குழந்தைவடிவில் ஐயப்பன், குளத்துப்புழா - ஐயப்பனின் அறுபடை வீடுகள்

இப்ப மாலை போடுறவங்கள்ல பெரும்பான்மையானவங்களுக்கு எதுக்கு மாலை போடுறோம்??! இருமுடியின் தத்துவமென்ன?! பதினெட்டு படிக்கு என்ன அர்த்தம்?! சரங்குத்தின்னா என்ன?! எரிமேலியில் ஏன் வேசம் போடுறோம்ன்னு தெரியாமயே மாலை போட்டு கோவிலுக்கு போறாங்க. அவங்களை பொறுத்தவரை இது ஒரு சுற்றுலா அவ்வளவே! ஆனா, சபரிமலை ஐயப்பனின் ஒவ்வொரு செயலுக்கும் ஒரு அர்த்தம் இருக்கு.  அதைலாம் நம் பதிவில் இனிவரும் காலங்களில் பார்ப்போம். 

முதலில் பதினெட்டாம்படி தத்துவம்...

பதினெட்டாம் படி ரகசியங்களில் ஒன்று ஐம்புலன்களை அடக்குவது.  அதாவது கண், காது, மூக்கு ,வாய், தோல் என ஐம்புலன்களை  அடக்குவது . காதுக்கு கெட்டதை கேக்காதே, கண்ணால் கெட்ட  விசயங்களை பாக்காதே. வாயால் புலால், மது, புகை சுவைக்காதே, அடுத்தவரை புண்படுத்தும் வார்த்தைகளை பேசாதே.  தோலினை இரண்டு வேளையும் குளித்து சுத்தபடுத்து. இப்படி ஐம்புலன்ங்களையும் அடக்கி,  அறுங்குணங்ககளையும் சீரமைத்து,  அறுங்குணம் என்றால் ஆறு குணம் . பேராசை,  கடும்பற்று, சினம், முறையற்ற பால் கவர்ச்சி(SEX), உயர்வு தாழ்வு மனப்பான்மை, வஞ்சம் இந்த ஆறு குணங்களையும் சீரமைத்தல்.  நம் உடலில் உள்ள ஏழு சக்கரங்களின் வழியாக ஏழு சக்கரம் என்றால் மூலாதாரம், சுவாதிஸ்தானம், மணிப்பூரகம், அனகாதம்,விசுத்தி, ஆக்கினை, துரியம் என்னும் ஏழு சக்கரங்களை கடந்து குண்டலினி சக்தி மேலோங்கி  நிற்கும்.  அப்பொழுது  ஐந்து பூதங்களின் அப்பனான அய்யப்பனை கண்டு தரிசிக்கலாம் என்பதே இந்த பதினெட்டு படிகளின் தத்துவம்.  ஐம்புலன்களை அடக்கி, அறுங்குணங்களை சீரமைத்து , ஏழு சக்கரங்களை கடந்து இந்த பதினெட்டு விதிகளை கடைபிடித்தால் ஐந்து பூதங்களின் அப்பனான ஐயப்பனை காணலாம் என்பதே  பதினெட்டு படியின் தத்துவம். 

பொதுவாக இந்து கடவுளர்களை பற்றி புரிந்து கொள்வது மிக எளிதான விஷயமில்ல. இந்துமதத்தில் சில இடைச்சொருகல்கள் காரணமாக சில விஷயங்கள் விமர்சிக்கப்படுகின்றனவே தவிர, உண்மையில் கடவுளை புரிந்துக்கொள்ள வள்ளலார், ராமக்கிருஷ்ணர்  மற்றும் விவேகானந்தர் போன்ற ஆன்மீக ஹீரோக்களால் மட்டும்தான் முடியும்.. அப்படி புரிந்துக் கொண்ட விஷயங்கள் நான்குபுறமும் கூர்மையான கட்டாரி போன்ற ஆயுதமாகும். ஆகவே, அதை கையாள்பவருக்கு அதை எப்படி உபயோகிக்க வேண்டும் என்ற அறிவு இருக்கவேண்டும்.  தகுதியானவர்களுக்கும்,  மனப்பக்குவம் உள்ளவர்களுக்கும் சென்றடைய வேண்டி எல்லாமே மறைப்பொருளாக வைத்தனர். அப்படிப்பட்ட சிலவிஷயங்களை நம்முடைய அறிவுக்கு எட்டியவரை முயற்சித்து பார்க்கலாம்..... 

அய்யப்பனை பல்வேறு வடிவங்களில், பல்வேறு நிலைகளில் பாலகனாக, வாலிபனாக  தரிசிக்கின்றோம்.  குளத்துப்புழா, அச்சன்கோவில், ஆரியங்காவு, எரிமேலி மற்றும் சபரிமலையில் உறைவது ஒரே இறைவன். வடிவங்கள்தான் வெவ்வேறு. ஐயப்பனுக்கும் அறுபடை வீடுகள் உண்டு. ஆரியங்காவு, அச்சன்கோவிலை பார்த்து வந்திருக்கோம். அந்த வரிசையில் குளத்துப்புழா அய்யப்பனை பற்றி பார்க்கலாம் .

