அருள்மிகு ஸ்ரீரங்கநாதப் பெருமாள் திருக்கோயில்.திருநீர்மலை - புண்ணியம் தேடி ஒரு பயணம்

கோயம்பேட்டுல இருந்து மதுரவாயல் வழியா பெருங்களத்தூர் போற பை-பாஸ்ல மலைக்கு மேல ஒரு கோவில் இருக்கு. அந்த வழியா போகும்போது பஸ்சுல இருந்து பார்த்திருக்கேன். அதேப்போல சினிமாவுல நிறைய தரம் இந்த ஊர் பேரை கேள்விப்பட்டிருக்கேன். ஆனா, இதுவரை கோவிலுக்கு போகும் வாய்ப்பு கிடைக்கலை.

அந்த இடம் “திருநீர்மலை” பொதுவா குன்றிருக்கும் இடமெல்லாம் குமரன் இருப்பான்னு மனசுல பதிஞ்சுட்டதால, இது ஒரு முருகன் கோவில்ன்னு இத்தனை நாள் நினைச்சுக்கிட்டு இருந்தேன். ஆனா, இது ஒரு பெருமாள் கோவில்.  இந்த கோவில் பல்லவரத்திலிருந்து 8 கி.மீ. துரத்துல இருக்கு. கோவிலுக்கு போறதுக்கு பல்லாவரத்தில் இருந்து நிறைய பஸ்கள் இருக்கு. 

108 திருப்பதிகள்ல இதுவும்ஒண்ணு. மலை மேலயும், கீழேயும் ரெண்டு பெரிய கோயில்கள் இருக்கு.   ரெண்டு கோவில்களிலும் பெருமாள்  நான்கு நிலைகளில், மூன்று அவதார கோலத்தில் காட்சி தருகிறார். இரண்டு திருத்தலங்களும் ஒரே திவ்விய தேசமாக் கருதப்படுது. சரி, நாம மலை அடிவாரக் கோவிலை முதல்ல பார்க்கலாம்.

மலையடிவார கோவிலின் மூலவர் நீர்வண்ணப்பெருமாள்  நின்ற திருக்கோலத்தில், தாமரைமலர் பீடத்தில்  அபய ஹஸ்த முத்திரைகளுடன் மார்பில் சாளக்ராம மாலை புரள, ராஜ கம்பீரத்துடன் கிழக்கு நோக்கி அருள்பாலிக்கிறார்/ அதனால, அவர் பேரு  நின்றான்  தாயார் அணிமாமலர்மங்கை, தனிக்கோவில் கொண்டு நாச்சியாரா எழுந்தருளியிருக்கிறார்.

ராமாயணம் எழுதிய வால்மீகி மகரிஷிக்கு, ராமபிரானை, திருமணக்கோலத்தில் தரிசிக்கனும்ன்னு ஆசை வந்ததாம். அவர், இத்தலம் வந்து சுவாமியை வேண்டி தவமிருந்தாராம். பெருமாள், அவருக்கு சீதா, லட்சுமணன், பரதன், சத்ருக்கனன் ஆகியோருடன் திருமணக்கோலத்தில் காட்சி தந்தாராம். அப்ப வால்மீகி, தனக்கு காட்டிய தரிசனப்படியே நிரந்தரமா இங்கு தங்கும்படி வேண்டினாராம். சுவாமியும் அதுப்படியே அருளினாராம்.

இவர் மலையடிவாரத்தில் தனிக்கோயிலில் இருக்கிறார். நீர் சூழ்ந்த மலையின் மத்தியில் இருந்ததால் இவருக்கு, நீர்வண்ணப்பெருமாள் ன்னும், தலத்திற்கு திருநீர்மலை ன்னும் பேர் வந்திச்சாம்.  நீல நிற மேனி உடையவர் என்பதால இவருக்கு "நீலவண்ணப்பெருமாள்' ன்ற பேரும் உண்டு. ராமபிரானுக்கும் சன்னதி இருக்குது.  இவரது சன்னதியில், சுவாமியை வணங்கியபடி  வால்மீகி காட்சி தருகிறார்.

இங்குள்ள ராமபிரான் கல்யாண ராமனாக் காட்சி தருவதால், திருமணம் கைக்கூடும் தலமாகவும், பிரார்த்தனைத்தலமாகவும் விளங்குது.

இங்கே கோபுரம் ராமருக்கு கொடிமரம் நீர்வண்ணருக்கு கோயில்களில் சுவாமி சன்னதிக்கு எதிரில் ராஜகோபுரம், பலிபீடம், கொடிமரம் ஆகியன ஒரே வரிசையில் இருக்கும். ஆனால், இங்கு பலிபீடம், கொடிமரம் இரண்டும் ராஜகோபுரத்திலிருந்து விலகி தனியே இருக்கு. வால்மீகிக்காக ராமராவும், நீர்வண்ணப்பெருமாளாவும் மகாவிஷ்ணு காட்சி தந்ததால, இவ்விரு மூர்த்திகளும் இத்தலத்தில் பிரதானம் பெறுகிறார்கள். எனவே, இவர்களுக்கு முக்கியத்துவம் தரும்விதமா ராமர் சன்னதி எதிரில் ராஜகோபுரமும், நீர்வண்ணர் எதிரில் கொடிமரமும் அமைந்துள்ளது.

