பொங்கல் பண்டிகை பட்டபாடு - வீட்டிலும்.... வெளியிலும்....

எங்க வீட்டில் பொங்கிய பொங்கல்...

யூ ட்யூப், கூகுள், ஃப்ளிக்கர், ட்விட்டர், வாட்ஸ் அப், ஃபேஸ்புக், பழைய கோல நோட்டு இதுலாம் பார்த்து, எந்த கோலம் போடலாம்ன்னு அலசி ஆராய்ஞ்சு சொந்தமா போட்ட கோலம். என்ன கரும்புதான் ஒன்னு பெருசாவும், இன்னொன்னு சிறுசாவும் போயிட்டுது :-( கலர் கொடுத்ததுலாம் பெரிய பொண்ணு. 

பொதுவாவே எனக்கு வரைய வராது. புள்ளி வச்ச கோலம்  நல்லாவே போட வரும். ஆனா, புள்ளியில்லாம மான், மயில் மாதிரிலாம் கோலம் போடனும்ன்னா சொதப்புவேன். அது என்னமோ தெரில இந்தமுறை மயில் மயில்மாதிரி வந்திட்டுது. கலர் சின்ன பொண்ணு கொடுத்துச்சு. 

மஞ்சக்காப்பு கட்டியாச்சு..

பிள்ளையார் வீடு கட்டியது என் பையன். கரும்பு, மஞ்சள், காய்கறிலாம் வச்சு முதல் படையல்..

முன்னலாம் வாசல்ல பொங்கல் வைப்போம். இப்ப மொட்டைமாடில வைக்குறோம். ஆற்றுமணலை கொட்டி, அதன்மேல் செங்கல் வச்சு களிமண் உருண்டை வச்சு அதுக்கு மேல் பொங்கபானை வைப்போம். அடுப்பு பத்தவச்சு பானை காய்ஞ்சுடுச்சான்னு நெல்மணி போட்டு பார்ப்போம்.   

அது வெடிச்சதும் பால் ஊத்துவோம். அது பொங்கினதும், அரிசி கழுவின தண்ணிய ஊத்தி தவிடு போட்டு தட்டு போட்டு மூடி துவரங்குச்சி கொண்டு எரிய விடுவோம். பொங்கல் மேற்கு பக்கமா வழிஞ்சது. 

பாலும், தண்ணியும் பொங்கி வந்ததும் அரிசியை போடுவோம். அரிசி பொங்கினதும், கடைக்கு போய் உப்பு வாங்கி வந்து பொங்கப்பானையில் சேர்ப்போம். உப்பு வாங்குறதுதான் முதல் செலவா இருக்கும்.

பொங்கல் வெந்ததும் இறக்கி வச்சிடுவோம்..

சாமிக்கு படைக்கும்போது செங்கல் தூளால் பிள்ளையார் வீடு, வாசல், பொங்கல் அடுப்புக்கு கோலம் போட்டு, பூசணி இலையில் பொங்கல், 9 தானியங்கள், 21காய்கறிகள் சேர்த்த குழம்பு,  பிடிகரணைக்குழம்பு, வெந்தயக்கீரை மசியல் செஞ்சு  சூரியனுக்கு படைச்சோம். 

மாடிக்கும், கீழுக்குமா நடந்ததால் எல்லாமே டயர்ட். அதனால் மாட்டு பொங்கலன்னிக்கு சிம்பிளா ஒரு கோலம். 

சாம்பார், பொரியல், வடை, கொழுக்கட்டை, சுய்யம்லாம் வச்சு படையல் போட்டாச்சு. புதுத்துணி வச்சும் படைச்சு உடுத்தி, அம்மா அப்பா, மாமனார், மாமியார், மச்சினர், மூத்தார், நாத்தனார் அவங்க பிள்ளைகளை பார்த்து பைசா கொடுத்து, வாங்கி..  கோவிலுக்கு போய் வந்தோம்.

இப்படியாக எங்க வீட்டு பொங்கல் பண்டிகை கடந்து போனது. 

இனி நெட்ல சுட்டது....

தங்கள் வீட்டு மாட்டை எப்படிலாம் அலங்காரம் செஞ்சிருக்காங்க பாருங்க, கொலுசு, செயின் மட்டுமில்லாம வாலில் அழகா ஜடை பிள்ளைகள், குஞ்சலம்லாம் வச்சி.. செமயா இருக்கு.

மல்லிகை பூ ஜடை வச்சு கல்யாண பொண்ணு மாதிரி அலங்காரம் பண்ணி இருக்காங்க. 

கவிதை, கட்டுரை, சமையல், கோலம்ன்னு தன் மனசுல இருப்பதை வெளிப்படுத்தும் திறமை இயல்பாவே எல்லா பொண்ணுங்களுக்கும் இருக்கு.  தூத்துக்குடி ஸ்டெர்லைட்  ஆலையால்  வரும் பாதிப்பு பத்தி பொங்கல் அன்னிக்கு ஒரு பொண்ணு கோலம் போட்டிருக்கு.

மாட்டு மடி பின்னாடி இருக்கு.

புரிஞ்சுதா?!