குளத்துப்புழா  ஐயப்பன் கோவிலில்  ஐயப்பன்  பாலகன் வடிவில் அருள்பாலிக்கிறார். அதனால், இந்த திருத்தலம் பாலா சாஸ்தா திருஸ்தலம் என சொல்லப்படுது. அதனால்தானோ என்னமோ இக்கோயிலின் வாசல், சிறு குழந்தைகள் நுழையும் அளவிலே இருக்கு!!   குளத்துப்புழா என்னும் கிராமம், தமிழ்நாடு -கேரளா எல்லைப்பகுதியில் இருக்கும் கொல்லம் மாவட்டத்தில் தேன்மலா மலைப்பிரதேசத்திற்கு அருகில் இருக்கு இந்த கிராமம்.  திருவனந்தபுரத்திலிருந்து 62 கி.மீ தூரத்திலும், கொல்லத்திலிருந்து 64 கி.மீ தூரத்திலும் உள்ளது.. செங்கோட்டையிலிருந்து சுமார் 40-50 கிமீ தொலைவிலிருக்கு. மதுரை - கொல்லம்  வழியாகவும் இக்கோவிலுக்கு போகலாம். இத்திருக்கோவில் கேரளக் கட்டிட அமைப்பைச் சேர்ந்தது. மரத்தாலான கோவில். நடுவில் கருவறையும் சுற்றி மரத்தாலான கூரையுடன் கூடிய சதுர வடிவப் பிரகாரம்மும்,  கருவறையில்  ஐயப்பன் பாலகனாகக்  காட்சி தருகிறார். 

பிரகாரத்தின் வலப்புறத்தில் யட்சியம்மன் சன்னிதி இருக்கு. குழந்தை வரம் வேண்டி இந்த அம்மனுக்குத் தொட்டில் கட்டி வேண்டிக்கிட்டா குழந்தை பாக்கியம் கிடைக்கும் என்பது நம்பிக்கை. பிரகாரத்தை வலம் வரும்போது தனியே பிரிந்து செல்லும் பாதை, திறந்தவெளிக் கோவிலாக அமைந்துள்ள நாகராஜர் கோவிலுக்கு இட்டுச் செல்லுகிறது. இவ்விரண்டு சன்னிதிகள் தவிர கோவிலைச் சுற்றி, விநாயகர், மாம்பழத்துறையம்மன், பூதத்தார் சன்னிதிகளும் அமைந்துள்ளன.

கொட்டாரக்கரை பகுதியை ஆண்ட ஒரு அரசரும், அவருடைய ஆட்களும் காட்டில் கல்லடையாற்றின் கரையில் ஒருமுறை தங்க நேர்ந்தது. அப்போது உணவு சமைப்பதற்காக அடுப்பு மூட்டக் கல் தேடினர். மூன்று கற்களும் ஒரே அளவில் கிடைக்கவில்லை. ஒரு கல் மட்டும் சற்றுப் பெரிதாக இருந்தது. அளவில் பெரிதாக இருந்த கல்லை அதைவிட பெரிதான ஒரு கல்லைக் கொண்டு உடைக்க முயற்சித்தனர். உடைக்க நினைத்த கல் உடையாமல் ,உடைக்கப் பயன்படுத்திய கல் எட்டு துண்டுகளாக உடைந்தது. உடைந்த பகுதிகளில் இருந்து இரத்தம் வழிந்தது. அரசரிடம் செய்தி தெரிவிக்கப்பட்டு தேவப் பிரசன்னம் பார்க்கப்பட்டதில், சிதறிய கல் பரசுராமரால் பிரதிஷ்டை செய்யப்பட்ட ஐயப்பன் உருவமென தெரிய வந்தது. பரிகாரமாக அவ்விடத்தில் குழந்தை வடிவான ஐயப்பனுக்குக் கோவில் கட்டப்பட்டு வழிபாடு செய்யப்பட்டது என்பது மரபுவழிச் செய்தி. சிதறிய எட்டுத் துண்டுகளும் கருவறையுள் உள்ளன. பூசை சமயத்தில் இவை ஒன்றாக வைக்கப்பட்டு வழிபட்டபின் வழக்கமான நிலையில் இன்றும் வைக்கப்படுகின்றன.

கோவிலை ஒட்டி கல்லடையாறு ஓடுகிறது. குளத்துப்புழை ஐயப்பனின் அழகில் மயங்கிய மச்சக்கன்னி ஒருத்தி, அவரைத் திருமணம் செய்ய ஆசைப்பட்டு கேட்க, ஐயப்பன் மறுத்து விட்டார். அதனால் அவள் அவரைப் பார்த்துக்கொண்டே அப்பகுதியில் வாழும் வரத்தையாவது தனக்குத் தர வேண்டுமென ஐயப்பனிடம் வேண்ட அவரும் தனது தலத்தில் ஓடும் ஆற்றில் மீனாக இருக்கும்படி அருளினாராம். மச்சக்கன்னியும் அவள் தோழியரும் கல்லடையாற்றின் இப்பகுதியில் மீன்களாக வாழ்வதாக நம்பிக்கை. கோவிலுக்கு வரும் பக்தர்கள் வேண்டுதலுக்காக இங்குள்ள மீன்களுக்குப் பொரி போடுகின்றனர். ஆற்றின் மற்ற பகுதிகளில் இல்லாத அளவில் இங்கு மீன்கள் அதிகளவில் காணப்படுகின்றன.

