வைணு பாப்பு வானாய்வகம் Vainu Bappu Observatory - மௌனசாட்சிகள்

நீலப்போர்வையாய் விரிந்திருக்கும் வானம். அதில் நாயகனாய் ஒரே ஒரு சூரியன், சூரியனுக்கு நாயகியாய் ஒரு நிலா, துணை நடிகர்களாய் ஒரு நூறு நட்சத்திரங்கள், நம் நல்லது கெட்டதுக்கு பழிபோட ஒன்பது கிரகங்கள், பஞ்சுப்பொதியாய் மேகம், அவை மோதிக்கொள்ளும்போது உண்டாகும் இடி, மின்னல்.. மழைநேரத்துல வரும் அழகான வானவில்.. இது மட்டும்தான் நமக்கு தெரிஞ்ச வானம் என்கிற விண்வெளி.  ஆனா, இதுமட்டுமில்லை விண்வெளி.  

பூமியிலிருந்து 100கிமீ தூரத்திலிருந்து விண்வெளி ஆரம்பிக்குது. விண்வெளி  கோள்களின் காற்று மண்டலத்துக்கு வெளியேயுள்ள, பிரபஞ்சத்தின் வெறுமையான பகுதியே விண்வெளின்னு சொல்லப்படுது.  நம்ம கண்ணுக்கு தெரியாத பல நூறு கோள்களும் விண்வெளியில் அடக்கம். பலவிதமான சமூக தேவைகளுக்கான விண்வெளி தொழில்நுட்பத்தின் பயன்பாடு என்பது  பூமி என்கிற இந்த கிரகத்தில் வசிக்கும் நம்மிடம் கற்பனைக்கும் அப்பாற்பட்ட மாற்றங்களை ஏற்படுத்தியிருக்கு. விண்வெளி பற்றிய விழிப்புணர்வை உண்டாக்கவும், விண்வெளி ஆராய்ச்சியினை ஊக்கப்படுத்தவுமென 70உலக  நாடுகள் சேர்ந்து அக்டோபர் மாதம் 4-ம் தேதி முதல் 10-ம் தேதி வரை ’உலக விண்வெளி’ வாரமாக கொண்டாடுகின்றனர்.

 1957ம் ஆண்டு அக்டோபர் மாசம் 4-ம் தேதி மனிதனால் உண்டாக்கப்பட்ட முதல் செயற்கை விண்கலமான ’ஸ்புட்னிக்-1’  விண்ணில் ஏவப்பட்டது. 1967ம் ஆண்டு அக்டோபர் 10ம் தேதி மாநிலங்களின் செயல்பாடுகளைக் காணுதல் மற்றும் சந்திரன் மற்றும் இதர கோள்கள் உள்ளிட்ட புற விண்வெளிகளை அமைத்திக்கான நடவடிக்கைக்காக பயன்படுத்துதல் போன்றவற்றுக்காக உலக நாடுகளிடையே ஒப்பந்தம் கையொப்பமானது. இது இரண்டையும் நினைவில் கொண்டே இந்த நாளினை விண்வெளி வாரமா கொண்டாட 1999ல்  முடிவெடுக்கப்பட்டது. 2017-ம் ஆண்டில் ’உலக விண்வெளி வார’ கொண்டாட்டத்திற்காக உலக விண்வெளி வார கழகம் ’விண்வெளியில் புதிய உலகத்தை ஆராய்தல்’ என்பதையும் குறிக்கோளாக ஏற்றுக்கொண்டது.

உலக விண்வெளி வாரத்தை முன்னிட்டு மௌனசாட்சிகளில் இன்னிக்கு பார்க்கப்போறது ஆசியாவிலேயே மிகப்பெரிய விண்வெளி ஆராய்ச்சி மையமான வைனு பாப்பு வானாய்வகத்தை பத்தி பார்க்க போறோம். இது வேலூர் மாவட்டத்தில் காவலூர் என்ற இடத்தில் இருக்கு. 

ஒரு வானியல் ஆராய்ச்சி மையத்தினை எங்க வேணும்ன்னாலும் அமைச்சிட முடியாது. அதுக்குன்னு சரியான சூழல் வேணும். வான்வெளியை கூர்ந்து நோக்க  சிறிது உயரமான இடமாகவும், வருடத்துக்கு பல நாட்கள் மேகமூட்டமில்லாமலும், நகர வெளிச்சத்தால் பாதிக்கப்படாமலும் அவ்விடம் இருக்கனும்.  பத்து பொருத்தமும் பக்காவா  வேலூர் மாவட்டம், ஆலங்காயத்தை அடுத்துள்ள ஜவ்வாது மலையில் உள்ள காவலூர் அமைஞ்சுது. 

காவலூர் வானியல் ஆய்வு மையம் நூறு ஏக்கர் பரப்பளவில் பரந்து விரிந்திருக்கு. இந்த இடம் கடல்மட்டத்திலிருந்து 725 மீட்டர் உயரத்திலிருக்கு. தீர்க்கரேகையாக 78 ° 49.6 கிழக்கும் 'அட்சரேகையாக 12 ° 34.6 வடக்குமா இவ்விடம் அமைஞ்சிருக்கு. இந்த ஆய்வகம் நகர விளக்குகள் மற்றும் தொழில்துறை பகுதிகளின் சத்தத்திலிருந்தும், நகர விளக்குகள், வாகனங்களின் வெளிச்சத்திலிருந்தும்  தேவையான அளவில் தொலைவிலிருந்து விலகி இருக்குது.   பூமத்தியரேகைக்கு நெருக்கமாகவும் பூமியின் வடக்கு மற்றும் தெற்கு ஆகிய இரண்டு அரைவட்டங்களையும் சமமாக கவனிக்க இயலும் என்ற காரணத்தாலேயே இவ்விடம் தேர்வு செய்யப்பட்டது. கூடுதலாக, ஆஸ்திரேலியா மற்றும் தென்னாப்பிரிக்கா இடையே இவ்விடத்தின் தீர்க்கரேகை செல்வதால் இங்கிருந்து தெற்கு வான்பொருட்களை கவனிக்கும் வானியல் வசதியும் உள்ளது என்பது குறிப்பிடத்தக்கதாகும்.

இந்தியா மேகநாத் சாஹா, சுப்ரமணியன் சந்திரசேகர் மாதிரியான  அற்புதமான விண்வெளி இயற்பியல் விஞ்ஞானிகளை உலகுக்கு அளித்துள்ளது. ஆனாலும், விண்வெளியைக் கண்காணிக்கும் வானாய்வில் இந்தியா இன்னமும் போதிய திறனின்றி உள்ளது”. அமெரிக்காவைச் சேர்ந்த உலகப் புகழ்பெற்ற வானியல் வல்லுநர் ஹார்லோ ஷாப்லே (1885- 1972) என 1947இல் சொன்னார், விண்வெளியை நவீனத் தொலைநோக்கிகளால் ஆராயும் வசதிகளும், அதில் நிபுணத்துவம் பெற்றவர்களும் இந்தியாவில் இல்லை என்பதையே அவர்  அப்படி சுட்டிக்காட்டினார்.