ஏசு, அல்லா, முருகன், ஈசன், புத்தர்ன்னு இருந்தாலும் இறைவன் ஒருவனே. அதில் மாற்றுக்கருத்தில்லை. இறைச்சி வச்சு ஈசனை வழிப்பட்டார் கண்ணப்பர். நெல்லிக்கனி ருசியா இருக்கான்னு கடிச்சு பார்த்து ராமருக்கு கொடுத்தாங்க சபரி. அவரவருக்கு தெரிஞ்சபடி கடவுள்மீதான பக்தியை வெளிப்படுத்தலாம். ஆனா, இந்த திணிப்பு ஏன்?! கேக் சாப்பிட்ட ஏசுவுக்கும் பொங்கலுக்கும் என்ன சம்பந்தம்?!

கோலத்தை பார்த்துட்டு மாடு தற்கொலை பண்ணிக்கக்கூடாதுன்னுதான் நான் மாடு கோலம் போடல. 

கரும்பினால் ஆன மாட்டுவண்டி//

அன்னாசி பழத்தால் ஆன பொங்கப்பானை..

கரும்பினால் ஆன பொங்கல்பானை... இதுலாம் ட்விட்டர், பேஸ்புக்ல சுட்டது..

நன்றியுடன்,

ராஜி

உழைப்பாளிகளை கௌரவிக்கும் காணும் பொங்கல்

பொங்கல் பண்டிகை மொத்தம் நாலு நாள் கொண்டாடப்படுது. முதல் நாள் போகின்னு சொல்லப்படும் இந்திரனுக்கான விழா, அடுத்த நாள் பொங்கல்ன்னு சொல்லப்படும் சூரியபகவானுக்கு நன்றி சொல்லும் நாள். அடுத்து மாட்டுப்பொங்கல்ன்னு சொல்லப்படும் உழவுக்கு பயன்படும் கால்நடைகளை சிறப்பிக்கவும், அதுக்கு நன்றி சொல்லவும்ன்னு பண்டிகை கொண்டாடி மகிழ்கின்றோம். அப்புறம் எதுக்கு காணும் பொங்கல்ன்னு கேட்டா, மூணு நாள் வேலை செஞ்சு டயர்டாகி இருப்போமே! அதுக்கு ரெஸ்ட் எடுக்கன்னு, குடும்ப இஸ்திரிகளும், ஊர் சுத்தி பார்க்கன்னு சிறுசுகளும், பொங்கல் செலவு என்னாச்சுன்னு கணக்கு பண்ணன்னு குடும்ப இஸ்திரன்களும் சொல்வாங்க. ஆனா, விவசாயத்துக்கு மூலாதாரணமான மழை, சூரியன், கால்நடைகள் மட்டுமல்ல, விவசாய நிலத்தில் இறங்கி வேலை செய்யும் வேலையாட்களும்தான்.

விவசாயம் செய்ய நிலமும், விதை, கடப்பாரை, மண்வெட்டி,உரம் மாதிரியான பொருட்கள் வாங்க பணமும் இருந்தாலும் சரியான, நம்பிக்கையான, உழைப்பாளி இல்லன்னா சரிவர விளையாது, அப்படியே விலைஞ்சாலும் விளைஞ்ச பொருட்கள் வீடுவந்து சேராது. அந்த உழைப்பாளிகளை சிறப்பிக்கும் விதமே இந்த காணும் பொங்கல். காணும் பொங்கல்ன்றது இன்றைய நாளில் நடப்பதுமாதிரி சினிமா, பீச்ன்னு சுத்துற பண்டிகையா முன்பு இருந்ததில்லை.

பெண்கள் தங்கள் சகோதரர்களின் நலனுக்காகச் செய்வதே “கனு’ பொங்கல். அன்றைய தினம் காலை நீராடி, வெறும் வயிற்றுடன், வெட்டவெளியில் சூரியக் கோலமிட்டு, அதில் பொங்கல், கரும்புலாம் வச்சு, சூரியனுக்கு அர்ப்பணிப்பார்கள். இதுவே, இன்னிக்கு காணும் பொங்கலாகிட்டு. இன்னிக்கு புத்தாடை அணிந்து, சொந்தங்களை சந்திச்சு மகிழ்ந்திருப்பாங்க, முன்னலாம் பண்டிகையின் முக்கியத்துவமே சொந்த பந்தங்களோடு கூடியிருப்பதே! இன்றைய சீரியல் உலகில் இதுலாம் மாறிட்டுது,

இந்த காணும் பொங்கல் பெண்களுக்கானதும்கூட, பொங்கலன்று பொங்கல் பானை உள்ளிட்ட 5 பானைகளில் கட்டப்பட்ட மஞ்சள் கிழங்கை வயசுல பெரிய 5 சுமங்கலிடம் கொடுத்து, அவங்க அதை கல்லில் இழைத்து தர நெற்றியில் பூசிக்கொள்வாங்க.   ஒருவேளை அப்படி 5 சுமங்கலிகள் கிடைக்கலைன்னா புருசன்கிட்டயே கொடுத்து இழைத்து வச்சுக்கலாம்.