ராமர் சன்னதிக்கு பக்கத்துல அனுமன் தொழுத  நிலையில் அருள்பாலிக்கிறார். இத்தலத்தை மங்களாசாசனம் செய்த திருமங்கையாழ்வார் தாயாரை, "அணிமாமலர்மங்கை' எனக் குறிப்பிட்டு பாசுரம் பாடியுள்ளார். பொதுவா பெருமாள் கோயில்களில் உற்சவர் சிலையை மூலவர் முன்பு வைப்பது வழக்கம். இக்கோயிலில் மூலவர் ரங்கநாதர் மலைக்கோயிலிலும், உற்சவர் அழகியமணவாளர் அடிவாரத்திலுள்ள கோயிலிலும் காட்சி தருகின்றனர். சித்திரை பிரம்மோற்ஸவ கொடியேற்றம் மற்றும் கொடி இறக்கம், பங்குனி உத்திரத்தில் நடக்கும் திருக்கல்யாணம் ஆகிய மூன்று நாட்கள் மட்டும் அழகிய மணவாளர் மலைக்கோயிலுக்கு எழுந்தருளுவார். அன்று மட்டுமே மூலவரையும், உற்சவரையும் ஒன்றாக தரிசிக்க முடியும்.

ஆண்டாளும் தனி சன்னதியில் எழுந்தருளியுள்ளார்.  

மலை அடிவார கோவிலில் மூலவர் ரங்கநாதர் சன்னதியின் பின்புறம் இருந்து பார்க்கும்  போது மலைக்கோவில் அழகாக காட்சி தருது. பூலோக வைகுண்டம் எனப் போற்றப்படும் திருவரங்கம், வடவேங்கடம், திருக்கோட்டிïர் ஆகிய தலங்களோடு இத்தலத்தையும் இணைத்துப் பூதத்தாழ்வார் பாட்டுக்கள் பாடியுள்ளார்.

இத்தலங்களின் பெருமையை குறிப்பிடும் போது திருமங்கையாழ்வார்    நான்கு திவ்ய தேசங்களான நாச்சியார்கோவில், திருவாலி, திருகுடந்தை , திருகோவிலூர் ஆகிய திருத்தலங்களை வணங்கிய பலன் கிடைக்கும்ன்னு சொல்லியிருக்கார். பூததாழ்வார் ஒரு படி மேலே போய்  ஸ்ரீ ரங்கத்தை வணங்கிய பலனை கிடைக்கும்ன்னு சொல்லி இருக்கார்.

அவ்வுளவு சிறப்புமிக்க இந்த மலையடிவார கோவிலை தரிசனம் செய்து விட்டு இபொழுது மலைமேல் இருக்கும் மூலவர் - (இருந்தான்) சாந்த நரஸிம்மன், வீற்றிருந்த திருக்கோலம்,  கிழக்கு நோக்கிய காட்சியிலும். மூலவர் - (கிடந்தான்) ரங்கநாதன், மாணிக்கசயனம், தெற்கே நோக்கிய காட்சியிலும். தாயார் - ரங்கநாயகி. (தனிக் கோவில் நாச்சியார்) . கிழக்கே நோக்கிய காட்சியிலும் மூலவர் - த்ரிவிக்ரமன் (நடந்தான்) , நின்ற திருக்கோலம், கிழக்கே கிழக்கு நோக்கிய காட்சியிலும் தரிசிக்கலாம்.

இது தோயாத்ரிமலை செல்லும் நுழைவு வாயில். இந்த இடம் பழைய காலத்தில் காண்டவ வனம் என அழைக்கப்பட்டதாம்.  இந்த வாசல் காண்டவ  வனத்தின் தோயாத்ரி வனவாசல் என்று குறிப்பிடப்படும். தோயம்ன்னா "பால்' ன்னு அர்த்தமாம்.  இந்த அலங்கார வளைவின் உள்புறம் அழகாக கலை நயத்துடன் செதுக்கப்பட்டிருக்கு.

இந்த அலங்கார வளைவைக் கடந்து 250 படிகளை ஏறிச் போனால், மலைக்கோயிலை அடையலாம்.

மலையேறும் பாதையில் வாயு மைந்தன் அனுமன் பக்தர்களுக்கு காட்சி தருகிறார்.  அவருக்கு ஒரு நெய் விளக்கு ஏற்றி வணங்கி விட்டு தோயாத்ரிமலை படிகளை ஏறனும்.  

ஸ்ரீரங்கத்தில் மகாவிஷ்ணுவை சயனக்கோலத்தில் தரிசித்த பிருகு முனிவர், மார்க்கண்டேய மகரிஷி இருவரும் தங்கள் இருப்பிடம் நோக்கி போகும்போது...,  அவர்களுக்கு பெருமாளின் சயனக்கோலம் அவர்கள் கண்களை விட்டு அகலவே இல்லையாம். மீண்டும் ஒருமுறை அந்த தரிசனம் கிடைக்க வேண்டுமென ஆசைப்பட்டிருக்காங்க.  எனவே, இத்தலத்தில் தங்களுக்கு அந்த திருக்கோலத்தைக் காட்டனும்ன்னு உருக்கமா பெருமாளை வேண்டிக்கிட்டாங்களாம். அப்ப  சுவாமி "போக சயனத்தில்' ரங்கநாதராக இங்குள்ள மலையில் காட்சி கொடுத்தாராம். இவரே இங்கு மலைக்கோயில் மூர்த்தியாக அருளுகிறார். அருகில் பிருகு, மார்க்கண்டேயர் இருவரும் இருக்கின்றனர். இவருக்கு அபிஷேகம் கிடையாது. வருடத்தில் ஒருமுறை கார்த்திகை மாதத்தில் தைலக்காப்பு மட்டும் செய்யப்படுது.

