Sunday, September 15, 2019

எங்க வீட்டு தேவதைக்கு பிறந்த நாள்

உயிர்வலி கண்ட அந்த
ஐந்து மணிநேரப் போராட்டம்..
நெஞ்சுக்கூட்டுக்குள் யாரோ
கைவைத்து அழுத்தியது போன்ற ஒரு உணர்வு...

செத்துவிடலாம் எனத் தோன்றிய 
அவநம்பிக்கைக்கையின் இருளுக்கு
உன்முகம் பார்க்கப்போகும் துடிப்பு ஒன்றே
ஒளிக்கீற்று...

உன் அழுகைச்சத்தம் கேட்ட அந்த நொடி
பட்ட துன்பமெல்லாம் பறந்துப்போக
மகளென்னும் தேவதையாய் என் எதிரில் நீ...
என் பெண்மையை நான் உணர்ந்த இரண்டாவது சந்தர்ப்பம்...

மன்னித்தலும், விட்டுக்கொடுத்தலும் மட்டுமல்ல
ரௌத்திரமும் பழகவேண்டுமென
கற்றுக்கொடுத்த ஆசான் நீ!! 
எனக்குள்ளிருந்த குழந்தைத்தனத்திலிருக்கும்
வைராக்கியத்தை உணர வைத்தவள்....

உலகம் புரியாமல் வளர்ந்த எனக்கு
உலகத்தின் கோரமுகத்தை காட்டிய முதல் ஆள் நீ...
அந்த கோரமுகத்திலிருந்து இன்று
என்னை மீட்பவளும் நீயே!

என் இரண்டாம் தாய் நீ....
அதனால்தானோ என்னமோ சித்தியாய்
சிலசமயம் என்னை இம்சிக்கிறாய்...
ஆழ்கடலாய் அமைதியாய் இருந்தாலும்...
உனக்கென லட்சியம் கொண்டவள்
உன் லட்சியம் நிறைவேற வாழ்த்துகள் மகளே!

இரண்டாவதும் பெண்ணாய் பிறந்ததால் அத்தனை உறவுகளும் விலகிச்செல்ல, அம்மா கலங்கி போய் எல்லாரும் செத்துடலாமா?!ன்னு கேட்க, அதுவரை அம்மாவை எதிர்த்து பேசாதவ, நீ வேணும்ன்னா செத்து போ. நான் வரமாட்டேன்... எனக்குதான் கைக்கொடுக்க நாதியில்ல. ஆனா, என் பெரிய மகளுக்கு  இவ இருக்கா. இவளுக்கு பெரியவள் இருக்கா, என் பிள்ளைகளை வளர்த்துக்க எனக்கு தெரியும்ன்னு சொல்லி வீம்பாய் நின்னேன். என் ஆசை இன்னிய வரைக்கும் நிறைவேறிக்கிட்டுதான் இருக்கு. பெரியவளும், சின்னவளும் அத்தனை நெருக்கம்.. என்னையும்கூட சின்னவள் விட்டுக்கொடுப்பா.. ஆனா, அவ அக்காவை விட்டுக்கொடுக்க மாட்டா..  என் அப்பா, அம்மா செல்லம் இவள்... எங்க சோகம் புரிஞ்சுதானோ என்னமோ! அப்பலாம் அழக்கூட மாட்டா. இப்பயும் அப்படிதான் அழவே அழாது. என் அம்மாவோட தைரியத்தை அப்படியே கொண்டிருக்கு... அன்னிக்கு ஹாஸ்பிட்டல்லயே விட்டு வந்த அத்தனை பேரும் இன்னிக்கு வீட்டுக்குள் வரும்போதே  அவப்பேரை சொல்லிக்கிட்டுதான் வர்றாங்க...
உடை விசயத்தில் அத்தனை நேர்த்தி.  எத்தனை செட் துணி எடுத்தாலும் மனசு நிறையாது அவளுக்கு.  வெளில கிளம்பும்போது அவதான் எனக்கு டச் அப் கேர்ள். போட்டோ எடுத்தா ஆயுசு குறையும்ன்னு சொல்லிச்சொல்லி வளர்த்ததால் இன்னிக்கும் எனக்கு கேமராமுன் நிக்க கூச்சம். ஆனா, இவ போன் முழுக்க குறைஞ்சது 2000 படங்கள் இருக்கு. செல்பி பிரியை. இப்படி செல்பி பைத்தியமா இருக்காதடின்னு சொன்னா, உன்னையப்போல பைத்தியமாதான் இருக்கக்கூடாது. செல்பி பைத்தியமா இருக்கலாம்ன்னு காலை வாரி விடும். 


என்னைவிட என் அப்பாமேல் அவளுக்கு பாசம் அதிகம்.  உறவுக்கரங்க உதவி கேட்கும்போது எதாவது கோவதீல் நான் செய்ய யோசித்தால் எனக்கு புத்திமஇ சொல்வா. யார்மீது வன்மம் கொள்ளாது. என்ன?! அவ கப்போர்டை சுத்தமா வச்சுக்க மாட்டா. எத்தனை மடிச்சு அடுக்கி வச்சாலும் கலைச்சு வைப்பா. மூளைக்காய்ச்சலின்போது செத்து பொழைச்சு வந்ததால, வாசிப்பதில் பிரச்சனை, நினைவாற்றலில் பிரச்சனைன்னு இருந்ததால ப்ளஸ்டூல மார்க் கம்மி... இதை சொல்லி எல்லாரும் மக்குன்னு சொன்னதால இன்னிக்கு கல்லூரில கிளாஸ் ஃபர்ஸ்ட்..  டாக்டராதான் ஆகமுடில... ஆனா, என் பேர் முன்னாடி டாக்டர்ன்னு போட்டே ஆகனும்ன்னு  பி.எச்.டி படிக்க இப்போதிலிருந்து தயாரிக்கிட்டு இருக்குறவ.  நான் எது சொன்னாலும் கேட்கமாட்டா. எப்ப பார்த்தாலும் என்கிட்ட சண்டைதான் போடுவா. அதுக்கு பெரியவ கேப்பா.. நீங்க ரெண்டு பேரும் அம்மா பொண்ணா?! இல்ல மாமியார் மருமகளா?!ன்னு.. ஆனா, உடம்புக்கு முடியாதபோது பெரியவ என் துணைக்கு வரமாட்டா... சின்னவதான் ஓடோடி வருவா... தாத்தா பாட்டி செல்லம்,,, தம்பிக்கு புத்தி சொல்லன்னு எல்லாமே இவள்தான். ஆடுற மாட்டை ஆடி கறக்கனும்.. பாடுற மாட்டை பாடி கறக்கனும்ன்ற சொல்லுக்கு ஏத்தமாதிரி கெஞ்சி, கொஞ்சி, மிஞ்சி காரியத்தை சாதிச்சுடுவா. இவ இல்லன்னா என் வீட்டு வண்டிச்சக்கரம் சுழலாது. என் அச்சாணியே இவள்தான்!!

வாழ்க்கையில் எல்லா வளமும், நலமும், பெற்று குன்றாத செல்வமும், மாறா சிரிப்போடும் பல்லாண்டு வாழ்க லட்டும்மா.....
முதல்முறையாக இந்த வருட பிறந்தநாளுக்கு எங்களையெல்லாம் பிரிஞ்சு ஹாச்டலில் இருக்கா. பெரியவளின் கல்யாண வேலைகள் இருப்பதால் அவளை நேரில் வாழ்த்தமுடியலை. வீடியோ காலில் வரும்போதெல்லாம் ஒரே அழுகாச்சி. எல்லாம் நல்லதுக்கே. கொண்ட லட்சியத்தினை அடைய சில கொண்டாட்டஙகளை விட்டுக்கொடுத்துதான் ஆகனும். சர்ப்ப்ரைஸ் கிப்டா கேக்கும், வாட்சும் ஆன்லைனில் புக் பண்ணியாச்சு. 

சின்னவளுக்கு சின்னதா ஒரு கிஃப்ட்...

இனிய பிறந்த நாள் வாழ்த்துகள்.. நீங்களும் வாழ்த்துங்கள் வளரட்டும்...

நன்றியுடன்,
ராஜி.

Friday, September 13, 2019

ஹேய்!! ஹோய்! டுடே நவரச நாயகன் கார்த்திக் பர்த்டே



1990களில்  திருத்தணில நாங்க குடியிருந்த தெருவில் கல்யாணம், திருவிழாக்களுக்கு மைக்செட், சீரியல் பல்ப் செட் போடும் கடை இருந்ததால் எல்லா புதுப்பாட்டும் புல் சவுண்ட்ல போடுவாங்க.  1989ல  சோலைக்குயில் படத்து கண்ணுல நிக்குது.. நெஞ்சுல சொக்குது மானே... பாட்டு கேட்க நேர என்னை ஈர்த்துச்சு...  மனசுக்குள் எப்பயும் அந்த பாட்டுதான் ரிவைண்டிங்... , ஸ்கூல் டான்ஸ்ல கங்கைக்கரை மன்னனடி... பாட்டுக்கு ஆட.. அப்பாவை கேசட் வாங்கி வரச்சொல்லும்போது அதுல, வருசம் 16, சோலைக்குயில் படமும் சேர்ந்து வர கேசட் கதறி கதறி அழுது கெஞ்சுற அளவுக்கு அதே பாட்டுதான். பாட்டு ஈர்த்ததே தவிர யார் நடிச்சாங்கன்னுலாம் தெரிஞ்சுக்க விரும்பல.  

இத்தனைக்கும் 1988ல நடந்த அக்கா கல்யாணத்துலயே கார்த்திக் நடிச்ச என் ஜீவன் பாடுது படம் பார்த்திருக்கேன். அப்பலாம் சின்ன பிள்ளைன்றதால   நடிகர்கள்மீது பெருசா ஈர்ப்பில்லை.  பிடித்தது காலப்போக்கில் பிடிக்காம போற அதிசயம்  நிகழும் ஈ லோகத்தில்,  இத்தனை காலமும் மாறாம இருக்குறது கார்த்திக் மீதான ரசனை மட்டுமே! அவர் ஈர்த்த அளவுக்கு எந்த நடிகரும் இன்னியவரைக்கும் இந்தளவுக்கு ஈர்த்ததில்லை....  அதுக்கப்புறம்,  எப்பயும் கார்த்திக்.. கார்த்திக்.. கார்த்திக்தான்.... 
 13/9/1960ல பிறந்திருக்கார் என் சின்ன பொண்ணை கருவுற்றிருக்கும்போது செப்.15 டெலிவரி டேட் கொடுத்தாங்க. ஆனா, செப் 13லயே அவ பிறந்திடனும்ன்னு சாமிக்கிட்டலாம் வேண்டிக்கிட்டேன். நாம கேட்டதைலாம் என்னிக்கு சாமி செஞ்சிருக்கு?! . 1981 அலைகள் ஓய்வதில்லை படம் வந்திச்சு.  எப்படி நடிப்பாரோன்னு பயந்துக்கிட்டிருந்த அவர் அப்பா முத்துராமனுக்கு  அந்த படம் சூப்பர் டூப்பர் ஹிட்டுன்னுகூட  தெரியாது.  படம் வெளில வரும் முன்னயே முத்துராமன் நெஞ்சுவலியில் இறந்துட்டாரு. ஆலோசனை சொல்லி, கைக்கொடுக்க ஆளில்லாம  கொஞ்சம் வருசங்களுக்கு சரியான படம்  தேர்ந்தெடுக்க தெரியாம பெருசா எதும் ஹிட் கொடுக்கவே இல்ல. ரஜினி, ராதிகா நடிச்ச நல்லவனுக்கு நல்லவன் படத்துல, கிட்டத்தட்ட  வில்லன் வேஷம்ன்னு சொல்லி ஏ.வி.எம். நிறுவனத்தார் கேட்க வில்லன் வேஷமான்னு யோசிச்ச கார்த்திக்கை எங்க நிறுவனத்தின் அடுத்த படத்துல நீங்கதான் ஹீரோன்னு வாக்களிச்ச பின் நடிச்சதா ஏ.வி.எம் சரவணனே சொல்லி இருக்கார்...
கார்த்திக்கின் பொன்னுமணி, ரஜினியின்  எஜமான் படப்பிடிப்பும் ஒரே தளத்தில் நடந்தபோது எடுத்த படம்...

