ஐஞ்சுவை அவியல்

 ஆன்மீகம்:

                                  

சிவபெருமானின் கண்களை விளையாட்டாகப் பொத்தினாள் உமாதேவி. அதனால் உலகங்கள் இருளில் மூழ்கின. அந்தப் பாவம் நீங்க தவம் மேற்கொண்டாள் உமையவள். நான்கு ஜாமங்களிலும் இரவு முழுவதும் ஆகம விதிப்படி அர்ச்சனை செய்தாள். பூஜையின் முடிவில் அம்பிகை ஈஸ்வரனை வணங்கி, அடியேன் தங்களைப் பூசித்த இந்த இரவை, தேவர்களும் மனிதர்களும் தங்கள் திருநாமத்தாலேயே – அதாவது `சிவராத்திரி’ என்றே கொண்டாட வேண்டும் என்று வேண்டினாள். உமையவள் பூஜித்த இடம் திருவண்ணாமலை மாவட்டத்தில் உள்ள  ”தேவிகாபுரம்”.   மாசிமாதம் தேய்பிறைச் சதுர்த்தசி திதியில் அம்பிகை சிவபெருமானை வணங்கிய  இந்த நாளில் மகா சிவராத்திரி கொண்டாடப்படுகிறது.

   சிவராத்திரி அன்று, சூரியன் மறைந்தது முதல் – மறுநாள் காலை சூரியன் உதயமாகும் வரை; தங்களை (சிவனை)ப் பூஜை செய்பவர்கள் யாராக இருந்தாலும், அவர்களுக்கு எல்லாவிதமான பாக்கியங்களையும் தந்து முடிவில் மோட்சத்தையும் அளிக்க வேண்டும். அருள் புரியுங்கள் என்று அன்னையானவள் வேண்டிக் கொண்டாள்..

    சிவபெருமானும், அப்படியே ஆகட்டும் என்று கூறி அருள் புரிந்தார். அந்த இரவே `சிவராத்திரி’ என வழங்கப்பட்டு, அனைவராலும் கொண்டாடப்படுகிறது.

பகல் பொழுது பரமேஸ்வரனுக்கும், இரவுப் பொழுது அம்பிகையான உமாதேவிக்கும் உரியது என்பது நியமம். ஆனால் சிவராத்திரி என்பது அம்பாளின் வேண்டுதலின் படி கொண்டாடப்படுவதால் அது சிவனுக்கு உரியதாயிற்று.

                       

குட்டீஸ் குறும்பு:

என் சின்ன பொண்ணு இனியாவுக்கு அப்போ 4 வயசு. பஸ்சுல போய்க்கிட்டு இருக்கும்போது,  எவ்வளவு சொல்லியும் கேட்காமல்   ஜன்னலுக்கு வெளியே கைநீட்டிக்கிட்டு வந்தாள். அப்படி செய்ய கூடாது அப்படி செய்தாள் டிரைவர் அங்கிள் நம்மை திட்டுவார்ன்னு சொல்லி அதட்டுனேன். அவளும் பயந்து தன்னை கண்ட்ரோல் பண்ணிக்கிட்டு வந்தாள்.

கொஞ்ச நேரம் கழிச்சு அம்மா அங்கெ பாரு, டிரைவர் அங்கிளெ வெளியே கையை நீட்டி வெளையாடிக்கிட்டு இருக்கார். அவரை யார் திட்டுறதுன்னு, பின்னால் வந்த வண்டியை முன்னால் போக சொல்லி சிக்னல் குடுத்துக்கிட்டு இருந்த டிரைவரை காட்டி கேட்க அருகிலிருந்த கண்டக்டர் உட்பட  அனைவரும் சிரிச்சுட்டோம். 

                        

ஜோக்: 

 என் பொண்டாட்டி பேச ஆரம்பிச்சா பைத்தியம் பிடிச்சுடும், அவ சமையல் வாய்ல வைக்க சகிக்காது. எங்க அம்மா கூட சண்டை போட்டுக்கிட்டே இருப்பா.

 யோவ்..... பாங்க்ல வந்து ஏன்யா இதெல்லாம் சொல்றே.

நம்ம கஷ்டத்தை சொன்னாக்கா பேங்க்ல லோன் குடுப்பாங்கன்னு சொன்னாங்க அதான்.

                              

                                

புதிரோ புதிர்
 திட்டச்சேரியில் எட்டு முட்டு; 

ஒரு முட்டுக்கு எட்டு பனை;

ஒரு பனைக்கு எட்டு பொந்து;

ஒரு பொந்துக்கு எட்டு ஆந்தை;

ஒரு ஆந்தைக்கு எட்டு முட்டை;

ஒரு முட்டைக்கு ஒரு குஞ்சு;

ஒரு குஞ்சுக்கு கால்படி கம்புன்ற கணக்கு படி பார்த்த்தால் எத்தனை படி கம்பு செலவாகும்? நான் கணக்குல பட்டதாரின்னு சர்ட் காலரை தூக்கிவிடுறவங்களாம் விடை சொல்லுங்க. நான் அடுத்த பதிவில் சொல்றேன்.

                             

டிப்ஸ்: 

ப்ரைட் ரைஸ் மற்றும் வெஜிடபிள் பிரியாணி செய்யும் போது, அதனுடன் வேக வைத்த சோளத்தையும் சிறிது சேர்த்துக் கொள்ள வேண்டும். இது பார்ப்பதற்கு அழகாக இருப்பது மட்டுமின்றி, உணவின் சுவையும் சூப்பராக இருக்கும்.