இரண்டு மஞ்சள் இலைகள் (அல்லது) வாழை இலைகளை, நுனி கிழக்கு முகமாக இருக்கும்படி வைத்து, நதிக்கரையிலோ, திறந்த வெளியிலோ (மொட்டை மாடியிலோ) கணுப்பிடி வைப்பாங்க. கணுப்பிடி வைக்குமிடத்தைக் கோலமிட்டு, செம்மண் பூசி வைப்பாங்க. முதல்நாள் (மீதமிருக்கும்) சாதத்தில் மஞ்சள் குங்குமம் கலந்து, மஞ்சள் சாதம், வெள்ளை சாதம், சிவப்பு சாதம்ன்னு தனித்தனியே ரெடி செய்வாங்க.  சர்க்கரைப் பொங்கலை பழுப்பு நிற சாதமாக கணக்கில் எடுத்துப்பாங்க. ஒவ்வொரு வகை சாதத்திலயும் ஏழு இல்லன்னா ஒன்பது என ஒற்றைப்படை எண்ணிக்கையில் வரும்படியாக, இலைகளில் மூன்று வரிசைகளாக வைப்பாங்க.. வெற்றிலை-பாக்கு,பழம்,தேங் காய், கரும்புதுண்டு, மஞ்சள் அட்சதை  பூக்கள்லாம் ஒரு தட்டிலும், மற்றொரு தட்டில் ஆரத்தியும் எடுத்து வச்சிக்கிட்டு 

காக்காப் பிடி வச்சேன்

கணுப்பிடி வச்சேன்

காக்கைக்குக் கல்யாணம்

கண்டவர்களுக்குச் சந்தோசம்

கூடப் பிறந்த சகோதரர்கள்
எந்நாளும் குறைவில்லாமல் சந்தோசமாய் வாழனும்..

ன்னு பாட்டு படிச்சு படையல் இடனும்..இவ்வாறு வைத்து முடித்ததும் தீபம் ஏற்றப்படும். கணுப்பிடி வைக்கும் விடியற் காலை நேரத்தில் ராகு காலம், எம கண்டம்லாம் இல்லாம பார்த்துக்கனும். அட்சதையையும் பூக்களையும் தூவி தேங்காய் உடைத்து, சூடம் ஏற்றி, கணுப்பிடி வைத்த இலைகளையும் சூரிய பகவானையும் வணங்கி ஆரத்தி எடுப்பாங்க. கணுப்பிடி வைத்த சாதத்தை, நாய், பூனைலாம் எச்சில் பண்ணாம பார்த்துக்கனும். காக்கா, குருவி மாதிரியான பறவைகளுக்கு இதை உணவா கொடுப்பாங்க.

மார்கழி மாசம் முழுக்க, அதிகாலையில் நீராடி வாசலில் கோலமிட்டு, அதன் நடுவே வைக்கும் கைப்பிடி சாணத்தை பிள்ளையார் ஆக்கி அதில் மஞ்சள் பூசணிப்பூ வைத்து வழிபட்டு வந்த பிள்ளையாரை, மதியம் 12க்குள் எடுத்து,  காயவச்சு பத்திரப்படுத்தி வருவாங்க. இதை காப்புக்கட்டு அன்னிக்கு ஒருகூடையில் எடுத்து வச்சிடுவான்க.காணும் பொங்கலன்னிக்கு வீட்டில் செய்த கலவை சாதம் முறுக்கு, பொரி, கரும்பு, பலகாரவகைகளுடன் குடும்பத்தோடு  ஆற்றங்கரை ஏரிக்கரை, கோவில், குளம், மலைன்னு போய் வருவாங்க. கோலாட்டம் ,கும்மி, டான்ஸ், பாட்டு..ன்னு அமர்களப்படும்.

இப்படி கணுப்பிடி வைத்த பெண்கள் அன்னிக்கு நைட் சாப்பிட மாட்டாங்க.  இந்த கணுப்பிடி நோன்பு உடன் பிறந்தவர்களின் நன்மைக்காகச் செய்யப்படுது.கார்த்திகை எண்ணெயும் கணுப்பழையதும் கூடப் பிறந்தவர்களுக்கு’ ன்னு ஒரு சொலவடையே இருக்கு. கார்த்திகையில் எண்ணெய் தேய்த்துக் குளிப்பதும், பொங்கல் அன்னிக்கு சமைத்த சாதத்தை,  மறுநாள் கணுப்பிடியாக வைப்பதும் உடன்பிறந்தவர்களின் நலனுக்காக என்பதே இந்த சொலவடையின் அர்த்தம். பிறந்த வீட்டுச் சீராகப் பெண்களுக்குப் பணமோ, துணியோ பிறந்த வீட்டில் தருவாங்க. வாய்ப்பு கிடைச்சா தாய்வீட்டுல மதிய உணவு சாப்பிடுவது வழக்கம்.

காணும் பொங்கலை கன்னி பொங்கல், கன்று பொங்கல் ன்னும் சொல்வாங்க. திருமணமாகாத பெண்களுக்காக கன்னி பொங்கலும், ஆண்களுக்காக கன்று பொங்கலும் வைத்து கூடிய சீக்கிரம் கல்யாணம் ஆகனும்ன்னு வேண்டிப்பாங்க. காணும் பொங்கல் பத்தி இத்தனை பார்த்தாச்சு. உழைப்பாளிகளை பத்தி ஆரம்பத்துல ஏதோ சொன்னியேம்மான்னு முணுமுணுக்காதீங்க.

நில உரிமையாளர்கள் காணும் பொங்கலன்னிக்கு தங்கள் வயலில் வேலை செய்த விவசாய கூலிகளுக்கு துணி, அரிசி, பருப்பு, பணம்ன்னு கொடுத்து, விருந்து வச்சு கௌரவிப்பது வழக்கம்.  இதுமாதிரியே, நெசவு, பானை செய்றவங்க, வண்டி ஓட்டுறவங்க, பாய்பின்னுறவங்கன்னு  எல்லா தொழில் முதலாளிகளும் தங்கள்கிட்ட வேலை செய்யும் தொழிலாளிகளை கௌரவிச்சாங்க. இதுவே இப்ப பொங்கல் இனாமா வந்தி நிக்குது. 

