ராஜியின் சுதந்திர தின கொண்டாட்டங்கள்!!

எல்லோருக்கும் இனிய சுதந்திர தின நல்வாழ்த்துகளை சொல்லிக்குறேன் சகோ’ஸ்,

பத்து வயதுல:

ஒரு வாரத்துக்கு முன்னயே ஸ்கூல் களை கட்ட ஆரம்பிசாலும், சுதந்திர தினத்தன்னிக்கு முதல் நாள் தான் கிளாஸ் ரூம்லாம் ஒட்டடை அடிச்சு பெருக்கி, கழுவி, பிளாக் போர்டுக்கு கோவை இலையும் கரியும்  சேர்த்து இடிச்சு பிழிஞ்ச சாறை தேய்ச்சு பளபளப்பாக்கி...,  சிவப்பு, வெள்ளை, பச்சை கலர் பேப்பர்களை சணல் கயிறில் பசை தடவி ஒட்டி காய வச்சு தோரணம் கட்டி முதல் நாள் வீட்டுக்கு போக மணி எட்டாகும். 

அப்படி போகும்போது..., 

ஏய் பிள்ளைகளா! நாளைக்கு வரும்போது துவைச்சு, நீட்டா இருக்குற யூனிஃபார்ம்லதான் வரனும். கொடி ஏத்த எல்லோரும் கண்டிப்பா வரனும். இல்லாட்டி 5ரூபா ஃபைன் கட்டனும் கூடவே ஒரு நாள் முழுக்க முட்டி போடனும்ன்னு சொல்லுவார்.

ஆனா, அவர் அப்படி செய்ய மாட்டார்ன்னு தெரிஞ்சும் கூட எல்லோரும் போவோம். அந்த ஊருல இருக்குற பெரிய ஆளுங்க யாரையாவது கூட்டி வந்து கொடியேத்த சொல்லுவாங்க. அவர் சுதந்திர போராட்ட தியாகின்னு நாங்கலாம் நினைச்சுக்கிட்டு இருப்போம். வளர்ந்தப்புறம்தான் தெரிஞ்சது அவர் ஹெட் மாஸ்டருக்கு கடன் கொடுக்குற பணக்காரர்ன்னு!!

பெட்டிக்குள்ள, காலன்டர்ல இருக்குற, காந்தி, நேரு, வ.ஊ.சி, பாரதியார் படத்தையெல்லாம் தேடி பிடிச்சு அழகா கட் பண்ணி ஸ்கூல்ல அங்கங்க ஒட்டுவோம். காலையிலேயே சீக்கிரம் வந்த டீச்சருங்களும் அக்காக்களும் கொடி பறக்குற கோலம் போட்டு பார்டர் கட்டுவாங்க. பிடி சார், கொடி கம்பத்துக்கு பக்கத்துல ஒரு மேஜை போட்டு வெள்ளை துணி விரிச்சு அதன் மேல  ஒரு தட்டுல ஆரஞ்ச் மிட்டாய், சந்தனம், பூ”லாம் போட்டு மேஜை மேல வைப்பார்.

நாங்கலாம் சார் சொல்லி தந்த எக்சசைஸ்லாம் செய்ய கைல, கலர் பேப்பர் ஒட்டுன எதாவது ஒண்ணை வெச்சுக்கிட்டு ரொம்ப டீப்பா டிஸ்கஸ் பண்ணிட்டு இருப்போம்!!  கலை நிகழ்ச்சி நடக்க காந்தி, நேரு, பாரத மாதான்னு கலர் பேப்பர், ஜிகினா உபயத்துல பசங்க ஜொலிப்பாங்க!!

அப்புறம் எல்லாரும் வருவாங்க. கொடி கம்பத்துக்கு பக்கத்துல அந்த பெரிய மனுசருக்கு பக்கத்துல ஹெட்மாஸ்டரும், பிடி சாரும் நிப்பாங்க.  மறுபக்கம் ஒரு ஸ்டூடண்ட் நிப்பார். அவர் அழகா லெஃப்ட், ரைட் போட்டுக்கிட்டு போய் அந்த பெரிய மனிதரை கூடி வந்து கொடி கட்டி இருக்கும் கயிறை பிடிச்சு கொடுப்பார்.