ஆவரேஜ் ஹீரோவா இருந்த கார்த்திக்கை நவரசநாயகனா காட்டுனது மௌனராகம் படத்துலதான்... மிஸ்டர் சந்திரமௌலீஈஈஈஈஈஈஈஈஈன்னு கூவி அதிகபட்சம் கால்மணிக்கூர் படத்துல வந்தாலும் காதல், குறும்பு, சோகம், கோபம்ன்னு அத்தனை அம்சத்தையும் காட்டி நடிச்சிருப்பார். படத்தின் நாயகன் மோகன்னாலும் படத்து பேரை கேட்டதும் நினைவுக்கு வர்றது கார்த்திக்தான். அந்த படத்துக்கப்புறம் கார்த்திக் கேரியர் டாப் கியர்ல போச்சு.. அக்னி நட்சத்திரம், வருசம் பதினாறு, கண் சிமிட்டும் நேரம், பாண்டி நாட்டு தங்கம், கிழக்கு வாசல், பொண்ணுமனி, முத்துக்காளைன்னு போய்க்கிட்டிருந்த கார்த்திக் கிராஃப்ல மீண்டும் ஒரு சறுக்கல்... எல்லாமே சொதப்பிக்கிட்டு வந்துச்சு...
ஆகாய கங்கை படத்துக்காக  கார்த்திக், சுகாசினி
மௌனராகத்துக்குபின் அக்னிநட்சத்திரத்தில் கார்த்திக்கை வச்சு இயக்கினார் மணிரத்தினம். பிரபு இன்னொரு நாயகன்.  பிரபு பெரிய வீட்டு பிள்ளையாய், போலீசாய் முறுக்கி காட்டி வருவார். காதல் காட்சியிலயும் அந்த ரஃப்னெஸ் தெரியும்.  ஆனா கார்த்திக் சாக்லேட் பாயா வந்து எல்லாரையும் கட்டிபோட்டார். நான் அந்த படத்துக்காக உடம்பை ஏத்தி கஷ்டப்பட்டு நடிச்சு வராத பேரை சும்மா கேமரா முன்னாடி நின்னு பேர் வாங்கிட்டு போயிட்டான் கார்த்திக்ன்னு பிரபுவே சொல்லி இருக்கார். 
அலைகள் ஓய்வதில்லை படத்துக்கான போட்டோ ஷூட்டிங்குக்கு வந்தபோது...

மணிரத்தினத்தின் தளபதி படத்துல கலெக்டர் வேசத்துக்கும், ரோஜா படத்து ஹீரோவாகவும் கார்த்திக்தான் முதல்ல நினைவுக்கு வந்திருக்கார். முதல்ல தளபதி படத்துக்காக போய் கேட்டபோது, என்ன நினைச்சாரோ தெரியல, அந்த படத்தை தவிர்க்க அதிக சம்பளம் கேட்டிருக்கார் கார்த்திக் அதனால் அந்த ரெண்டு படத்தையும் நடிக்க தவறவிட்டிருக்கார். பலவருசங்கழிச்சு ராவணன் படத்துலதான் மீண்டும் ரெண்டு பேரும் கைக்கோர்த்திருக்காங்க. பிரபு, விக்ரம், ஐஸ்வர்யா ராய் என்ட்ரிக்கு பறக்காத விசில் கார்த்திக் என்ட்ரிக்கு பறந்துச்சாம். கார்த்திக்குண்டான இடம் இன்னும் சினிமாவில் நிரப்பப்படாமயே இருக்குன்னு மணிரத்தினமே ராவணன் படத்து புரமோஷன்ல சொன்னார். 

மிஸ்டர் சந்திரமௌலி... மிஸ்டர் சந்திரமௌலி... வசனத்தை எதாவது ஒரு சந்தர்ப்பத்தில் சொல்லி நடிக்காத நடிகரும், மிமிக்ரி ஆர்ட்டிஸ்ட்டும் இதுவரை இல்லை. மிமிக்ரி ஆர்ட்டிஸ்ட்டுக்கு கார்த்திக் குரல்ன்னா அல்வா சாப்பிடுறமாதிரி... கார்த்திக் ஹே.. ஹேய்..ன்னு சொல்லி கைகாலை ஆட்டி, குழைஞ்சு பேசி ஓவர் ஆக்டிங்க் செய்ய மட்டுமே தெரியும்ன்னு சொன்னவங்க வாய மூடுற மாதிரி உன்னிடத்தில் என்னை கொடுத்தேன்... படத்துலயும், ஆனந்தபூங்காற்றே... படத்துலயும் நடிச்சு அசத்தி இருப்பார். ஹீரோவா நடிச்சிட்டிருக்கும்போதே அஜீத், பிரபுதேவா, விஜயகாந்த்... மாதிரியான நடிகர்கள் படத்துல கெஸ்ட்ரோல்லயும் நடிச்சிருக்கார். ஆறு பாடல்களை பாடி இருக்கார். 

பொதுவா எல்லா நடிகர், நடிகைகளுக்கும் ரீ எண்ட்ரிங்குறது ஒருமுறைதான் வரும். ஆனா கார்த்திக்குக்கு ரெண்டாவது முறையும் வந்துச்சு..  சுந்தர் சி இயக்கத்துல 1995ல உள்ளத்தை அள்ளித்தா படத்துமூலமா மீண்டும் பிசியானார் கார்த்திக். பூவரசன், மேட்டுக்குடி, பிஸ்தா, கோகுலத்தில் சீதைன்னு அவர் கொடுத்த ஹிட்டுகள் ஏராளம். கோகுலத்தில் சீதை படத்துல கார்த்திக் ரிஷியாவே வாழ்ந்திருப்பார். அந்த படத்து சாயலும் எல்லா நடிகர்கள்கிட்டயும் பார்க்கலாம்.  இதுக்கிடையில், கார்த்திக்கின் கவனம் அரசியல் பக்கமும் பார்வை போனது ...  அரசியல்ல மூழ்கி முத்தெடுத்தவங்க வெகுசிலரே! மூழ்கி காணாம போனது நிறைய பேரு. ஆனானப்பட்ட சிவாஜியே அரசியல்ல ஜெயிக்க முடியாதபோது தான் எம்மாத்திரம்ன்னு கார்த்திக் நினைச்சிருக்கனும்.. சரியான வழிக்காட்டுதல் இல்லாததால் அரசியல்ல இறங்கி சினிமாவை இழந்துதான் மிச்சம்...
தனக்கு தம்பியா, வில்லனா நடிச்ச சக நடிகரான முத்துராமன் தன்னோட மகனின் வளர்ச்சியை பார்க்க உடனில்லையேன்னு எம்.ஜி.ஆர் கலங்கினது படத்துலயே தெரியும்.

பொதுவா, நீச்சல் தெரியாம நீரில் முங்குறவங்களை,  ரெண்டு முறை வெளித்தள்ளி காப்பாத்த பார்க்குமாம். அதுல தப்பிச்சுக்கலைன்னா மூணாவது முறை முங்கிதான் போகனும். ஆனா, கார்த்திக் விசயத்துல இந்த விதி உடைக்கப்பட்டிருக்கு...  மாஞ்சா வேலு படத்துல கெஸ்ட்ரோலும், அனேகன் படத்துல வில்லனாவும் மீண்டும் கைக்கொடுத்து அவருக்குன்னு இன்னும் ரசிக பட்டாளம் இருக்குங்குறதை  அவருக்கு உணர்த்தி இருக்கனும்.  சூர்யாவோடு ‘ இது தானா சேர்ந்த கூட்டம்’ படத்துல வில்லனா வந்தார்(இன்னமும் நான் படம் பார்க்கலை :( ). 

இப்ப சமீபத்துல வெளிவந்த மிஸ்டர்.சந்திரமௌலி படத்துல ஃபர்ஸ்ட் ஹீரோ கார்த்திக்தான். அவரோடு சேர்ந்து அவர் மகனும் நடிச்சிருக்கார். அப்பாவோடு சேர்ந்து நடிக்க கொடுத்து வைக்காத எனக்கு என் மகனோடு சேர்ந்து நடிக்கும் வாய்ப்பு கிடைச்சிருக்குன்னு ஆடியோ ரிலீஸ்ல கண்கலங்கினார்.  தன் மகள் வயதுடைய வரலட்சுமி சரத்குமாருக்கு பத்து பொருத்தமும் பக்காவா பொருந்தி போனார்.  

அக்னி நட்சத்திரம், வருசம் 16, கிழக்குவாசல், பொன்னுமணி  படத்துக்காக நான்கு முறை பிலிம்பேர் விருதையும், அலைகள் ஓய்வதில்லை, அக்னி நட்சத்திரம், கிழக்குவாசல், உன்னிடத்தில் என்னை கொடுத்தேன்(1998)& பூவேலி(1998) படத்துக்காக நான்கு முறை தமிழக அரசின் சிறந்த நடிகருக்கான விருதையும், உன்னிடத்தில் என்னை கொடுத்தேன் படத்துக்காக சினிமா எக்ஸ்பிரஸ் விருதும்,  அபிநந்தனான்ற தெலுங்கு படத்துக்காக நந்தி விருதையும், அதுமட்டுமில்லாம கலைமாமணி பட்டமும் வாங்கி இருக்கார்.  சுயமரியாதை, அமரன், சின்ன ஜமீன், சிஷ்யா, பிஸ்தா, அரிச்சந்திரான்னு ஆறு படத்தில் சொந்தகுரலில் பாட்டு பாடி நடிச்சிருக்கார்.
 பல தடவை தவறவிட்டும் மீண்டும் கலை உலகில் இன்னொரு வாய்ப்பு வந்திருக்கு. பிரபு, சத்யராஜ் மாதிரி இந்த வாய்ப்பையாவது தக்க வச்சுப்பாரான்னு பொறுத்திருந்துதான் பார்க்கனும்..... உங்களுக்கு கைக்கொடுக்காத அரசியலை விட்டு, உங்களுக்குன்னு இன்னமும் இருக்கும் ரசிகர் பட்டாளத்தை கவனிங்க கார்த்திக் சார். 

காதல் மன்னன், காதல் இளவரசன், நடிகர் திலகம்ன்னு எத்தனை நட்சத்திரங்கள் இருந்தாலும் எல்லாரும் உணர்ச்சிகளை வெளிக்கொணர கொஞ்சம் மெனக்கெடனும்... உங்களுக்கு அதுலாம் வேண்டவே வேண்டாம். தானாவே வரும். நவரச நாயகன்ங்குற பட்டம் உங்களுக்கு மட்டுமே பொருந்தும்.  அந்த பட்டம் மௌனமாய் ராகம் பாடியப்படி... உங்கள் நடிப்பு திறமைக்கு மௌனச் சாட்சியாய் என்னிக்கும் உங்களுக்காகவே இருக்கும்... 


 இனிய பிறந்த நாள் நல்வாழ்த்துக்கள்  கார்த்திக் சார்... 

