வெல்ல அதிரசம் - கிச்சன் கார்னர்

தீபாவளி பலகாரம்ன்னாலே எங்க ஊர் பக்கம் அதிரசத்துக்குதான் முதலிடம். மத்ததுலாம் அதுக்கடுத்துதான். தீபாவளிக்கு மறுநாள் நோன்பு எடுப்போம். இப்ப அது விசயம்ல்ல. அதை பத்திய பதிவு வியாழக்கிழமை வருது. அந்த நோன்புக்கு அதிரசம் அதுலயும் குறிப்பா வெல்ல அதிரசம்தான் செய்வோம். 

தேவையான பொருட்கள்:

பச்சை அரிசி - 1 கிலோ

வெல்லம் - 1கி

சுக்கு - 10கிராம்

ஏலக்காய் - 5 

கசகசா - 1 டேபிள்ஸ்பூன்

வெள்ளை எள் - 1 டேபிள்ஸ்பூன்

நெய் - 1 டேபிள்ஸ்பூன்

எண்ணெய் - தேவையான அளவு

அரிசியை தண்ணில 2 மணி நேரம் ஊற வெச்சு, தண்ணி நல்லா வடிச்சு, ஒரு காட்டன் துணில மூட்டை கட்டி வைங்க. அரை மணி நேரம் கழிச்சு, லேசா ஆற வச்சு, மெஷின்ல இல்ல மிக்சில போட்டு அரைச்சுக்கோங்க. அரிசி லேசான ஈரப்பதத்துல இருக்கனும், ரொம்ப காய்ஞ்சுட்டாலும் அதிரசம் நல்லா இருக்காது.

                                            

வெல்லத்தை பொடிச்சு ஒரு பாத்திரத்துல போட்டு 100மிலி தண்ணி ஊத்தி வெல்லம் கறையும் வரை சூடு பண்ணி, அடுப்பை அணைச்சுட்டு வெல்லத்தண்ணியை ஆற விட்டு, அடிக்கணமான பாத்திரத்துல வடிக்கட்டிக்கோங்க. 

அடுப்புல வச்சு கொதிக்க விடுங்க. அடிக்கடி ஜல்லிக் கரண்டியால கிளறி விடுங்க. இல்லாட்டி,  பாத்திரத்துல அடிப்பிடிச்சுக்கும்

வெல்லம் கொதிக்கும்போதே ஏலக்காய், சுக்கை மிக்சில போட்டு நைசா அரைச்சு, ஜலிச்சு வச்சுக்கோங்க.

 ஒரு தட்டுல கொஞ்சம் தண்ணி ஊத்தி, கொதிக்கும் வெல்லப் பாகை எடுத்து ஒரு சொட்டு விடுங்க. லேசா விரலால நகர்த்தி பாருங்க. பாகு தண்ணில கரையாட்டி, அதான் சரியான பதம். அடுப்பை சிம்ல வச்சுட்டு, பாகுல அரிசி மாவை கொஞ்சம் கொஞ்சமா போட்டு கிளறுங்க. கைல எடுத்து தொட்டு பாருங்க சப்பாத்தி மாவு பதத்துக்கு வந்ததும் அடுப்பிலிருந்து இறக்கிடுங்க.

  அப்படி கிளறும்போதே வெள்ளை எள்ளை போட்டுக்கோங்க.

 அடுத்து கசகசாவை சேர்த்துக்கோங்க.

பொடிச்சு வச்ச சுக்கு, ஏலக்காய் பொடியை சேர்த்து நல்லா கிளறுங்க.

நெய் சேர்த்து கிளறி மூடி வைங்க. 

மாவை சின்ன, சின்ன உருண்டையாக்கி,  வாழை இலை இல்லாட்டி பாலிதீன் பேப்பர்ல எண்ணெய் தொட்டு தட்டிக்கோங்க.

வாணலில எண்ணெய் ஊத்தி காய்ஞ்சதும் ஒண்ணொண்ணா போட்டு, ரெண்டு பக்கமும் நல்லா சிவந்ததும் எடுங்க. வடை போல வாணலி ஃபுல்லா அதிரசம் போடாதீங்க. ஒண்ணு இல்ல ரெண்டு போட்டு சுடுங்க.

ரெண்டு பக்கமும் பொன்னிறமா வெந்ததும்,  அதிரசம் அமுக்கும் கட்டையில வச்சு அழுத்தி எடுத்தா, அதிரத்துல இருக்கும் அதிகப்படியான எண்ணெய் வெளில வந்துடும். இந்த மாதிரி கட்டை இல்லாட்டி பூரி அழுத்துறதுல வச்சு லேசா அழுத்தலாம். இல்லாட்டி ஒரு கிண்ணத்தை திருப்பி போட்டு அது மேல அதிரசம் வச்சு ஒரு தட்டால அழுத்தி எடுத்தாலும் எண்ணெய் வந்திரும்.

சூடான, சுவையான அதிரசம் ரெடி. குறைஞ்சது பதினைந்து நாள் வச்சு சாப்பிடலாம். சுக்கு, கசகசா, எள் சேர்த்திருக்கிறதால உடம்புக்கும் ஒண்ணும் பண்ணாது.

 டிஸ்கி: இன்னும் கேமரா வாங்காததால, பதிவருக்குண்டான கடமையை ஆத்தோ, ஆத்தோன்னு ஆத்தனுமேன்னு மொபைல்ல படங்கள் எடுத்தேன். கொஞ்சம் அப்படி, இப்படிதான் இருக்கும். அட்ஜஸ்ட் பண்ணிக்கோங்கப்பா! அடுத்த வாரம் வேற ஒரு ஈசியான ரெசிபியோட வரேன்.