அந்த கயிறை பிடிச்சு அப்படி இப்படி அசைச்சா கொடி பறக்கும். அதுக்குள்ள இருக்கும் பூ பறக்கும்.  ”தாயின் மணிக்கொடி பறக்குது பாரீர்”ன்னு பத்து நாளா மனப்பாடம் பண்ண பாட்டை பாடி கொடுத்த  ஆரஞ்ச் மிட்டாயை சாப்பிட்டு கொண்டாடினேன்!!

15 வயதுல: 
காலண்டர் வந்ததும் முதல் வேலையா என்னிக்குலாம் லீவ் வருதுன்னு பர்ப்போம். சுதந்திர தினம் சனி, ஞாயிறுல வந்தா செம கடுப்பா இருக்கும். வெள்ளி, திங்கள்ல வந்தா கூடுதல் சந்தோசம். ஏன்னா, 3 நாள் லீவ் கிடைக்கும்ன்னு.

இன்னிக்கும் ஸ்கூல் போகனுமா?!ன்னு சலிச்சுக்கிட்டே போய் கொடி ஏத்தி மிட்டாய் வாங்கிக்கிட்டு, பசங்களோடு அரட்டை அடிச்சு முடிச்சு வீட்டுக்கு வந்து

யாராவது இது எத்தனையாவது சுதந்திரதினம்ன்னு கேட்டா கண்டிப்பா ஒண்ணு கூட்டி இல்லாடி ஒண்ணு குறைச்சுதான் சொல்லுவேன். அப்போல்லாம் டிவில சுதந்திர தினத்தன்னிக்கு ஜனாதிபதி டெல்லில கொடி ஏத்துறதை ”டிடி”ல வெச்ச கண்ணு வாங்காம பார்ப்போம். சிறப்பு பட்டி மன்றம் போடுவாங்க அதையும் பார்ப்போம்.

அன்னிக்குலாம் லீவ் நல்லா எஞ்சாய் பண்ணுவேன்!!

20 வயதுல: 
நாடு நமக்கு என்ன செஞ்சது?! ஏன் சுதந்திரம் கொண்டாடனும்?! எங்க பார்த்தாலும் குப்பை, சரியான கழிப்பிட வசதி இல்லை, சரியா வரி கட்டுறதில்லை. யாரும் வரிசை முறையை எங்கயும் கடைப்பிடிக்கறதில்லை, எங்க பார்த்தாலும் லஞ்சமும், அலட்சியமும் தலைவிரித்தாடுதுன்னு வீர வசனம் பேசிக்கிட்டே அதே தப்பை நாமும் செஞ்சுக்கிட்டே.., சட்டையில தலைக்கீழா கொடியை குத்தி நன்பர்கள் கூட, ரிலீசான  புது படத்தை பார்க்க போய்டுவேன்!!

25 வயசுல:
சேர்ந்தா மாதிரி 3 நாள் லீவ் வந்துட்டா ஹவுஸ்பாசை கூட்டிக்கிட்டு அம்மா வீடு இல்லாட்டி சின்னதா ஒரு டூர் அடிப்போம். அப்படி இல்லாட்டி ஹாயா டிவி முன்னாடி உக்காந்து சூர்யா, பரத், நமீதா, நஸ்ரியா பேட்டியும், ”வீட்டுக்கு அடங்காத பெண் யார்? வேலைக்கு போகும் பெண்ணா?! இல்லை வீட்டில் இருக்கும் பெண்ணா?!ன்னு பட்டி மன்றம் பார்த்துக்கிட்டு உலகத் தொலைக்காட்சிகளில் முதல் முறையான அரைகுறை அழகிகள் நடிச்ச படத்தை பார்த்து கொண்டாடினேன்!!