கீழ்ப்படத்தில் காணப்படுவது கல்கி மண்டபம்.  இத்தலத்து பெருமாளை தரிசிக்க திருமங்கையாழ்வார் வந்தபோது, மலையைச் சுற்றிலும் நீர் நிறைந்திருந்ததாம். அவரால் நீரைக் கடந்து சென்று சுவாமியை தரிசிக்க முடியலையாம். ஆனாலும், அவர் காத்திருந்து சுவாமியை தரிசித்துவிட்டுச் செல்வதென முடிவெடுத்திருக்கிறார். கோயில் எதிரேயுள்ள மற்றொரு மலையில் தங்கினார். நாட்கள் நகர்ந்ததே தவிர, தண்ணீர் குறைந்தபாடில்லை. ஆனாலும் பெருமாளை தரிசிக்க வேண்டுமென்பதில் தீர்க்கமா இருந்த திருமங்கையாழ்வார், தண்ணீர் வடியும் வரை காத்திருந்து, சுவாமியை தரிசிக்கச் சென்றார். தன் மீது பாசம் கொண்ட பக்தனுக்காக பெருமாள் நின்ற கோலத்தில் நீர்வண்ணப்பெருமாள், இருந்த கோலத்தில் நரசிம்மர், சயன கோலத்தில் ரங்கநாதர், நடந்த கோலத்தில் உலகலந்த பெருமாள் என நான்கு கோலங்கள் காட்டியருளினாராம்.  இந்த நால்வரையும் இத்தலத்தில் தரிசிக்கலாம். நீர்வண்ணப்பெருமாள் மலையடிவாரத்திலுள்ள கோயிலிலும், ரங்கநாதர், நரசிம்மர், உலகளந்த பெருமாள் ஆகியோர் மலைக்கோயிலிலும் அருள் புரிகின்றனர்.

ஈரடியால் மூவுலகும் நடந்து மூன்றாவது அடியை எங்கே வைப்பது என கேட்பது போல திரிவிக்கிரம அவதார நிலையில் நடந்த வராகவும் இங்கு காட்சி தருகிறார்.

இரணியனை சம்ஹாரம் செய்ய நரசிம்ம அவதாரம் எடுத்த மகாவிஷ்ணு, உக்கிரமா இருந்தார். இந்த வடிவம் கண்டு பிரகலாதன் பயந்தான். எனவே, சுவாமி தன் பக்தனுக்காக உக்கிர கோலத்தை மாற்றி, அவனைப்போலவே பால ரூபத்தில் தரிசனம் தந்தார். இவரை "பால நரசிம்மர்' என்கின்றனர். மலைக்கோயிலில் இவருக்கு சன்னதி இருக்க்கு. இவருக்கு பின்புறம் நரசிம்மர், சுயரூபத்துடன் இரண்டு கரங்களுடன் காட்சி தருகிறார். இடக்கை ஆட்காட்டி விரலை உயர்த்திக் காட்டுகிறார். இவரிடம் சங்கு, சக்கரம் இல்லை. இவ்வாறு இங்கு பால வடிவம் மற்றும் சுயரூபம் என இரண்டு வடிவங்களில் நரசிம்மரை தரிசிக்கலாம்.

கொடிமரத்தின் முன்பு கருடாழ்வார் வீற்றிருந்து அருள் பாலிக்கிறார் அவருக்கு நேரே ஸ்ரீதேவி பூதேவி சமேதராக ஆதிசேஷனின் குடையின் கீழ் சயன கிடந்த திருக்கோலத்தில் ஸ்ரீரங்கநாதராய் அருள்பாலிக்கிறார்.அவருடைய தொப்புள் கொடியிலிருந்து பிரம்மாவும் தாமரை மலரில் அமர்ந்திருக்கும் திருக்கோலமும் நாம் இங்கு தரிசிக்கலாம்  

கோவில் கொடிமரம் அழகாக காட்சியளிகிறது வைகானச ஆகம விதிப்படி இரு வேளை பூஜை நடக்கிறது.

மலைக்கோயிலில் உள்ள ரங்கநாதருக்கு சித்திரையிலும், அடிவாரத்திலுள்ள நீர்வண்ணப்பெருமாளுக்கு பங்குனியிலும் பிரம்மோற்ஸவம் நடக்குது. வைகுண்ட ஏகாதசியின்போது அழகிய மணவாளர் சொர்க்கவாசல் கடக்கிறார். இவரே மாசி மகத்தன்று கருடசேவை சாதிக்கிறார். நரசிம்மருக்கு ஆனியிலும், உலகளந்த பெருமாளுக்கு ஆடியிலும் ஒருநாள் விழா நடக்குது. அப்ப.  இவ்விருவரும் அடிவார கோயிலுக்கு எழுந்தருளி கருடசேவை சாதிக்கின்றனர். சித்திரை உத்திரத்தில் நீர்வண்ணர், அணிமாமலர்மங்கை திருக்கல்யாணமும், பங்குனி உத்திரத்தில் ரங்கநாதர், ரங்கநாயகி திருக்கல்யாணமும் நடக்குது.