அவரது மனக்குறை வெகு விரைவில் நீங்கியது மட்டுமில்லாம, உலக அரங்கில் இந்தியா தலைநிமிர்ந்து நிற்கும்படியாக  ஆசியாவிலேயே மிகப் பெரிய வானாய்வுத் தொலைநோக்கியை தமிழகத்தில் நிறுவப்பட்டு 1986ம் ஆண்டு அன்றைய பிரதமர் ராஜீவ்காந்தியால் பொதுமக்கள் பயன்பாட்டுக்காக திறந்து விடப்பட்டது. இங்கிருக்கும் 2.34 மீட்டர் விட்டமுடைய தொலைநோக்கிதான் ஆசியாவிலேயே மிகப்பெரியதாகும் 

2.34மீட்டர் விட்டமுடைய தொலைநோக்கி இருக்கும் பிளாட்பார்ம்..

உலக அரங்கில் தலை நிமிர்ந்து நிற்கும்படி ஆசியாவிலேயே மிகப்பெரிய வானியல் ஆய்வகத்தை உருவாக்க காரணமான விஞ்ஞானியின் பெயர் வைணு பாப்பு. இவர் கேரளத்தின் தலச்சேரியைப் பூர்வீகமாகக் கொண்ட, தீயா சமூகத்தைச் சேர்ந்த சுனன்னா பாப்பு, ஆந்திர மாநிலத்தின் நிஜாமையா வானாய்வகத்தில் ஆய்வாளராகப் பணியாற்றினார். சுனன்னா பாப்புவின் மகனாக, ஆகஸ்ட் 10,  1927, ஆக. 10 சென்னையில்  வைணு பாப்பு பிறந்தார். வைணு பாப்புவின் முழு பெயர்  மனாலி கல்லட் வைணு பாப்பு.

சென்னை பல்கலைக்கழகத்தில் இயற்பியலில் முதுநிலை பட்டம் பெற்ற பாப்பு, கல்வி உதவித்தொகை பெற்று இங்கிலாந்து,  ஹார்வர்டு பல்கலைக்கழகத்தில் மேற்படிப்பு படித்தார். அப்போது தனது சக ஆராய்ச்சியாளர்களான பார்ட் போக், கார்டன் நியூகிர்க் ஆகியோருடன் இணைந்து, ஒரு புதிய வால்நட்சத்திரத்தைக் கண்டுபிடித்தார். அதற்கு  ‘பாப்பு- போக்- நியூகிர்க்’ வால்நட்சத்திரம் என பெயரிடப்பட்டது (Bappu-Bok-Newkirk comet- 1949). அதற்காக, பசிபிக் வானியல் சங்கத்தின் டோனோ வால்நட்சத்திரப் பதக்கம் பெற்றார்.

1952ல பிஎச்.டி. பட்டம் பெற்றவுடன், கார்னெகி மதிப்பூதியம் பெற்று, அமெரிக்காவின் பாலோமர் வானாய்வகத்தில் விஞ்ஞானியாகச் சேர்ந்தார். அங்கு பணியாற்றியபோது, அமெரிக்க விஞ்ஞானி ஓலின் சாடோக் வில்சனுடன் இணைந்து, விண்மீன்களிடையிலான தொலைவைக் கண்டறியும் தேற்றத்தை உருவாக்கினர். விண்மீன்களுக்கு இடையிலான விண்ணிடைத் தொலைவுகளை அளவிட அவற்றின் ஒளிக்கதிர் மாறுபாடு உதவும் என்பதை அவர்கள் நிரூபித்ததால், அது ‘வில்சன்- பாப்பு விளைவு’ (Wilson- Bappu effect) என்றே அழைக்கப்படுது.

1953-இல் வைணு பாப்பு நாடு திரும்பினார். உத்தரப்பிரதேச அரசின் நைனிடால் வானாய்வகத்தை மேம்படுத்தும் பணி பாப்புவிடம் ஒப்படைக்கப்பட்டது. அந்த வானாய்வகத்தின்  இயக்குநராக விளங்கிய பாப்பு அதை அபிவிருத்தி செய்தார் (1954- 1960) 1960-இல் தமிழகத்தில் கொடைக்கானலிலிருந்த வானாய்வகத்தின் இயக்குநராக பாப்பு நியமிக்கப்பட்டார். அங்கு சூரிய ஒளியில் இயங்கும் சாதாரண தொலைநோக்கி மட்டுமே இருந்தது. அதையும் நவீனப்படுத்தினார் பாப்பு.

அப்ப, இரவிலும் துல்லியாமாக வான்வெளியை ஆராய புவியியல் ரீதியாக மிகப் பொருத்தமான இடத்தை அவர் பல்லாண்டுகளாகத் தேடினார். அது உயரமான இடமாக இருப்பதுடன், மேகமூட்டமில்லாத இடமாகவும், சூழல் பாதிக்கப்படாத- ஒளி மாசு அற்ற பகுதியாகவும் இருந்தால் மட்டுமே, வானிலுள்ள பொருள்களை மிகத் துல்லியமாக உற்றுநோக்கிக் கண்காணிக்க முடியும். தனது நீண்ட நெடிய  தேடுதலின் விளைவாக, ஜவ்வாது மலையிலுள்ள காவலூர் என்ற இடத்தைக் கண்டறிந்தார் பாப்பு. 

I2.3 மீட்டர் விட்டமுடைய தொலைநோக்கி.

தான் கண்டெடுத்த காவலூரில்  அரசின் உதவியுடன் ஒரு வானாய்வகத்தை பாப்பு நிறுவினார் (1968). ஆரம்பத்தில் 38 செ.மீ. விட்டமுடைய தொலைநோக்கியுடன் காவலூர் வானாய்வகம் தனது பணியைத் துவக்கியது. வியாழன் கிரகத்தில் ஏற்படும் மாறுபாடுகளை ஆராய, 1971-இல் 61 செ.மீ. விட்டமுள்ள எதிரொளிக்கும் தொலைநோக்கி இங்கு நிறுவப்பட்டது. இவை இரண்டுமே பாப்புவின் மேற்பார்வையில் உள்நாட்டிலேயே உருவாக்கப்பட்டவை.