30 வயசுல: 

வேலை வெட்டி இல்லாம அந்த காந்தியும், நேருவும் சுதந்திரத்தை வாங்கி கொடுத்துட்டு, அதுக்கு ஒரு நாள் லீவையும் கொடுத்து, ஒரு புரோகிராமை ஒழுங்க பார்க்க விடாம, உங்ககிட்ட என்னை அல்லாட வைக்குற  இந்த சுதந்திர தினத்தை கொண்டாடத்தான் வேணுமா?!ன்னு வூட்டுக்காரரை திட்டிக்கிட்டே கொண்டாடினேன்!!

இப்போ: 

சுதந்திர தினம் வருதே!! அதுக்கு பதிவு போடனுமே!! இதுங்களுக்குலாம் லீவாச்சே!! வீட்டுல இருந்துக்கிட்டு உயிரை எடுக்குமே! அதனால, இப்பவே ரெடி பண்ணி வச்சுடனும்ன்னு ஒரு வாரத்துக்கு முன்னாடியே படம்லாம் தேடி கண்டுப்பிடிச்சு அட்டாச் பண்ணி,  டைப் பண்ணி டிராஃப்ட்ல வச்சுட்டு...,

காலையில கண் விழிச்சு மூஞ்சி புக்குல, ட்விட்டர்ல  ஒரு ஸ்டேட்டசும், இங்க ஒரு பதிவும் போட்டு, நேரத்துக்கு சோறு பொங்கி டைனிங் டேபிள் மேல வச்சுட்டு, எத்தனை ஓட்டு , கமெண்ட் விழுந்துச்சு, இன்னிக்கு போஸ்ட் ஹிட்டாச்சா?!

இல்லியா?! இன்னிக்கு லீவாச்சே!! அதான் ஹிட்டாகலைன்னு என்னை நானே சமாதானம் பண்ணிக்கிட்டு மத்த பிளாக்குக்கு போய் கமெண்ட் போட்டு, மறுநாளுக்கு பதிவு தேத்தி...,

ஒரு வழியா இந்த ”சுதந்திர தினத்தையும்” கொண்டாடிக்கிட்டு இருக்கேன்!!

கல்வி வரம் அளிக்கும் ”ஹயகீரீஸ்வர்” -ஸ்கூல் ரி ஓப்பன் ஸ்பெஷல்

 

                       

பசங்களுக்குலாம் ஸ்கூல் திறக்குற நாள் கிட்ட வந்துடுச்சு. அவங்க நல்லா படிக்கனும்ன்னு செங்கல்பட்டு மாவட்டத்துல இருக்குற  செட்டிப்புண்ணியம் தேவநாதசுவாமி கோயில் ஹயக்ரீஸ்வரர் கோவிலுக்கு போய் வந்தோம். 

ஒருமுறை உலகம் அழிய இருந்த சமயத்துல, இந்த உலகத்தையும், மக்களையும் தன்னுள்ளே அடக்கி, ஆலிலை மேல் குழந்தை வடிவத்தில் சயனித்தாராம் மகாவிஷ்ணு. பிறகு, புதிய உலகைப் படைப்பதற்காக தன் நாபிக்கமலத்திலிருந்து (தொப்புள்) பிரம்மனை படைத்து, நான்கு வேதங்களையும் அவருக்கு உபதேசித்தாராம். பிரம்மனும் படைப்புத்தொழிலை ஆரம்பித்தாராம்.

இதன்பின், மது, கைடபன் என்ற அசுரர்கள் பெருமாளின் உடலில் இருந்த தண்ணீர் திவலைகளில் இருந்து பிறந்தனராம். விஷ்ணுவின் பிள்ளைகள் என்ற தைரியத்தில், பிரம்மாவிடம் இருந்த வேதங்களை அபகரித்தனராம்... தங்களுக்கும் படைப்புத்தொழில் செய்ய உரிமை உண்டு என வாதிட்டு, பின், குதிரை முகம் கொண்டு பாதாளத்திற்கு சென்று வேதங்களை ஒளித்து வைத்தனராம்...,

இதனால்  படைப்புத்தொழில் நின்று போனது. மது, கைடபரால் உலகில் அசுரர்கள் அதிகரிப்பார்கள் என்ற நிலை ஏற்பட்டது. பிரம்மன் பெருமாளைச் சரணடைந்தராம்.., பெருமாள் பாதாள உலகம் வந்த போது, அங்கே அசுரர்கள் குதிரை வடிவில் இருப்பதைக்கண்டு,  உடனே தானும் குதிரை முகம் கொண்டு அவர்களுடன் போரிட்டு, வேதங்களை மீட்டு பிரம்மனிடம் கொடுத்தார்.

