் கொண்டாடப்படுது. இந்த விரதத்தை வயசு வித்தியாசமில்லாம எல்லா பெண்களும் கொண்டாடுவர்.  இவ்விரதத்தை கடைப்பிடிப்பதால்  திருமணப்பேறும், குழந்தைப்பேரும், வீட்டில் சகல சௌபாக்கியங்களையும் பெறலாம்.

ஒருமுறை தேவர்களுக்கு பெரிய அளவில் துன்பங்கள் கொடுத்து வந்த மகிஷாசுரன் என்ற அரக்கனை கொல்ல சக்திவாய்ந்த தெய்வத்தை உருவாக்க சிவன், விஷ்ணு, பிரம்மா ஆகிய மும்மூர்த்திகளும் முடிவு செய்தனர். மூன்று கடவுள்களின் வாயில் இருந்தும் வெளிப்பட்டது ஒரு அற்புதமான பெண் உருவம். அதற்கு 10 கைகள், ஆக்ரோஷமான முகம் கொண்டதாக இருந்தது. அந்த பெண் தெய்வம்தான் துர்க்கை. சிவபெருமானின் துணைவி பார்வதிதேவியின் ஒரு வடிவம். அந்த துர்க்கையிடம் அனைத்து கடவுளர்களும் தங்களின் விருப்பமான ஆயுதங்களையும், கவசங்களையும் அளித்தனர்.


துர்க்காதேவி உலகையே அச்சுறுத்தி வந்த மகிஷாசுரனை வதம் செய்ததன் நினைவாக கொண்டாடப்படுவதே நவராத்திரி மற்றும் விஜயதசமி பண்டிகை. மைசூர் சாமுண்டீஸ்வரி மலையில் மகிஷாசுரனை துர்க்கை அழிப்பதுபோன்ற பண்டையகால சிற்பம் இன்றும் காணப்படுகிறது. துர்காதேவி, லட்சுமி, சரஸ்வதி என வெவ்வேறு வடிவங்களில் போற்றப்பட்டு பக்தர்களால் வணங்கப்படுகிறார். மகாபாரதத்தில் 12 ஆண்டுகள் காட்டில் திரிந்த பாண்டவர்கள் மாறுவேடத்தில் ஒரு ஆண்டை கழிக்க தங்கள் ஆயுதங்களை படையலிட்டு தங்களின் அடையாளத்தை அறிவித்தனர். அந்த நாள்தான் விஜயதசமின்னும் சொல்லப்படுது.

லட்சுமிதேவி, அலர்மேலுமங்கையாய் அவதரித்து திருப்பதி வெங்கடேசப்பெருமாளை அடையும்பொருட்டு இந்த விரதத்தை மேற்கொண்டதாகவும் ஒரு கதை சொல்லப்படுது.

சுரதா என்ற மன்னன்  தன் எதிரிகளை அழிப்பதற்காக வேண்டி தன் குருவின் ஆலோசனைப்படி காளியின் உருவத்தை தூய களிமண்ணால் செய்து உண்ணாவிரதமிருந்து  அம்பாளை வேண்டிக்கொள்ள,  அதன் பலனாக எதிரிகளை அழித்து  ஒரு புது யுகத்தையே உண்டு பண்ணினான் என்பது நம்பிக்கை.  ஐம்பூதங்களிலான சிற்பங்களைக்கொண்டு தன்னை வழிப்படுவோர் அனைத்து பாக்கியங்களையும் பெறுவர் என தேவிப்புராணத்தில் சொல்லப்படுது.  நவராத்திரியின் சிறப்பம்சம் கொலு வைப்பதாகும்.  கொலு என்பது படிப்படியாக படிகளை அமைத்து ஐம்பூதங்களால் ஆன பொம்மைகளை வைத்து வழிப்படுவதாகும்.  ஒன்பது படிகளை கொண்ட அமைக்கவேண்டியது என்பது விதின்னாலும், அவரவர் வசதிக்கேற்ப கொலுப்படிகள் அமைக்கலாம்.

