மார்க்கெட் வயர் கூடை - கைவண்ணம்

கால் உடைஞ்சு அம்மா வீட்டில் இருந்தபோது  பின்னியது. பெட் ரெஸ்ட்ன்னு ஒரு மாசம் செமயா போரடிக்கும். அம்மா பார்க்கும் சீரியல் இன்னும் கடுப்பேத்தும். அப்பாவை வயர் வாங்கி வரச்சொல்லி பின்னியது. அப்பாக்கு நிறங்களுக்கான வேறுபாடு தெரியாது. மொத்தம் நாலு வயர் வாங்கி வா, அதில் ஒரே கலர்ல ரெண்டு பாக்கெட்ன்னு ரெண்டு கலர், அதிலும் லைட் கலர்,  டார்க் கலர்ன்னு பார்த்து வாங்கி வான்னு சொன்னால் இப்படி வாங்கி வந்தார்.

 மகளின் மாமியார் வீட்டிற்கு மார்க்கெட் போக, பூஜைக்கூடை, கடைக்கு போக சின்ன கூடைன்னு மொத்தம் மூணு கூடை போட்டுக்கொடுத்தேன். அதை பார்த்து மகளின் நாத்தனார் கேட்க அவங்களுக்காக பின்னியது இது.. இது கிராஸ் கட் கூடை.. வயர் கொஞ்சம் பத்தாம போக கைப்பிடி சிறுசாகிட்டது.

இது அண்ணன் வீட்டுக்காக பின்னியது.. 

நல்லா இருக்கா மக்களே!?

நன்றியுடன்,

ராஜி

பிள்ளையார் குடை - கைவண்ணம்

சின்ன வயசுல வினாயகர் சதுர்த்தி பண்டிகைக்கு  அப்பாவோடு போய் பிள்ளையார் சிலை வாங்கி வருவேன். எங்க வீட்டில் அச்சுப்பிள்ளையார்தான் வைப்பாங்க. சிலை செய்றவர் ரெண்டு அச்சு வச்சிருப்பார். களிமண்ணை குழப்பி, ரெண்டு அச்சுலயும் நிரப்பி, ரெண்டு அச்சையும் ஒன்னா சேர்த்து, கொஞ்ச நேரம் கழிச்சு அச்சை கழட்டினா, பிள்ளையார் வந்திருவார். அவருக்கு தங்க கலர் ஜிகினா பொடியை கரைச்சு பிள்ளையார் சிலை முழுக்க தடவி கண்ணுக்கு கருப்பும் சிவப்புமா இருக்கும் குன்றின்மணி வச்சா பிள்ளையார் ரெடி. அச்சிலயே  எலி இருக்கும். ஆனா, கண்ணுக்கு தெரியாது. அதனால், எலி செய்யவும், பிள்ளையாருக்கு பின்னாடி குடையை சொருகவும் கொஞ்சூண்டு களிமண் கொடுப்பார். என் பொண்ணு மண்டைக்குள்ளயே எக்கச்சக்கமா களிமண் இருக்கு. அதைக்கொண்டு ஊருக்கே பிள்ளையார் செய்யலாம்ன்னு அப்பா சொல்லாம வாங்கிட்டு வருவார்.

கடைக்காரர் கொடுத்த களிமண்ணை கொண்டு  எலி செய்வேன்.  பிள்ளையார் பிடிக்க குரங்கான கதைதான் எல்லாருக்கும் தெரியும். ஆனா, எலி முயலான கதைலாம் நடக்கும். எலி பிடிச்சு, மிச்சமீதி மண்ணில் சின்னதா பிள்ளையார் செய்வேன். அந்த பிள்ளையாருக்கு பாண்ட்ஸ் பவுடர், கண்மை, நெல்மணி கொண்டு அலங்காரம் செய்வேன். பிள்ளையார் சுமாரா இருந்தாலும்,   நான் மேக்கப் போட்ட பின்  அழகாகிடுவார். என் பாட்டு வாத்தியார் வீட்டில் ஒருமுறை நூலைக்கொண்டு அவரே செஞ்ச பிள்ளையாரை பார்த்ததிலிருந்து நானே பிள்ளையார் குடை செய்ய ஆரம்பிச்சுட்டேன்.  இந்த வருசமும் நம்ம கைவண்ணத்துல செஞ்ச குடைதான் பிள்ளையாருக்கு. போரடிக்குதுன்னு என்னிக்கு தூக்கி அடிக்க போறார்ன்னு தெரில!!