என் தாத்தா காணும்பொங்கல் அன்னிக்கு காலைல புதுத்துணி உடுத்திக்கிட்டு வாசல் திண்ணைல உக்காந்துக்குவார்.  அவர் காலில் விழும் பெரியவங்களுக்கு நாலணா தருவார். அதைகூட உனக்கு மட்டும்தான் அதிகமா தரேன். மத்தவங்களுக்குலாம் கம்மிதான். அவங்கக்கிட்ட சொல்லிடாதன்னு சொல்வார். சின்னவங்களுக்கு  ஆரஞ்ச் புளிப்பு மிட்டாய் தருவார். இதுக்காகவே ரெண்டு மூணு பாக்கெட் மிட்டாய் வாங்கி வச்சுப்பார். வெள்ளை வேட்டி, காமராஜர் மாதிரி தொளதொளன்னு சட்டையும், அந்த மிட்டாயை வச்சிக்கிட்டு அவர் உக்காந்திருக்கும் தோரணையும் அடடா! 

 சகோதரர்களின் நல்வாழ்வுக்கும், உழைப்பாளிகளை கௌரவிக்கவும் கொண்டாடப்படும் இந்த விழா இப்ப வெறும் பொழுதுபோக்கா மட்டுமே இருக்குறது வேதனை. காணும் பொங்கல்ன்னா ஊர் சுத்தி பார்க்குறதுன்னு ஆகிப்போச்சு. இந்த நாளில்,  இறைவனை, சொந்தங்களை, உழைப்பாளிகளை, சகோதரனை காணும் நாள்ன்னு இனிவரும் தலைமுறைக்கு எப்படி புரிய வைக்க போறோம்ன்னுதான் தெரில!!

புருசன் பொண்டாட்டி சண்டைய திருவண்ணாமலையே கைக்கொட்டி சிரிச்சு வேடிக்கை பார்த்து  கொண்டாடுது. அது என்னன்னு ஒரு எட்டு பார்த்துட்டு வாங்களேன்.

என் வலையுக சகோதரர்கள் அனைவரும் நல்லா இருக்கனும்ன்னு நானும் வேண்டிக்குறேன். 

நன்றியுடன்,

ராஜி

பொங்கலோ பொங்கல்! மாட்டு பொங்கல்!!!

எத்தனையோ உயிரினங்கள் இருக்க, உழவுத்தொழிலுக்கு மாடுகள்தான் உதவுது. இதுக்கு புராண காரணங்களா இரண்டினை சொன்னாலும்,  மனிதர்களோடு நெருங்கி பழகும் குணமும், சாதுவான போக்குமே உழவுக்கு மாடுகளை பயன்படுத்த காரணமாகும். விவசாய வேலைகளுக்கு உதவும் பொருட்களை சிறப்பித்து வணங்க ஆயுதபூஜைன்னு ஒருநாள் இருக்கு.  அதுமாதிரிதான் உழவுக்கு உதவும் மாட்டினை சிறப்பிக்கவும், அதற்கு நன்றிகூறவுமே பொங்கல் பண்டிகைக்கு மறுதினம் மாட்டு பொங்கலாய் கொண்டாடப்படுது.

இன்னிக்கு ஸ்டேட்டஸ் சிம்பலா கார், மொபைல், பிளாட்ன்னு சொல்லுற மாதிரி அந்தகாலத்தில் மாடுகள் இருந்தது. ஆடு, மாடு உள்ளிட்ட கால்நடைகளே ஒருநாட்டின் செல்வத்தின் அடையாளமா இருந்ததாய் குறிப்புகள் சொல்லுது.“ஆயிரம் பசுவுடைய கோ நாயகர்’ன்ற பட்டப் பெயர்களெல்லாம் அப்ப புழக்கத்தில் இருந்துச்சு. “ஏரின் பின்னால்தான் உலகமே சுழல்கின்றது’ என்றார் திருவள்ளுவர். அந்த ஏர் முனையை முன்னிருந்து இழுத்து செல்பவை மாடுகளே! இப்பதான் போர்போட்டு தண்ணிய இழுக்குறோம். முன்னலாம் கலயம்மூலமாதான் நீர் இறைச்சது. அந்த கலயம் கட்டிய கயிற்றினை இழுப்பது மாடுகள்தான். அறுவடை முடிஞ்சபின் நெல் தனியா, வைக்கோல் தனியா பிரிக்க மாடுகள்தான் உதவும். அறுவடை செஞ்ச தானியங்கள் வீடு வந்து சேர வண்டி இழுக்க உதவுவதும் மாடுகள்தான். இப்படி, உலகம் உயிர்ப்போடு இருக்க தன்னாலான உதவிகளை மாடுகள் செய்யுது.

காளை மாடுகளின் துணைக்காக பசு மாடுகளும் வீட்டில் வளர்க்கப்பட்டது. பசுக்கள் பால், தயிர், வெண்ணெய்ன்னு நமக்கு வருமானத்துக்கும், உடல் ஆரோக்கியத்துக்கும், விவசாயத்துக்கு உதவும் காளைமாடுகளை ஈன்றெடுக்கவும்.\ இப்படி எல்லா விதத்திலும்  நமக்கு மாடுகள் உதவுவதால் மாடுகளைக் கடவுளாகவே கருதி வழிபடுவதுதான் மாட்டுப் பொங்கலின் தத்துவம்.