கொலுவின் கீழிருந்து முதல்படியில் புல், பூண்டு மாதிரியான ஓரறிவு ஜீவன்களையும், இரண்டாம் படியில் நத்தை, சங்கு மாதிரியான ஈரறிவு ஜீவன்களையும், மூன்றாவது படியில் கறையான், எறும்பு மாதிரியான மூவறிவு கொண்ட ஜீவன்களையும், நாலாவது படியில் நண்டு, வண்டு மாதிரியான நாலறிவு கொண்ட ஜீவன்களையும், ஐந்தாம் படியில்  மிருகங்கள், பறவைகள் மாதிரியான ஐந்தறிவு ஜீவன்களையும், ஆறாவது படியில் மனிதர் உருவில் வாழ்ந்த மகான்களையும், மனிதர்கள்ன்னு ஆறரிவுக்கொண்ட ஜீவன்களையும்,  ஏழாவது படியில் சித்தர்கள், ரிஷிகள்மாதிரியானவர்களையும், எட்டாம் படியில் இந்திரன், தேவர்கள், நவக்கிரங்கங்கள் மாதிரியானவர்களையும், ஒன்பதாம் படியில்  பிரம்மா, விஷணு, சிவன், முருகன், அம்பிகைன்னு தெய்வங்களின் உருவ பொம்மைகளையும் வைத்து வழிப்பட வேண்டும்.


நவராத்திரியின் முதல்நாளில் சக்தியை சாமுண்டியாகவும், இரண்டாவது நாள் வராகி தேவியாகவும் , மூன்றாவது நாளில் இந்திராணியாகவும், நான்காம் நாள் வைஷ்ணவிதேவியாகவும், ஐந்தாம் நாள் மகேஸ்வரியாகவும்,  ஆறாம் நாள்  கவுமாரி அம்மனாகவும்,  ஏழாம் நாள் மகாலட்சுமியாகவும், எட்டாம்நாள்  நரசிம்மகியாகவும், ஒன்பதாம்நாள் பிராக்மியாகவும் நினைத்து வழிப்படவேண்டும். 


நவராத்திரி கொலுவில் கீழே உள்ள மூன்று படிகளில் வைக்கப்படும் அரிசி, பருப்பு, பாத்திரம் போன்றவை, தாமச குணத்தைக் குறிக்கும். அடுத்த மூன்று படிகளில் வைக்கப்படும் அரசர், ராணி, மந்திரி போன்றவை, ரஜோ குணத்தைக் காட்டும்; மற்ற மூன்று படிகளில் வைக்கப்படும் தெய்வ உருவங்கள் சத்துவ குணத்தை அடையும் வழியை நமக்குக் காட்டுகின்றன. நவராத்திரியின் ஒன்பது நாளும் துர்க்கையை ஒன்பது வடிவாக வழிபட வேண்டும். வந்ஹி துர்கா, வன துர்கா, ஜல துர்கா, ஸ்தூல துர்கா, விஷ்ணு துர்கா, பிரம்ம துர்கா, ருத்ர துர்கா, மகா துர்கா, சூலினி துர்கா போன்ற அன்னைகளின் சக்திகளை ஒவ்வொரு உயிரும் வாழ்வில் பெற்றிருக்கும். அவர்களுக்கு நன்றி தெரிவிக்கும் பொருட்டு நவராத்திரி விழாவில் தேவதைகளைச் சிறப்பிக்க வேண்டும். நவராத்திரி பூஜை செய்வதால் கடன் நிவாரணம், மன அமைதி பெறலாம். அறிவு பெருகும். இச்சா சக்தி, ஞான சக்தி, கிரியா சக்தி என மூன்று சக்திகளைப் பெறலாம். நவராத்திரி பண்டிகையின் போது ஒவ்வொரு ராத்திரிக்கும் ஒவ்வொரு நவதானியமாக ஒன்பது வகை சுண்டல் செய்து கடவுளுக்குப் படைத்து வழிபடுவர்.


கோதுமை, பச்சரிசி,  துவரை,  பச்சைப்பயறு,  கடலை,  மொச்சை,  எள்ளு,  உளுந்து,  கொள்ளுவினால் ஆன சுண்டலை தினத்துக்கொன்றாக வைத்து நைவேத்தியம் செய்ய வேண்டும்.  கொலு பார்க்க வரும் பெண்களுக்கு வெற்றிலை, பாக்கு, பழம் பாக்கு, தேங்காய், வளையல், சீப்பு, தட்டு மாதிரியான பொருட்களை கொடுத்து அனுப்புவர். சிறுமிகளை அந்தந்த நாளுக்குரிய அம்பாள் வடிவத்தில் அலங்கரித்து  வணங்குவர்.