பொதுவா எல்லா கோயில்களிலும் விழாக்காலங்களில் சுவாமி ஒவ்வொரு நாளும் ஒவ்வொரு வாகனத்தில் எழுந்தருளுவார். ஆனா, இக்கோயிலில் ரங்கநாதர், ஒரே நாளில் ஏழு வாகனங்களில் பவனி வருவார். தை மாத ரதசப்தமியன்று இந்த அற்புத தரிசனத்தைக் காணலாம். அன்று காலை சூரிய உதயத்திற்கு முன்பு ரங்கநாதர் சூரியபிரபை வாகனத்தில் எழுந்தருளி , மாடவீதி சுற்றி தீர்த்தக்கரைக்கு எழுந்தருளுகிறார். சூரிய உதய வேளையில், பெருமாளின் பாதத்திலிருந்து முகம் வரையில் படிப்படியாக தீபாராதனை செய்வர். இதனை பெருமாளுக்கு சூரியனே செய்யும் பூஜையாக கருதுவதுண்டு. பின்னர், அனுமந்த வாகனம், கருடன், சேஷன், குதிரை, சிம்மம், சந்திரபிரபை ஆகிய வாகனங்களில் சுவாமி உலா வருவார்.

 தானாக தோன்றிய எட்டு பெருமாள் தலங்கள் சிறப்பானதாக கருதப்படுகிறது. இவை, "ஸ்வயம் வ்யக்த க்ஷேத்ரங்கள்' எனப்படும். இதில் திருநீர்மலையும் ஒன்று. ஸ்ரீரங்கம், ஸ்ரீமுஷ்ணம் (கடலூர்), திருப்பதி, வட மாநில கோயில்களான சாளக்கிராமம், நைமிசாரண்யம், புஷ்கரம், நாராயணபுரம் ஆகிய ஏழும் பிற தலங்கள் ஆகும். மலையில் அமைந்த கோயில் என்பதால் இங்கு பவுர்ணமி தோறும் கிரிவல வைபவம் விசேஷமாக நடக்குது.

ஆயுள்பலம் அதிகரிக்க வாழ்க்கை பிரச்சனையின்றிச் செல்ல, குழந்தைகள் நோயில்லாமல் ஆரோக்கியமா வாழ..,  குடும்பப் பிரச்சனைகள் மறைந்துபோக, திருமணத்தடைகள் நீங்க திருநீர் மலைக்கு வந்து பெருமாளைத் தரிசனம் செய்து விட்டு சென்றால் போதும். அவர்களுக்கு பஞ்சகிரகங்களின் அனுக்கிரகங்களும் கிடைக்கும். கடன் தொல்லையும் நிவர்த்தியாகும்.  

ஒரு வழியாக மலைமேல் உள்ள பெருமாளையும், பால நரசிம்மரையும், ரங்கநாதரையும் தரிசித்து விட்டு மலைமேல் இருந்து இறங்கி தீர்த்த குளத்திற்கு போலாம்.

இந்த திருக்குளம்  3 ஏக்கர் பரப்பளவில் ,நடுவில் நீராழி மண்டபத்துடன் அழகிய தெப்பக்குளம் இது. கும்பகோணத்திலுள்ள மகாமக குளத்தில் 19 தீர்த்தங்கள் சங்கமித்திருப்பதாக ஐதீகம். அதுபோல்,  இங்கு  குளம் ஒன்று, ஆனால், இதில் கலந்திருக்கும் தீர்த்தம் நான்கு. இந்தக் கோயிலின் எதிரிலுள்ள புஷ்கரிணியில் (குளம்) சித்த தீர்த்தம், சொர்ண தீர்த்தம், காருண்ய தீர்த்தம், க்ஷீர தீர்த்தம் என நான்கு தீர்த்தங்கள் சங்கமித்துள்ளன.

சித்திரை மற்றும் பங்குனியில் நடக்கும் பிரம்மோற்ஸவத்தின் 9ம் நாள், வைகுண்ட ஏகாதசிக்கு மறுநாள் ஆகிய மூன்று நாட்களிலும் இங்கு தீர்த்தவாரி விழா நடக்கும். துவாதசி திதி நாட்களில் தீர்த்தவாரி நடப்பதால் இந்த நிகழ்ச்சியை, "முக்கோட்டி துவாதசி' ன்னு சொல்றாங்க.

இக்கோவிலில் காலை 8 முதல் 12 மணிவரையிலும், மாலை 4 முதல் 7.30 மணிவரையிலும் பெருமாளை தரிசிக்கலாம்.

ஒரே மூச்சில் நான்கு கோலத்தில் பெருமாளை தரிசனம் செய்த திருப்தியோடு இங்கிருந்து கிளம்பலாம்.  புண்ணியம் தேடி போற பயணத்துல அடுத்த வாரம் வேறொரு கோவிலில் சந்திக்கலாம். நன்றி! வணக்கம்!

மீண்டும் வேண்டும் அந்த நாட்கள்!!

கஷ்டப்பட்டு சமைச்ச மணல் இட்லிகளை

பகிர்ந்து.., கட்டி காப்பாத்திய விருந்தோம்பல்!!

சட்டை நுனியில் வைத்து காக்காய் கடி

கடித்த கமர்கட்டில் பகை தீர்த்த சாமர்த்தியம்!!