அசுரர்கள் கைபட்டதால் தங்களது பெருமை குன்றியதாக நினைத்த வேதங்கள், தங்களை புனிதமாக்கும்படி பெருமாளை வேண்டின. குதிரைமுகத்துடன் இருந்த பெருமாள் வேதங்களை உச்சிமுகர்ந்ததால், அந்த மூச்சுக்காற்றில் வேதங்கள் புனிதமடைந்ததாக இந்த புண்ணிய தளத்தோட வரலாறு.

கடலூருக்கு பக்கத்திலிருந்து “திருவஹீந்திரபுரம் தேவநாதன்” கோயிலில் இருந்து, அழகான பெருமாள் விக்ரகம் மற்றும் யோக ஹயக்ரீவர் ஒன்றை செட்டிப்புண்ணியத்துக்கு எடுத்து வந்து,  அவற்றை வைகாசி,  மகம் நட்சத்திரத்தில் செட்டிப்புண்ணியத்தில் பிரதிஷ்டை செய்தனர். பிறகு தாயார் ஹேமாப்ஜவல்லி, ஸ்ரீதேவி, பூதேவி தாயார்கள், ஆண்டாள், ராமபிரான், சீதை, லட்சுமணன், ஆஞ்சநேயர் ஆகியோர் சிலைகளும் பிரதிஷ்டை செய்யப்பட்டது.  மூலவரை வரதராஜர் என்றும், உற்சவரை தேவநாத சுவாமி என்றும் அழைக்கின்றனர்.

இங்கு ”வித்யாதோஷ நிவர்த்தி”  ”சங்கல்ப ஆராதனை” என்னும் கல்வி பூஜை நடத்தப்படுகிறது.  இந்த சிறப்பு பூஜை தேர்வு வேளையில் செய்யப்படுகிறது. கல்வியாண்டு துவங்கும் வேளையிலும்,  மாணவர்களின் புத்தகம் மற்றும் எழுதுபொருட்களை எடுத்துச்சென்று பூஜை செய்தும் வரலாம். திக்குவாய் உள்ளவர்கள், பேச முடியாதவர்களுக்கு நாக்கில் தேன் தடவப்படுகிறது. இதன்மூலம் தன்னம்பிக்கை அதிகரிக்கும் என்கிறார்கள்.

செங்கல்பட்டில் இருந்து தாம்பரம் செல்லும் வழியிலுள்ள சிங்கப்பெருமாள் கோயில் மகேந்திராசிட்டி ஸ்டாப்பில் இருந்து 3 கி.மீ., தூரத்தில் செட்டிப்புண்ணியம்ன்ற இத்திருத்தலம் இருக்கு.

கோவில் திறந்திருக்கும் நேரம் காலை 7.30 மணி முதல் மதியம் 12 வரை, மாலை 4.30 முதல் இரவு8 வரை. நங்க நட்ட நடு மத்தியானத்துலதான் போனோம். வெயில் கொளுத்தி படுத்தி எடுத்திட்டுது.

இன்னொரு மனதை நெருடலான ஒரு விசயம்.., வண்டியை விட்டு இறங்கியதும் பத்து வயது  கூட நிரம்பாத குழந்தைகள் துளசி மாலையும்.., கற்பூரத்தையும் விற்க ஓடி வந்து போட்டி போடுதுங்க. உலகத்தாருக்குலாம் கல்வி வரம் அளிக்கும் அந்த ”ஹயகீரீஸ்வர்” கண்ணுக்கு இக்குழந்தைகள் புலப்படவே இல்லியோ!?