இனிவரும் நாட்களில் நவராத்திரியின் ஒவ்வொரு நாளும் அந்தந்த அம்மனை பத்திய பதிவு வரும்.   அம்பிகையை வழிப்படுவோம். அனைத்து நலன்களும் பெறுவோம்.

தமிழ்மணம் ஓட்டுப்பட்டை...
http://tamilmanam.net/rpostrating.php?s=P&i=1472330

நன்றியுடன்,
ராஜி.

புதன், செப்டம்பர் 20, 2017

மெட்ராஸ் நல்ல மெட்ராஸ் - மௌனச்சாட்சிகள்


சென்னை .. இந்த பேருக்கு மயங்காதவர்கள் யாரும் இருக்க மாட்டாங்கன்னு நினைக்குறேன். பறக்கும் ரயில், பளபளக்கும் ஹோட்டல், வானுக்கு போட்டி போடும் கட்டிடங்கள், அல்ட்ரா மாடர்ன் பெண்கள், அப்பா, அம்மா முதற்கொண்டு நிம்மதி தவிர கிடைக்காத பொருள் ஏதுமில்ல. கல்வி, மருத்துவம், கலை, பொழுதுபோக்குன்னு வாழ்க்கைக்கு தேவையான அத்தனை அம்சமும் இங்கு கிடைக்கும். எல்லா தொழிலுக்கும் வாய்ப்புண்டு. உண்மை, கடின உழைப்பு இருந்தா சென்னைல பொழைச்சுக்கலாம். அதனாலதான்,   கெட்டும் பட்டணம் போய் சேருன்னு சொன்னாங்க போல. ஆனா பாருங்க.. இன்னிக்கு பட்டணம் வந்து கெட்டுப்போனவங்கதான் அதிகம்.  

முடிவெது?! தொடக்கமெது?!ன்னு   பிரம்மாண்டமாய் உருவெடுத்திருக்கும் சென்னை,  ஒருக்காலத்தில் சிறுசிறு கிராமங்களாகத்தான் இருந்தது அப்போல்லாம் அடையாறுக்கும், மயிலாப்பூருக்கும் இடையில் ஊர்களே கிடையாது.  வெறும் வயல்வெளிகளும், தோட்டங்களும்தான் இருந்தது. அடையாறிலிருந்து மயிலாப்பூர் கிராமத்திற்கு செல்ல ஒரு நீண்ட பாதை மட்டுமே இருந்ததாம். இன்று, அங்கு கஸ்தூரிபாய் மாடி ரயில்வே இருக்கும் பாதையில் மக்கள் நடமாடக்கூட இடம் இல்லாத அளவு கூட்டம். ஆனா, அன்று அது மிகப்பெரிய ஓடை!! பெரிய வயல் வரப்புக்களை கொண்ட வயல்வெளி. அந்த வயல்வெளிகளுக்கு தண்ணீர், இன்றைய IITயின் உள்இருக்கும் மிகப்பெரிய குளத்தில் இருந்துதான் தண்ணீர் பாசனம் நடந்ததாம். இன்று அந்த குளம் IIT  யில் இருக்கிறது. அக்குளத்தில் தண்ணீரும் இல்லை. தண்ணீர் இருந்தாலும் அதை பாய்ச்ச  வயல்வெளிகளும் இல்லை ... :-(