பசுவின் உடலில் முப்பத்து முக்கோடி தேவர்களும் இருப்பதாக நம்ம முன்னோர்கள் சொல்லி இருக்காங்க. அதனால்  பசுவை வணங்கினால் அனைத்து தேவர்களையும் வணங்குவதற்கு ஈடாகும். மாட்டுப் பொங்கலன்று பசுக்களுக்கு மஞ்சள் பூசி, திருநீறிட்டு, குங்குமம் வைத்து, மாலை போட்டு வணங்குவர். மாடுகளை சுத்தம் செய்து, கொம்புக்கு வர்ணம் பூசி பலூன், பட்டு துணி, சலங்கை கட்டி அலங்கரித்து பொங்கலிட்டு படைத்து முதலில் மாடுகளுக்கு ஊட்டிய பின்னரே தாங்கள் உண்ணுவதை வழக்கமாய் வச்சிருக்காங்க. 

ஒருமுறை புருசனும், பொண்டாட்டியும் தோட்டத்தில் உக்காந்து பேசிக்கிட்டு இருந்தாங்களாம். அப்ப நகையும், பட்டுமா உடுத்தி இருந்த பொண்டாட்டியை பார்த்து இப்படி நீ சீரும் சிறப்புமா இருக்க என் உழைப்புதான் காரணம்ன்னு சொன்னானாம். அப்படியா?!ன்னு மனைவி கேட்க, அதுக்கு இல்லன்னு சொல்றமாதிரி பக்கத்துல இருந்து மாடு தலை அசைத்ததாம்.வயலில் காளைமாடும், வீட்டில் பசுமாடும் உழைப்பதால்தான் நமக்கு இந்த வாழ்வும் வந்துச்சுன்னு மனைவி பதில் சொல்ல, அதுக்கு ஆமோதிப்பது மாதிரி பசுமாடு தலையசைக்க மோதிபார்க்கலாமா?!ன்னு கணவன் விளையாட்டாய் இறங்க, அப்படி உருவானதே ஜல்லிக்கட்டுன்னு ஒரு கதை சொல்வாங்க.

 தென் மாவட்டங்களில் ஜல்லிக்கட்டு என்னும் மாடுபிடி விளையாட்டு இந்நாளில் நடைபெறும். கொல்லேறு தழுவுதல், மஞ்சு விரட்டு என்கிற பெயர்களும் இவ்வீரவிளையாட்டிற்கு உண்டு. முன்பு, இந்திய நாணயமாகிய சல்லிக் காசுகளை மாடுகளின் கொம்பில் கட்டிவைத்திருப்பார்கள். மாட்டை அடக்குபவர்களுக்கே அந்த காசு பரிசளிக்கப்படும். இந்த சல்லிக்காசே பின்பு ஜல்லிக்கட்டாக மாறி அழைக்கப்பட்டது. வேலி ஜல்லிக்கட்டு, வாடிவாசல் ஜல்லிக்கட்டு, வடம் ஜல்லிக்கட்டு என இதற்கு பல பெயர்கள் உண்டு.

 பொங்கல் பொங்கிவரும்போது கொஞ்சம் நீரினை அள்ளி, அதை வயல்வெளிகளுக்கும், மாடுகளுக்கும் குடிப்பாட்டவும் செய்வர். ‘பொங்கலோ பொங்கல், மாட்டு பொங்கல்.. பட்டி பெருக பால் பானை பொங்க நோவும் பிணியும் தெருவோடு போக...‘ ன்னு பாடிக்கிட்டே மாடு பொங்கல் உண்ட எச்சில் தண்ணீரை தொழுவத்தில் தெளிப்பது வழக்கம். இதுக்கு. தண்ணீர் தெளித்தல் ன்னு பேரு. . மாட்டுப்பொங்கலன்று முறைமாப்பிள்ளைமீது மஞ்சள் நீர் தெளிப்பது தமிழக கிராமங்களில் இன்றும் உண்டு.  ஜல்லிகட்டுக்காக வளர்க்கப்படும் மாடுகளுக்கு தினத்துக்கு பாதாம், முந்திரி, மூலிகை செடிகள்ன்னு உணவே ஸ்பெஷலா இருக்கும். மனிதர்களுக்கு போலவே குறிப்பிட்ட இடைவெளியில் மருத்துவபரிசோதனைன்னு கவனிப்பு உச்சத்தில் இருக்கும்.  வீரத்தை காட்டவேண்டிய இடத்தில் காட்டனும். பாசத்தை காட்ட வேண்டிய இடத்தில் பாசத்தை காட்டனும். இதுக்கு சரியான உதாரணம் காளைமாடுகளே!  தன்னோட உரிமையாளர்கள்மீது அம்புட்டு பாசமா இருக்கும். முக்கியமா அந்தவீட்டு பொண்ணுங்கமேல காளைகளுக்கு பாசம் அதிகம். பொண்டாட்டி பின்னாடி சுத்தும் புதுமாப்பிள்ளை மாதிரி, ஆக்ரோஷமாய் ஜல்லிக்கட்டு களத்தில் திரியும் காளை, ஜல்லிக்கட்டு மைதானத்தை விட்டு வந்ததும் அந்த வீட்டு பொண்ணுங்களுக்கு பொட்டி பாம்பாய் அடங்கிடும். 