காவல்காரனுக்கு தெரியாம பறித்த கொய்யா,

சளியாய் உருமாறி அப்பாக்கு காட்டிக்கொடுக்கும்!!

ஓடும் ரயில் பின்னே, நண்பர்கள் பின் பிடித்து 

ஓடிய ரயில் கூவல்கள்..

சிக்கு முடிக்கும், பழைய இரும்புக்கும்

வாங்கிய சேமியா ஐசும், சோன் பப்டியும் ருசிக்கும்...,

அம்மாக்கு தெரியாம அவள் புடவையை திருடி

போட்ட திண்ணை நாடகம் தெரிந்து விழுந்த அடி!!

பாடம் படிக்கும் போது விழுந்த கொட்டுக்களுக்கும், 

உடைத்த பல்ப குச்சிக்கும் ஆசிரியர் இல்லாத போது

கட்டி புரண்டு போட்ட சண்டையும், 

மூக்குடைப்பட்ட நண்பனும்...,

ஒரு போதும் நெஞ்சில் வஞ்சம் வைத்ததில்லை!!

சமாதானப்படுத்த வருவதாக வரும் சகுனிகளைப்

பார்த்து, நானும், அவனும்

ஒன்று சேர்ந்து சிரிக்க தவறியதில்லை!!

கோடி பொன்னும், ஆயிரம் நேர்த்திகடனும் 

செய்து கேட்கிறேன். இறைவா!

மீண்டும் வேண்டும் என் பால் மனம்!! 
மீண்டும் வேண்டும் அந்த பால்யம்!! 

புலிகுகை, மாமல்லபுரம் - மௌன சாட்சிகள்

கடந்த சில வாரங்களா நாகர்கோவில் சுத்தியுள்ள திருவிதாங்கூர் அரசுகளையும், அதன் பெருமை, வீழ்ச்சி, அவர்கள் விட்டு சென்ற தடயங்களை  மௌனசாட்சிகள்ல பார்த்து வந்தோம். அங்கயே இருந்தா போரடிச்சுடும். அதுமில்லாம, வீட்டை பூட்டிக்கிட்டு எத்தனை நாள்தான் அங்கயே டேரா அடிக்குறது. ஸ்கூல், ஆஃபீஸ்ன்னு ஆயிரம் வேலைகள் இருந்ததால, வேண்டா வெறுப்பா (வீட்டுக்கு வந்தா, சமைக்கனும், கூட்டனும், துவைக்கனுமே!!) வீட்டுக்கு வரும்போது  சென்னைல இருக்குற மச்சினர் குடும்பத்தை ட்ராப் பண்ண வேண்டியதால கடைசியா வண்டி சென்னைக்கு பறந்துச்சு! 

வண்டி ஈசிஆர் ரோட்டுல போய்க்கிட்டு இருந்தப்போ, போற வழிதானே!? மகாபலிபுரம் போலாம்ன்னு எங்கிருந்தோ ஒரு சவுண்ட் வந்துச்சு. ம்க்கும், வெறும் மணலும், கற்சிலையையும் பார்த்து என்ன ஆகப்போகுது!? ஒரு கோவில் இல்ல, பார்க் இல்ல பசங்க என்சாய் பண்ண எதுமில்லன்னு முணுமுணுப்புகள் எழுந்தால, போகலாமா!? வேணாமா!?ன்னு ஓட்டெடுப்பு நடந்துச்சு. சிவகாமியின் சபதம் படிச்சதால அங்க போகனும்ன்னு நான் ஓட்டளிக்க, மெஜாரிட்டி ஓட்டு போகலாம்ன்னு வரவே வண்டியை அந்த பக்கம் திருப்பியாச்சு!!

பறந்து  விரிந்த பல்லவ சாம்ராஜ்யத்தின் பெருமை பேசும் கட்டிடங்கள்,  துறைமுக நகரமான மாமல்லபுரத்தில் கடல்வழி வாணிகம், மக்களின் ஆடல் பாடல் கொண்டாட்டம், அவர்தம் செல்வசெழிப்பு, பல்லவ மன்னனின் வாழ்நாள் லட்சியத்தை பூர்த்தி செய்ய அயராது பாடுபடும் ஆயனார் சிற்பி, பரஞ்சோதி, நாகநந்தி அடிகள், காஞ்சி முற்றுகை, ஆயிரம் கனவுகளையும், இளவரசனையும் மனசில் சுமந்து பட்டாம்பூச்சியாய் சிறகடிக்கும் சிவகாமி, அவளின் காதல் ததும்பும் பார்வையை  பார்த்து கொண்டு வரும்போது தீடீரென போர் முழக்கங்கள், மக்களின் ஓலம், அழிவு, சிவகாமியின் சபதம், இளவரசனின் திருமணம், அரசனின் மரணம்.., சிவகாமி நடராஜரை கணவானாய் வரித்து கொண்டு ஆலயத்தில் நடனம் ஆடுவது, அவள் மனதை புரிந்துக் கொண்ட மன்னனி கண்ணீர்,  ஆட்சி மாற்றம்,  போர், சூறையாடல், கடல் கொந்தளிப்பு மாமல்லபுரத்தின் அழிவு என் கண் முன்னே!!