மீள்பதிவு

நன்றியுடன்,
ராஜி. 

Sunday, September 08, 2019

என் ஜீவன் பாடுது.. உன்னைத்தான் தேடுது.. - பாட்டு புத்தகம்

எள்ளலும் எகத்தாளமுமாய் காதல் பாடல்பாடி நம்மையும் ரொமாண்டிக் மூடுக்கு கொண்டு போறதில் எஸ்.பி.பியை மிஞ்ச யாருமில்லை. அதேப்போல் சோகப்பாடல்களைப்பாடி நம் கண்ணில் நீரை வரவழைப்பதில் கே.ஜே.யேசுதாஸைவிட யாருமில்லை. தாஸன்னான்னு இளையராஜாவால் செல்லமாய் கூப்பிடப்படும் யேசுதாஸ் பல பாடல்களை பாடி இருந்தாலும யேசுதாஸின் டாப் டென் பாடல்கள்ன்னு வரிசைப்படுத்தினால் அதில் நீதானா அந்தக்குயில் படத்தில் வரும்  என் ஜீவன் பாடுது..உன்னைத்தான் தேடுது...பாடல் கட்டாயம் இருக்கும்.

பாட்டின் முதலில் வரும் ஹம்மிங்க் பாட்டு சுமந்து வரும் சோகத்துக்கு கட்டியம் கூறி நம்மை அழைத்துச்சொல்லும்.  பாடலின் இடையிடையே ஒலிக்கும் உடுக்கை சத்தம்  நம் மனசின் அடி ஆழத்திலிருக்கும் சோகத்தை அசைச்சு வெளிக்கொணர்ந்துட்டுதான் ஓயும். பாடல், வரிகள், இசைன்னு இந்த  பாட்டு ஹிட்டடிக்க பல காரணங்கள் இருந்தாலும், இந்த படம் ஹிட் அடிக்காம போனதுக்கு ஒரே காரணமாதான் இருக்கும். அது இந்த படத்துல நடிச்ச ராஜா. செத்தவன் கையில் கொடுத்த வெத்தலை பாக்கு மாதிரின்னு எங்க ஊர் பக்கம் சொல்வாங்க, அந்த மாதிரி, உணர்ச்சிகொந்தளிப்பில் ஒலிக்கும் இந்த பாட்டை எந்தவித உணர்ச்சியுமில்லாம வெறும் வாயை மட்டுமே அசைச்சு சொதப்பி வச்சிருப்பாரு.

இரவுப்பயணத்தின்போது இந்த பாட்டை கேட்டா, கண்ணில் நீர் எட்டிப்பார்க்காம இருக்காது...
என் ஜீவன் பாடுது, உன்னைத்தான் தேடுது..
என் ஜீவன் பாடுது, உன்னைத்தான் தேடுது...
காணாமல் ஏங்குது, மனம் வாடுது...
எங்கே என் பாதை மாறி, எங்கெங்கோ தேடி தேடி....
என் ஜீவன் பாடுது.. உன்னைத்தான் தேடுது...
ஆஆஆஆ

கண்ணோடு மலர்ந்த காதல் ,
நெஞ்சோடு கனிந்த நேசம்
பொன்னாக வளர வேண்டும் வாழ்விலே!
ஒன்றோடு ஒன்று சேரும் .

உல்லாசம் வாழ்வில் கூடும் 

என்றே நான் நினைத்தேன் உண்மை நீரிலே...

உன் மேனி சேர துடிக்குது ஓர் மனம்,
கல்யாண காலம் வந்ததும் திருமணம்
எப்போது அந்த சொர்க்கம் தோணுமோ?! 
ஆஆஆஆஆஆ..

என் ஜீவன் பாடுது..உன்னைத்தான் தேடுது..

நெஞ்சத்தை திறந்து வைத்தேன்.
எண்ணத்தை சொல்லி வைத்தேன்.
என் ராணி மனசு இன்னும் தெரியலே!!
முல்லைப்பூ வாங்கி வந்தேன்.
முத்தாட ஏங்கி நின்றேன்.
கொண்டாட காதல் நாயகி வரவில்லை!!
என் ஜீவன் போனப்பாதையில் போகிறேன்..
என் நெஞ்சில் பொங்கும் கேள்வியை கேட்கிறேன்
அன்பே என் காலம் யாவும் நீயன்றோ?!!
ஆஆஆ..

என் ஜீவன் பாடுது..உன்னைத்தான் தேடுது...

படம்: நீதானா அந்தக்குயில்..
நடிகர்கள் :ராஜா, ரஞ்சனி
இசை: இளையராஜா
பாடியவர்: கே.ஜே.யேசுதாஸ்

அடுத்த வாரம் கார்த்திக் பாட்டோடு வர்றேன். அதுக்கொரு காரணம் இருக்கு.. என்னன்னு ஒருவாரம் வெயிட் செய்யண்டி!!
நன்றியுடன், 
ராஜி. 

Saturday, September 07, 2019

எங்க புள்ளைங்கலாம் பயங்கரம் - கிராமத்து வாழ்க்கை

Image
வேப்பங்கொட்டையை இரண்டாய் ஒடைத்து, உள்ளிருக்கும் பருப்பினை எடுத்துட்டு, பிளந்த வேப்பங்கொட்டையை கைவிரல் முட்டியில் வைத்து, இன்னொரு பிள்ளை ஓங்கி அடிக்க, வலித்தாலும் எட்டி பார்க்கும் ரத்தத்தினை கண்டு சந்தோசப்பட்டிருக்கோம். ஏன்னா, எங்க புள்ளைங்கல்லாம் பயங்கரம்!!
Image
எப்பவாவது பாட்டி வீட்டுக்கு லீவுக்கு வரும்போது வயக்காட்டுக்கு போறதுண்டு. வேர்க்கடலை பறிக்குற வேலை மட்டுமே தெரியும். மத்தபடி உருப்படியா எந்த வேலையும் தெரியாது. தெரிஞ்சுக்கும் வயசும் அப்ப இல்ல.  ஆனா, வயக்காட்டில் புகுந்தால் அதகளம்தான்.   பாட்டி, களை பறிக்க, மடை திறக்க, வரப்பை சீர் செய்யன்னு எதாவது செய்யும் நேரத்தில் சோளக்கதிரில் இருக்கும் முடிகளை இப்படி ஜடை பின்னி அழகு பார்த்ததுண்டு. காட்டு பூக்களை பறிச்சு வச்சு அழகூட்டியதுமுண்டு. 
Image
ரசகுல்லா, மக்கன் பேடா, அல்வா... என எத்தனை விதமான இனிப்புகளை சாப்பிட்டாலும் இந்த ஆரஞ்ச் மிட்டாய் சுவைக்கு ஈடாகாது.  எனக்கு தெரிஞ்சு ஒரு மிட்டாய் 5பைசா. குடியரசு தினம், சுதந்திர தினத்தன்னிக்கு லீவுன்னுகூட பார்க்காம ஸ்கூலுக்கு போனது இதுக்காகத்தான் இருக்கும். மஞ்சள், ஆரஞ்ச், பச்சை கலர்ல கிடைக்கும். ஸ்கூலில் கொடுத்ததும் சாப்பிட மாட்டேன். அதை வீட்டுக்கு கொண்டு வந்து அம்மாக்கிட்ட காட்டிட்டுதான் சாப்பிடுவேன். வீட்டுக்கு வருவதற்குள் கையெல்லாம் பிசுபிசுன்னு ஆகிடும்.  ஸ்கூல்லியே தின்னுட்டு வர்றதுக்கென்னன்னு அம்மா கடுமையா திட்டுவாங்க.  ஆனாலும், மறுக்கா, மறுக்கா அதையேதான் செய்வேன். ஏன்னா, இந்த புள்ளைங்கலாம் பயங்கரம்.
எத்தனை எத்தனை கனவு, ஏக்கம், பயணம், துக்கம், ஆனந்தத்தை சுமந்த பெட்டி இந்த போஸ்ட் பாக்ஸ்.. கிராமத்தில் பொதுவாய் போஸ்ட் ஆபீசில் இருக்கும்.  டவுனாய் இருந்தால் அங்கங்கு இருக்கும். கீழ பூட்டு போட்டு இருப்பாங்க. மேல ஒரு ஓப்பன் இருக்கும். கைவிட்டு யாரும் எடுக்கக்கூடாதுன்னு இருக்கும் துவாரத்தை அசையும் ஒரு தகரத்துண்டால் மறைச்சிருப்பாங்க. அந்த தகரத்துண்டை தள்ளிட்டுதான் தபால்களை சேர்க்கனும். அப்படி அந்த துண்டை தள்ளலைன்னா தபால் சரியா உள்ள விழுகாதுன்னு வெகுளித்தனமா நம்பிக்கிட்டிருந்தேன்.
இருபது, முப்பது ஆண்டுகளுக்கு முன்புவரை கிடைக்கும் பொருட்களை கொண்டு சந்தோசமாய் இருந்த நாட்கள்....  பிள்ளைகளை பள்ளிக்கு அனுப்புவாங்க. அது அறிவு வளர மட்டுமே! வேலைக்கு போறதுலாம் ஆண்பிள்ளைகளுக்கே முக்கிய குறிக்கோள் கிடையாது.  வீட்டிலிருக்கும் பொருட்களைக்கொண்டே விளையாட பழகி இருந்தோம். கொட்டாங்கச்சி, தீப்பெட்டி, உடைந்த டம்ப்ளர்களைக்கொண்டு டெலிபோன் செய்து பேசி மகிழ்ந்தோம். இப்ப அம்மாக்கள் மாதிரிலாம் அப்பத்திய அம்மாக்கள் இல்ல.  மாவரைத்தல், மிளகாய் இடித்தல், தண்ணி இறைத்தல்ன்னு எத்தனை கடுமையான வேலைகள் இருந்தாலும், பிள்ளைகளோடு கதைப்பேசி, விளையாடிய அம்மாக்களை பெற்ற கடைசி தலைமுறை நாம்தான். 
No photo description available.

பல்பம்... அஞ்சாப்பு முடிக்கும்வரை பலகையில்தான் வீட்டுப்பாடம் எழுதி போவோம். தமிழ், ஆங்கிலம், கணக்கு, அறிவியல், வரலாறு&புவியியல்ன்னு அத்தனை பாடத்தையும் சின்ன சிலேட்டில் நுனுக்கி, நுனிக்கு எழுதுவோம், காலையில் கொடுத்தனுப்பும் முழு பல்பம்குச்சி மாலையில் சின்னதா இருக்கும். அதுக்குள்ளவா எழுதி தீர்த்துட்டேன்னு அம்மா முறைப்பாங்க. வகுப்பில் தூக்கம் வராம இருக்க பல்பக்குச்சியை தின்னது நமக்குதானே தெரியும்!!
Image
இப்பத்திய பிள்ளைகளுக்கு விதம்விதமா பொம்மைகள் கிடைக்குது. ஆனா, அப்ப கைக்குழந்தைன்னா கிலுகிலுப்பை, ஆறு மாசத்துக்குபின் சீப்பாங்குழல், ஒரு வருசத்துக்குபின் பந்து, நடைவண்டி, அதுக்கப்புறம் படத்தில் காட்டி இருக்கும் இந்த குதிரை. இதில்தான் உக்கார வச்சி ஆட்டிக்கிட்டே கதை சொல்வாங்க. எனக்கு வாங்கின குதிரை ரொம்ப நாள் இருந்துச்சு. என் சின்ன பொண்ணு பிறந்தபின் தான் இனி தாங்காதுன்னு உசுரை விட்டுடுச்சு. இந்த குதிரையோட பேர் மறந்து போச்சு! யாராவது சொல்லுங்களேன். ப்ளீச்.
போன தலைமுறை பிள்ளைகள் மட்டுமே அறிந்த மருத்துவமுறை இது. வயலுக்கு, வியாபாரத்துக்கு, வேலைக்கு போய் வந்த அப்பா, தாத்தா, மாமாக்கள் தங்கல் உடல்வலி தீர வீட்டிலிருக்கும் சின்னப்பசங்களை ஏறி முதுகுல  மிதிக்க சொல்வாங்க. இது தப்புதான், ஆனா,  அப்படி செய்தா வலிலாம் போய்டும்ன்னும் சொல்வாங்க. ஆனா, இப்பத்திய பிள்ளைகளுக்கு நாமதான் தைலம் தேய்ச்சு, கால் பிடிச்சு விடுறதா இருக்கு :-(

கொசுவத்தி மீண்டும் ஏற்றப்படும்....
நன்றியுடன்,
ராஜி

Friday, September 06, 2019

புதுவை ஆதீன சிதம்பரம் ஸ்ரீ பாதபூஜை அம்பலத்தாடும் சுவாமிகள்- பாண்டிச்சேரி சித்தர்கள்.