இக்கோவிலில் ஐயப்பன் பாலகனாக அமைந்துள்ளதால், சிறுவர்களின் கல்விக்கு உகந்த இடமான இங்கு விஜய தசமி மற்றும் சில குறிப்பிட்ட நாட்களில் இங்கு நடைபெறும் வித்யாரம்பம் சிறப்பானது. ஏப்ரல்/மே மாதத்தில் நடைபெறும் விஷு மகோத்சவம் இங்கு நடைபெறும் முக்கியமான திருவிழா.  பரவலாக அறியப்பட்ட ஐயப்பனின் கோவில்களில் குளத்துப்புழா ஐயப்பன் கோவிலும் ஒன்று.  ஆரியங்காவு, அச்சன்கோவில், எருமேலி, பந்தளம், சபரிமலை ஆகியவை ஐயப்பனின் பிற முக்கியமான கோவில்கள். [சபரிமலை]க்குச் செல்லும் பக்தர்கள் செங்கோட்டையிலிருந்து ஆரியங்காவு, குளத்துப்புழா சென்று ஐயப்பனை வழிபட்டபின் பந்தளம் சென்று பின் அங்கிருந்து சபரிமலைக்குச் செல்வது வழக்கம். திருநெல்வேலி மாவட்டம் பாவூர்சத்திரம் அருகேயுள்ள அரியப்பபுரம் என்னும் சிற்றூரில் அமைந்துள்ள குளத்தூர் ஐயன் கோவில் இந்தக் கோவிலில் இருந்து பிடிமண் மற்றும் நீர் எடுத்துவந்து கட்டப்பட்டது. இன்றைக்கும் இந்தக் கோவில் திருவிழாவின் போது குளத்துபுழா சென்று நீர் எடுத்து திரும்புவது வழக்கத்தில் உள்ளது. 

அடுத்தவாரம் எரிமேலியிலிருந்து சந்திக்கலாம்..

நன்றியுடன்
ராஜி

தொட்டிப்பாலமா?! தொட்டில்பாலமா?! - மௌனச்சாட்சிகள்

கோட்டைகள், புகழ்பெற்ற கட்டிடங்கள், இடிஞ்சுபோன வரலாற்று சின்னங்கள், சமாதிகள்ன்னு மௌனசாட்சிகளில் பார்த்திருக்கோம். கலை, அறிவியல், பண்பாடு, கலாச்சாரத்துல மட்டுமில்ல நம்மாளுங்க நீர் மேலாண்மைல வெளுத்து வாங்கி இருக்காங்கன்னு நம்மில் எத்தனை பேருக்கு தெரியும்?! எல்லாம் தெரியும். முல்லை பெரியாறு அணை, சாத்தனூர் அணைன்னு நீயே பதிவு போட்டிருக்கே ராஜின்னு நீங்க எதிர்வாதம் செய்யலாம்.  காசும், இடமும், வசதி வாய்ப்பும் இருந்தால் இன்னிக்கு எத்தனையோ அணைகளை கட்டமுடியும். ஏன்னா இன்னிக்கு அறிவியல் அந்தளவுக்கு வளர்ந்திருக்கு. ஆனா, அந்த காலத்தில் அந்தரத்தில் ஒரு பாலத்தை கட்டுறதே அதிசயம். அந்த பாலத்துல தண்ணி ஓடுதுன்னா?! எத்தனை பாராட்டுக்குரிய விசயம்?! நான் எந்த இடத்தை சொல்ல வரேன்னு இந்நேரத்துக்கு பலர் யூகிச்சிருப்பீங்க. எஸ் அதே இடம்தான். குமரி மாவட்டத்தின் மாத்தூர் தொட்டிபாலம்தான்.

செங்கோட்டை டூ கொல்லம் ரயில்பாதை

வருசா வருசமும் மலைக்கு போய்வரும் அப்பா ஒருவாரத்துக்கு தான் போய் வந்த இடங்கள் பத்தி கதைகதையாய் சொல்வார். அந்த கதைகளில் தவறாமல் இடம்பெறும் இடங்களில் முக்கியமானது குற்றாலம் செங்கோட்டையிலிருக்கும் ஒரு ஓடையும், செங்கோட்டை டூ கொல்லம்  ரயில்பாலமும்( இந்த பாலம் நிறைய சினிமாவில் வந்திருக்கு)......  மாத்தூர் தொட்டிப்பாலமும்....  என் அப்பா ஒவ்வொரு இடமா  சிலாகிச்சு சொல்லச்சொல்ல  நேரில் பார்த்தமாதிரியே இருக்கும். கூடவே, அந்த இடங்களுக்குலாம் போகனும்ன்னு ஆசை வரும். 

குமரி மாவட்டத்திலிருக்கும் மாத்தூர் தொட்டிப்பாலம் ஆசியாவிலேயே மிகப்பெரிய தொட்டிப்பாலம். கேரள-தமிழக எல்லையில் இருப்பதால் இந்த இடம் கேரளத்தின் சாயலில் இருக்கும். தொட்டி மாதிரி அமைப்புள்ள பல பகுதிகளையும் இணைச்சு பாலமாக்குனதால தொட்டிப்பாலம்ன்னும், இரு மலைகளுக்குமிடையே ஒரு தொட்டில்மாதிரி இந்த பாலம் இருக்குறதால தொட்டில்பாலம்ன்னு பேர் வந்து இப்ப தொட்டிப்பாலம்ன்னு ஆகிடுச்சு. இதுக்கு பேர் வந்துச்சு.  