ஆனா, நான் மட்டும் எந்த பாதிப்பும் இல்லாமல் அப்படியே இருக்கிறேன். பல சரித்திர கதைகள் கொண்ட   பூமியில் நிற்கும் போது கனவுகள் போல பூர்வ ஜென்ம வாசனை போல, அதே நினைவுகள் வந்து என் மனசில் நிழலாட, குழந்தைகள், குடும்பம், வயதை மறந்து சிறு பிள்ளையாய் ஆர்வத்தோடு மாமல்லபுரத்தை சுற்றி பார்க்க ஆரம்பித்தேன்.

எல்லோருக்கும் தெரிந்த இடம்தான் இருந்தாலும், இப்படித்தான் சுற்றுலா பதிவு போடனும்ன்னு இருக்குற விதிமுறைகளுக்கேற்ப..., சென்னைல இருந்து ECR வழியா பாண்டிச்சேரி போற வழியில இருக்கு இந்த மாமல்லபுரம் . இது, காஞ்சிபுரம் மாவட்டத்துல இருக்கு. இது, ஏழாம் நூற்றாண்டில் பல்லவ நாட்டோட முக்கியமான துறைமுகமா இருந்ததுன்னு ஆராய்ச்சியாளர்கள் சொல்றாங்க. மாமல்லபுரம்  பல்லவர் கால துறைமுக நகரமாக இருந்ததாம் இந்த துறைமுகநகரத்தை மேம்படுத்த மகேந்திரவர்மனின் மகன் நரசிம்மவர்மபல்லவன் சிறப்பு கவனம் செலுத்தினானாம்.  இவனது  சிறப்பு பெயர்களில் ஒன்று மாமல்லன்.இவர் சிறந்த போர் வீரர் என்பது மாத்திரம் இல்லாம சிறந்த மல்யுத்த வீரனாவும் இருந்திருக்கிறார். அதனால இந்த நகரத்திற்கு மாமல்லபுரம் என்று பெயர் வந்ததுன்னு சொல்றாங்க. அது காலபோக்குல மகாபலிபுரம்ன்னு அழைக்கபடுவதாகவும் சொல்றாங்க  .

உங்க கிட்ட பேசிக்கிட்டே வந்ததுல கவனிக்கலை. இங்க, புலிக்குகைன்னு  போர்டு இருக்கு. இங்க ஜூ எதாவது இருக்கா!? புலி இருக்குமோ!? இல்ல  23 ம் புலிகேசி படத்தை இங்க எடுத்ததால இந்த பேரா!? சரி, அங்க போயி என்ன!? ஏதுன்னு தெரிஞ்சுக்கிட்டு வரலாம். வாங்க!!

இங்க குகையையும் காணோம்!! புலியையும் காணோம்!!  யாரை கேக்கலாம்!! சூர்யா எங்கன்னு கேட்டேன். ஏன்? இப்ப எதுக்கு நடிகர் சூர்யாவை கேட்குறேன்னு என் வூட்டுக்காரர் கேட்க.., அவர்தானே மாமல்லபுரத்துல கைடா இருக்கார்ன்னு நான் சொல்ல, குழப்பமும், கோவமுமா வூட்டுக்காரர் என்னை பார்க்க.., மாயாவி படத்தை டிவில பார்த்துட்டு அம்மா இப்படி குழப்புதுன்னு பையன் நம்மை போட்டு கொடுக்க.., அதுக்குள்ள அந்த இடத்தை பத்தி கூட வந்தவங்க சொல்ல ஆரம்பிச்சாங்க.

இந்த இடத்தோட பேரு சாளுவன்குப்பம்.  முதலாம் நூற்றாண்டுகளிலேயே இந்த சாளுவன்குப்பத்தை சுத்தி மக்கள் வாழ்ந்திருக்காங்கன்னு ஆராய்ஞ்சு சொல்லி இருக்காங்க. ஆரம்பகாலத்துல இந்த இடம் திருவிழிச்சில் னு சொல்லி இருக்காங்க. அதுக்கப்புறம், விசயநகரப் பேரரசு காலத்துல, சாளுவ மன்னன் சாளுவ நரசிம்ம தேவராயன் பெயரால் சாளுவன்குப்பம்ன்னு  பேர் வந்துச்சாம்.  இது 8 ம் நூற்றாண்டுல வடிவைவமைக்கபட்டிருக்கலாம் ன்னு நம்பப்படுது. இப்ப இந்த இடம் தொல்பொருள் இலாக்காவின் பாதுகாப்பில் இருக்கிறதுனால சுத்தமா பராமறிக்குறாங்க.

 பெரிய பாறையின் முன்ன 11 புலி முகங்களும், அதன் தலைபாகத்தில் யானை வடிவமும், நிற்கிற நிலையில் நாலு புலிகளும் இருக்கு. நடுவுல சதுர வடிவில் ஒரு இடம் இருக்கு.  இது கலையரங்கமா இருந்திருக்கலாம். மன்னர் உட்கார்ந்து பார்க்கவும், கலைநிகழ்சிகள் நடத்தவும் அழகா வடிவமைச்சிருக்காங்க. புளிதலைகளுக்கு பக்கத்திலேயே இரண்டு யானை தலைகளும், அதன் நடுவே ஒரு சிவலிங்கமும், உள்ள தெரியுற சதுரவடிவ மாடங்கள்ல சிவன் பார்வதி உருவங்கள் இருக்கு. ஓரமா ஒரு குதிரை நிற்கிற மாதிரி செதுக்கி இருக்காங்க.