மூன்றாவதாக, நிறங்களைப் பிரிக்கும் மேகநிற மானியுடன் கூடிய, நுட்பமான மின்னணுவியல் தொலைநோக்கி 100 செ.மீ. விட்டத்தில் 1972-இல் நிறுவப்பட்டது. இந்தத் தொலைநோக்கிகள் பல புதிய கண்டுபிடிப்புகளை வழங்கி உலகின் கவனத்தை ஈர்த்தது. வியாழன் கிரகத்தின் நிலவான கானிமீடுக்கு வளிமண்டலம் இருப்பதை 1971-இல் காவலூர் வானாய்வகம் கண்டுபிடித்தது. யுரேனஸ் கிரகத்தைச் சுற்றி வளையம் இருப்பதையும் 1977-இல் பாப்பு தலைமையிலான விஞ்ஞானிகள் வெளிப்படுத்தினர்.

இவ்வளவு செய்தும்  வைணு பாப்புக்கு  திருப்தி ஏற்படலை. வானை அளக்கும் மிகத் துல்லியமான மிகப்பெரிய அதிநவீன தொலைநோக்கியுடன் கூடிய வானாய்வகம் அமைப்பது அவரது கனவாக இருந்தது. 

ஆங்கிலேயர் ஆட்சிக்காலத்திலேயே (1786) வானியல் ஆய்வுகள் இந்தியாவில் தொடங்கி இருந்தாலும், வானாய்வு நிறுவனங்களும் அதற்குத் தகுதி படைத்த வல்லுநர்களும் வளர்ச்சி பெறவில்லை. இந்நிலையை மாற்ற விரும்பிய வைணு பாப்பு, அரசிடம் நிதியுதவி பெற்று, சுய அதிகாரம் கொண்ட இந்திய வானியற்பியல் கழகத்தை (Indian Institute of Astrophysics- IIA) ஓர் ஆராய்ச்சி நிறுவனமாக 1971-இல் பெங்களூரில் நிறுவினார். வானியலில் முதுநிலை, ஆராய்ச்சிப் படிப்புகள் இங்கு துவக்கப்பட்டது. தவிர, இந்நிறுவனத்தின் கட்டுப்பாட்டில், கொடைக்கானல், காவலூர், ஹன்லே (லடாக்), கௌரிபிதனூர் (பெங்களூரு) ஆகிய இடங்களிலுள்ள வானாய்வகங்கள் செயல்படுது. நாட்டின் பிரதான ஆராய்ச்சி மையங்களுள் இதுவும் ஒன்று.

பெங்களூரைத் தலைமையிடமாகக்கொண்டு இந்திய வானியற்பியல் கழகம் இயங்கியபோதும், காவலூரையே தனது பணிக்களமாகக் கொண்டு, தீவிர ஆய்வுகளில் பாப்பு ஈடுபட்டார். தனது பெருங்கனவான மாபெரும் தொலைநோக்கியை உருவாக்கும் பணியில் அவர் தீவிரமாக உழைத்தார். அவரது முயற்சியின் பலனாக, 2.34 மீட்டர் விட்டமுடைய அதி நவீன தொலைநோக்கி காவலூரில் 1985-இல் நிறுவப்பட்டது. 1986-இல் அது செயல்பாட்டுக்கு வந்தது. ஆனால், தனது கனவு நிறைவேறும்முன், 1982, ஆக. 19ல் வைணு பாப்பு மறைந்தார். அவரது சிறப்பை உணர்ந்த அரசு, காவலூர் வானாய்வகத்துக்கும், புதிய தொலைநோக்கிக்கும் வைணு பாப்புவின் பெரையே சூட்டி கௌரவித்தது (Vainu Bappu Observatory). 

சுமார் 40கி.மீ. தொலைவிலும் இருக்கும் 25 பைசா நாணயத்தையும் மிகத் துல்லியமாகக் காணக்கூடிய அளவுக்கு திறன் படைத்தது இந்த தொலைநோக்கி. இதன்மூலம், உலக அளவில் பிரமாண்டமான வானியல் தொலைநோக்கிகளைக் கொண்டுள்ள நாடுகளின் பட்டியலில் இந்தியாவும் இணைந்தது. பல புதிய வானியல் நிகழ்வுகள் இதன்மூலம் கண்டறியப்பட்டது.

பெல்ஜியம் அறிவியல் கழகம், அமெரிக்க வானியல் சங்கம் ஆகியவற்றின்  கௌரவ உறுப்பினராக பாப்பு இருந்தார். சர்வதேச வானியல் சங்கத்தின் துணைத் தலைவராகவும் (1967- 1973), தலைவராகவும் (1979- 1982) வைணு பாப்பு செயல்பட்டுள்ளார். சாந்தி ஸ்வரூப் பட்நாகர் விருது (1970), பத்மபூஷண் விருது (1981) ஆகியவற்றை இந்திய அரசு அவருக்கு வழங்கி கௌரவித்தது. இந்தியாவின் வானியல் ஆய்வில் புதிய பரிமாணத்தை ஏற்படுத்திய வைணு பாப்புவால், வானையும் அளக்கும் திறமை நமக்கு வாய்த்தது.

2.3மீட்டர் விட்டமுடைய தொலைநோக்கி..

1மீ தொலைநோக்கியின்  உதவியுடன் 1972  வியாழன் கோளின் நிலாவான கானிமீடிற்கு வளிமண்டலம் உள்ளது கண்டுபிடிக்கப்பட்டது. 1977 - யுரேனசு கோளைச் சுற்றி வளையம் இருப்பது பட்டாச்சார்யா, குப்புசாமியால் கண்டுபிடிக்கப்பட்டு   வைணு பாப்புவினால் தந்தியனுப்பப்பட்டு அனைத்துலக வானியல் சங்கம் - ஐ ஏ யூ-வினால் பதிவு செய்யப்பட்டது .

45 செ.மீ சிமிட் தொலைநோக்கியின் உதவியுடன் 1988 பிப்ரவரி 17ல் ஒரு சிறுகோள் (minor planet) ராஜமோகன் என்பவரால் கண்டுபிடிக்கப்பட்டது.  இந்தியா கண்டுபிடித்த இருபதாம் நூற்றாண்டின் முதல் (சிறிய) கோள் அதுவே.  அதற்கு, கணித மேதை ராமானுஜன் நினைவாக 4130 ராமானுஜன் என்று பெயரிடப்பட்டுள்ளது . 

 சனி கோளைச் சுற்றி ஒரு மெல்லிய கோள்வெளி வளையம் இருப்பதை 1984ல்தான்காவலூரிலிருந்து முதலில் கண்டுபிடிக்கப்பட்டது.  ஒவ்வொரு சனிக்கிழமையும் மாலை 6 மணியிலிருந்து இரவு 10 மணி வரை வைணு பாப்பு தொலைநோக்கி எவ்வாறு இயங்குது என பார்வையாளர்களுக்கு காட்டப்படும். வானம் தெளிவாக இருப்பின் 15 செ.மீ பார்வையாளர் தொலைநோக்கி மூலம் இரவு நேரத்தில் வானத்தினை பார்க்க அனுமதிக்கப்படும். 