தமிழன் என்றோர் இனமுண்டு. தனியோர் அவருக்கு குணமுண்டுன்னு சொல்லும் சொல்லுக்கேற்ப, நன்றி என்பது தமிழனுக்கே உண்டான தனிக்குணம். மனிதர்களுக்கு மட்டுமல்ல, தனக்கு உதவும் கால்நடைகளுக்கும்  கடன்பட்டவராய் இருப்போம்ன்னு சொல்லாமல் சொல்லுது இந்த விழா. 

அனைவருக்கும் இனிய மாட்டுப்பொங்கல் வாழ்த்துகள்...

நன்றியுடன்,

ராஜி

தைப்பொங்கலும் வந்தது... பாலும் பொங்குது...

பொங்கல் பண்டிகைன்னாலே புது துணி, டிவியில் புது படம்,  ரேஷன்ல ஒரு கிலோ அரிசியும்,  பணமும், இலவச வேட்டி சட்டையுமாய் இந்த கால பிள்ளைகளுக்கு மாறிட்டுது.  ஆனா, பொங்கல் பண்டிகை நமது பண்பாடு, கலாச்சாரம், கலை, வாழ்வியல்முறையினை அடுத்தவர்களுக்கு எடுத்து சொல்வதோடு, உலகுக்கே சோறு போடும் உழவனுக்கும், அவனுக்கு உதவும் கால்நடைகளுக்கும் நன்றி சொல்லும் விதமாதான் பொங்கல் பண்டிகை கொண்டாடப்படுது.  இன்றைக்கு பொங்கல்ன்னு அழைக்கப்படும் இந்த விழா சங்ககாலத்தில் தைந்நீராடல்ன்னு பேர். . தைந்நீராடல்ன்னா  மார்கழி, தை மாத விடியற்காலையில் ஆற்றுநீரும், குளத்துநீரும் வெதுவெதுப்பா இருக்கும். மாலையில் குளுமையாக இருக்கும். சங்ககால மகளிர் காலையில் இந்த வெதுவெதுப்பான நீரில்  நீராடி இறைவனை தொழுது மகிழ்ந்தனர். இதனையே சங்க இலக்கியங்கள் தைந்நீராடல் எனக் குறிப்பிடுகின்றது.  

ஆடிப்பட்டம் தேடி விதைன்னு.. சொல்லும் பழமொழிக்கேற்ப ஆடியில் விதை விதைத்து, நடவு நட்டு, களை பறித்து, ஆறு மாதங்கழித்து மார்கழியில் அறுவடை செய்யும் உழவர்கள், விவசாயத்தில் தங்கள் தொழிலுக்கு பலவிதத்தில் உதவிய கால்நடைகளுக்கு நன்றி  சொல்ல விழா எடுத்து கொண்டாடி மகிழ்வதே இப்பண்டிகையின் தாத்பரியம். மார்கழி கடைசியிலிருந்து காய்கறிகள் நல்ல விளைச்சலும், அறுவடை முடிச்சு வந்த தானியங்களை தூசு நீக்கி, தரம் பிரிச்சு, மூட்டையாக்கி விற்பனைக்கும், சேமிச்சு வைக்கவும்ன்னு ஏகப்பட்ட வேலைகளும், வேலைவாய்ப்பும் இருக்கும். வேலைவாய்ப்பு இருந்தால் பணப்புழக்கம் இருக்கும். இதனால் திருவிழா, வீடு சீர் செய்ய, கல்யாணம் காதுகுத்துன்னு சுபநிகழ்ச்சிகள் நடத்த இப்படி பசி இல்லாம, மக்கள் மகிழ்ந்திருக்கும் காலம் தைமாதத்தில் தொடங்குவதால்தான்    ‘தை பிறந்தால் வழி பிறக்கும்’ என்னும் பழமொழி உண்டாச்சு.

வானியல் சாஸ்திரப்படி சூரியனின் சஞ்சாரத்தை அடிப்படையாக வைத்தே ஒவ்வொரு தமிழ் மாதப்பிறப்பும் நிர்ணயம் செய்யப்படுது. கடவுள் இல்லை என்பவர்கள்கூட வணங்கும் ஒரே தெய்வம் சூரியன். இவர் தனுர்ராசியிலிருந்து மகரராசிக்கு மாறும் நாளில்தான் தைமாதம் பிறக்குது. இதிலிருந்து உத்திராயன புண்ணியகாலம் ஆரம்பமாகுது. உத்திராயனம் என்பதற்கு வடக்கு நோக்கி நகர்தல்ன்னு அர்த்தம். கிழக்கில் உதிக்கும் சூரியன் மேற்கில் மறைந்தாலும், இன்றுமுதல் அவருடைய சஞ்சாரம் சற்றே வடக்கு நோக்கி சாய்ந்திருக்கும் என்கிறது வானியல். இதிலிருந்து ஆறுமாத காலம் தேவலோகவாசிகளுக்கு பகல்பொழுது என்பது இந்துக்களின் நம்பிக்கை. சூரியனை வழிபடும் சமயத்திற்கு ‘சவுரம்’ என்பது பெயர். இன்றைக்கு இச்சமயத்தில் இருந்தவர்களெல்லாம் சைவத்தோடும் வைணவத்தோடும் ஐக்கியமாகிவிட்ட நிலையில், அனைத்து சமயத்தவராலும் சூரியன் வழிபடப்படுகிறார்.