இயற்கையிலே செதுக்கபட்டமாதிரி ஒரு பெரிய பாறை சாய்தளமா இருக்கு. அதுல நிறைய கலைநுணுக்கங்கள் சிற்பமா வடிவமைக்க பட்டு இருக்கு.  அதுல ஏறிச் சென்று உச்சியில் எப்படித்தான் செதுக்கினாங்களோ!? இதுல ராக் கிளைம்பிங்ன்னு சொல்ற விளையாட்டுக்கு ஏற்ப பிடிச்சு ஏறுவதற்கு நிறைய ஓட்டைகள் அந்த கல்லிலே செதுக்கபட்டிருக்குன்னு சொல்லவும்,கூட வந்த இளவட்டங்கள் அதில் ஏறலாமான்னு கேட்டதுக்கு,  அதெல்லாம் தகுந்த பயிற்சி உள்ளவர்களால் மட்டுமே முடியும். மத்தவங்கலாம் வேடிக்கைப் பார்த்தால் போதும்ன்னு சொல்லிட்டார்.

   

இந்த பெரியக் கல்லைத் தாண்டி போகும்போது, அங்கங்க நிறைய கற்பாறைகள் சிதறி கிடக்குற மாதிரி இருக்கு. கூடவே காதலர்களும் சிதறி கிடக்குற மாதிரி ஒவ்வொரு கல்லிற்கு பக்கத்திலையும் லவ்விட்டு இருக்காங்க..இதையெல்லாம் தாண்டி போன சில அடி தூரத்துல அழகான சிவன் கோவில் ஒண்ணு இருக்கு.  இந்த கோவிலோட பேரு அதிரண சண்டகோவில். இது ஒரு குடவரை கோவில்.  மிகவும் சக்தி வாய்ந்த சிவன் கோவிலாம்.

சிவனை கும்பிடும் முன் நந்தியை கும்பிடனுமில்ல!! அதானே முறை!?  நந்தியை ரெண்டு துண்டா செதுக்கி பின் ஒட்டி வச்சமாதிரி இருக்கு. பக்கத்தில் ஒருபாறையில் மஹிசாசுரமர்தினி  கதை செதுக்கப்பட்டிருக்கு. அங்க நம்மாளுங்க கற்பூரம் ஏத்தி வச்சு சாமி கும்பிடுறாங்க.

அங்க இருந்த ஒரு நடுத்தர வயது அம்மா ரொம்பவும் பயபக்தியோடு சாமி கும்பிட்டுக்கிட்டு இருந்தாங்க.  அவங்க கிட்ட இந்த கோவிலை பத்தி  கேட்டபோது...,  அவங்களோட சின்ன வயசுலலாம் இங்க காலை,  மாலை பூஜை நடக்குமாம். வேண்டிய வரத்தை உடனே நிறைவேத்தி கொடுத்திடுவாராம். ஆனா, இப்ப இந்த இடம் தொல்பொருள் துறையின் கட்டுப்பாட்டுல இருகிறதால ஒரு தேங்காகூட உடைக்க விடமாட்டேங்குறாங்கன்னு ஆதங்கபட்டாங்க. அவ்வளவு சிறப்பு வாய்ந்த  சிவன் கோவிலுக்குள் சிலர் செருப்பு காலோட நடந்து போறதை பார்க்கும் போது மனசு வேதனைப்படுது.

பட்டைதீட்டிய சிவலிங்கமும், அவருக்குப் பின்னே பார்வதி சமேத பரமேஸ்வரரும், பக்கத்தில் இருபுறமும் துவாரபாலகர்கள் வீற்றிருக்க பிரம்மா, விஷ்ணு இருவரும் இரண்டு பக்கத்துலயும் இருந்து அருள் புரியுறாங்க. பக்கவாட்டு சுவர்களில் ஏதோ குறிப்புகள் அடங்கிய கல்வெட்டுகள் காணப்படுது.

சாமி கும்பிட்டு முடிச்சதும் தூரத்துல ஓட்டு வீடு ஒண்ணு கண்ணுல பட்டுச்சு. சரி அங்க போய் கொஞ்சம் ரிலாக்ஸ் பண்ணிக்கலாம்ன்னு கிட்ட போய் பார்த்தா அது வீடில்ல கோவில்ன்னு தெரிஞ்சது. இங்க இதுப்போல ஒரு கோவிலான்னு ஆச்சர்யம் வரவே கோவிலுக்கு போனோம்.

 இங்க இருக்குற கிராம தேவதை ஸ்ரீ தனியமர்ந்தஅம்மன்ஆலயம்.  அங்க பய பக்தியோடு சாமி கும்பிட்டுக்கிட்டு இருந்துச்சு ஒரு குடும்பம், இந்த கோவில் பத்தி கேட்டதும் இந்த அம்மனின் வரலாறை சொன்னாங்க. அதிலயும் ஒரு சின்ன பொண்ணு ரொம்ப ஆர்வமா கோவில் பத்தி சொன்னது அந்த அம்மனே நேரில் வந்து சொன்ன மாதிரி இருந்துச்சு!!