பாண்டிச்சேரி சித்தர்கள் வரிசையில்  இரண்டு வாரமாக தொள்ளைக்காது சித்தர், ஸ்ரீஅரவிந்தர் ஆசிரமத்தினை பார்த்தோம். அந்தவரிசையில்  இன்று நாம பார்க்கபோறது புதுவை ஆதீன சிதம்பரம் ஸ்ரீபாதபூஜை அம்பலத்தாடும் சுவாமிகள் திருமடம்.  புதுச்சேரியில் உள்ள செட்டிக்கோவிலின் பின்புறம் உள்ள அம்பலத்தார்  மடத்து வீதியில் அமைந்து  இருக்கிறது ஸ்ரீநாகலிங்க சுவாமிகளின் ஜீவ சமாதி. இவர் திருவாசகத்தை மிகவும் நேசித்து அதை மக்களிடம் கொண்டு சேர்பித்தவர். திருவாசகம் உள்ளிட்ட பல ஆன்மீக கருத்துக்களை எடுத்துச்சொல்லி எல்லாருடைய மனதையும் உருக செய்வார். இவருடைய அற்புதச்செயலை பார்த்து பிரெஞ்சு அரசு இந்த தெருவிற்கு அம்பலத்தாடும் ஐயர் மடத்து வீதி எனப்பெயர் சூட்டி கௌரவித்தது.

இவருக்கு திருவாசகத்தின்மீதான ஆர்வம் எப்படி வந்தது என செவிவழி கதையாக சொல்லப்படுவது என்னன்னா, இறைவனால் எழுதபட்டதாக சொல்லப்படும் திருவாசகத்தில்  இந்நூலில் இறைவனை எப்படி அடைவது, இறைவனின் பெருமைகள், அண்டகோளங்களின் விந்தைகள், இரகசியங்கள் .இயக்கங்கள், அவைகளை இயக்கும் மூலப்பொருட்கள், சூட்சுமநிலைகள் எல்லாவற்றையும் பற்றி விவரிக்கப்பட்டிருக்கு. இறைவனை தேடுபவர்களுக்கு இறைவனை அடைய இன்றளவும் இருப்பது திருவாசகம். இந்த திருவாசகத்தின் பெருமையை  அருளுணர்வால் உணர்ந்து இறைவனை அடைந்தார் இராமலிங்க சுவாமிகள். வள்ளலாரைப் போலவே, பல சித்தர்கள் திருவாசகத்தின் வழியே சென்று, இறைவனை அடைவதில் வெற்றி கண்டிருக்காங்க.
முன்னொரு சமயம், கனக சபையிலிருக்கும் இந்நூலை யாரிடம் ஒப்புவிப்பது என்ற பிரச்சனை எழுந்தபோது.  ஒவ்வொருவரும் தாங்களே இந்நூலை வைத்துக்கொள்ளவேண்டும் என்று ஆசைப்பட்டனர். அப்பொழுது ஒரு அசரீரி ஒலித்ததாம். "இந்நூலை நம் சிவகங்கையில் விடுங்கள்.  கங்கையை சுற்றியிருக்கும் யாரிடம் கொண்டுபோய் சேருகின்றதோ -அவரிடம் இருக்கட்டும்” என்று அசரீரி சொன்னது. உடனே அந்நூல் சிவகங்கையில் விடப்பட்டது. கங்கையில் குளித்துக்கொண்டிருந்த சித்தரும் சிறந்த சிவபக்தருமாகிய ஒரு பெரியவரிடம் அந்நூல் வந்து நின்றது. அவர் அந்நூலை எடுத்து தலையில் வைத்துக்கொண்டு சிவ பஞ்சாட்சரத்தை ஓதிக்கொண்டே இந்த மடத்திற்கு வந்தார். அன்று முதல் அவ்விடத்திற்கு ஸ்ரீபாதபூஜை அம்பலத்தாடையார் மடம் என்று வழங்கலாயிற்று. அந்த பெரியவர்க்குபின் ஒருவர்பின் ஒருவராக திருவாசகத்திற்கு சிவபூஜை செய்து பாதுகாத்து வந்தனர்.
இச்சமயம், கர்நாடகா நவாப்கள் தமிழகம்மீது போர் தொடுத்தனர். அப்போரின்போது ஏராளமான கோவில்களும், மடங்களும் இடித்து நாசமாக்கப்பட்டன. யுத்தம் சிதம்பரம் பரவியது. அப்பொழுது, அம்பலத்தாடையார் மடத்து பத்தாவது பட்டத்தை ஸ்ரீநாகலிங்க சுவாமிகள் வகித்து வந்தார். யுத்தம் பரவி வருவதும் கோவில்கள் இடிக்கப்பட்டு நாசமாக்கப்படும் செய்தியை கேள்விப்பட்ட ஸ்ரீநாகலிங்க சுவாமிகள் அதிர்ந்து, கண் கலங்கினார். இறைவனால் கையொப்பம் இடப்பட்ட அத்தெய்வத் திருநூலுக்கு  பாதிப்பு வந்து விடுமோ என பயந்தார்.ஊண், உறக்கம் என எல்லவரையும் மறந்தார் .அந்த சிவப்பரம்பொருளிடம் அனுதினமும் அழுது முறையிட்டு கொண்டிருந்தார். உடல், உயிர் எல்லாமே அந்த சிவபரம்பொருளை நோக்கி சிவபஞ்சாட்சர தியானத்தினுள் ஆழ்ந்தார்  நாட்கள் பல சென்றன.   யுத்தம் கடுமையாக நடந்தது. எங்கு பார்த்தாலும் அழிவுச்செய்திகளே வந்துகொண்டிருந்தன. சுவாமிகள் இதைப்பார்த்து சிவபரம்பொருளை  நோக்கி கடுமையான தியானம் இருந்தார். உலக அமைதிக்காக தன்னிலை மறந்தார் . ஓம் நமச்சிவாய என்ற பஞ்சாட்சர மந்திரத்தினை தவிர அவரது உதடுகள் வேறு எதையும் உச்சரிக்கவில்லை. அவரது சிந்தை முழுக்க திருவாசகத்தை காக்கவேண்டும் என்று மட்டுமே இருந்தது . அந்த குறிக்கோளை நோக்கி கடுந்தவம் இருந்தார்.
தடுத்தாட்கொள்பவன் இறைவன் அல்லவா?! அடியவர்களின் துயர் கண்டு பொறுமையாகவா இருப்பான்?! இனியும் தனது பக்தனை கலங்கவிடவேண்டாம் என எண்ணி, ஸ்ரீநாகலிங்க சுவாமிகளின் நெற்றிப்பொட்டில்  ஜீவஒளியை பாய்ச்சி, திருவாசகத்தினை பாதுகாக்கும் இடத்தினை சுட்டிக்காட்டினார். இந்த தரிசனத்தைக்கண்ட ஸ்ரீநாகலிங்க சுவாமிகள் ஆனந்தம் கொண்டார். ஆனந்த கூத்தாடினார். இறைவன் சுட்டிக்காட்டிய இடம் ஞானபூமியான பாண்டிச்சேரி என்று கண்டு மகிழ்ந்தார். ஆத்மசாதனைக்கு மிகவும் உகந்த இடமானதும், சித்தர்களையும், ஞானிகளையும் தன்பால் கவர்ந்திழுக்கும் புண்ணிய பூமியாம் பாண்டிச்சேரிதான் ,” திருவாசகத்தை” பாதுகாக்க சரியான இடம் என்ற இறைவனின்  கருணையை கண்டு ஆனந்தமடைந்தார்.
உடனே,  திருவாசகம் இருந்த வெள்ளிப்பெட்டகத்தை அழகான பட்டுத்துணியில் மூடி, அந்த மூட்டையினை தலையிலே சுமந்துக்கொண்டு,  தனது மடத்தில் இருந்த இருவரை துணைக்கு அழைத்துக்கொண்டு, மடத்தைவிட்டு வெளியேவரும் வேளையில் கடுமையான புயலும் அதை தொடர்ந்து மழையாக பொழிந்ததாம், அவற்றையெல்லாம் எதிர்க்கொண்டு கடலூர் வழியாக பாண்டிச்சேரி வந்து சேர்ந்தார். பாண்டிச்சேரியில் ஒரு இடத்தை தேர்ந்தெடுத்து ஒரு சின்ன குடிசை அமைத்து திருவாசகம் இருந்த வெள்ளிப்பெட்டகத்தை வைத்து சிவப்பரம்பொருளுக்கு அனுதினமும் பூஜைகள் செய்துகொண்டு வந்தார். அங்கு ஆழ்ந்த சிவத்தியானத்தில் எப்பொழுதும் இருந்ததால், ஸ்ரீநாகலிங்க சுவாமிகளுக்கு சக்திகள் பெருகின. சக்திகள் சித்துக்களாக மாறியது. பலரும் சுவாமிகளிடம் வந்து தங்களது குறைகளை சொல்ல,  அவைகளை உடனே ஸ்ரீநாகலிங்க சுவாமிகள் தீர்த்து வைத்துக்கொண்டு இருந்தார். நாட்கள் செல்லச்செல்ல,  சுவாமிகளின் பெருமை எல்லோருக்கும் தெரிந்தது. தூரத்திலிருந்தும் பக்தர்கள் அவரை தேடி வந்தவண்ணம் இருந்தனர் .
இப்படியே பல ஆண்டுகள் சென்றன. சுவாமிகள் இந்த பக்தர்கள் கூட்டம், புகழ்வெளிச்சம் இதிலெல்லாமிருந்து விடுபட்டு இறைவனுடன் கலக்கும் நாளை எதிர்பார்த்துக்கொண்டிருந்தார்.  ஒருநாள் சிவபூஜை செய்துகொண்டிருக்கும்போது, தனது அருகில் இருந்த பட்டத்து தம்பிரான் ஸ்ரீநாகலிங்க சுவாமிகளின் எதிர்கால நிகழ்ச்சியை சூசகமாக தெரிவித்தார். அதைக்கேட்டு ஆனந்தப்பட்ட சுவாமிகள், தனது சீடன் பக்குவநிலைக்கு வந்துவிட்டான் என்பதை உணர்ந்துகொண்டார். அந்த நிமிடமே தனது 10வது பட்டத்தை 11வது பட்டமாக தனது சீடனுக்கு அளித்து மடத்தின் பீடத்தில் அமர்த்தினார். அன்றிரவே சுவாமிகள் இறைவனோடு கலக்கும் நேரத்தை இறைவனின் திருக்குறிப்பினால் உணர்ந்துகொண்டார் . இரண்டாம் நாள் தெய்வீக நிலையிலையே சுவாமிகள் காணப்பட்டார். சுவாமிகள் எதுவும் பேசாமல் மௌனத்தையே கடைப்பிடித்தார். சைகையினால் தம்முடைய சீடர்களிடம் அவர்கள் செய்யவேண்டிய முறைகளையும், கடமைகளையும் பற்றி மட்டும் விளக்கினார். மூன்றாம் நாள் வந்தது. சுவாமிகள் சிவத்தினுள் ஐக்கியமாகும் நேரமும் வந்தது. எல்லோரும் சுவாமிகளை வணங்கி நின்றனர் சுவாமிகள் இந்த உலகவாழ்வை விட்டு சிவத்தினுள் ஆட்கொள்ளப்பட்டு ஜீவன் முக்தியடைந்தார்.
உலகம் உய்ய இறைவன் அருளிய திருவாசகத்தைப் போற்றி
பாதுகாத்து, புதுவைக்கு கொண்டு வந்த பெருமை ஸ்ரீ நாகலிங்க
சுவாமிகளையே சாரும்.சுவாமிகள் தங்கியிருந்த இடத்தினுள்ளே அவரின் ஜீவசமாதி அமைக்கப்பட்டுள்ளது. சமாதி மேல் சிவலிங்கம் பிரதிஷ்டை செய்யப்பட்டுள்ளது இந்த தெய்வீக இடத்தை  அம்பலத்தார் மடம் என்றே அழைக்கப்பட்டது.இம்மடம் அமைந்துள்ளதால் அத்தெருவிற்கு அம்பலத்தார்மடத்து வீதி  என்று  பிரஞ்சு அரசு பெயர் சூட்டியது .
இன்றும் இங்கே தவறாமல் ,திருவாசகம் வைத்திருக்கும்  வெள்ளிப் பெட்டகம் அன்றாடம் பூஜிக்கப்படுகிறது. 
ஒவ்வொரு ஆண்டும் மகாசிவராத்திரியன்று இரவு பெட்டகம் திறக்கப்பட்டு பூஜை செய்யப்படுகின்றது.இவரது குரு பூஜை ஒவ்வொரு வருடமும் ஆனி மாதம் 7 -ம் நாள் சிறப்பாக கொண்டாடப்படுகிறது. மீண்டும் அடுத்தவாரம் வேறு ஒரு சித்தரின் ஜீவ சமாதியில் இருந்து உங்களை சந்திக்கிறேன் .
நன்றியுடன்
ராஜி.