தமிழர் திருநாளாகிய பொங்கல் பண்டிகை தமிழகமும், தமிழர்கள் மட்டும் கொண்டாடப்படுவதில்லை. இந்த பண்டிகையை  மகர சங்கராந்தியாக  மத்த மாநிலத்துக்காரங்க கொண்டாடுறாங்க. அதேசமயம் அறுவடை திருநாள் எனவும் இவ்விழா அழைக்கப்படுகிறது. குஜராத் மற்றும் ராஜஸ்தானில் இப்பண்டிகை உத்தராயன்ன்னும், பஞ்சாப் மற்றும் ஹிமாச்சல பிரதேசத்தில் லோரி ன்னும் கொண்டாடப்படுது. இந்தியாவிற்கு அப்பாலும் பொங்கல் பண்டிகை களைகட்டுது. இந்தோனேசியா, தாய்லாந்து, இலங்கை, நேபாளம், மியான்மர், லாவோஸ் போன்ற நாடுகளிலும் வெவ்வேறு பேர்களில் இப்பண்டிகை கொண்டாடப்படுது.

நேபாளத்தில் மாகி, மாகே சங்கராந்தி, மாகே சகாராதின்ற பேரிலும்,  தாய்லாந்தில் சொங்க்ரான் ன்னும், லாவோஸ் மக்களால் பி மா லாவ்ன்னும், மியான்மரில் திங்க்யான்ன்னும்  பொங்கல் கொண்டாடப்படுது. இலங்கையில் தமிழர் திருநாளை தமிழ் புத்தாண்டாக கொண்டாடுறாங்க. சிங்கப்பூர், மலேசியாவிலெல்லாம் அரசு விடுமுறையே உண்டு. போனவருசம் கனடா, பிரான்ஸ் நாட்டு பிரதமர்கள் பொங்கல் திருநாளுக்காக வாழ்த்துகள் சொன்னாங்க. 

பொங்கல் பண்டிகை  கி.மு. 200 - கி.மு. 300 காலக்கட்டத்திலிருந்தே பொங்கல் பண்டிகை கொண்டாடப்பட்டு வந்திருக்கு.பொங்கல் பண்டிகை கொண்டாட்டத்தின் ஒரு பகுதியாக, தைந்நீராடலின்போது சங்ககால பெண்கள் 'பாவை நோன்பு'ன்ற விரதத்தை கடைப்பிடித்து வந்தனர். பல்லவர்களின் ஆட்சிக்காலத்தில் (கி.பி. 400-கி.பி.800) பொங்கல் பண்டிகை மிகவும் முக்கியமான பண்டிகையாக இருந்திருக்கு. தமிழ் மாதமான மார்கழியின் (டிசம்பர் - ஜனவரி)போது இது கொண்டாடப்பட்டது. இந்த பண்டிகையின்போது நாட்டில் மழையும் வளமும் செழிக்க வேண்டி இளம்பெண்கள் விரதமிருந்து  வேண்டுவர். 

பாவைநோன்பு இருக்கும் பெண்கள் மார்கழிமாதம் முழுக்க பால் மற்றும் பால்பொருட்களை சாப்பிடமாட்டாங்க. தங்கள் முடிக்கு எண்ணெடுவது, கண்ணுக்கு மையிடுவது, மருதாணி மாதிரியான அழகுப்படுத்திக்கொள்ள மாட்டாங்க. கடுமையான சொற்களை பேசாம, காலையில் குளிச்சுமுடிச்சு,  ஈர மண்ணில் செய்யப்பட்ட கட்யாயணின்ற பெண் தெய்வத்தின் சிலையை அந்த காலத்துல வணங்கி வந்ததா குறிப்புகள் சொல்லுது. தைமாத முதல்நாள் தங்கள் நோன்பை முடிச்சுப்பாங்க.  நல்ல கணவன் அமையவும், நெற்பயிர்கள், பயிர்கள் செழிக்க தேவையான மழையை கொண்டு வருவதற்காகவுமே இந்த நோன்பு உண்டானது.. பழமை வாய்ந்த இந்த மரபுகளும், சடங்குகளும்தான் படிப்படியா மாறி இன்னிக்கு பொங்கல் பண்டிகையா மாறி இருக்கு.

ஒரு ஜுவல்லரில போன பொங்கல் பண்டிகைக்காக தங்கத்தில் செய்த பொங்கல்பானை. (ஃபேஸ்புக்ல சுட்டது)

இன்றைய பொங்கல் பண்டிகைக்கு வித்திட்டது. தைந்நீராடலும், பாவைநோன்புமே ஆகும். தைந்நீராடல் பற்றியும், பாவை நோன்பின்போது கடைப்பிடிக்கப்படும் சடங்குகள் பற்றியும், ஆண்டாளின் திருப்பாவை மற்றும் மாணிக்கவாசகரின் திருவெம்பாவை ஆகியவற்றில் தெளிவா சொல்லப்பட்டிருக்கு. குலோத்துங்கான்ற அப்படி நிலத்தை தானமாய் வழங்குவதை பொங்கல் பண்டிகையின்போது  செய்வதை வழக்கமாய் கொண்டிருந்தார்ன்னு  திருவள்ளூர் வீரராகவா கோவிலில் இருக்கும் கல்வெட்டில் சொல்லப்பட்டிருக்கு. 

