வத்தக்குழம்பு - கிச்சன் கார்னர்

எங்காவது ஊருக்கு போய்ட்டு வரும்போது ஹோட்டல்லயும் சாப்பிட முடியாம, வீட்டுக்கு வந்தும் சாம்பார், ரசம், பொறியல்ன்னு சமைக்க முடியாத நேரத்துலயும், வீட்டுல காய்கறிகள் எதும் இல்லாத போது சட்டு, புட்டுன்னு சமைச்சு அசத்த சூப்பர் குழம்பு இது...,

எல்லா வீட்டுலயும் எப்பவும் துவரம்பருப்பும், காய்ந்த மிளகாய், மிளகு கண்டிப்பா இருக்கும். அதைலாம் வச்சு 10 நிமிசத்துல இந்த குழம்பை ரெடி பண்ணிடலாம்.

தேவையான பொருட்கள்:
துவரம்பருப்பு - 1 கப்
காய்ந்த மிளகாய் - 4
மிளகு - 10
பூண்டு - பத்து பல்
தக்காளி - 1
புளி - சின்ன எலுமிச்சை அளவு
எண்ணெய் - 2 டீஸ்பூன்
வடகம் - கொஞ்சம்
உப்பு - தேவையான அளவு

அடுப்பில் வாணலியை சூடாக்கி, சமையல் எண்ணெய் ஒரு டீஸ்பூன் ஊத்தி காய்ந்ததும் சுத்தம் பண்ண பருப்பை (கழுவாமல்) போடவும்...,

கூடவே காய்ந்த மிளகாயை போடவும்...

மிளகு போட்டு.., பருப்பு நல்லா சிவக்கும் வரை வறுத்து தண்ணி ஊற்றவும்...,

பருப்பு கொதிச்சு வரும்போது தக்காளியை நாலா, எட்டா வெட்டி போடவும்...,

கூடவே உரிச்ச பூண்டை சேர்த்து கொதிக்க விடவும்.., 

பருப்பு வெந்தால் போதும் ரொம்பவும் குழையனும்ன்னு அவசியமில்ல. கூடவே, உப்பும், புளியும் சேர்த்து கல்சட்டில மைய, மைய கடைஞ்சுக்கோங்க...., புளியை கறைச்சு ஊத்தனும்ன்னு அவசியமில்ல. சுத்தம் பண்ணி அப்படியே சேர்த்துக்கலாம்,

வாணலியில் எண்ணெய் 1 டீஸ்பூன் விட்டு காய்ந்ததும் வடம் போட்டு தாளிச்சுக்கோங்க....,

பொறிஞ்ச வடகத்துல, கடைஞ்ச குழம்பை ஊத்தி சூடு பண்ணால் போதும்..., கொதிக்க வைக்கனும்ன்னு அவசியமில்ல. ஒரு வேளை காரம் கம்மியா இருக்குற மாதிரி இருந்தா வடகம் தாளிக்கும் போது காய்ஞ்ச மிளகாயை கிள்ளி போட்டுக்கிட்டா காரம் சேர்ந்துக்கும்.

பத்தே நிமிசத்துல கார சாரமான குழம்பு ரெடி. சாதம் ரெடி ஆகுறதுக்குள்ள இந்த குழம்பு ரெடி ஆகிடும். தொட்டுக்க வத்தல், அப்பளம் இருந்தால் இன்னும் ஒரு பிடி கூடுதலா இறங்கும். இதை கேப்பை களிக்கு தொட்டுக்கிட்டா நல்லா இருக்கும். விருப்பப்பட்டா பருப்போடு கொஞ்சம் வெந்தயம் சேர்த்துக்கலாம். சளி, வரட்டு இருமல் இருக்கும்போது கேப்பை களி கிளறி இந்த குழம்பை தொட்டுக்கிட்டு சாப்பிட்டால் குணமாகும். என் பிள்ளைகளுக்கு பிடிச்ச குழம்பு இது.

அடுத்த வாரம் வேற ஒரு ஈசியான ரெசிபியோட சந்திக்கலாம்..., பை பை, டாட்டா, சீ யூ.