சென்னையிலிருந்து கிட்டத்தட்ட 200கிமீ தூரத்தில் இருக்கு. வாணியம்பாடி வரை ரயில்ல போகலாம். அல்லது பேருந்து மூலமாகவும் போகலாம். வேலூர், ஓசூரிலிருந்துலாம் நேரடி பேருந்து இருக்கு. இல்லன்னா, தின்பண்டம், அண்டா குண்டா, அடுக்குச்சட்டி, உடைகள், மோதிரம், செயின், பழங்கள்ன்னு சீரோடு வந்து நம்ம வீட்டில் விருந்து சாப்பிட்டு மறுசீராய் உடை, பழம், தேங்காய்லாம் வாங்கிட்டு காவலூர் போகலாம்.  

 தான் உள்ளவரை இந்தியர்களின் அறிவுத்திறமையையும், வைணு பாப்புவின் அயராத உழைப்பினையும் மௌனமாய் உலக அரங்கில் பறைச்சாற்றும் வைணு பாப்பு வானாய்வகத்தை பார்க்க எப்போ வர்றீங்க சகோஸ்?!

நன்றியுடன்,

ராஜி.

பெண்களுக்கு இதய நோய் வருவது குறைவாம்!! - உலக இருதய தினம்

உடலுக்குள் மறைவா கைப்பிடி அளவில் இருக்கும் ஒரு உறுப்புதான் இதயம்.  மனிதன் உயிர்வாழ மிக முக்கியமான உறுப்பு இதயம். இதை மறுப்பதற்கில்லை. ஆனா இந்த இதயம் காதலர்கள்கிட்டயும், சினிமாக்காரங்கக்கிட்டயும் மாட்டிக்கிட்டு படும் பாடு இருக்கே! அடடா! சொல்லி மாளாது. சதா சர்வகாலமும் இயங்கிட்டிருக்கும் இகைப்பிடி அளவிலான இந்த  இதயம் நின்னுட்டா அம்புட்டுதான் சொந்தக்காரவுகளுக்குலாம் சொல்லி அனுப்பிட வேண்டியதுதான்!  இதயம், சிறுநீரகம், மூளை மாதிரி உடல் சம்பந்தப்பட்ட வேலைகளை மட்டும் பார்த்துக்கிட்டு இருந்தா ஒரு பிரச்சனையுமில்ல. ஆனா, இந்த இதயமிருக்கே மனம், காதல், உணர்ச்சிகளோடு சம்பந்தப்பட்டு அதும் துடிச்சு நம்மையும் துடிக்க வைக்குது :-( . இப்படி படாத படுத்தும் இதயத்தை பத்திரமா  பாதுக்காக்கும் பொருட்டு  உலக இருதய நாள்ன்னு ஒவ்வொரு வருடமும் செப்டம்பர் மாதம் 29ம் நாள் கொண்டாடப்படுது.  இதயத்தை பாதுக்காக்கனும்ன்னா பந்தம், பாசம், காதல்ல வீழாம இருந்தாலே போதும்ன்னு கூட்டத்துல சவுண்ட் விடுறது யாருப்பா?! நீ சொல்றதுலாம் சரிதான். உணர்ச்சி வசப்படுதலே இதயம் பாழாக முக்கிய காரணி. அதோடு சேர்த்து இன்னமும் காரணங்கள் இருக்கு. அதுலாம் என்னன்னு பார்க்கலாம். 

இதயத்தின் அழகிய துடிப்புகளே நாம் உயிர்ப்போடு இருப்பதன் அடையாளம். துடிப்புகளின் ஏற்ற இறக்கமே நோய்களின் அறிகுறி. துடிப்புகளின் மவுனம் அதுவே மரணத்தின் அறிகுறி. இறைவனின் படைப்புகளில்  ஓர் அற்புதத் தொழிற்சாலைன்னா அது இதயம்தான்.   நம்  மூடிய கையின் அளவில்,  மார்பின் இடப்புறத்தில் இருக்கும் இந்த இதயம், நாம் பிறக்கும்முன்பே கருவிலேயே துடிக்க ஆரம்பிக்குது. நாலு அறைகளையும்,  நான்கு வால்வுகளையும் கொண்டது.  இதயம் Myocardium என்னும் தசைகளால் ஆனது. உடலில் உள்ள அனைத்து அசுத்த ரத்தமும் இதயத்தின் வலது மேல்அறைக்கு வரும். மூச்சுக்குழாய் வழியாக வெளியிடப்படும் காற்றின்மூலம் ரத்தத்தில் உள்ள அசுத்தம் வெளியேறும். அதேமாதிரி உள்ளிழுக்கும் மூச்சுக்காற்றின்மூலம் ரத்தம் சுத்தம் செய்யப்படும். இவ்வாறு சுத்தம் செய்யப்பட்ட ரத்தமானது ஒவ்வொரு முறை இதயம் சுருங்கி விரியும்போதும் உடல் முழுவதும் பரவும். உடலுக்குத் தேவையான சுத்த ரத்தத்தை எடுத்துச் செல்லும் பெரும்பணியை இதயத்தின் பெருந்தமனி செய்யுது.

இதயம் துடிக்குறது நின்னுடுச்சுன்னா  கெட்ட ரத்தம் சுத்தமாகாது. உடலிலுள்ள திசுக்களுக்கு எனர்ஜி தரும் குளுக்கோஸ் மற்றும் தாது உப்புகள்லாம் சரியாக கிடைக்காது. தேவையான எனர்ஜி கிடைக்கலைன்னா திசுக்கள் பாதிக்கப்படும்.  திசுக்கள் புதுப்பிக்க  முடியாம போயி, முடிவில் உடல் செயலிழந்து இறப்பு நேரிட வாய்ப்புண்டு. இதயத்துக்கு செல்லுது. ரத்தக் குழாய்கள் மூலம் ஆக்சிஜன் கலந்த ரத்தம் இதயத்துக்கு செலுத்தப்படுது. இவ்வாறு செலுத்தப்படும் ரத்தத்தில் ஆக்சிஜன் அளவு குறைவாக இருந்தாலோ இல்ல ஆக்சிஜன் இல்லாம போனாலோ மாரடைப்பு ஏற்படும். இதற்கு முக்கியக் காரணம் ரத்தக் குழாயில் ஏற்படும் அடைப்புகளே! ரொம்பவே உணர்ச்சிவசப்படும்போது,  மன உளைச்சலில் இருக்கும்போது, இதய ரத்தக்குழாய்கள் சில நொடிகள் முழுமையாகச் சுருங்கும். இதனாலும் மாரடைப்பு ஏற்படும். மன அழுத்தம், புகை மற்றும் மதுப்பழக்கம் உள்ளவர்களின்  கல்லீரலில் எல்.டி.எல்ன்ற கெட்ட கொலஸ்ட்ரால் அதிகமா உருவாகும். இது ரத்தத்தில் கலந்து இதயத்துக்குச் செல்லும் ரத்தக் குழாயில் அடைப்பு உண்டாகி அதன் காரணமாகவும் மாரடைப்பு ஏற்படும்.