கோடம்பாக்கத்தில் 1953-1954-களில், காலக்கட்டங்களில் சொற்பமான தியேட்டர்களே  இருந்தன.  மவுண்ட் ரோட்டின் மையப்பகுதியில் கெயிட்டி, கேஸினோசித்ராநியூகுளோப்வெலிங்டன்நியூ எல்பின்ஸ்டன்,மிட்லேண்ட், ஓடியன்,பிளாஸா,பாரகன்.   திருவல்லிக்கேணியில் ஸ்டா ர், பிராட்வேயில் பிராட்வே,பிரபாத்,மினர்வாவால்டாக்ஸ் ரோட்டில் ரீகல்.  தங்கசாலையில் கிரவுன்,கிருஷ்ணாஸ்ரீமுருகன் டாக்கீஸ்.  வண்ணாரப்பேட்டையில் பாரத், மகாராணி,மகாராஜாபுரசைவாக்கத்தில் ராக்ஸி கெல்லிஸில் உமாஅயனாவரத்தில் சயானி மயிலாப்பூரில் கபாலி, காமதேனுதியாகராயநகரில் பிரபல நடிகை டி.ஆர்.ராஜகுமாரிக்குச் சொந்தமான ராஜகுமாரிசைதாப்பேட்டையில் நூர்ஜஹான்இவைகள் எல்லாம் இப்பொழுது இருக்கிறதா என்றால் எதுவுமே இல்லை. ன்று இரண்டு விடுபடலாம் . அதுவும் உறுதியாக தெரியவில்லை .
       (Rare photographs of Arni in southern India portraits of the Jaghiredar of Arni and his family,)

சென்னை கிராமம் நூற்றாண்டுகள் பழமை கொண்டது. ,.    வந்தவாசியை ஆண்ட தாமல் வெங்கடப்பா நாயக்கர், பூந்தமல்லியை ஆண்ட தாமல் அய்யப்ப நாயக்கர் ஆகிய சகோதரர்களின் தந்தை சென்னப்ப நாயக்கர் பெயரால் சென்னை என்று அழைக்கப்படுவதாக சொல்லப்படுகிறது. இனி இதிலிருந்த கிராமங்கள் எப்படி உருத்தெரியாமல் போனதோ அதேபோல் அந்த கிராம்களின் பெயர்களும் காலஓட்டத்தில் காணாமல் போய்விட்டன.

மதராஸ் மாகாணம் என்றழைக்கப்பட்ட சென்னையை ஆட்சி செய்ய இங்கிலாந்து அரசால் கவர்னர்கள் நியமிக்கப்பட்டார்கள். 1670களில் எலிகு யேல் என்னும் ஆங்கிலேயர் மதராஸ் கவர்னராக இருந்தார். அப்போது புனித ஜார்ஜ் கோட்டைக்கு வெளியே, வெள்ளையர்களுக்கு உதவி வேலைகளைச் செய்ய அழைத்து வரப்பட்ட குடும்பங்கள் குடியமர்த்தப்பட்ட பகுதி ஜார்ஜ் டவுனாக உருவானது. பிறகு கோல்கொண்டா சுல்தானின் நிர்வாகத்தில் இருந்த திருவல்லிக்கேணி, தண்டையார்பேட்டை, எழும்பூர் ஆகிய கிராமங்களை விலைக்கு வாங்கி நகரின் எல்லையை விரிவுபடுத்தினார் கவர்னர் யேல். கோட்டைக்குள் இருந்த குதிரை லாயத்தால் சுகாதாரப் பிரச்சினை எழுந்தது. இதனால் குதிரைகளை மேய்க்க ‘பிளாக் டவுன்’ அதாவது கறுப்பர்கள் நகரம் என்றழைக்கப்பட்ட ஜார்ஜ் டவுன் தேர்வு செய்யப்பட்டது. ஆனால் அங்கே போதிய மேய்ச்சல் நிலம் இல்லை. மேய்ச்சல் நிலமும் நீர்வளம் நிறைந்த பகுதியைத் தேடியபோது, கண்களில் பட்டது ஆற்றுக்கரையில்(அடையாறு) இருந்த திருப்புலியூர். அதுதான் இன்றைய கோடம்பாக்கம்.