மலையும் மலை சார்ந்த இடமுமாய் இருந்த மாத்தூர் பகுதியிலிருக்கும்  கணியான்பாறைன்ற மலையையும் கூட்டுவாயுப்பாறைன்ற  மலையையும்  இணைச்சு, பறளியாற்று நீரை கொண்டுச்செல்ல கட்டப்பட்ட பாலமிது.  இரண்டு மலைகளை இணைச்சு கட்டப்பட்டிருக்கும் இந்த பாலத்தின் நீளம் 1204 அடி, தரைமட்டத்திலிருந்து 104அடி உயரத்தில் கட்டப்பட்டிருக்குது. 

இந்த பாலம் பெரியப்பெரிய தொட்டியா  கட்டி, அவைகள் தொகுக்கப்பட்டு தண்ணீர் செல்லும்  பாலமா மாறி இருக்கு. அந்த பகுதிகள் ஏழு அடி அகலமும், ஏழு அடி உயரமென கட்டப்பட்டிருக்கு.   இந்த பாலத்தை தாங்க மொத்தம் 28தூண்கள் கட்டப்பட்டிருக்கு.  ஒவ்வொரு தூணின் சுற்றளவும் 32 அடியாகும்.  இந்த பாலத்தின் நடுப்பக்கத்திலிருந்து கீழ பார்த்தா, ஆத்து தண்ணியும், அதைக்கடக்க ஒரு சாலையுமென அழகா காட்சியளிக்கும் இந்த இடம்.  

இந்தப் பாலத்தின் வழியா போகும் தண்ணி குமரி மாவட்டத்தின் கல்குளம், விளவங்கோடு வட்டத்திலிருக்கும் ஊர்களின் நீர்ப்பாசனத்துக்கு உதவுது. அணையிலிருந்து வரும் தண்ணி முதலில் மாத்தூர் பாலத்திற்கும் அதன்பின் செங்கோடி, வடக்குநாட்டு பாலங்கள் வழியா தேங்காய்ப்பட்டணம், அதைச் சுற்றியுள்ள கிராமத்திற்கும் பாயுது.

ஒரு டூவீலர்ல சமாளிச்சு ஓட்டுமளவுக்கு  இந்த பாலத்தின் அகலத்தில் குறுகிய பாதையில் பாலத்தின் இந்த முனையிலிருந்து அந்த முனைவரை செல்லலாம். இரு மலைகளுக்கிடையே, மேலிருக்கும் நீலவானம், பறந்து செல்லும் மேகம், கீழிருக்கும் அடர்ந்திருக்கும் தென்னை, ரப்பர் மரங்கள்,   சலசலத்து ஓடும் ஆறு என இயற்கை எழிலை கண்டு ரசிக்கலாம்.  என்னை மாதிரியான உயரத்தை கண்டு பயப்படுறவங்க இந்த இடத்தை தவிர்த்துடலாம். அதனால்தானோ என்னமோ என்னால் இதுவரை இந்த இடத்துக்கு போகமுடில.     

என்னைமாதிரி பயந்தாங்கொள்ளிங்களும், கால்வலி எடுத்தவங்களும் பாதியிலேயே கீழிறங்க, பாலத்தின் பக்கத்திலிருக்கும் படிக்கட்டுக்களால் கீழ வரலாம்.   பாலத்துக்கடியில் நதிக்கரையில் குழந்தைகள் விளையாட சின்னதா ஒரு பூங்கா இருக்கு.  கன்னியாக்குமரியின் விளவன்கோடு, கல்குளம், அதைச்சுற்றியுள்ள பகுதிகள்லாம் ஒருகாலத்தில் வறண்டிருந்தது. அப்பகுதிகளுக்கென நீர்ப்பாசன வசதிகளை செம்மைப்படுத்தினால் விவசாயம் நடந்து இப்பகுதி வளம்படும்ன்னு எண்ணிய பெருந்தலைவர் காமராஜர்  முயற்சியால் இந்த பாலம் 1962ல கட்ட ஆரம்பிச்சு,  1966ம் ஆண்டு கட்டப்பட்டது. மாத்தூர் தொட்டிப்பாலத்தின் பயனாக பல ஹெக்டர் விவசாய நிலங்கள் பயன்பெற ஆரம்பிச்சு கன்னியாக்குமரி மாவட்டம் விவசாயத்தில் தன்னிறைவு அடைஞ்சுது.

இந்த பாலம் திருவட்டாறிலிருந்து 3கிமீலும், கன்னியாக்குமரிலிருந்து 60கிமீலும், நாகர்கோவிலிலிருந்து 45கிமீ தூரத்திலும் இருக்கு.  சாலைமார்க்கமாவும், ரயில் மார்க்கமாவும் போகலாம். ஆகாயமார்க்கமா போகனும்ன்னா திருவனந்தபுரம்வரை போயிட்டு அங்கிருந்து சாலை மார்க்கமா 70கிமீ பயணிச்சா இந்த பாலம் வரும். எல்லாரும் ஒருக்கா போய் பார்க்கவேண்டிய இடம்ன்னு  அப்பா சொல்வார். எனக்குதான் இதுவரை அமையவே இல்ல. 

நம் பாட்டனின் கட்டிடக்கலை, நிர்வாகத்திறன், திட்டமிடுதல், நீர்மேலாண்மை, விவசாயத்துக்கு கொடுக்கும் முக்கியத்துவம்ன்னு பலவிசயங்களை இன்றைய தலைமுறைக்கு எடுத்துக்காட்டும் விதமா மௌனமாய் நின்றுக்கொண்டிருக்கிறது இந்த மாத்தூர் தொட்டிப்பாலம்.