தேவையான பொருட்கள்:

வுல்லன் நூல்

குச்சி

பழைய நியூஸ் பேப்பர்

கற்கள்

பசை

மூங்கில் குச்சி, இல்லன்னா, சைக்கிள் போக்ஸ் கம்பில செஞ்சா வளையாது. எனக்கு இது ரெண்டுமே கிடைக்காததால் பயன்படுத்தாத தென்னந்துடைப்ப குச்சியை எடுத்துக்கிட்டேன்.  ஒரே அளவில் ஆறு இல்லன்னா எட்டு குச்சி எடுத்துக்கனும். ப்ளஸ் குறி மாதிரி குச்சியை வச்சு நல்லா இறுக்கமா கட்டிக்கனும். 

அடுத்து, இன்னொரு குச்சியை வச்சி கட்டிக்கனும். எங்க வீட்டுல இருக்குறதுங்க மூணு குச்சி போதும்ன்னு சொன்னதால் அத்தோடு விட்டுட்டேன். இன்னொரு குச்சியை கட்டிக்கிட்டா இன்னும் நல்லா இருந்திருக்கும். 

ஒவ்வொரு முறையும் குச்சில ஒரு நூலை சுற்று சுத்திக்கனும். இப்படியே நூலை சுத்திக்கிட்டே இருக்கனும். கலர் மாத்தனும்ன்னு நினைச்சா நூலை கட் பண்ணி, இன்னொரு நூலை முடி போட்டுக்கிட்டால் போதும். 

பிடிச்ச கலர் நூல்களை சுத்திக்கனும். நான் மிச்சம் மீதி நூலை சுத்திக்கிட்டேன்.

குஞ்சலத்துக்கு வுல்லன் நூலை கையில் சுத்தி வளையமாக்கிக்கனும்...

நூல் பிரிஞ்சுடாம இருக்க, வளையத்துக்குள் இன்னொரு நூலை நுழைச்சு முடி போட்டுக்கனும்.  முடி போட்ட எதிர் முனையை கட் பண்ணிக்கிட்டால் குஞ்சலம் ரெடி. 

ஆறு குச்சிக்கு ஆறு குஞ்சலம் ரெடி.

க்ளூ போட்டும் ஒட்டிக்கலாம் இல்ல ஒரு நூல் கொண்டும் குச்சியில் இணைக்கலாம். 

இப்படியே எல்லா குஞ்சலத்தையும் இணைச்சுக்கனும். 

அங்கங்க கற்களை ஒட்டிக்கிட்டா குடையின் மேல்பகுதி ரெடி. 

குடையின் கைப்பிடிக்கு பழைய நியூஸ் பேப்பரை கனமான கொம்பு மாதிரி சுத்திக்கனும். நியூஸ் பேப்பர் தெரியாம இருக்க வுல்லன் நூலை சுத்திக்கனும்.

இப்படி வெறுமனே இருந்தால் நல்லா இருக்குமா?! அதனால் சில்க் த்ரெட் நூலில் பத்து இழை எடுத்து சுத்திக்கிட்டேன். 

குடையின் கைப்பிடி ரெடி.

குடையின் மேல்பகுதிக்குள் க்ளூவை வச்சு ஒட்டிக்கனும். 

பிள்ளையார் குடை ரெடி. ஒரு மணி நேரத்தில் ரெடி பண்ணிட்டேன். 