ஆடு மாடுகளை நம்பி வாழும் ஆயர்குடி மக்கள் இங்கே அதிகம் வாழ்ந்தனர். கர்நாடக நவாபுகளின் ஆதிக்கத்தில் இருந்த இந்தப்பகுதி, அவர்களது குதிரைப்படை லாயமாகவும் இருந்தது. நவாபுகளிடமிருந்து முதல்தரமான குதிரைகளை வாங்கிய யேல் நிர்வாகம், புலியூருக்குத் தனது குதிரைகளின் லாயத்தை மாற்றியது. நவாபுகள் தங்கள் குதிரைப்படை லாயத்தை உருது மொழியில் ‘ கோடா பாக்’ என்று அழைத்தனர்.கோடா பாக் என்பதற்குக் குதிரைகளின் தோட்டம் என்பது பொருள். கோடா பாக் காலப்போக்கில் கோடம்பாக்கம் என்று மருவியதாகச் சொல்கிறார்கள் சென்னை வரலாற்றை ஆய்வுசெய்தவர்கள். 
கோடம்பாக்கத்திற்கு இன்னொரு விளக்கமும் உள்ளது.  'கோடா' என்ற உருதுச் சொல்லுக்கு 'குதிரை' என்றும், 'பாக்' என்பதற்கு 'இடம்' என்றும் பொருள். கோடா+பாக் = 'கோடாபாக்' என்ற தமிழ் உச்சரிப்புச் சொல் திரிந்து நாளடைவில் 'கோடம்பாக்கம்' என்று ஆகிவிட்டது.  அதிருக்கட்டும். குதிரைக்கும் கோடம்பாக்கத்திற்கும் என்ன சம்பந்தம் இருக்கிறது?.

அது என்னவென்றால், ஆங்கிலேயரின் சென்னை வருகைக்கு முற்காலத்தில், ஆற்காட்டை ஆண்டு வந்த 'நவாப்' என்னும் முஸ்லிம் அரசர்கள், மேற்குத் திசையிலிருந்து கிழக்கே உள்ள சென்னப்ப நாயக்கன் பட்டினத்திற்கு தம் பரிவாரங்களுடன் வருவார்கள். அப்போழுதெல்லாம் நீண்ட தூரம் பயணித்து வந்த குதிரைகளிலிருந்து இறங்கி, இந்த இடத்தில் இளைப்பாறி ஓய்வெடுத்துக் கொள்வார்கள். அவர்களைச் சுமந்து ஓடிவந்த குதிரைகளுக்கும் போதிய ஓய்வு கொடுப்பார்கள். அவ்வாறு தமது குதிரைகளை நிறுத்தி வைத்து ஓய்வும், உணவும் கொடுத்த அந்தக் குறிப்பிட்ட  சிற்றூர்தான் நாளடைவில் 'கோடா பாக்' என்றும், பிறகு 'கோடம்பாக்கம்' என்றும் வழங்கலாயிற்று என்று அதன் வரலாறு கூறுகின்றது.

கோடம்பாக்கத்தைச் சார்ந்து இருக்கின்ற 'சாலிக்கிராமம்' என்பதும் காரணப்பெயர்தான். எப்படி என்றால் 'சாலிகன்', 'சாலியன்' என்ற சொல்லுக்கு 'கைத்தறி நெசவாளன்' என்று பொருள். ஒருகாலத்தில் இந்தப் பகுதியில் 'சாலியர்' குடும்பங்கள் நிறைந்திருந்து, நெசவுத் தொழில் நடைபெற்று வந்தது. இதனால் 'சாலிக்கிராமம்' என்னும் பெயர் உண்டானது. இங்கு நேர்த்தி மிக்க புடவைகள் நெய்யப்பட்டன.  60 ஆண்டுகளுக்கு முன்பு, 'கோடம்பாக்கம் புடவை' புகழ் பெற்றிருந்தது. ஒருமுறை உடுத்திய பெண்கள் அதை விரும்பி உடுத்தியதால் அதனால் சென்னை வந்து செல்பவர்கள் , நான் ஊருக்குச் செல்லும்போதெல்லாம் நிறைய புடவை வாங்கி இருக்கிறேன் செல்வர். இன்றைக்கு கோடம்பாக்கமும், அதைச்சார்ந்த சாலிகிராமமும் இருக்கின்றன. ஆனால் குறிப்பிட்ட அந்த அழகிய வண்ணவண்ண புடவைகள் மட்டும் இல்லை.