Thursday, September 05, 2019

பூ டிசைனில் உல்லன் மேட் - கைவண்ணம்

எப்பயும் ஒரே மாதிரி மேட் பின்னிக்கிட்டிருந்தா எனக்கும் போரடிக்கும். வாங்குறவங்களுக்கும் போரடிக்கும். அதான் கொஞ்சம் வித்தியாசமாய்... உல்லன்லியே பல விதமா பின்னுறாங்க. மாடல் இருந்தால் பின்னிடுவேன். இதுமாதிரி மணியில் டேபிள் மேட் செய்து வச்சிருந்தேன். அது எங்கன்னு தேடிப்பார்க்கனும்.



இப்ப இதை பார்த்துட்டு சிவப்பு, மஞ்சள் நூலில் பின்னித்தர சொல்லி இருக்காங்க...  அடுத்த கைவண்ணம் பகுதிக்குள் முடிக்கிறேனான்னு பார்க்கனும்,,,

நன்றியுடன்,
ராஜி

Wednesday, September 04, 2019

வேட்டைக்குப்போகும் சுடலைமாட சாமி - சிறுதெய்வ வழிபாடு

தென்தமிழகத்தின் வழிப்பயணங்களில்  ஜன்னலில் நம்மை கடந்து செல்லும் காடு, மலை, மரம், மனிதர்களை கடப்பது போலவே ஊர் கடைசியில், வெட்டவெளியில் வலது கையில் வாளும், இடதுக்கையில் சூலமும், பின் இருக்கும் ஆறு கைகளில் மான்மழு, ஊன்றுகோல், உறுக்குத்தடி, கபாலம், திரிசூலம், வல்லாயுதம் ஏந்தி  சிவப்பேறிய கண்களுடனும், முறுக்குமீசையுடனும் வெள்ளைக்குதிரையில் அமர்ந்திருக்கும் காவல் தெய்வத்தை நம்மில் பலர் பார்த்திருப்போம்.  அவர் பெயர் சுடலைமாடன்.  அவரைப்பத்திதான் இன்றைய சிறுதெய்வ வழிபாட்டில் பார்க்கப்போறோம்.

சுடலை மாடன் பிறப்பிற்கு இரண்டு கதை சொல்லப்ப்படுது. ஒருமுறை அம்மையும், அப்பனும் பேசிக்கிட்டிருந்தாங்களாம். உலக உயிர்களுக்கு படியளக்கும் நேரம் வந்திட்டுது. நான் போய், அவரவர் விதிப்படி  எல்லாரும் பசியாற அவரவருக்கான உணவை சேரும்படி வழி செய்துட்டு வரேன்னு சொல்லி சிவன் கிளம்பினாராம். உடனே, பார்வதி தன் பக்கத்தில் போய்க்கிட்டிருந்த ஒரு எறும்பை பிடிச்சு ஒரு டப்பாக்குள் போட்டு அடைச்சு வச்சுக்கிட்டாங்க. போன வேலையை முடிச்சுட்டு டயர்டா வந்த சிவன்கிட்ட, என்னங்க போன காரியம் நல்லபடியா நடந்துச்சா?! எல்லா உயிர்களுக்கும் சாப்பாடு போய் சேர்ந்துச்சான்னு கேட்டாங்க. ம்ம்ம் எல்லா உயிர்களுக்கும் உணவுக்கு ஏற்பாடு செய்துட்டேன்னு சிவன் சொன்னாராம்.  அப்படியா! அப்ப இந்த டப்பாவில் இருக்கும் எறும்புக்கும் உணவு போய் சேர்ந்திருக்குமான்னு நக்கலா  கேட்டபடி டப்பாவை திறந்து பார்த்தால்,  எறும்பு டப்பாவில் ஒட்டிக்கிட்டிருந்த எதையோ சாப்பிட்டுக்கிட்டு இருந்துச்சாம். பார்வதி தேவிக்கு தன் தவறு புரிந்தது. பரம்பொருளையே சந்தேகித்துவிட்டேன், என்னை மன்னியுங்கள்ன்னு பார்வதிதேவி சிவனை பணிந்தார். 

சிவனை பத்திதான் நமக்கு தெரியுமே! நெற்றிக்கண்ணை திறந்தாலும், குற்றம் குற்றமேன்னு திருவிளையாடல்லையே பார்த்திருக்கிறோமே! என் மனைவியே இருந்தாலும் என்னை சோதிச்சதால், பூலோகம் போய் வனப்பேச்சியாய் சுற்றித்திரின்னு சாபமிட்டார்.  பார்வதிதேவி கணவனை பிரியனுமேன்னு அழுதாங்க.    மயானத்திலிருந்தபடியே நீ என்னை நினைத்து தியானம் செய்.  உரியகாலம் வந்ததும் என்னை வந்தடைவாய்ன்னு சாப விமோசனம் தந்து பூமிக்கு பார்வதிதேவியை அனுப்பிட்டாங்க.  பார்வதிதேவியும் பூமிக்கு வந்து ஒரு மயானத்தில் வனபேச்சியம்மனாக அமர்ந்தாள்.  மனம் ஒன்றி ஈசனை எண்ணி தவம் புரிந்தாள்..

சிவன் வாக்களித்த நேரம் நெருங்கியது, பார்வதிதேவிமுன் தோன்றினார்.  அன்னையின் சாபத்தை நீக்கினார். "தேவி.. உனக்கு என்ன வரம் வேண்டும் கேள்" என சிவன் கேட்டார். பார்வதி தேவி, ஐயா! நமக்கு இரு புதல்வர்கள் இருக்காங்க. அதில் ஒன்னு கோவிச்சுக்கிட்டு பழனி மலையில் உக்காந்திருக்கு, இன்னொன்னு யானை முகத்தோடு முழுமுதற் கடவுள்ன்ற பேரில் பிசியா இருக்கு.  அவர்களை பிரிந்து வாழும் சூழல். நீங்களும், உலகை காக்கிறேன்னு அடிக்கடி காணாம போய்டுறீங்க! அதனால், எனக்கு துணையாக என்னோடு இருக்கமாதிரி அழகான ஒரு ஆம்பிள்ளை பிள்ளை வேணும்ன்னு கேட்டாங்க. 

உடனே, சிவன், பார்வதி!  அங்க பாரு! மயானத்தில் பிணம் எரிகின்றதல்லவா?! அப்பிணம் கொழுந்துவிட்டு எரியும்போது,  நீ அங்கே நின்று என்னை நினைத்து உன் முந்தானையை ஏந்து .உனக்கு ஓர் ஆண்குழந்தை கிடைக்கும். நீ குழந்தையை எடுத்துக் கொண்டு கைலாயத்திற்கு வா!" என சொல்லி மறைஞ்சுட்டார்.  வனப்பேச்சியம்மனும் சிவன் சொன்னமாதிரி மயானத்தில் எரிஞ்சுக்கிட்டிருந்த பிணமொன்றின் அருகில் போனாங்க. பிணம் கொழுந்துவிட்டு எரியும் வேளை வந்ததும், அதன் அருகில் போய், தன் முந்தானையை ஏந்த அவள் மடியில் பிணத்தின் சதைகள் முத்துக்கள் போல் உருண்டு அன்னையின் மடியில் விழுந்தன. அப்படி விழுந்த சதைதுண்டுகள்  ஓர் சதைப் பிண்டமாக வனபேச்சியம்மாளின் மடியில் இணைந்தன. பிண்டத்திற்கு உயிர் இருக்கு.  ஆனா,  எந்த உறுப்புகளும் இல்லையேன்னு வனப்பேச்சியம்மன் கலங்கினாங்க. வனப்பேச்சி மீண்டும் ஈசனை நினைத்து அழுதாள். "பிள்ளை வரங்கேட்ட எனக்கு இந்த முண்டத்தைத் தந்து விட்டீர்களே!" என புலம்ப சிவன் அவள்முன்தோன்றி அப்பிண்டத்திற்கு உறுப்புகளை அளித்து அழகியதோர் ஆண்குழந்தையாக மாற்றி பார்வதி தேவியிடம் கொடுக்கின்றார். 