அதிகப்படியான கொழுப்புள்ள உணவுகள், உடலில் சேரும் கலோரிகளை எரிக்குமளவுக்கு உடல் உழைப்பு இல்லாமை, உடல் பருமன், மனஅழுத்தம், புகைபிடித்தல், குடிப்பழக்கம், ரத்தக்கொதிப்பு, சர்க்கரை நோய், ரத்தத்தில் கொழுப்பின் அளவு அதிகரித்தல், மன உளைச்சல்லாம் இதயத்தின் சீர்க்கேட்டுக்கு வழிவகுக்கும்.   கொழுப்பு சேராம இருக்க உணவுக்கட்டுப்பாட்டோடு உடற்பயிற்சி செய்து ஓரளவு இதயத்தை பாதுக்காக்கலாம். ஆனா, மன உளைச்சல், பணிச்சுமை, கவலை, பதற்றம், ஆவேசம், வீட்டுச்சூழல், வெளிப்புறச்சூழல் காரணிகள்தான் இதயத்துக்கெதிரான பெரும் விளைவுகளை ஏற்படுத்தும். இப்படியான எதிர்மறையான எண்ணங்களால் கார்டிசால், அட்ரீனல் ஹார்மோன்கள் ரத்தத்தில் கலந்து உடலின் எந்தப் பகுதியிலும் ரத்தக்குழாயில் அடைப்பை ஏற்படுத்தும். அதனால், தியானம், யோகா செய்து மனசை கட்டுக்குள் வைக்கலாம். 

சாப்பாட்டுக்கு பின்னும், வேகமா நடக்கும்போதோ இல்ல உணர்ச்சி வசப்படும்போதோ மார்பின் நடுப்பகுதியில் வலி ஏற்பட்டு, அந்த வலி தோள்பட்டை, கழுத்து இல்லன்னா வயிற்றுப் பகுதிக்குப் பரவி, மூச்சுவிடுவதில் சிரமமும், வியர்த்து கொட்டுதல் மற்றும் திடீர்ன்னு  உடல் கணத்தல்லாம் மாரடைப்பின் அறிகுறி.  குடி, மதுப்பழக்கம், பணிச்சுமை, மன அழுத்தம்லாம் சட்டுன்னு ஆண்களை தாக்கிடும். அதனால், ஆண்களுக்கே பெருமளவில் மாரடைப்பு ஏற்படும். பெண்களுக்கு இதய நோய் வருவது காரணம்(பெண்களுக்கு இதயம்ன்னு ஒன்னு இருந்தால்தானேன்னு கப்பித்தனமா கமெண்டக்கூடாது) இயற்கையாகவே பெண்களின் உடலில் ஈஸ்ட்ரோஜென் என்ற  ஹார்மோன் சுரப்பதால் பெண்களுக்கு  இதய நோய் வருவது அபூர்வம்.  எதிர்மறையான எண்ணங்கள், ஒழுங்கற்ற மாதவிடாய், இன்சுலின் மாதிரியான மருந்துகளினால் இந்த ஈஸ்ட்ரோஜென் ஹார்மோன் சுரப்பில் மாறுபாடு ஏற்பட்டு இப்பலாம் பெண்களுக்கும் இதயம் சம்பந்தமான நோய்கள் வருது.

30 வயசுக்கப்புறம் வருடத்துக்கு ஒருமுறை எல்லாருமே ரத்தத்தத்தில்  சர்க்கரையின்,  கொழுப்பின் அளவு,  ரத்த அழுத்தம்  போன்றவறை பரிசோதிச்சுக்கனும். ரத்தத்தில்,  சி.பி.கே – எம்.பி (CPK-MB) என சொல்லப்படும் ‘கிரியாட்டின் ஃபாஸ்போகைனேஸ்’ன்ற என்ஸைம் அளவைப் பரிசோதித்துச்சுக்கனும். ஒருவேளை,  ஆரம்பக்கட்ட பரிசோதனைகளில் எதாவது பிரச்சனை இருந்தால், எக்கோ கார்டியோகிராம் பரிசோதனை, டிரெட்மில் பரிசோதனை, ஆஞ்சியோகிராம் மற்றும் நியூக்ளியர் ஸ்கேன் போன்ற பிரத்யேகப் பரிசோதனைகள்லாம் இதயத்துக்காக செய்யப்படுது.

வெங்காயம், பூண்டு, கீரை வகைகள், தக்காளி, வெள்ளரிக்காய், வாழைத் தண்டு, வாழைப்பூ, பீன்ஸ், கத்தரிக்காய், வெண்டைக்காய், காளிஃபிளவர், முருங்கைக்காய், புடலங்காய், கேரட், முள்ளங்கியைலாம் தினமும் சாப்பாட்டுல சேர்த்துக்கனும். ஆடை நீக்கிய பால், தயிர், சத்து பானங்களை அளவான இனிப்போடு குடிக்கனும்.  வெள்ளை சர்க்கரைக்காக நாட்டுச் சர்க்கரையைக் குறைந்த அளவு பயன்படுத்தலாம். முட்டையின் வெள்ளைக் கரு, மீன், மட்டன் சூப் அல்லது நாட்டுக்கோழி சூப்லாம். சாப்பிடலாம். நல்லெண்ணெய், சூரியகாந்தி எண்ணெய்,  சேர்த்துக்கலாம். அதுலாம்கூட சுத்திகரிக்கப்பட்டதா இல்லாம செக்கு எண்ணெயா இருந்தா நல்லது.