கடைகளில் பத்து ரூபாய்க்கு குடை கிடைக்கும். ஆனா, நம்ம கையால் செஞ்சால் ஒரு திருப்தி. எங்க வீட்டு சாமிக்கு வச்சு அழகு பார்த்தாச்சு.

பிள்ளையாருக்கு மட்டும்தான் குடையான்னு என் வீட்டு கடைக்குட்டி என் மூத்தார் பேரன் தன் தலையில் வச்சுக்கிட்டு அழகு பார்த்தபோது...

அடுத்த வாரம் இன்னொரு பிள்ளையாருக்கு பழைய சிடியில் செஞ்ச குடையை பார்க்கலாம்...

நன்றியுடன்,

ராஜி

வையர் கூடை பின்னுதல் முன்னோட்டம் - கிராஃப்ட் கார்னர்

எங்க போனாலும் எனக்கு வயர்கூடை கையில் இருக்கனும். வீட்டிலிருப்பது பழசாகி நைந்து போய் எப்ப வேணும்ன்னாலும் உசுர் போகும் நிலையில் இருப்பதால் புதுசா ஒரு கூடை பின்ன வேண்டிய சூழல்..  இந்த வாரம் அந்த முயற்சியில்தான்.... இப்ப சும்மா ட்ரையல் படம்தான்.. அடுத்த வாரம் கூடை முழுசும் பின்னி விரிவா பதிவாக்கிடுவேன்.

கூடை பின்னும் வயர் 40ரூபாய்க்கு கலர் கலரா  கிடைக்குது. வயர்ல ஒரு பக்கம் பள்ளமாவும், இன்னொரு பக்கம் கொஞ்சம் மேடாவும் இருக்கும்.  வயர் பின்ன பழகுறவங்க சின்ன சின்ன துண்டுகளில் முதல்ல பழகிக்கனும். 

ஸ்டார் கூடை, நெல்லிக்காய், சிவன் கண், கிராஸ் லைன், பிஸ்கட் முடிச்சு, அடுக்கு மல்லி முடிச்சு, பூசணிக்காய் கூடை, பூஜைக்கூடை,  ட்யூப் வச்சதுன்னு விதம் விதமா கூடை பின்னலாம். 

ஒரு கட்டு வயர்ல செஞ்ச கூடை  100 ரூபா வரை விக்கலாம். அது பெரும்பாலும் பிள்ளைகளுக்கு மதிய சாப்பாடு கொண்டு போகத்தான் வாங்குறாங்க. 

மிச்சம் மீதி வயர்ல நிலைவாசப்படி தோரணம், சாமிக்கு மாலை, யானை, பூச்சாடின்னு செய்யலாம். 

பிளாஸ்டிக் பைகளுக்கு மாற்றா பிளாஸ்டிக் வயர் கூடையான்னு கேக்கக்கூடாது. தினத்துக்கு ஒரு கவரைவிட அஞ்சாறு வருசத்துக்கு ஒரு கூடைன்றதால பெருசா சுற்றுச்சூழல் மாசுப்படாது. 

தொலைக்காட்சிகளின் ஆதிக்கம் அவரும்முன் மாலை வேளையில் படிப்பு வேலைலாம் முடிச்சுட்டு, தெரு பெண்களோடு சேர்ந்து  இந்த  கூடை பின்னுவதை பார்த்திருக்கோம்.  ஆனா இப்பத்திய பசங்க ட்வி, மொபைல்ன்னு இருக்குதுங்க.

2000ம் ஆண்டு தொடக்கம் வரை எங்க போனாலும் கையில் பை ஒன்றை கொண்டு போவோம். மெல்ல மெல்ல பிளாஸ்டிக் பைக்கு அடிமையானதோடு சோம்பேறியாகவும் ஆகிட்டோம். கைகளில் பைகளை கொண்டு போவது கௌரவக்குறைச்சலா நினைக்க ஆரம்பிச்சுட்டோம்.  அப்பலாம் எல்லார் வீட்டிலும் இந்த மாதிரி கூடை இருந்துச்சு.  