படங்கள்லாம் நெட்ல சுட்டது....

நன்றியுடன்,

ராஜி

ஈசியான கேரட் அல்வா - கிச்சன் கார்னர்

வெள்ளையா இருக்கவுங்கலாம் பொய் சொல்லமாட்டாங்கன்ற வடிவேலு காமெடி மாதிரி வெள்ளையா இருக்க பண்டம்லாம் உசத்தின்னு நினைச்சுக்கிட்டிருக்கோம். ஆனா, உண்மை அப்படியில்லை. மைதா, சர்க்கரை, சுத்திகரிக்கப்பட்ட எண்ணெய், பாலீஷ் பண்ணப்பட்ட அரிசி, ரவைன்னு எல்லாமே உடம்புக்கு தீங்கு செய்யக்கூடியதுதான். நஞ்சுன்னு தெரிஞ்சே வெள்ளை சர்க்கரையை பயன்படுத்திக்கிட்டிருக்கோம். இந்த நச்சுப்பொருள்தான் உணவு அரசியலில் அரிசி, கோதுமைக்கு அடுத்தபடியான இடம்பெற்றிருக்கு.

எலும்புப்புரை நோய், எலும்பு மெலிதல், எலும்புத்துளைன்னு பெண்களை மட்டுமே தாக்கும் ஆஸ்டியோபொரோசிஸ்ன்ற நோய் சர்க்கரையை சாப்பிடுவதால் உண்டாகுது. அதுமட்டுமில்லாம, நிறைய வகை புத்துநோய் உருவாக இந்த சர்க்கரையே காரணமாகும்.    நம் பாரம்பரிய இனிப்புகள்லாம் பனைவெல்லத்துலயும், வெல்லம், தேனினாலுமே செய்யப்படும். ஆனா, அறிவியல் வளர்ச்சி சர்க்கரை கொண்டுவந்தபின்,  பயன்படுத்த ஈசின்னு இந்த சர்க்கரையை பயன்படுத்த ஆரம்பிச்சுட்டோம்.  வெல்லம் கொஞ்ச நாளில் கெட்டுடும், இல்ல காத்தோடு சேர்ந்து வேதிமாற்றமடைஞ்சு நீர்த்துடும்.  அதுமில்லாம வெல்லத்துல, கரும்பு சக்கை, மண் மாதிரியான பொருட்கள் இருப்பதால அதை ஒதுக்கி வைக்க ஆரம்பிச்சோம்.அதன்பலனை இன்னிக்கு அனுபவிக்குறோம். 

நமக்கு தேவையான சர்க்கரையை, அரிசி, கிழங்குகள், கீரைகள், சர்க்கரையிலிருந்து எடுத்துக்கொள்ளும்.  ஆனா, இப்ப தினத்துக்கு 20முதல் 50கிராம் சர்க்கரையை நேரடியா எடுத்துக்க ஆரம்பிச்சுட்டோம். தலைவாழையிலையில் இனிப்பு பரிமாறின காலம்போய் சர்க்கரை நோய்க்குண்டான மாத்திரையை பரிமாற ஆரம்பிச்சுட்டோம்.  இனியாவது சுதாகரிச்சுக்கிட்டா நல்லது. இயற்கையோடு இணைந்து வாழ கத்துக்கிட்டா மிகப்பெரிய ஆபத்திலிருந்து பிள்ளைகளை தப்பிக்க வைக்கலாம்... ஆரோக்கியத்தைவிட நாவின் ருசிக்கும், சோம்பேறித்தனத்துக்கும் ஆட்பட்டதால சர்க்கரையைதான் அதிகம் சேர்த்துக்குறோம்.

தேவையான பொருட்கள்..

கேரட் 1/4கிலோ

சர்க்கரை 1/4கிலோ

நெய் - 100மிலி

பால் 100மிலி

முந்திரி திராட்சை

ஏலப்பொடி 

கொஞ்சூண்டு கலர் பவுடர்(தேவைப்பட்டால்)

உப்பு - கொஞ்சம்

வாணலியில் நெய் ஊற்றி காய்ஞ்சதும். முந்திரியை உடைச்சு சிவக்க வறுத்துக்கனும்.. திராட்சையையும் சேர்த்து வறுத்துக்கனும்.

அதே வாணலியில் இன்னும் கொஞ்சம் நெய் ஊத்தி துருவிய கேரட்டை சேர்த்துக்கனும். 

கூட கொஞ்சூண்டு உப்பு சேர்த்து நல்லா வதக்கனும்...

கேரட் கொஞ்சம் வதங்கினதும் பால் சேர்த்துக்கனும்.

 பச்சை வாசனை போய்,  கேரட் வெந்ததும் சர்க்கரையை சேர்த்துக்கனும்..

கூடவே ஏலக்காய்பொடி சேர்த்துக்கனும்..

தேவைப்பட்டால் கலர்ப்பொடி சேர்த்துக்கலாம். இல்லன்னாலும் பரவாயில்லை

வறுத்து வச்சிருக்கும் முந்திரி திராட்சையை சேர்த்துக்கனும்.... நல்லா சுண்டி வரும்வரை விட்டு அல்வாப்பதம் வந்ததும் இறக்கிடனும்.

வீட்டிலேயே இருக்கும் பொருட்களை கொண்டு சுலபமா செய்யக்கூடிய கேரட் அல்வா ரெடி.. 