நெய், வெண்ணெய், பாலாடைக்கட்டி, தேங்காய் எண்ணெய், உருளைக் கிழங்கு, சர்க்கரை வள்ளிக் கிழங்கு, ஐஸ்க்ரீம், சாக்லேட், ஊறுகாய், காபி, முட்டையின் மஞ்சள் கரு, கோழியின் இறைச்சியைலாம் அதிகப்படியா உண்பதை தவிர்க்கனும்.  சர்க்கரைநோய் இருக்கவுங்க, மாம்பழம் மற்றும் பலாப்பழத்தைத் தவிர்ப்பது நல்லது. நடைப்பயிற்சி, சைக்கிளிங், நீச்சல் ,ரோபிக்ஸ் பயிற்சிகளை அவரவர் வசதிக்கேற்ப  செய்யலாம்.  யோகா , தியானம், பிராணாயாமம் மாதிரியானமூச்சுப் பயிற்சிகள்  செய்யலாம். இது மன அழுத்தத்தைக் குறைத்து, இதய ஆரோக்கியத்துக்கு உதவும்.  எப்பயும்  மகிழ்ச்சியா, மனநிறைவுடன் வாழ முயற்சி செய்யனும்.  தொடர்ச்சியா பலமணி நேரம் வேலை செய்யுறவங்க இடையிடையே கொஞ்சநேரம் ரெஸ்ட் எடுத்துக்கனும். நேர்மறை எண்ணத்தை உருவாக்கிக்கனும் இதுலாம் மாரடைப்பை முதல் நிலையிலேயே சரிசெய்யும். மறுமுறை மாரடைப்பு ஏற்படுவதைக் கட்டுப்படுத்தவும் செய்யும்.

யாருக்காவது மாரடைப்பு வந்தால் பாதிக்கப்பட்டவரின் உடைகளைத் தளர்த்தி, காற்றோட்டமான சூழ்நிலையில் உட்கார அல்லது படுக்க வைக்கனும். மூஞ்சில தண்ணீர் தெளிக்கக்கூடாது. பாதிக்கப்பட்டவரின் இடப்புறமாக நின்று, கைகளை இடப்புற மார்புப்பகுதியில் வைத்துத் தொடர்ந்து அழுத்தனும். அதுக்காக ரொம்ப அழுத்தமா அழுத்தக்கூடாது. அது மார்பு எலும்பை எலும்பை உடைக்கக்கூடும்.  பாதிக்கப்பட்டவரின் மூக்கைப் பிடித்துக்கொண்டு, வாயோடு வாய் வைத்து வேகமா ஊதனும். பின்னர் மீண்டும் இட மார்புப்பகுதியில் அழுத்தம் கொடுக்கனும். உடனடியாக ஹாஸ்பிட்டலுக்கு கொண்டுபோகனும். அதிகப்பட்சம் 4 மணி நேரத்துக்குள் சிகிச்சை கிடைச்சா  உயிரிழப்பிலிருந்து காப்பாற்றலாம்.

மாரடைப்புக்கு ஆளானவங்களுக்கு பைபாஸ் சர்ஜரி,  பேஸ்மேக்கர், ஹார்ட்  அசிஸ்ட் டிவைஸ், செயற்கை எந்திரம்ன்னு சொல்லப்படும் எக்மோ மாதிரியான சிகிச்சைகள் அளிக்கப்பட்டு அவங்களை உயிர் வாழ வைக்க முடியும். ஆனா, அதுலாம் தற்காலிகாமானதுதான்.  70  வயதைத் தாண்டியவர்களுக்கு, அதிலும் புகை, மதுப்பழக்கம் உள்ளவர்களுக்கும், சர்க்கரை நோய் உள்ளவர்களுக்கும்  சைலன்ட் அட்டாக் வர வாய்ப்புகள் அதிகம். காலை 5 மணி முதல் 8 மணி வரைதான் பெரும்பாலும் சைலன்ட் அட்டாக் ஏற்படும். இரவு அதிக நேரம் விழித்திருப்பது, காலை எழுந்தவுடன் செய்ய வேண்டிய வேலைகளைப் பற்றிய மனஅழுத்தம் போன்றவைலாம் பல சைலன்ட் அட்டாக் ஏற்பட காரணம்.

இதய நோய், சர்க்கரை நோயின் பாதிப்பு  இந்தியாவில்தான் அதிகம். காரணம், இந்தியாவில் ஒவ்வொரு  வருசமும் 24 லட்சம் பேர் இதய நோய்களால் உயிரிழக்குறாங்க. கடந்த சில வருடங்களாக  20 வயதிலேயே இதய நோயால் பாதிக்கப்படுறவங்களின் எண்ணிக்கை அதிகரிக்குது.  30 முதல் 45 வயதினரின் எண்ணிக்கையும் சமீபமாக அதிகரித்து வருகிறது. நம்ம இதயம்  சராசரியா 300கிராம் எடை கொண்டது. இது ஒரு நாளைக்கு சராசரியா 1,00,000  முறைகளும் வருசத்துக்கு 30மில்லியன் முறையும், ஆயுள் முழுவதும் 2.5 பில்லியன் தடவையும்  துடிக்குது. ஒரு வருசத்துல 31 லட்சத்து 59 ஆயிரம் லிட்டர் ரத்தத்தை உடலுக்குள் பம்ப் செய்யுது. தன் ஆயுளில் 1மில்லியன் பேரல் ரத்தத்தை சுத்தம் செய்து, உடல் முழுக்க பம்ப் செய்யுது. (ஒரு பேரல் 117.34 லிட்டர் அளவு).  ஆண்களைவிட பெண்களுக்கு இதயத்துடிப்பின் எண்ணிக்கை அதிகம். அதேமாதிரி பெரிய உயிரனங்களின் இதயத்துடிப்பு குறைவாகவும், சிறிய உயிரினங்களின் இதயத்துடிப்பின் எண்ணிக்கை அதிகமாவும் இருக்கும் (யானைக்கு நிமிசத்துக்கு 20 -30, எலிக்கு 500 -600). மோதிர விரல் நீளமாய் இருக்குறவங்களுக்கு மாரடைப்பு வர வாய்ப்பு குறைவாம்

பல், ஈறுகளில் பிரச்சனை இருக்கவுங்களுக்கு மாரடைப்பு ஏற்பட வாய்ப்பு அதிகம். மார்பின் இடப்பாகம் இதயம் இருக்குன்னு சொன்னாலும் நெஞ்சின் நடுவில் இரண்டு நுரையீரலுக்கும் நடுவில்தான் இதயம் இருக்கு. இதயத்தின் அடிப்பாகம் இடப்பக்கம் சாய்ந்து இருக்குறதால, நமக்கு இதயம் இடப்பக்கமா இருக்குற மாதிரியும், அங்கதான் துடிக்குற மாதிரியும் நாம உணர்றோம். லப்டப்ன்னு உண்டாகும் சத்தம் இதயத்தின் நான்கு அறைகளும் திறந்து மூடுவதால் உண்டாவது. நாம தூங்கினாலும், விழித்திருந்தாலும், எந்த வேலை செய்தாலும் செய்யலைன்னாலும் இடைவிடாது துடிப்பது இதயம் மட்டுமே! அதனால நமக்காக துடிக்கும் உறவுகளை கண்டுக்காம இருக்க மாதிரி இல்லாம இதயத்தை பேணி காப்போம்!