 படம் கூகுள் ல இருந்து சுட்டது...,

மீண்டும் பள்ளிக்கு போகலாம்....., தொடர்பதிவு

 ஒண்ணாம் வகுப்பு..,

தொல்லை தாங்க முடியலைன்னு அம்மாவின்

 தூண்டுதலால், இடது காதை வலது கையால்

தலை மேல் தொட முடிந்த தகுதியோடு

அடிவாங்கி, வீதியெல்லாம் புரண்டு கதற கதற

நல்ல நாள் பார்த்து விஜய தசமியில்

கண்டிப்புடன் உட்காரவைக்கப்பட்ட வகுப்பு....

ஒண்ணாம் வகுப்பு

இரண்டாம் வகுப்பு:

தூக்கம், கதை, விளையாட்டு என

மகிழ்ச்சியாய் கழிந்த பள்ளி வாழ்க்கையில்

சிலேட்டு குச்சி, பலகை,

அ, ஆ..., 1,2,...வாய்ப்பாடு

அரிச்சுவடி, வீட்டுப்பாடம் என

வில்லன்கள் புகுந்த வகுப்பு

இரண்டாம் வகுப்பு...,

மூன்றாம் வகுப்பு:

இரட்டைக்கோடு நோட்டு, கோணார் கடை தேன்மிட்டாய்

ஜவ்வு மிட்டாயில் செய்த தேள், வாட்ச், பாம்பு..,’

 பாண்டி விளையாட்டு, கிச்சு கிச்சு தாம்பூளம் 

விளையாட்டுடன், அட்டெண்டன்ஸ், சாக்பீஸ் 

கொண்டுவரும் அட்டெண்டர் வேலைகளோடு

 பாடங்களை கற்ற வகுப்பு...,

மூன்றாம் வகுப்பு.

நான்காம் வகுப்பு:

ஆங்கிலத்தின் அறிமுகம்...,

நண்பனின் சில்லு மூக்கை பதம் பார்த்து

தோழியின் பென்சிலை உடைத்து..,

வீட்டு பாடம் செய்யாமல் அரட்டை அடித்து

இருக்கும் மூணு பாடத்திலும் ஃபெயிலாகி

இது தேறுமான்னு ஆசிரியரையே

யோசிக்க வைத்த வகுப்பு....

 நான்காம் வகுப்பு.

ஐந்தாம் வகுப்பு:

பேனாவின் அறிமுகம்

கிளாஸ் டீச்சரின் செல்லம்

கபடி விளையாட்டில் சுட்டி

பரத நாட்டியம் , நாடகம்..., ஆனால்

படிப்பில் மட்டும் பூஜ்ஜியம், என

ஆரம்ப பள்ளி படிப்பை முடித்த வகுப்பு...,

ஐந்தாம் வகுப்பு.

ஆறாம் வகுப்பு:

புது பள்ளி, புது நட்பு,

புதுசா சீவிய முள் கொம்பு..,

கண்டிப்பான வரலாற்று ஆசிரியர் மற்றும்

கனிவான கணக்கு ஆசிரியரின் தீவிர முயற்சியில்..,

மூளைக்குள் படிப்பு ஏற ஆரம்பித்த வகுப்பு....

ஆறாம் வகுப்பு.

ஏழாம் வகுப்பு:

கபடி, கோ கோ, ஓட்டப்பந்தயம், என

கலக்கி பி.டி சாரின் செல்லம்...,

தமிழாசிரியரின் வற்புறுத்தலால்

பஞ்சதந்திரகதைகளும், அம்புலி மாமா புத்தகமும்

அறிமுகமான வகுப்பு...,

ஏழாம் வகுப்பு.

எட்டாம் வகுப்பு:

கிராஃப் நோட், ஜியாமிண்ட்ரி பாக்ஸ்..,

கட்டுரை போட்டியில் முதல் பரிசு..,

சைக்கிள் பழக, எதிர் பாலினர் மீது

 புரியாத ஈர்ப்பு.., அம்மாவுக்கு துணையாய்

வீட்டு காரியங்களிலும், அப்பாவுக்கு

கணக்கு பிள்ளையாய் மாறி உலகத்தை

படிக்க துவங்கிய வகுப்பு...,

எட்டாம் வகுப்பு.