முண்டமாகப் பிறந்த அந்தக் குழந்தைக்கு முண்டனென்றும், சுடலைமுத்துக்களால் பிறந்ததால் சுடலைமாடன் என பேர் வச்சாங்க. பேர் வச்சா போதுமா?! சோறு வச்சியான்னு பின்னாடி பேசிடக்கூடாதுன்னு,  அமுதத்தையே  பிள்ளைக்கு ஊட்டி வளர்த்தாள்.  கொஞ்ச காலத்துக்கப்புறம் சுடலைமாடனோடு கயிலாயத்துக்கு போனாங்க.   முருகன், பிள்ளையார் இல்லாம, வெறிச்சோடி கிடந்த கயிலாயம் சுடலைமாடனின் வரவால், புதுப்பொலிவு கண்டது. என்னதான் ராஜா மாதிரி கயிலாயத்தில் இருந்தாலும், சுடலைமாடனின் வயிற்று பசி தீரலை.  ஒருநாள், தீராத பசியோடு சுடலைமாடன் படுத்திருந்தான்.  அவனுக்கு பசியினால் தூக்கம் வரலை.  அவன் பிறந்த  சுடுகாட்டில் பிணமொன்று எரிந்து கொண்டிருந்தது. அந்த வாசனை கயிலாயத்தின் சுடலை மாடனின் நாசிக்கு வந்து சேர்ந்தது. அன்னை ஊட்டும் அமுது நம்ம பசியை தீர்க்காது. நாம போய் அந்த பிணத்தை தின்று பசியை தீர்த்து வருவோம்ன்னு நினைச்சு கிளம்பினான்.  சுடலைமாடன் சுடுகாட்டுக்கு போய் எரியும் பிணங்களைத் தின்றான். அங்கே சுற்றித் திரியும் பேய்களுக்கும் உணவளித்தான். பேய்களோடு பேயாக சுடலை அங்கே நடனமாடினான்.

அம்மா தேடுவாங்கன்னு சுடலைமாடன் நல்ல பிள்ளையாய் கயிலாயம் திரும்பி அம்மாக்கு பக்கத்தில் படுத்திக்கிட்டார். இது வாடிக்கையானது. ஒருநாள், பக்கத்தில் படுத்திருக்கும் குழந்தையின்மீது பிணவாடை அடிப்பதை உணர்ந்தாள் பார்வதிதேவி. நடந்ததை ஞானதிருஷ்டியால் அறிந்தவள், குழந்தை வரம் கேட்டால், பிணத்தை தின்னும் குழந்தையை எனக்கு தந்துவிடிட்டீரேன்னு மீண்டும் சிவனிடம் முறையிட்டாள்.  பிணத்தை தின்றதால், சைவலோகமாய்  திகழும் கயிலாயத்தில் இனி சுடலைமாடன் இருப்பது தகாது. அதனால், சுடலையை அழைத்து, நீ பூலோகம் செல் என சிவன் சுடலைமாடனை பணித்தார்.

ஐயனே! என்னை உருவாக்கி வளர்த்தவரான தாங்களே  என்னை பூலோகத்திற்கு செல் என பணித்தால் நான் என்ன செய்வேன் என சுடலைமாடன் சிவனிடம்  முறையிட்டான். சுடலைமாடா!  நீ பூலோகம் செல்லும் காலம் வந்துவிட்டது. அதனால்தான், பிணத்தை உண்ணும் நிலை உனக்கு வந்தது. உனக்கான பணிகள் பூலோகத்தில் காத்திருக்கின்றது. நீ பூலோகம் சென்று அந்த பணிகளை கவனி என சிவன் பதில் சொன்னார்.  சரி, உங்கள் வாக்குப்படி நான் பூலோகம்  போகிறேன். ஆனால், தாங்கள் எனக்குக் கொடை கொடுத்து வரமளிக்க வேண்டும்" சுடலை விண்ணப்பித்தான்.  அப்படியா! உனக்கு எந்த மாதிரியான கொடை வேண்டும் என சிவன் கேட்க,  அதற்கு, ஐந்து வயது பாலகனான  சுடலை,  "எட்டாத பரண் போட்டு அதில் எட்டு அடுக்குகளில் எனக்குப் படையல் இட வேண்டும். ஒரு பரணில் ஒரு கோட்டை புழுங்கல் அரிசி சோறும், ஒரு பரணில் சூலி ஆடுகளும், ஒரு பரணில் சூலி எருமைகளும், ஒரு பரணில் சூலி பன்றிகளுமாக, உயிர்ப்பலிகள் படையல் இடவேண்டும்."என்று கேட்டான். இதைக் கேட்டதும் கைலாயமே  அதிர்ந்தது. சைவத்தின் பிறப்பிடமான கயிலாயத்தில் அசைவப்படையலா?! அதும் சிவன் தரவேண்டுமென இந்த சிறுவன் கேட்டுவிட்டானே என முப்பத்து முக்கோடி தேவர்களும் திகைத்து நிற்க, அன்னையவள் பிணந்தின்னும் குழந்தையை வளர்த்ததை எண்ணி கூனிக்குறுகி நின்றாள். 

சிவன் சுடலைமாடனின் வேண்டுகோளுக்கு சம்மதித்தார். சைவதிருக்கோவிலான கயிலாயத்தில் அன்றைய தினம், சுடலைமாடனுக்கு அசைவப்படையல் சிவனின் மேற்பார்வையில் தயாரானது.  நாட்டிய மங்கைகள் நடனமாடினர். சுடலைமாடன் வந்தான். அசைவப்படையலை சிவன், சுடலைமாடனுக்கு படைக்க, அனைத்தையும் ஏற்க மறுத்த சுடலைமாடன், தனக்கு நரபலி கொடுக்க வேண்டுமென, சுடலைமாடன் கேட்க, ஈசனுக்கு கோவம் வந்தது. கோவத்தை அடக்க, காலை தரையில் தேய்க்க, தேவகணியன் தோன்றினான். தன் கையிலிருந்த மகுடியை இசைத்துக்கொண்டே நடனமாடினான். நடனம் உச்சக்கட்டத்தை எட்டும்போது தன் கையை கிழித்துக்கும்கொண்டும். நக்கை கடித்துக்கொண்டதாலும் ரத்தம் பெருக்கெடுத்தது.  அந்த ரத்தத்தையே பலியாய் சுடலைக்கு தேவகணியன் கொடுக்க, அதை நரபலியாய் சுடலைமாடன் ஏற்றுக்கொண்டு, மீண்டும் ஒரு வரத்தினை சிவனிடம் சுடலைமாடன் கேட்க, "ஓயாத பேய்களை அடக்கும் வரம் வேண்டும். தர்க்கம் செய்யும் பேய்களை நான் தடிக்கொண்டு ஓட்ட வேண்டும். நான் கொடுக்கும் மயான சாம்பலால் தீராத நோய்களெல்லாம் தீர்ந்து போக வேண்டும். நல்லவர்கள் என்னைப் பணியாவிட்டாலும் அவர்களுக்கு நான் நல்லது செய்ய வேண்டும். கெட்டவர்கள் என் பாதம் பணிந்தாலும் அவர்களை நான் கருவறுக்க வரம் வேண்டும்" என்று சுடலைமாடன் வரம்  கேட்டான்.

மகனின் கோரிக்கை நியாயமானதென உணர்ந்த சிவன், நீ கேட்ட வரத்தினை தந்தேன் என வரமளித்து, சுடலையை கயிலாயத்தின் தெற்கு வாசல் வழியாய் பூலோகத்திற்கு அனுப்பி வைத்தனர். சுடலைமாடனும் வீராவேசமாக, கையில் வல்லயம், வீச்சரிவாள், பொந்தந்தடியை ஏந்தி சுடலைமாடசாமியாய் பூலோகம் வந்து சேர்ந்தார். திருக்கேதாரம் தொடங்கி அனைத்து சிவாலயங்களுக்கும் சென்று வழிபாடு செய்தார்.  வடநாட்டுப் புண்ணியதலங்களையெல்லாம் தரிசனம் செய்துவிட்டு  தென்னாடு நோக்கி வந்தார் சுடலைமாடசாமி.  காஞ்சிபுரம் ஏகாம்பரநாதரையும், சிதம்பரத்து நடராஜரையும், திருவண்ணாமலை அண்ணாமலையாரையும் உட்பட அனைஅவரையும் தரிசித்துக்கொண்டே மலையாளதேசத்திற்கு சென்று புண்ணிய தலங்களை தரிசித்தார். அங்கு, பேச்சிப்பாறை அருகே கொட்டாரக் கரை என்ற ஊரை சுடலைமாடசாமி  வந்தடைந்தார். சுடலைமாட சுவாமி கொட்டாரக்கரை வந்து சேர்ந்த சமயத்தில் அங்கே கோயில் கொண்டிருந்த அன்னை பகவதிக்குத் திருவிழா. தேரோட்டம் சிறப்பாக நடை பெற்றுக் கொண்டிருக்கின்றது.. தேரிலே சிம்மக்கொடியைக் கண்டதும் தன் தாய்க்குத்தான் திருவிழா நடக்கிறது என்று அறிந்த சுடலைமாட சாமி  அன்னையிடம் அடைக்கலம் கேட்டு வணங்கி நின்றார். 

தேரின்மீதிருந்த அன்னை, கூட்டத்தோடு இருந்த சுடலைமாடசாமியை கவனிக்கவில்லை. அன்னையின் கவனத்தினை ஈர்க்கும்விதமாய், சுடலைமாடசாமி, ஒரே பாய்ச்சலாய் ஓடி தேர் முன் நின்றார். தேரின் அச்சு முறிந்தது. கோவிலின் கொடிமரத்தை உடைத்து, கோவில் கொடியை கிழித்தார். திருவிழா கூட்டத்தினுள் தேவதாசியின் நடனத்தை காமத்துடன் பார்த்துக்கொண்டிருருந்த ஒருவன் தலையை   பிடுங்கி எறிந்தார்.  அவனின் காமத்தை காசாக்கும் எண்ணத்துடன் இருந்த தேவதாசியின்மீது அந்த தலை பட்டதால் அவளும் இறந்தாள். அன்னையே கதியென இருந்த கோவில் பூசாரியையும் அடித்தார் சுடலைமாடசாமி. பூசாரி அன்னையிடம் முறையிட, அன்னை பகவதிக்கு பொறுக்கவில்லை. "யாருடா அது என் கோட்டைக்குள் அத்து மீறியது?" என்று கோபத்தோடு கிளம்பி வந்தாள்.

ருத்ரகோலத்தில் இருக்கும் தன்னை கண்டால், அன்னையின் கோபம் அதிகமாகும் என எண்ணிய சுடலைமாடசாமி ஏழு வயது பாலகனாக உருக்கொண்டு அன்னையின்முன் நடந்து வந்தார். பாலகனைக் கண்டதும் அன்னையின் தாய்மை பெருக்கெடுத்தது.  பாலகனை பக்கம் அழைத்து, யார்?! எந்த ஊர்?! பெற்றோர் யார் என விசாரித்தாள். கயிலாயத்தில் நடந்தவற்றையெல்லாம் சுடலைமாடன் பகவதி அம்மையிடம் சொல்ல,   எனக்கென யாருமில்லை தாயே! அதனால் உங்களை அடைக்கலம் கேட்டு உங்கள் கவனத்தை ஈர்க்கவே இப்படி செய்தேன் என சுடலைமாடன்சாமி கூறினார்.


யார் பெற்றால் என்ன?! என்னை அடைக்கலமென நாடி வந்ததால், நீ இனி என் மகன்.  நீ கேட்டவாறு உனக்கு அடைக்கலம் தந்தேன். முதலில் பசியாறு என பகவதி அம்மன் சுடலைமாட சாமியை அழைத்தாள். அன்னையே சிலகாலமாய்,  தங்கள் கோவிலை பார்த்துக்கொண்டுதான் இருக்கின்றேன். இங்கு பச்சரிசி சாதம் தவிர வேறு எதும் இங்கு உமக்கு படையல் இடுவதில்லை.  இது என் பசியை தீர்க்காதே என்று சுடலைமாடசாமி சொல்ல,  உனக்கு வேறென்ன வேண்டுமென பகவதி அம்மை கேட்க, "ஒரு கோட்டைப் 
புழுங்கலரிசியில்  பொங்கி ஒரே படையலாக இடவேண்டும்" என சொன்னார்.  