ஆங்கிலேய  வாணிபக் கழகத்தின் துணிமணிகளை வெளுப்பதற்கும், துவைப்பதற்கும், சாயம் போடுவதற்கும் பல சலவைத் தொழிலாளர்கள் (வண்ணார்கள்) பெத்தநாயக்கபேட்டைக்கு வடப்புறத்தில் வேலை பார்த்து வந்தனர். அவர்களுக்கு வேண்டிய திறந்தவெளியும், பெருமளவு நீரும் கிடைக்காததால், கறுப்பர் பட்டினம் அழைக்கப்பட்ட  ஜார்ஜ் டவுன் வடக்கில் சென்று குடியேற வேண்டியதாயிற்று. அவர்களுக்கு இந்த இடம் வசதியாக மாறிப்போய் விட்டதால், அங்கேயே நிலைத்து வாழத் தொடங்கிவிட்டனர். அவர்கள் வாழ்ந்த  இந்தப் பகுதிக்கு வண்ணாரப்பேட்டை ன்னு பேர் வந்து இன்னிக்கு வாஷர்மேன்பேட்டையாகிட்டுது. 


தெய்வீக மூலிகைகள் (வேர்கள்) நிறைந்திருப்பதால், திரு +வேர்+காடு திருவேற்காடு எனப்பேர் உண்டாச்சு. இன்றைய கோயம்பேடு அமைந்திருக்கும் பகுதியில் முன்னொரு காலத்தில்   கோயட்டி என்ற ஒரு குருட்டு நாரை இருந்ததாம். இது தன் பக்தியால், இறக்கும்போதும் இறைவனின் நாமத்தை துதித்ததால் அந்நாரைக்கு முக்தி கிடைத்ததாம். அதனால, அந்த நாரையின் பெயரால் 'கோயட்டிபுரம்' ன்னு அழைக்கப்பட்டு, பின் அது 'கோட்டிபுரம்' என்றாகி நாளடைவில் 'கோயம்பேடு' என அழைக்கப்படுது.


பதினேழாம் நூற்றாண்டில் ராமநாதபுரம் தொண்டியிலிருந்து வந்த   இஸ்லாமிய துறவியான குணங்குடி மஸ்தான் சாகிபு என்பவர்   சென்னையின் "லெப்பை காடு" என்ற இடத்தில் தவம் செய்தார். உள்ளூர்வாசிகள் அவரை "தொண்டி ஆவர் நாயகன்" எனப்பொருள்படும்படி "தொண்டியார்" என   அழைத்தனர். பின்னர், காலப்போக்கில் லெப்பைக்காடு,  தொண்டியார்பேட்டை என்று அழைக்கப்பட்டு இப்போது தண்டையார்பேட்டை என இன்று அழைக்கப்படுது. 

ஒருக்காலத்தில் வில்வ மரங்கள்  நிறைந்த  பகுதியாக இருந்தது. வில்வம்=மாவிலம்=மாம்பலம் எனப் பெயர் பெற்றது. "மயிலை மேல் அம்பலம்" அதாவது, மயிலையின் மேற்குப் பகுதியில் இவ்விடம் அமைந்திருப்பதால் மேல் அம்பலம் பிந்நாளில் "மேற்கு மாம்பலம்" என மாறியதாக சொல்லப்படுது.   குரோம் லெதர் ஃபேக்டரி இருந்ததால் அப்பகுதியில் வசித்த மக்கள் இந்த இடத்தை குரோம்பேட்டைன்னு அழைக்க ஆரம்பித்தனர். ஒருக்காலத்தில் அல்லி மலர்கள் பூத்து குலுங்கும் நீர்த்தடங்களை கொண்டிருந்ததால் திரு+அல்லி+கேணி = திருவல்லிக்கேணி என அழைக்கப்படுது.  பி. தியாகராய செட்டி என்னும் பிட்டி தியாகராயர் என்றழைக்கப்படும் திராவிட கட்சியின்  மூத்த தலைவரும், சிறந்த தொழிலதிபருமாய் இருந்த இவரின்  நினைவாக டி.நகர் அழைக்கப்படுது.
இன்றைய சென்னையை அன்னிக்கே தோலுரித்து காட்டிய கண்ணதாசன் பாடல்வரிகளும், அதுக்குண்டான லிங்கும்... 
video
மெட்ராஸ் நல்ல மெட்ராஸ்
மெட்ராஸ் நல்ல மெட்ராஸ்
மெதுவாப் போறவுக யாருமில்லே 
இங்கே சரியாத் தமிழ் பேச ஆளுமில்லே
மெதுவாப் போறவுக யாருமில்லே 
இங்கே சரியாத் தமிழ் பேச ஆளுமில்லே
ஆம்பிள்ளைக்கும் பொம்பிள்ளைக்கும் 
வித்தியாசம் தோணல்லே
ஆம்பிள்ளைக்கும் பொம்பிள்ளைக்கும் 
வித்தியாசம் தோணல்லே
அநியாயம் ஆத்தாடியோ
மெட்ராஸ் நல்ல மெட்ராஸ் 
மெட்ராஸ் நல்ல மெட்ராஸ்