ஒன்பதாம் வகுப்பு:

மகளிர் பள்ளி, தாவணியே சீருடை....,

அக்காவின் சாயம்போன சைக்கிள்

கிடைத்தற்கே ஃபோர்ட் கார் கிடைத்த சந்தோசம்,

”பெண்ணாய்” என்னை உணர்த்தியது...,

ஒன்பதாம் வகுப்பு.

பத்தாம் வகுப்பு....,

டியூஷன், தினமும் டெஸ்ட்,

டி.வி, சினிமா, அரட்டை கச்சேரி,

தூக்கத்துக்குலாம் தடா விதிக்கப் பட்டாலும்

டிமிக்கி குடுத்து அனுபவித்து..., விளையாட்டாய்

மார்க் அள்ளி பெற்றோருக்கும், பள்ளிக்கும்

பெருமை சேர்த்த வகுப்பு...,

பத்தாம் வகுப்பு.

பதினொன்றம் வகுப்பு...,

கணக்கு பாடம் எடுத்தால் எந்த

 பட்டப்ப்டிப்புக்கும் போகலாமென நம்பி

சேர்ந்து..., காமர்ஸ் குரூப் மாணவர்களை

 ஏளனமாய் பார்த்து, லேப்ல எலி அறுக்கும்போது

மயங்கி விழுந்து..., பொது தேர்வு அடுத்த வருடம்தானே

என அசால்ட்டாய் இருந்த வகுப்பு...,

பதினொன்றம் வகுப்பு.

பனிரெண்டாம் வகுப்பு:

இன்னும் நாள் இருக்கு என 

அரை பரிட்சை வரை அலட்சியமாய் கழித்து..,

புத்தனுக்கு போதி மரம் போல், பள்ளி அரசமரம் 

எதிர்காலம் பற்றி போதிக்க...,

அக்கறையாய் படித்து 

ஆட்டோகிராஃப், கவிதை, திருமணமா? கல்லூரியா? என

பள்ளி வாழ்க்கை முடிந்த வகுப்பு...,

பனிரெண்டாம் வகுப்பு.

டிஸ்கி: போன வாரம் என் பொண்ணுக்கு ஸ்கூல்ல ஃபேர்வெல் பார்ட்டி.   தனக்கொரு கவிதை வேணும்ன்னு கேட்டாள்.  சில கவிதைகள் எழுதி காட்டுனேன். எதுவும் அவளுக்கு பிடிக்கலை. எப்படி வேணும்ன்னு கேட்டேன்.., அவ என் பள்ளி வாழ்க்கை மொத்தமும் ஒரே கவிதையில் வந்துடனும்ன்னு கண்டிசன் போட..., எப்பவோ எங்கேயோ படிச்ச ஒரு கவிதை நினைவுக்கு வந்தது. அந்த கவிதையில் இப்படித்தான் வகுப்பு வாரியா பிரிச்சு எழுதியிருப்பார். அந்த சாயல்ல எழுதினதுதான் இந்த கவிதை. அவளுக்கு தகுந்தாற்போல் எழுதி அவக்கிட்ட குடுத்து, எனக்கு தகுந்தாற்போல் எழுதி பதிவாக்கிட்டேன். இந்த கருப்பொருள் எல்லாருக்கும் ஒத்துவருமே அதனால் இதையே ஏன் ஒரு தொடர் பதிவாக்கக்கூடாதுன்னு தோணுச்சு.

அதனால்,   

”கவிதைவீதி” சௌந்தர் சார், 

 ”மின்னல் வரிகள்” கணேஷ் அண்ணா, 

 தம்பி ”தமிழ்வாசி” பிரகாஷ், 

சகோதரர் ”அவர்கள் உண்மைகள்”  மதுரை தமிழன்,

”சகோதரி கீதமஞ்சரி” கீதா,  

ஆகியோரை இந்த தொடர் பதிவை தொடர  அழைக்கின்றேன். இந்த ஐந்து பேரும் தங்களுக்கு பிடித்த ஐந்து பேரை அழைக்க வேண்டுமென அன்புடன் கேட்டுக்கொல்கிறேன் சாரி.., கேட்டுக்கொள்கிறேன்.