நன்றியுடன்,

ராஜி

உடலின் கழிவுத்தொழிற்சாலை எதுன்னு தெரியுமா?! - உலக சிறுநீரக தினம்

நம்ம ஊர்ல  கெட்ட வார்த்தையைக்கூட பொதுவெளில பேசிடுவாங்க. ஆனா, சிறுநீர் கழிக்கனும், ரெஸ்ட் ரூம் எங்க இருக்குன்னு கேட்க அத்தனை கூச்சம். ஆணுக்கு இந்த பிரச்சனை இல்லை.  மரத்தடியில், கார் சந்துல, ரோட்டோரத்துல அவங்க இம்சை கழிஞ்சிடும். ஆனா பெண்ணுக்கு?! கொஞ்சம் முன்னாடி போய்க்கிட்டிருங்க. ஒன்னுக்கு அடிச்சுட்டு வந்துடுறேன்னு சொல்லி ரோட்டோரத்தில் ஒதுங்கும் நம் வீட்டு ஆண்களுக்கே பெண்களின் அவஸ்தை தெரியாத போது மத்தவனுக்கு எப்படி தெரியும்?!    ஒதுங்க இடம் கிடைக்காம அடக்கி அடக்கி நோய் தொற்றுக்கு ஆளாகுபவர்களில் பெண்கள்தான் அதிகம். அப்படியே ஒதுங்க இடம்கிடைச்சாலும் நம்மூர் பப்ளிக் டாய்லட் சுத்தம் பத்திதான் உங்களுக்கு தெரியுமே! அதனாலயும் நோய் தொற்று உண்டாகுது. என்னடா என்னிக்கும் இல்லாம இன்னிக்கு மூக்கை சுளிக்க வைக்கும் பதிவுன்னு சிந்திக்குறவங்களுக்கு இன்னிக்கு உலக சிறுநீரக தினம்ன்னு நினைவுப்படுத்த கடமைப்பட்டிருக்கேன்.

ஒவ்வொரு ஆண்டும் மார்ச் மாதம் இரண்டாவது வியாழக்கிழமை அன்று உலக சிறுநீரக தினம் கொண்டாடப்படுது.  அதன்படி பார்த்தால் இந்த வருசம் மார்ச் 8 அன்னிக்குதான் இத்தினம் அனுஷ்டிக்கப்படுது. உடலிலிருந்து வெளியேறும் ஒரு கழிவுப்பொருள்தானே?! அதை சேமிக்க ஒரு பை. இதை கொண்டாட ஒரு தினமான்னு ஆச்சர்யப்படுறவங்களுக்கு சிறுநீரகத்தின் முக்கியத்துவம் தெரியலைன்னுதான் சொல்லனும்.  சிறுநீரகத்தை காப்பதும், ஆரம்பக்காலகட்டத்தில் நோயை கண்டறிவதும், அந்த நோய் பற்றிய விழிப்புணர்வு உண்டாக்கும் நோக்கில் இத்தினம் அனுஷ்டிக்கப்படுது.  66 நாடுகளின் ஒத்துழைப்புடன் 2006ம் ஆண்டுதான் முதன்முதலா இத்தினம் உலக சிறுநீரக தினமா பிரகடனப்படுத்தப்பட்டது. இந்நாடுகளின் எண்ணிக்கை இரண்டே ஆண்டில் 88ஆ உயர்ந்ததிலிருந்து  சிறுநீரகத்தின் முக்கியத்துவத்தை புரிஞ்சுக்கலாம்.

நம்ம உடம்பிலிருக்கும் நச்சுக்களையும், அதிகப்படியான நீரினையும் வெளியேற்றி நம்   ஆரோக்கியத்தைக் காக்கும் பணியினை செய்வது இந்த   சிறுநீரகம். "இந்தியாவில் ஒரு மில்லியன் நபர்களில் 800 பேர் நாட்பட்ட சிறுநீரக நோய் பிரச்னையால் அவதிபடுகிறார்கள்" என்கிறது சுகாதார துறை அமைச்சகம். இதில் அதிர்ச்சி தரக்கூடிய ஒரு செய்தி என்னவென்றால், பலர் தங்களுக்கு சிறுநீரகம் பாதிப்பு இருக்குன்னே தெரியாம இருக்குறதுதான். நோய் முத்திப்போன  நிலையில்தான் தனக்கு இன்ன பாதிப்ப்பு இருக்குன்னு தெரிஞ்சுக்குறாங்க.   

சிறுநீரக நோய் ஆரம்பகால பாதிப்பு மற்றும் நாட்பட்ட சிறுநீரக பாதிப்பு என இரண்டு வகைப்படும். குறுகிய கால சிறுநீரக பாதிப்பானது ஆரம்பக்காலக்கட்டத்தில் கண்டறிந்தால் மாத்திரை, ஊசி , உணவுக்கட்டுப்பாடு மூலம் குணப்படுத்த முடியும் இல்லன்னா அறுவை சிகிச்சை, டயாலிஸ், மற்றும்  உறுப்பு மாற்றுன்னு சிகிச்சை பெரிசா இருக்கும். 

உயர் ரத்த அழுத்தமும், சர்க்கரை நோயுமே சிறுநீரக பாதிப்புக்கு முக்கிய காரணமாகும். அதில்லாம அசுத்தமான நீர், ரசாயணப்பொருட்கள் கலந்த உணவு, போதிய நீர் அருந்தாமை,  சத்தான உணவு பழக்கம் இல்லாமை, சிறுநீர் அடக்கி அடக்கி உண்டாகும் நோய் தொற்று, மது, புகை பழக்கம். உடல் பருமன், காசநோய், அளவுக்கு அதிகமான மருந்துகள் உபயோகித்தல்.. என இப்படிப்பட்ட காரணமும் சிறுநீரகம் பாதிக்கப்பட காரணம் உண்டு. 

இதயம், மூளை, கண் மாதிரியான உறுப்புகளுக்கு கொடுக்கும் முக்கியத்துவம் சிறுநீரகத்துக்கு நாம கொடுக்குறதில்லை. நம்ம உடம்பிலிருக்கும் கழிவுகளையும், குடிச்ச தண்ணியையும் வெளியேற்றும் ஒரு உறுப்புதானேன்ற அலட்சியம் நம்மில் பலருக்கு, ரத்தத்தில் இருக்கும் கழிவுகளை பிரித்தெடுப்பது அத்தனை சுலபமில்லை.  ரத்தத்தில் இருந்து பிரிப்பதும் பின்னர் மீண்டும் கிரகிப்பது என இதன் செயல்பாடு  கிட்டத்தட்ட ஒரு ரசாயன பேக்டரிக்கு ஒப்பானது. 