பொங்கல் பண்டிகை பற்றிய புராணக்கதைகள் இரண்டிருக்கு.  ஒன்னு சிவபெருமானுடன் தொடர்புடையது, இன்னொன்னு இந்திரனுடன் தொடர்புடையது. நந்தி புராணத்தின்படி, ஒருமுறை நந்தியிடம் பூமிக்கு செல்லுமாறும், அங்கே மனிதர்களிடம் தினமும் எண்ணெய் குளியல் செய்து, மாதம் ஒருமுறை மட்டுமே உண்ணுமாறு சிவபெருமான் கூற சொன்னார் சிவபெருமான். ஆனால் நந்தியோ, தவறுதலாக, தினமும் உணவு உண்டு, மாதமொருமுறை எண்ணெய் தேய்த்து குளிக்கவும் சிவபெருமான் சொன்னார் என அனைவரிடமும் நந்தி சொல்லிவிட்டார். இதனால் கோபங்கொண்ட சிவபெருமான் நந்திக்கு சாபமிட்டார். அதனை என்றுமே பூமியில் வாழுமாறு கூறினார். அதிகமான உணவை தயாரிக்க மனிதர்களுக்கு உதவியாக நிலத்தை உழவேண்டுமென சாபமிட்டார். அதனால்தான் ஏர் உழ, நீர் இறைக்க, நெல் அடிக்க, வண்டி இழுக்க என மாட்டிற்கும், உழவுக்கும் தொடர்புண்டானதாம். 

அடுத்தகதை தேவலோகத்துக்கே  அரசனானதால் மிகவும் கர்வத்துடன் இருந்துவந்த இந்திரனுக்கு பாடம் புகட்ட எண்ணிய  கிருஷ்ணர்,  இனி இந்திரனை வணங்கவேண்டாமென கூறினார்.கிருஷ்ணர் சொன்னதை அப்படியே ஏற்றுக்கொண்ட மக்கள் இந்திரனை வணங்காமல் புறக்கணித்தனர்.  இதனால் கோபங்கொண்ட இந்திரன், புயல் மழையை உண்டாக்க மேகங்களை பூமிக்கு அனுப்பினார். மழையும் 3 நாட்களுக்கு தொடர்ந்தது. கிருஷணரோ மனித இனத்தை பாதுகாக்க கோவர்த்தன மலையை கையில் தூக்கி சுமந்து கொண்டார். பின், தன் தவறையும், கிருஷ்ணரின் தெய்வீக சக்தியையும் உணர்ந்த இந்திரன். கிருஷ்ணரிடம் மன்னிப்பு கேட்டான். கிருஷணரும் இந்திரனை மன்னித்து அவனுக்கு மக்கள் வருடமொரு விழா  எடுப்பதாக வாக்களித்தார். அதுவே பொங்கல் பண்டிகையின் முன்னோடி.

ஆடி முதல் மார்கழி மாதம் வரை நீண்ட இரவும், தை முதல் ஆனிவரை நீண்ட பகலும் இருக்கும். இருள் நீங்கி வெளிச்சம் பிறக்கும் இத்தினத்தை வாழ்வில் வெளிச்சம் பிறக்க நீண்ட பகலை வரவேற்கும் விதமாகவும் இப்பண்டிகை கொண்டாடப்படுது. விவசாயத்துக்கு உதவும் ஏர் கலப்பை மற்றும் நெல் அறுக்கும் அரிவாள்களை வைத்து சூரியனையும், பூமியையும் விவசாயிகள் வணங்குவர். 

இந்த உலகம் பஞ்சபூதங்களால் ஆனது. இந்த உடலும் பஞ்சபூதங்களால் ஆனது. நாம் உண்ணும் ஒவ்வொரு தானியமும் பஞ்சபூதங்களால் ஆனதே. இப்படி எல்லாமே பஞ்சபூதங்களின் சேர்க்கையால் ஆனதே இவ்வுலகம். அதை உணர்த்தவே பஞ்சபூதங்களான காற்று, ஆகாயம், நீர், நிலம், நெருப்பின் கலவையால் உருவான மண்பானையில் பொங்கல் வைக்கப்படுது.  பொங்கல் பொங்கி வரும்போது வடக்குதிசையில் பொங்கினால் பணவரவும், தெற்கு திசையில் பொங்கினால் செலவும், கிழக்கில் பொங்கினால் வீட்டில் சுபநிகழ்ச்சியும், மேற்கில் பொங்கினால் குடும்பத்தில் மகிழ்ச்சியும் தங்குமென்பது நம்பிக்கை.

பொங்குதல்ன்னா மிகுதல், அதிகமாதல், பெருகுதல், மிஞ்சுதல், நெருங்குதல்ன்னு அர்த்தம். வீடுகளில் இந்த மாதத்தில் தானியங்கள். காயகறிகள் நிரம்பி இருக்கும். மிதமிஞ்சியதை உறவுக்காரங்க, நட்புகளுக்கு கொடுப்பாங்க. அவங்க வீட்டிலும் பொருட்கள் நிரம்பி இருக்கும்.  விளைப்பொருட்களைக்கொண்டு பண்டிகை அன்னிக்கு  பால் பொங்கி, அரிசி பொங்கி அதனால் மகிழ்ச்சி பொங்கும். அதனால்தான் இப்பண்டிகைக்கு பொங்கல்ன்னு பேர் உண்டானது.

பொங்கல் பொங்கும் நேரம்

நோய் இல்லா வாழ்வும்...

நிறைந்த செல்வமும் எல்லார்

வாழ்விலும் குறைவில்லாமல் கிடைத்து

அன்புடனும், நேசத்துடன் வாழ

வழி செய்யட்டும்.

சகோதர, சகோதரிகள் அனைவருக்கும் இனிய பொங்கல் திருநாள் வாழ்த்துகள்

நன்றியுடன்,

ராஜி