சீட்டுக்கட்டுக் கணக்காக 
இங்கே வீட்டக் கட்டி இருக்காக
வீட்டக் கட்டி இருந்தாலும் 
சிலர் ரோட்டு மேலே படுக்காக
பட்டணத்துத் தெருக்களிலே 
ஆளு நிக்க ஒரு நிழலில்லையே?
வெட்டவெளி நிலமில்லையே? 
நெல்லுக் கொட்ட ஒரு இடமில்லையே?
அடி சக்கே..

வைக்கேலாலே கன்னுக் குட்டி 
மாடு எப்போ போட்டுது?
கக்கத்திலே தூக்கி வச்சாக் கத்தலையே என்னது?
வைக்கேலாலே கன்னுக் குட்டி 
மாடு எப்போ போட்டுது?
கக்கத்திலே தூக்கி வச்சாக் கத்தலையே என்னது?
ரொக்கத்துக்கு மதிப்பில்லையே? - இங்கு
வெக்கத்துக்கு விலையில்லையே?
மெட்ராஸ் நல்ல மெட்ராஸ் 
மெட்ராஸ் நல்ல மெட்ராஸ்

ஊரு கெட்டுப் போனதுக்கு 
மூரு மாருக்கெட்டு அடையாளம்
நாடு கெட்டுப் போனதுக்கு 
மெட்ராஸு நாகரிகம் அடையாளம்

தேராட்டாம் காரினிலே ரொம்பத் திமிரோடு போறவரே 
எங்க ஏரோட்டோம் நின்னு போனா 
உங்க காரோட்டோம் என்னவாகும்?
ஹே..ஹே..

காத்து வாங்க பீச்சுப் பக்கம் காத்து நிக்கும் கூட்டமே
நேத்து வாங்கிப் போன காத்து என்ன ஆச்சு வூட்டிலே?
காத்து வாங்க பீச்சுப் பக்கம் காத்து நிக்கும் கூட்டமே
நேத்து வாங்கிப் போன காத்து என்ன ஆச்சு வூட்டிலே?
கெட்டுப்போன புள்ளிகளா 
வாழப் பட்டணத்தில் வந்தீகளா?
மெட்ராஸ் நல்ல மெட்ராஸ் 
மெட்ராஸ் நல்ல மெட்ராஸ்

மெதுவாப் போறவுக யாருமில்லே 
இங்கே சரியாத் தமிழ் பேச ஆளுமில்லே
ஆம்பிள்ளைக்கும் பொம்பிள்ளைக்கும் 
வித்தியாசம் தோணல்லே
அநியாயம் ஆத்தாடியோ
மெட்ராஸ் நல்ல மெட்ராஸ் 
மெட்ராஸ் நல்ல மெட்ராஸ்
அடி ஆத்தாடியோ..

என்னதான் பேர் மாறினாலும், நாகரீகம், பழக்க வழக்கங்கள் மாறினாலும், அந்த இடத்துக்குண்டான பெருமை மறக்கப்பட்டாலும், ஊர்ப்பேர் மூலமா தன் பெருமையை பறைச்சாற்றியபடி  மௌனச்சாட்சியாய் இருக்கு.  அபா! மூச்சு வாங்குது. மிச்சம் மீதி ஊர்ப்பெயர்க்காரணத்தை அடுத்த பதிவில் பார்க்கலாம்....  ஒரு ஜோடா ப்ளீச்....

தமிழ்மணம் ஓட்டுப்பட்டை...
http://tamilmanam.net/rpostrating.php?s=P&i=1472220










நன்றியுடன்,
ராஜி.