அடுத்தடுத்த வாரத்தில் வயர் கூடை பின்னும் நுணுக்கத்தை  படத்தோடு சொல்றேன்., மத்தவங்களுக்காக இல்லாட்டியும் என் பசங்களும் தெரிஞ்சுக்கனும்ன்னுதான். ஏன்னா, என் பொண்ணுங்களுக்கே இதில் ஆர்வமில்லை:-(  பைசாவை கொடுத்து எதையும் வாங்கலாம்ன்னு நினைக்கும் தலைமுறை அவங்க. ஆனா, எத்தனை ரூபா கொடுத்தாலும் மனத்திருப்தியை வாங்கமுடியாது. அந்த மனத்திருப்தி சின்ன சின்ன செய்கை, மெனக்கெடலால்தான் கிடைக்கும்

நன்றியுடன்,

ராஜி

மணித்தோரணம் - கிராஃப்ட் கார்னர்

சினிமாவுல காட்டுற மாதிரி எல்லா வாசப்படிக்கும் மணியாலான ஸ்க்ரீன் போடனும்ன்னு ஆசை. கோவம் வந்தா நானே எல்லாத்தையும்  பிச்சு போட்ருவேன்னும் உள்ளுக்குள் பயம்.  அதனால, ரெண்டு பெட்ரூமுக்கும் இடைப்பட்ட இடத்துல என் ஆசைக்கும், பயத்துக்கும் ஏத்த மாதிரி சிம்ப்ளா ஒரு கண்ணாடி தோரணம் செஞ்சு மாட்டியாச்சு. கோவத்துல பிச்சு போட்டா கொஞ்சமா வீணாப்போகுமே! அதான்....  என்னிக்கு கோவம் வந்து நான் இல்லன்னா அப்பு பிடிச்சு இழுத்து அறுக்கப்போறோமோ?! அந்த ஆண்டவனுக்குதான் வெளிச்சம்....

தேவையானப் பொருட்கள்:

வெவ்வேறு கலர் மீடியம் சைஸ் உருண்டை வடிவ கண்ணாடி மணிகள்,

சின்ன சைஸ் கலர் முத்து

குஞ்சலம் போல தொங்க விட எதாவது ஒரு வடிவத்துல கண்ணாடி மணி(என் பொண்ணுக்கு பிடிச்சது கதாயுதம் வடிவத்துல இருக்கும் மணி)

கத்தரிக்கோல்

நரம்பு இல்ல திக்கான நூல்

எல்லாத்தையும் எடுத்து வச்சுக்கோங்க.

முதல்ல கதாயுதம் வடிவத்துல இருக்கும் மணியை கோர்த்துக்கிட்டேன்...

எனக்கு பிடிச்ச கத்திரிப்பூ கலர் மணி...

அதுக்கடுத்து ஸ்கைப்ளூ கலர் மணியை கோர்த்துக்கிட்டேன். இப்படியே உங்க விருப்பத்துக்கு ஏத்த மாதிரி கோர்த்துக்கோங்க...

இடையிடையே கோல்டன் கலர் திலக வடிவ மணிகளையும் கோர்த்துக்கிட்டேன்....

எல்லாத்தையும் கோர்த்துக்கிட்டே வந்தா ஒரு சரம் ரெடி....

நடுவில் சின்ன சரம். அதுக்கடுத்து கொஞ்சம் பெரிய சரம், அதுக்கடுத்து இன்னும் கொஞ்சம் பெரிய சரம்ன்னு அழகா கோர்த்து ஆணி அடிச்சு மாட்டியாச்சு...

தோரணம் எப்படி இருக்குன்னு சொல்லுங்க...

தமிழ்மணம் ஓட்டுப்பட்டை.....
http://tamilmanam.net/rpostrating.php?s=P&i=1476634

நன்றியுடன்,
ராஜி