நன்றியுடன்,

ராஜி

புடலைங்காய்க்கும், கத்தரிக்காய்க்கும் குழந்தை பிறந்தா எப்படி இருக்கும்?! - ஐஞ்சுவை அவியல்

அடியேய்! உன்னோடு மல்லுக்கட்டி கட்டியே என் ஆயுசு முடிஞ்சிடும்போல! எதாவது சொன்னா காதுல வாங்குறியா?! உன்போக்குல போறியே! உன்னைலாம்  திட்டக்கூடாது.  உன்னை படைச்ச பிரம்மன்மட்டும் கைக்கு கிடைச்சா.. உண்டு இல்லன்னு பண்ணிடுவேன்

என்னாது என்னை பிரம்மன் படைச்சானா?! லூசா மாமா நீ?!

இல்லியா பின்ன?! இந்த உலகத்தை படைச்சது பிரம்மன். அவர்தான் ஆக்கல் தொழிலின் முதலாளிடி. உயிர்களை படைக்குறதுதான் அவர் வேலை...

இப்படிதான் சொல்லி பலகாலமா ஏமாத்திக்கிட்டிருக்காங்க. 13.8 பில்லியன் வருசத்துக்கு முந்தி பிரபஞ்சம் உருவாகியது.    13.6 பில்லியன் வருசத்துல பால்வெளி அண்டம் உண்டானது. 4.6 பில்லியன் வருசத்துல பூமி உண்டானது. 4.5பில்லியன் வருசத்துல நிலா உண்டானது. 4.28 பில்லியன் வருசத்துல தண்ணீர் திரவ வடிவத்துக்கு வந்துச்சு.  3.9 பில்லியன் வருசத்துல பச்சையம் உருவானது. 

3.5 பில்லியன் வருசத்துல ஒரு செல் உயிர்களான அமீபா, பாரமீசியம், பாக்டீரியாலாம் தோன்ற ஆரம்பிச்சுது. 2.9 வருசத்துல பகோலா பனிப்பாறைகள் உண்டானது. 2.5ல கடல்லயும், வளிமண்டலத்துலயும் ஆக்சிஜன் கிடைக்க ஆரம்பிச்சது. 1.6ல உயிர்கருக்கள் உண்டாக உண்டானது. 510 மில்லியன் வருசத்துல முதுகெலும்புள்ள உயிரினம் கடல்ல உருவானது.

420 மில்லியன் வருசத்துல செடிகளும், பவளப்பாறைகளும் உண்டானது. 400 மில்லியன் வருசத்துல காடுகள் உருவானது. 360வது மில்லியன் வருசத்துல முதுகெலும்புள்ள கடல்வாழ் உயிரினத்துக்கு கால் முளைக்க ஆரம்பிக்குது. 350மில்லியன் வருசத்துல அந்த உயிரினம் வளர்சிதை மாற்றமடைஞ்சு தரையில் நடக்க ஆரம்பிச்சது. 230 மில்லியன் வருசத்துல டைனோசர் காலம் ஆரம்பிச்சது. 199 மில்லியன் வருசத்துல பறப்பன, ஊர்வன தோன்றியது. 65 மில்லியன் வருசத்துக்கு முந்தி விண்கல் பூமில விழுந்து, எரிமலை வெடிச்சு டைனோசர்லாம் அழிஞ்சுது. 63வது மில்லியன்ல நஞ்சுக்கொடி(தொப்புள்கொடி) பாலூட்டிகள் பிறக்குது.  45மில்லியன் நவீன பாலூட்டிகள்ன்னு சொல்லப்படும் குரங்குகள் மாதிரியான உயிரினம் உருவாகுது.

7மில்லியன் வருசத்துல நம்ம முன்னோர்களான சிம்பான்சி உருவாச்சு. அதுக்குப்பின் படிப்படியா முன்னேறி Homosapiensன்ற ஆதிமனிதன் 2,00,000 வருசம் முன்ன உருவானான். 70,000 வருசத்துக்கு முன்ன பூமி குளிராகவும், அழுக்காகவும் மாறி Ice ageக்கு மாறுச்சு. 60,000 வருசத்துல அதிலிருந்து ஆதிமனிதனில் கொஞ்ச பேரு ஆப்பிரிக்கா கண்டத்துக்கு போனாங்க.

எங்க இருந்துடி அவங்கலாம் ஆப்பிரிக்காவுக்கு போனாங்க?!

ஹோமோசேப்பியன்ஸ்ல எங்கிருந்தும் ஆப்பிரிக்காவுக்கு போகல. அந்த சுற்றுவட்டாரத்திலதான் இருந்தாங்க. பூமி பாகப்பிரிவினை நடந்திருக்கும் இந்த நேரத்தில் இப்படி சொன்னால்தான் விளங்கும். அதும் உன்னைமாதிரி தத்திகளுக்கு இப்படிதான் சொல்லனும். ஹோமோசேப்பியன்ஸ்லிருந்து Homininன்ற உயர்நிலை விலங்கினம் உருவானது. இவங்க கோரைப்பற்கள் குரங்கைவிட சின்னதா இருந்துச்சு. Homininn பத்திய முதல் தடயம் ஆப்பிரிக்காவில்தான் கிடைச்சது. சரியா இதேக்காலக்கட்டத்தில் கிழக்கு ஆப்பிரிக்காவில் ஒரு உயிரினம் தோணுச்சு. அந்த உயிரினத்தின் தொடை எலும்புகள், குனிஞ்சு நாலுகாலால் நடக்க ஆரம்பிச்சுது.