யார் அன்னையும்  சுடலைமாடசாமி கேட்டபடி படையல் இட ஏற்பாடு செய்தாள். பகவதி அம்மையின் கோவிலின் ஈசான மூலையில் உள்ள, ஏழு கடாரம் தங்கத்தினை காவல் காக்கும் பொறுப்பினை சுடலைமாடசாமியிடம் தந்தாள். அன்றிலிருந்து, தங்கத்தினை காவல் காக்கும் பொறுப்பினை திறம்பட செய்துவந்தார் சுடலைமாடசாமி. கூடவே, கோவிலுக்கு வரும், கொடியவர்களை பலிக்கொள்ள ஆரம்பித்தார். இதைக் கண்ட பகவதிக்குப் பொறுக்கவில்லை "மகனே இங்க பார்... என்னை நாடி வருவோர் கெட்டோர்களென்றாலும், நல்லோர்களென்றாலும் அவர்களைக் காப்பது என் கடமை.. நீ அவர்களை வதம் செய்யக் கூடாது" என்று எச்சரித்தாள். இதைக் கேட்ட சுடலை மாடனோ "அம்மையே நீ தரும் சைவப் படையல் எனக்குப் போதவில்லை.. என்ன செய்வது?! என்னைப் படைத்த ஈசன் இப்படிப் படைத்து விட்டார்..  செவ்வாய் மற்றும் வெள்ளி  இரவுகளில் மயானத்தில் நான் வேட்டைக்குச் செல்ல அனுமதி கொடுக்க வேண்டும்" என்று கேட்டார். அம்மையும் அனுமதி அளித்தாள். வ்வாறாக சுடலைமாடன் செவ்வாய் மற்றும் வெள்ளிக்கிழமைகளில் மயான வேட்டைக்கு செல்வதோடு, அன்னையின் புதையலுக்கும் காவல் இருப்பதுமாக இருந்து வந்தார்.


கொட்டாரக்கரை பகவதி அம்மன் ஆலயத்தின் ஏழு கடாரம் தங்க புதையலுக்கு காவல் பொறுப்பிலிருந்தபோது,  கேரள தேசத்தில் நந்தம்புனலூர்ன்ற ஒரு ஊர் இருந்தது. அங்கு,  காளிப் பெரும்புலையன் என்றொருவன் வாழ்ந்து வந்தான். அவன் ஒரு மந்திரவாதி. மந்திரத்தால் என்னவேண்டுமானாலும் செய்வான். அதனால், அவனுக்கு பயந்த மக்கள் அவனை அந்த ஊருக்கு தலைவனாக்கி வைத்திருந்தனர். ஊருக்கே தலைவனாய் இருந்தாலும், அவனுக்கு குழந்தைகள் ஏதுமில்லை. அது அவனுக்கு பெரும் கௌரவக்குறைச்சலாய் இருந்தது. தன் மனைவி புலக்கொடியாளை பாதளகண்டி ஈஸ்வரி அம்மன் ஆலயத்தில் சென்று ஒருமண்டலம் விரதம் இருந்து அம்மனை வணங்கி வரச்சொன்னான். புலக்கொடியாளும் அன்னையை நோக்கி கடும் விரதமிருந்தபோது, ஔவையார் நோன்பிருந்த வீட்டிலிருந்த ஒரு கொழுக்கட்டை மாவின் ஒரு துளியை காகமொன்று கவ்விக்கொண்டு விரதமிருந்த புலக்கொடியாள் மடியில் போட்டது. கேட்ட வரம் கிடைக்குமென மனநிம்மதியோடு வீடு திரும்பினாள் புலக்கொடியாள். அம்மன் அருளால், அழகிய  பெண் குழந்தையொன்றுக்கு தாயானாள். காளிப்புலையனின் குலதெய்வமான இசக்கியம்மன் நினைவாகவும், ஔவையார்  நோன்பு கொழுக்கட்டையின் மாவின் நினைவாகவும் மாவு+இசக்கி=மாவிசக்கி என பேர் வைத்து கண்ணின் மணியாய் காத்து வளர்த்து வந்தான். மாவிசக்கியும் படிப்பிலும், குணத்திலும்  சிறந்து விளங்கியதோடு யாரோடும் ஈடு சொல்லமுடியாத பேரழகியாய் திகழ்ந்தாள். மாவிசக்கி, சடங்காகி நின்றபோது, தன்னிடமிருந்த சொற்ப ஆபரணங்களை கொண்டு அழகுப்படுத்தி இருந்தாள் புலக்கொடியாள். மகளை கண்ட காளிப்புலையனுக்கு, தன் மகளை இன்னும் பல ஆபரணங்களைக்கொண்டு அழகுபார்க்க ஆசை வந்தது. 

உடனே, மந்திரக்கூடத்துகு  சென்று, காளியை வேண்டி அஞ்சனமை போட்டு   மிகுந்த தங்க நகைகள் எங்குள்ளது என பிரசன்னம் பார்த்தான். அதில்,  கொட்டாரக்கரை பகவதியின் ஆலயத்தில் ஏழு கடாரம் பொன் புதையலாக இருப்பதை அறிந்தான். அந்த நகைகளை கொள்ளையடிக்க திட்டம் போட்டான். ஆனால், காவலுக்கு சுடலைமாடன் இருப்பது அவனை யோசித்தான். செவ்வாய், வெள்ளிகளில் சுடலைமாடன் மயான வேட்டைக்கு கிளம்புவதை தெரிந்துக்கொண்ட சுடலைமாடன்,  கோவிலுக்குள் சென்று ஒரு கடாரம் தங்கத்தை கொள்ளையடித்து வீடு வந்து சேர்ந்தான். மயான வேட்டையிலிருந்து வந்த சுடலைமாடன்சாமிக்கு, ஒரு கடாரம் தங்கம் களவு போனதை அறிந்து கடும் கோபம் கொண்டார்.  அன்னை பகவதியிடம் சென்று, நடந்ததை சொல்லி, களவாடியது யார் என கேட்டார். அன்னையோ, எனக்கு நகை பெரிதல்ல. தங்கத்துக்கு ஆசைப்பட்ட எனது குழந்தை ஒருவன் கொண்டு சென்றான். அவனை மன்னித்துவிடு என சுடலைமாடசாமியை தேற்றினாள்.  சுடலைமாடசாமி பிடிவாதம் பிடிக்க, காளிப்புலையனை பற்றி அன்னை சொன்னாள்.  களவு போன தங்கத்தை மீட்டுவர அன்னையிடம்  அனுமதி கேட்டார் சுடலைமாடசாமி, மகனே! வேண்டாம். அவன் மிகப்பெரிய மந்திரவாதி.  உன்னை சிமிழ் ஒன்றில் அடைத்துவிடுவான் என எச்சரித்தாள். அம்மையே! நான் பரமசிவனிடம் வரம் வாங்கி வந்தவன். என்னை யாரும் ஒன்னும் செய்யமுடியாது. எனது காவலிலிருந்த தங்கத்தை கொள்ளை கொண்டவன் குடும்பத்தை பலிகொள்வேன் என பதமிட்டார். அப்போது தெரியும் மிகுந்த சக்திக்கொண்டது இந்த சுடலை மாயாண்டியா?! அல்லது அந்த மந்திரவாதியா?!என சொல்லி  ஆவேசமானார். இனி மகனை கட்டுப்படுத்த இயலாது என பகவதி அம்மனும் திருநீற்றைப்பூசி, வல்லயத்தை(ஈட்டி ) கையில் கொடுத்து ஆசி  வழங்கி அனுப்பி வைத்தாள். 

ஆவேசமாய் சென்ற சுடலைமாடன், மோசக்காரனை நாமும் வேசம் போட்டு மோசம் செய்வோமென பாம்பாட்டி வேடம் கொண்டு சில பாம்புகளை பிடித்து பெட்டியில் அடைத்துக்கொண்டு, நந்தப்புனலூர் வந்து சேர்ந்தார்.  பாம்புகளை காட்டி வித்தை காட்டினான். ஊரே திரண்டு வேடிக்கை பார்த்தது. ஆனால், காளிப்புலையன் வீட்டிலிருந்து யாரும் வரவில்லை. மாடியில் தலைக்கோதிக்கொண்டிருந்த மாவிசக்கியை கண்ட, சுடலைமாடன், இவளுக்காகத்தானே நகையை கொள்ளைக்கொண்டான். இவளை முதலில் பலிக்கொள்ள வேண்டுமென பண்டார ரூபங்கொண்டு, காளிப்புலையன் வீட்டுக்கு வந்து பிட்சை கேட்டார்.  மாவிசக்கியும் பிட்சையிட உணவினை எடுத்துக்கொண்டு வாசலுக்கு வந்தாள், அவள் கிழக்கு வாசலுக்கு வந்தால், வடக்கு வாசலுக்கு போனார் சுடலைமாடன், அவள் வடக்கு வாசலுக்கு வந்தால், மேற்கு வாசலில் நின்று போக்கு காட்டினார். கோவமடைந்த இசக்கி, கிழட்ட் பண்டாரமே! ஓரிடத்தில் நிற்க மாட்டாயா?! என கத்தினாள், நான் அன்னம் கேட்கவில்லை, உன் பெண் கேட்க வந்துள்ளேன் என சுடலைமாடன் சொல்ல, கிழட்டுப்பயலுக்கு நான் பொண்டாட்டியாக வேண்டுமா?! என் தந்தைக்கு தெரிந்தால் தலை துண்டாகும். இங்கிருந்து போய் தொலை என மிரட்டினாள் மாவிசக்க்.


சரி, அங்குமிங்கும் ஓடி, தாகமாய் உள்ளது. கொஞ்சம் தண்ணீர் கொண்டுவா என சுடலைமாடன் சொல்ல,  தண்ணீரும் தரமுடியாது என மாவிசக்கி மறுக்க, உன்னை உன் தந்தையின்முன்னே கற்பழிப்பேன் என சபதம் செய்கிறார். நடந்ததை தந்தையிடம் சொல்கிறாள் மாவிசக்கி. தனது மகளிடமே வாலாட்டுபவன் யார் என அஞ்சனமைக்கொண்டு பார்க்க, அதில் எதுவும் தெரியவில்லை. மாந்திரீகத்தில் சிறந்து விளங்கும் தனக்கே ஒருவன் அகப்படவில்லையெனில் அவன் மிகுந்த சக்திகொண்டவனாய்தான் இருக்கவேண்டுமென முடிவெடுத்து, தன் மகள் மாவிசக்கிக்கு ஏழு அறைகளை அடுக்காக அமைத்து அதில் நடு அறையில்  மந்திரீக வளையம் அமைத்து அதன் நடுவே தனது மகளை அமரவைத்தான்.  சுடலைமாட சாமி பல்லி(எறும்பு எனவும் சொல்வதுண்டு) உருக்கொண்டு  அறையின் மேற்கூரையிலேறி அங்கிருந்து மந்திர வளையத்தினுள் இருந்த மாவிசக்கிமீது விழுந்து அவளே அறியாமல், அவளை கற்பழித்தார் சுடலைமாடசாமி. மறுநாள் காலையில் தன் நிலை உணர்ந்த மாவிசக்கி அழ, தனது மகளின் நிலைக்கண்ட, காளிப்புலையன் வந்தவன் மிகப்பெரிய சித்துக்காரன். அவனை எதிர்க்க முடியாது என உணர்ந்து வந்தவன் யாரென தனது ஏவல் தேவதைகளிடம் கேட்டான்.  அவைகளும் விடை தெரியாமல் விழித்தன. மாவிசக்கி கர்ப்பமானாள்.  கொள்ளைக்கொண்டவன் குடும்பத்தை பலிக்கொள்ளும் நாளுக்காக காத்திருந்தார். 