வாலாஜாபாத் ஆற்றங்கரையில் வீற்றிருந்து தண்ணீரின் வழியே கரைந்து சமுத்திரத்தில் தானே உருவாகியதாம். இந்த அம்மன் கடலில் மீன்பிடிக்குறவங்க துடுப்பு போடும் போது ஏதோ துடுப்பில் தட்டியதாம்.   துடுப்பு தட்டிய இடத்துல இரத்தம் வந்ததாம். உடனே அவங்க இறங்கி பார்த்த போது அங்கே 6 வடிவில் அம்மன் சிலைகள் இருந்ததாம். அதை எடுத்து வந்து இங்க பிரதிஷ்டை பண்ணினாங்களாம்.

2004 ல் சுனாமி வந்த போது அதன் பாதிப்பு இந்த கிராமத்து மக்களை தாக்காதவாறு இந்த அம்மன் பாதுகாத்து காபாற்றியதாம். அந்த சிலைகள் எப்போதும் மழை, வெயில், பனி, காத்து படும்படியா திறந்தே இருந்ததாம் . இங்கு கோவில் கட்ட நினைத்த மக்கள் கோவில் கட்டி வரும்போது மேற்கூரை மட்டும் நிக்காம விழுந்துக்கிட்டே இருந்ததால, மேற்கூரை இல்லாமயே இந்த கோவில் கர்ப்பக்கிரகம் இருக்கு.  இதான் இந்த சளுவன் குப்பத்தோட காவல் தெய்வமாம்.

இது கோவிலை ஒட்டி காணப்படுற சப்தகன்னியர் சிலை. இதோடு புலிகுகையின் எல்லை முடிந்ததுன்றதுக்கு அடையாளமா ஒரு கேட் போட்டுவச்சு இருக்காங்க. அந்த பக்கம் கடற்கரை.  தூரத்துல சிந்துசமவெளி நாகரீக கட்டிட அமைப்பு போல் ஒரு கட்டிடம் தெரிஞ்சுது. அங்க போய் பார்க்கலாம்ன்னு அங்க போனோம்...,

இங்க தெரியுற இந்த யானை வடிவ பாறை 2004 வந்த சுனாமி பேரலையால மேல்பாகம் மட்டும் மணல் மூடி தெரிந்ததாம். தொல்பொருள் துறையினர் அதை அகழ்வாராய்ச்சி செய்து பார்த்தபோது அது ஒரு பழங்கால முருகன் கோவில் என கண்டறியபட்டதாம்.  இந்த பாறையின் பின்பகுதியில் நிறைய  சிற்பங்கள் செதுக்கபட்டிருக்குறதால அதை ஆராய்ச்சி செய்ய தோண்டும்போது இந்த கோவில் வெளிப்பட்டதாம். 

  இது ஒரு மிகப்பழமையான கோயில்.  இது சங்ககாலத்திற்கு முன் கட்டப்பட்டதா சொல்லபடுது.   அடித்தளத்தில் இருக்கும் செங்கல் கட்டுமானம் சங்க கால கட்டிட கலைவகையை சேர்ந்ததாம். இந்த செங்கற்களை இப்ப இருக்கும் கற்களோடு ஒப்பிடும்போது கொஞ்சம் பெரியதா இருக்கு. இந்த வகை செங்கற்கள் சங்க கால தொடர்புடைய பூம்புகார், உறையூர், மாங்குடி, அரிக்கமேடு இங்க கிடைத்த கற்கள் மாதிரி இருந்ததாம்.

இங்க பெரிய வெங்கலத்தினால் ஆன முருகன் சிலையும், வெண்கல  விளக்குகள், சிவலிங்கம், சோழர்களின் காலத்தில் உள்ள செப்பு காசு லாம்  கூட கிடைச்சுதாம். சிலப்பதிகாரத்தில் சொல்லபட்டுள்ள குறவன் கூத்து  பற்றிய மண் சிற்பங்களும் இங்கு கிடைத்தனவாம்.  மேலும் .சுடுமண்ணால் ஆன ஒரு நந்தி, ஒரு பெண்ணின் சிலையும் இங்கு இருந்ததாம். இந்த கோவிலின் முன் புறத்தில் கல்லிலேயே செய்யப்பட்ட முருகனின் வேல் ஒன்று உள்ளது,

இங்கு கிடைக்கப்பட்ட பொருட்கள் எல்லாம் மாமல்லபுரம் மியூஸியத்தில் வச்சு இருகிறாங்களாம். கோவிலின் நடுவே சிறிய குழி போன்ற பகுதி இருக்கு. அங்க இருந்து தான் சிலைகள் எல்லாம் கிடைத்ததாம். இந்த இடம் சுற்றிலும் கயிறு கட்டி பாதுகாத்து வச்சிருக்காங்க.

மாமல்லபுரம்ன்னு சொன்னாலே எல்லோருக்கும் ஐராவதம், பிடாரி ரதம், அர்ஜுனன் தவம், சூரியன் கோவில் இதுப்போல சில இடங்கள் மட்டுமே போய் பார்த்து, பதிவாக்கி இருக்காங்க. ஆனா, இதையெல்லாம் தாண்டி இங்கு பார்த்து ரசிக்க வேண்டிய இடங்கள் பல இருக்கு. அந்த இடங்களைலாம் உங்கள் பார்வைக்கு காட்டக்கூடிய சிறிய முயற்சியே இது!!

அடுத்த வாரமும் மாமல்ல புரத்துலயே மௌன்சாட்சிகள் பகுதிக்காக சந்திக்கலாம்....,