50,000வருசத்துல கொஞ்சபேரு ஆஸ்திரேலியா போனாங்க. அதேக்காலக்கட்டத்துல கொஞ்சபேரு ரெட் சீ பக்கம் போனாங்க. 35,000 வருசத்துல ஆசியாவின் நடுப்பகுதியில் மக்கள்தொகை பெருக்கம் உண்டானது. நாப்பது வருசத்துக்கு முந்தி மனுசன் தென்கிழக்கு வழியா ஆப்பிரிக்காவுக்குள் நுழைஞ்சு Neanderthalsன்ற ஆதிமனிதனை காலி பண்ணாங்க.

ஆசியாவின் ரஷ்யாவுக்கும், வடஅமெரிக்காவின் அலாஸ்காவுக்கும் இடையிலிருக்கும் நீரிணையான பெரிங் நீரிணையை கடந்து அமெரிக்காவுக்குள் மனுசன் போனான்.  அடுத்து Ardipithecus Ramidus உருவாகியது. இதோட பாத எலும்புகள் ரெண்டு கால்ல நடக்க ஆரம்பிச்சு வச்சுது

நாளாக.. ஆக Homininல் மாற்றம் உண்டானது. இதனால் நல்லா நடக்கவும் , மரமேறவும் முடிஞ்சது. அதுக்கு தகுந்தமாதிரி 4மில்லியன் வருசத்துக்கு முந்திவரை இதனோட கால்விரல்களுக்கிடையே அதிகப்படியான இடைவெளி இருந்துச்சு. அதனால் அது ஈசியா மரமேற முடிஞ்சது. 4மில்லியன் வருசத்துக்கப்புறம் அந்த கால்விரல் இடைவெளி காணாம போனது. Homininsல புது இனம் வர ஆரம்பிச்சிச்சு . அதோட பேரு Kenyanthropus 3 மில்லியன் வருசத்துக்கு முந்திவரை இவங்க ஆப்பிரிக்காவில்தான் அதிகப்படியா இருந்தாங்க. அடுத்தது அதோட பாத எலும்பான Bipedalism மனுசன மாதிரி ரெண்டு கால்ல நடக்க வச்சுது . அடுத்து கற்களாலான உபகரணங்களை பயன்படுத்த ஆரம்பிச்சாங்க. எத்தியோப்பியாவில்தான் முதல் கல்லாலான உபகரணங்கள் பயன்படுத்தப்பட்டதுன்னு சான்றுகள் சொல்லுது.

நம்ம வம்சாவழியினர்.

மனுசனுக்கு பெருத்த சவாலா இருந்த நெருப்ப Homo Heidelbergensisதான் கையாள கத்துக்கிட்டாங்க. homo neanderthalensis இதுக்கிடையில் ஒருபுறம் ஓரிடத்தில் தங்கி 12,000வருசத்துல விவசாயம் செய்ய ஆரம்பிச்சாங்க.அதுக்கப்புறம் சக்கரத்தை கண்டுப்பிடிக்க வாழ்க்கை எளிமையா மாற ஆரம்பிச்சது. பூமிப்பகுதி முழுக்க இவங்க பரவ ஆரம்பிச்சாங்க. இந்த காலக்கட்டத்துல ஹோமோசேப்பியன்ஸ் இனம் அழிய ஆரம்பிச்சது. இதுக்கு காரணம் இயற்கையோடு போட்டி போட்டதால்ன்னு சொல்றாங்க. 4,500ல எகிப்துல பிரமிட் கட்ட ஆரம்பிச்சாங்க.

1543ல அறிவியல் யுகம் உருவானது. 1760ல தொழிர்புரட்சி உண்டானது. 1903ல முதன்முதலா விமானத்தை கண்டுபிடிச்சாங்க. 1914ல முதல் உலகப்போர் உண்டானது. 1939ல இரண்டாவது உலகப்போர் வந்துச்சு. 1969ல நிலாவுக்கு போனான். டிவி, ஃப்ரிட்ஜ், கார், செல்லுலர்ன்னு எத்தனையோ கண்டுபிடிப்புகளை மனுசன் கண்டுப்பிடிச்சான். இப்படிதான் இன்றைய உலகம் உருவானது. அதைவிட்டு பிரம்மன் உலகை படைச்சான். ஏவாள் கேட்டதால ஆதாம் ஆப்பிளை பறிச்சு கடிச்சதால உயிரினம் உண்டானதுன்னு கதை விடுவாங்க அதுலாம் நம்பாத மாமா.

அப்ப கடவுள்லாம் பொய்யா?!

அதுக்கும் என்னால பதில் சொல்லமுடியும். அதுலாம் இன்னொரு பதிவில் பார்க்கலாம். உலகம் உருவான கதையை மட்டும்தான் இங்க சொன்னது. உலகம் எப்படி உருவாச்சுன்னு நான் சொன்னது துளியூண்டுதான். முழுசா தெரிஞ்சுக்கனும்ன்னா Jared diamond எழுதுன Guns, germs and steel ஐ படிக்கலாம். இல்ல என்னைய மாதிரி இங்கிலீஷ் தெரியாதவங்க இந்த புத்தகத்தை படிக்கலாம். அதைவிட்டு பிரம்மா, ஜீசஸ்தான் உலகை படைச்சாங்கன்னு ப்ரூடா விடுறவங்களை நம்பாத மாமா.