நாட்கள் நகர்ந்தது. மாவிசக்கி நிறைமாத கர்ப்பிணியானாள். ஆலடிப்புதூரிலே காக்காச்சி மலை தாண்டி பளியன்மார்கள் விவசாயம் செய்து வந்தனர்.  அவர்கள் நிலத்தை பாழாக்கினால் புலையன் வருவான். அவனைப் பழிவாங்கலாம் என எண்ணிய சுடலைமாடசாமி, விவசாய நிலத்தை நாசம் செய்தார். காளிபுலையனிடம் விவசாயிகள் புகார் செய்தனர். சேதாரத்தை பார்வையிட கிளம்பிய காளிப்புலையனை அவன் மனைவி புலக்கொடியாள் , தான் கொடிய கனவு ஒன்று கண்டதாய் சொல்லி தடுத்தாள்.  மனைவியிடம், தன்னை யாரும் எதுவும் செய்யமுடியாது எனக்கூறி காக்காச்சி மலைக்கு போனான் காளிப்புலையன். அங்கு மைப்போட்டு பார்க்கும்போது, தானே அவன்முன் பிரசன்னமானார் சுடலைமாடசாமி. தான் யார் எனச்சொல்லி, என் அன்னையின் ஆலயத்துனுள் புகுந்து கொள்ளையடித்த உம்மை பழிவாங்கவே வந்தேன் என ஓங்கி ஓர் அடி அடித்தார் சுடலைமாடசாமி. கதிகலங்கிபோனான் புலையன். 

உமது வலிமை தெரியாமல் உமது காவலில் இருந்த தங்கத்தை கொள்ளையடித்துவிட்டேன்.  என்னை மன்னித்து விடு என மன்றாடினான் காளிப்புலையன்.  இப்பொழுது தெரிகிறதா?! களவு கொடுத்தவனின் மனநிலை. எமது செல்வத்தை கொள்ளையடித்த வலி தெரியவே உமது மகளின் கற்பை சூரையாடினேன். உமது காவலில் இருந்த நிலத்தை பாழ்படுத்தினேன். யாருக்காக, நீ தங்கத்தை கொள்ளையடித்தாயோ அவளை பலிகொடுத்தால் உமக்கு மன்னிப்பு தருகிறேன். உன்னை மன்னிக்கிறேன் என சுடலைமாடசாமி சொல்ல, சரி, என் மகளை பலிக்கொடுக்க சம்மதிக்கிறேன். பதிலுக்கு நீ என் சிமிழுக்குள் அடைபடவேண்டுமென கோரிக்கை வைத்தான். சரி  என சம்மதித்தார் சுடலைமாடன், "ஏழு பரண்கள் போட்டு எட்டாத உயரத்தில், ஏணிவைத்து மாலைசாற்றி, கும்பம் வைத்து, ஒருபரணில் சூல் ஆடுகளும், ஒரு பரணில் சூல் பன்றிகளும், ஒரு பரணில் சூல் எருமைகளும், ஒரு பரணில் கருங்கிடாக்களும், ஒரு பரணில் செங்கிடாக்களும், ஒரு பரணில் ஒரு கோட்டை புழுங்கலரிசி சோற்றை ஒரே படையலாய் போட்டு சுடலைமாடசாமியை திருப்திப்படுத்த நினைத்தான் புலையன். படையலை ஏற்ற, சுடலைமாடசாமி, அடேய்! நான் கேட்ட உன் மகள் எங்கே என ஆவேசத்தோடு புலையனின் நெருங்கினான். மகளா?! உயிரா? என யோசித்த புலையன் உயிர் என முடிவெடுத்து, மகளை அழைத்து வந்து, கைகால்களை கட்டி வைத்து வயிற்றை கீற கத்தியை எடுத்தான்.




பெற்ற மகளென்றும் பாராது, பலிகொடுக்க துணிந்த நீ, . நான் மரித்து ஏழு நாட்களுக்குள் செத்துப் போவாய்." என்று சாபமிட்டு அழுதாள்.. மகளின் கதறலை காதில் வாங்காமல், வயிற்றை கீறி, கருவை வேரோடு பிடுங்கி, தலைவாழையிலையில் படையல் வைத்தான். படையலை ஏற்ற சுடலைமாடசாமி, புலையனின் சிமிழில் அடைந்தார். சுடலைமாடனை அடைத்துவிட்டோம். இனி, பகவதி அம்மன் கோவில் தங்கம் முழுக்க கொண்டு வந்துவிடலாம் என எண்ணினான் புலையன். மாடனை அடைத்த சிமிழை அருகிலிருந்த பாழடைந்த கிணறு ஒன்றில் எறிந்துவிட்டு வீடு வந்து சேர்ந்தான். புலக்கொடியாள் நீர் எடுக்க சென்ற புலக்கொடியாள், கணவனுக்கு சமைக்க நேரமானதால், அதிக தூரம் செல்ல முடியாது என யாரும் புழங்காத அந்த பாழடைந்த கிணற்றிலிருந்து நீர் எடுத்துக்கொண்டு வீடு வந்து சேர்ந்தாள்.

புலையனும் உணவு உண்ண அமர்ந்தான். குடிக்க தண்ணீரை செம்பில் நிரப்பி புலையன் அருகிள் வைத்தாள். தண்ணீர்  குடிக்க சொம்பை எடுத்த புலையன் கண்ணில் சிமிழ் பட்டது. ஐயோ! இந்த சிமிழ் இங்கு வந்தது எப்படி!? என திகைத்தபோது, புலக்கொடியாள் அவளும் திகைத்து, எப்படி வந்தது, என்ன இருக்கிறது என அறிய செம்பிலிருந்த சிமிழை எடுத்து திறந்தாள், சிமிழிலிருந்து ஆங்காரமாய் வெளிவந்த சுடலைமாடசாமி, மகளுக்காக கோவிலுக்குள் புகுந்து கொள்ளையடித்த மாபாதகன், தன் உயிர் காக்க, பெற்ற மகளையே பலிக்கொடுத்த பாவி, இனி நீ உயிரோடு இருக்கக்கூடாது என என் அன்னையின் ஆலயம் புகுந்து திருடிய உன்னைக் குடும்பத்தோடு அழிப்பேன் என்று சபதம் செய்தேன்.. இப்போது நிறைவேற்றுகிறேன்." என்று சொல்லி அவனையும், அவன் மனைவி புலக்கொடியாளையும் பலிக்கொண்டார்.



அன்னையின் ஆலயத்தில் களவாடிய ஒரு கடாரம் தங்கத்தோடு கொட்டாரக்கரை திரும்பி அன்னையிடம் சேர்ப்பித்தார். அன்னையே! இப்போது புரிகிறதா உனது மகனின் பராக்கிரமம்?! என பணிந்தார். திரவியங்களை மீட்டது சந்தோசம், உமது பராக்கிரமத்தினை மெச்சினோம். ஆனா, நீ இப்படிப் பழிவாங்குவதெல்லாம் கூடாதப்பா. தெய்வங்கள் மனிதர்களை ரட்சிக்க வேண்டும். இனி,  நீயும் வரங்கொடுக்கும் தெய்வமாக வேண்டும்" என்று அவனை ஆசீர்வதித்தாள். "அப்படியே செய்கிறேன் அன்னையே.. எனக்கு விடை கொடு" என்று சொல்லி அன்னையிடம் அனுமதி வாங்கிவிட்டு, கொட்டாரக்கரையை விட்டுப் புறப்பட்டார். நேராக குற்றாலம் வந்து சேர்ந்தார். குற்றால அருவியில் குளித்து விட்டு திருக்குற்றால நாதரையும், அம்பிகையையும் வணங்கினார்... பின்னர் குற்றாலப்பதியிலேயே அருளும் தெய்வமாகி வரமருள ஆரம்பித்தார்.
ஊர்க்கடைசியில் அல்லது மயானத்துக்கு அருகில் சுடலைமாடனுக்கென கோவில் உண்டு. கோவில்ன்னா ஆகமவிதிப்படி ராஜகோபுரம், பள்ளியறை, கருவறை, மடப்பள்ளி என இருக்காது. மேற்கூரை இன்றி, வெட்டவெளியில் ஒரு பீடத்தின்மீது சுடலைமாடன் வீற்றிருப்பார். நித்திய பூஜைகள் என எதுவும் கிடையாது. சுடலைமாடனை குலதெய்வமாய் ஏற்றோர் வழிபாடு செய்தால் மட்டுமே உண்டு. மற்றபடி வருடத்திற்கு மூன்று நாட்கள் கொடைவிழா நடக்கும். வியாழக்கிழமை இரவில் குடியழைப்போடு விழா தொடங்கும். வெள்ளிக்கிழமை பலவித பட்சணங்கள், காய்கறிகள், பழங்கள், அசைவமென அன்னம் படைப்பு,  உச்சிகாலத்தில் தீபாராதனையும் நடக்கும்.
Image may contain: people standing and food

பலிகொடுத்த ஆடு, மாடு, பன்றியின் ரத்தம் கலந்த சாதம் ஒரு கலயத்தை ஒரு கையிலும், மறுகையில் தீவட்டியுடன்   மாலையில் சுவாமி மயானம் செல்வார். இதனை வேட்டைக்கு செல்லுதல் சொல்வாங்க. சாமி வேட்டைக்கு போகும்போது யாரும் எதிரில் வரக்கூடாது.  அப்படி எதிரில் வந்தால் மூன்று நாளுக்குள் மோட்சம் அடைவர் என நம்பிக்கை. கலயத்தில் இருக்கும் ரத்தச்சோற்றை ஊரின் நான்கு எல்லையில் வானத்தை நோக்கி சாமி ஆடுபவர் இறைப்பார். இதனால், தீய சக்திகள் ஊருக்குள் வராது என்பது நம்பிக்கை.  சாமி வேட்டைக்கு சென்று வந்த பின்னர் அருள்வாக்கு சொல்லுதல் நிகழும்.  அடுத்த நாள் சனிக்கிழமை பூப்படைப்பு தீபாராதனை, மாலையில் கணியன் கூத்துடன் விழா முடியும்.  கணியன் கூத்தில் கொடைவிழா நடத்துவபர்களின் குடும்பம் உட்பட, ஊரார், ஊரிலிருக்கும் ஆடு,மாடுகள் நலமோடு வாழவும், மழை பெய்து நிலவளம் செழிக்கவும் சுடலமாடனே வாழ்த்துவது போல இருக்கும்.  சுடலைமாடனின் படையலில் சுருட்டு, பிராந்தி,  அசைவம், பொரி, கடலை என கட்டாயம் இடம்பெறும். 

Image may contain: 1 person, outdoor


கோபம் தெறிக்கும் கண், வேல், வாள்ன்னு இருந்தாலும், தீயவர்களை மட்டுமே அழிக்கும் குணமுடையவன் இந்த சுடலைமாடன். பொருளை களவு கொடுத்தவர்கள், அநீதிக்கு ஆளானவர்கள் முறையிட்டால் ஓடோடி வருபவர். அவரை வணங்கும்போது சொல்லவேண்டிய மூலமந்திரம்..
"ஹரி ஓம் அகோரமாடா கெம்பிரமாடா 
ஆகாசமாடா பகவதி புத்திரா 
வீராதி வீரா வாவா ஐயும் கிலியும் சௌவும் 
நசி மசி வாவா சுவாகா"

மீண்டும் ஒரு சிறுதெய்வத்தின் கதையோடு சந்திப்போம்!!

நன்றியுடன்,
ராஜி.