மனிதனின் அடிமுதுகுப்பகுதியில்  பீன்ஸ் விதை வடிவில் உக்காந்திருக்கும்  இரண்டு சிறுநீரகங்கள். ஒவ்வொன்றும் 10-15 செ.மீ உயரமும் 160 கிராம் எடையும் கொண்டதா இருக்கும். சிறுநீரகம் என்றதும் ஒரு மிகப்பெரிய வடிகட்டி என நாம நினைச்சுப்போம். ஒவ்வொரு சிறுநீரகத்திலும், ரத்தத்தை சுத்தம் செய்யும் அமைப்பான நெஃப்ரான்கள் தலா 10 லட்சம் இருக்கும். இந்த நெஃப்ரான்களில்தான், ரத்தக் குழாய் போன்ற வடிகட்டி இருக்கும். சிறுநீரகத்தினுள் ரத்தம் நுழைந்ததும் நெஃப்ரான்கள் இரண்டு கட்ட செயல்பாட்டின் மூலம் ரத்தத்தில் உள்ள தாதுஉப்புக்கள் உள்ளிட்டவற்றைப் பிரிக்கும்.  பிரிக்கப்பட்ட கழிவுகள் மீண்டும் மற்றொரு குழாய் வழியே பயணிக்கும்.  அங்கே, உடலுக்குத் தேவையான தாதுஉப்புகள் மீண்டும் கிரகிக்கப்பட்டு, மிச்சமிருக்கும் கழிவுகள் அனைத்தும்  சிறுநீராய் வெளியேற்றப்படும். 

இரு சிறுநீரகங்களும் சேர்ந்து ஒரு நாளைக்கு  தோராயமா 190 – 200 லிட்டர் ரத்தத்தைச் சுத்தம் செய்யும்.  இதில், கிட்டத்தட்ட 1.8 லிட்டர் சிறுநீராக வெளியேறுகிறது. மீதம் உள்ளவை மீண்டும் உடலுக்குள் செலுத்தப்பட்டு பயன்படுத்தப்படுகிறது. இப்படிப் பிரிக்கப்படும் சிறுநீரானது சிறுநீர்ப்பையில் சேகரிக்கப்படுகிறது.

கழிவுகள், நச்சுகளை பிரிச்சு ரத்தத்தை சுத்தம் பண்ணுவதும்,  ரத்தத்தில் இருக்கும்  சோடியம், பொட்டாசியம் போன்ற எலெக்ட்ரோலைட் அளவைப் பராமரிக்குது. ரத்த அழுத்தத்தைக் கட்டுக்குள் வைக்கிறது. எரித்ரோபோய்டின் என்கிற ஹார்மோனை உற்பத்தி செய்யுது. இந்த எரித்ரோபோய்டின்தான் ரத்த சிவப்பணுக்கள் உற்பத்தியைத் தூண்டுபவை. வைட்டமின் டி-யைச் செரிவானதாக்கி, எலும்புகள் பயன்படுத்துமாறு பக்குவப்படுத்தி வைக்கின்றது. உடலின் நீரின் அளவை சமநிலையில் வைப்பதும் சிறுநீரகத்தின் வேலை. 

இந்த சிறுநீரகம் பாதிக்கப்பட்டா  நச்சுக்கள் உடலிலேயே தங்கிவிடும். இதனால், கால் வீக்கம், வாந்தி, குமட்டல், தூக்கமின்மை, சுவாசித்தலில் சிரமம் போன்ற பிரச்னைகள் ஏற்படும். ஆரம்பக்காலத்திலேயே பிரச்னையைக் கண்டறிந்து சிகிச்சை பார்க்கலைன்னா  சிறுநீரகங்கள் முற்றிலுமாகச் செயலிழந்துடும். இதனால், உயிரிழப்புகூட ஏற்படலாம்.   ஒரு வீட்டுக்கு கழிவுநீர் வடிகால் இல்லன்னா வீடு எப்படி நாறிப்போகுமோ அதுமாதிரி சிறுநீரகம் இல்லன்னா உடல் ஆரோக்கியம் நாறிப்போகும். 

சிறுநீரகம் பாதிக்கப்பட்டா சிறுநீர் வெளியேறும் அளவு குறையும். பசி எடுப்பது குறையும். தூக்கம் வராது. வாந்தி வரும். கடுமையான உடல் சோர்வு, உடல் அரிப்பு, கை கால், முகத்தில் வீக்கம், மூச்சிளைப்பு , வாய் துர்நாற்றம், முதுகு வலி என அறிகுறிகள் தோன்றும். அப்பவே கவனிச்சா சிறுநீரக பாதிப்பிலிருந்து தப்பிக்கலாம். 

உயர் ரத்த அழுத்தம்தான் சிறுநீரகத்தின் முதல் எதிரி. அதனால முறையான உணவுக்கட்டுபாடு, மற்றும் உடற்பயிற்சி, வாழ்க்கை முறை மாற்றங்களால் ரத்த அழுத்தத்தை கட்டுக்குள் கொண்டு வரனும்.  உணவில் உப்பை குறைத்து சாப்பிடுங்க. கருவாடு, ஊறுகாய், அப்பளம், சிப்ஸ் மாதிரியான உப்பு அதிகமா இருக்கும் பொருட்கள், பாக்கெட்டில் அடைக்கப்பட்ட உணவு இதுலாமும் சிறுநீரகத்துக்கு எதிரி. அதனால அதையெல்லாம் எப்பவாவது எடுத்துக்கலாம்.  எப்பயுமே எடுத்துக்க கூடாது.  சர்க்கரை நோயை கட்டுக்குள் வைக்கனும். சிறுநீரை அடக்கி வைக்கக்கூடாது. அப்படி ஒரு உணர்வு வரும்போதே ரெஸ்ட் ரூம் போய் வந்திரனும். ஒவ்வொரு முறையும் ரெஸ்ட் ரூம் போகும் போது அந்தரங்க உறுப்புகளை சுத்தப்படுத்திக்கனும். அதுக்காக பெண்கள் சோப், அந்த உறுப்புகளுக்கான லிக்விட் பயன்படுத்தக்கூடாது, ஏன்னா, நன்மை செய்யும் பாக்டீரியாக்களை இவை அழிச்சுடும். மது, புகை உபயோகிக்கக்கூடாது.  2 முதல் 3 லிட்டர் தண்ணீர் குடிக்கனும்.  மருத்துவர் சொல்லாம நாமளா எந்த மாத்திரை மருந்துகளும் எடுத்துக்க கூடாது.  இப்படிலாம் செஞ்சா சிறுநீரகத்தை நோய் பாதிப்புல இருந்து காப்பாத்தலாம்....

சிறுநீரகத்தையும் கவனிப்போம்..... நோயில்லாமல் வாழ்வோம்...

நன்றியுடன்,

ராஜி.