இப்படி பல பில்லியன் வருசமா நல்லபடியா இருந்த இந்த உலகத்தை, ஒரு 15,000 வருசத்துக்கு முந்தி வந்த மனுசன் பாழ்படுத்த ஆரம்பிச்சு, இன்னிக்கு மனுசனை தவிர மத்த உயிரினம் வாழவே லாயக்கில்லாம ஆக்கிட்டான். இந்த பிரபஞ்சம் எப்படி நம்மக்கிட்ட மாட்டிக்கிட்டு லோல்படுதுன்னு ஒரு உதாரணம் மேலிருக்கும் இந்த படம்...

தலையெழுத்தென்றே தெருவில் மூன்று பத்து ரூபாய்கென விற்கும் அவள் கைகளில் தொங்குகிறது அவள் தலையெழுத்தினை சரியாக எழுதாத கடவுள்கள்.....!

புடலைங்காயும், கத்திரிக்காயும் கலப்பு மணம் பண்ணி பிறந்த பிள்ளைங்க போல இருக்குது மாமா இந்த கத்திரிக்கா...

எப்பயுமே என்னைதான் திட்டுவே . இன்னிக்கு உன்கிட்ட  மாட்டிக்கிட்டது  கடவுளா ?! ரைட்டு....

நன்றியுடன் 

ராஜி 

வாழ்வே மாயமா?! - பாட்டு புத்தகம்

கொடுத்தும் பெற மறுத்து நிராகரிக்கப்பட்டது அன்பென்றால் எல்லாத்தையும் தூக்கி போட்டு உடைக்கனும்ன்னு   ஒரு கோவம் வரும். ஆற்றாமை, கழிவிரக்கம், பழி உணர்ச்சின்னு எல்லாம் கலந்த கலவையான ஒரு உணர்ச்சி வரும். அழுது, அரற்றி, முட்டி மோதி போங்கடா டேய்(டி), யாரையும் நம்பி நான் இல்லன்னு கெத்தா திமிரா வெளியில் சொல்லிக்கிட்டு பகல் முழுக்க திரிஞ்சாலும், படுக்கையில் படுக்கும்போதுதான் அந்த வெறுமை தாக்கும். எத்தனைதான் சமாதானங்களை வரிசையா மூளை எடுத்து சொன்னாலும் மனசு அதையெல்லாம் ஏத்துக்காம நம்மையும் மீறி அழுகை துளிர்க்கும். அந்த    வலி, வேதனைலாம் சொல்ல வார்த்தைகள் இல்ல. அந்த மாதிரி எல்லா  உணர்ச்சிகளும்  கலவையே இந்த பாட்டு.

ஒரு கோபக்கனலோடு, நிராசையான ஒருத்தியின் சோகத்தை பிரதிபலிக்கும் பாட்டு.  பாடலை கேளுங்க. புல்லாங்குழலிலேயே அந்த கோபம், மென்சோகம் எல்லாத்தையும் காட்டிட்டு, ஒரு சிறு  தபேலாவின் தாளத்தில் கோவத்தையும். மனதிடத்தையும் காட்டி இருப்பார் ராஜா. அவளின் மனம் பேதலிப்பதை அவ்வளவு அழகாக வெளிக்கொணர்ந்து இருப்பார் இளையராஜா. பலருக்கு இந்த பாட்டு ஃபேவரிட்தான். இதுவரை கேட்டிராவிட்டாலும் கேட்ட மாத்திரத்திலேயே பிடிக்கும் இந்த பாட்டு. சசிரேகாவுக்கு இதுதான் முதல் பாட்டுன்னு சொன்னா நம்ப முடியாது. போங்கடா டேய்ன்னும், தன் நிலை இப்படி ஆகிடுச்சேன்னு அழுகையுமா நடிக்க முட்டைக்கண்ணு  ஸ்ரீதேவியை தவிர வேறு யார் இருக்க முடியும்?! 

வாழ்வே மாயமா?
வெறும் கதையா? கடும்புயலா?
வெறும் கனவா நிஜமா?
நடந்தவை எல்லாம் வேஷங்களா?
நடப்பவை எல்லாம் மோசங்களா?
(வாழ்வே மாயமா?)

நிலவுக்கு பின்னால் நிழலிருக்கும்
நிழலுக்கும் ஒருநாள் ஒளிகிடைக்கும்
மலருக்குள் நாகம் மறைந்திருக்கும்
மனதுக்குள் மிருகம் ஒளிந்திருக்கும் 
திரைபோட்டு நீ மறைத்தாலென்ன 
தெரியாமல் போகுமா?
(வாழ்வே மாயமா?)

சிரிப்பது போல முகமிருக்கும்....
சிரிப்புக்குப் பின்னால் நெருப்பிருக்கும்!!
அணைப்பது போல கரமிருக்கும்...
கொடுவாள் அங்கே மறைந்திருக்கும்!!
திரைபோட்டு நீ மறைத்தாலென்ன 
தெரியாமல் போகுமா?
(வாழ்வே மாயமா?)

திரைப்படம் : காயத்ரி

பாடலாசிரியர்: பஞ்சு அருணாசலம்

இசை: இளையராஜா

பாடலைப்பாடியவர்: B.S. சசிரேகா

நன்றியுடன்,

ராஜி