Friday, June 13, 2014

பழமுதிர்சோலை, நூபுர கங்கை - புண்ணியம் தேடி ஒரு பயணம்

அழகர் கோவிலில் சுந்தராஜ பெருமாளை தரிசனம் செய்தாகிட்டுது. பெருமாளை தரிசிக்காதவங்க போய் தரிசனம் செஞ்சுட்டு வந்துடுங்க. நாங்க காத்திருக்கோம். எல்லோரும் சேர்ந்து பழமுதிர்சோலைக்கு போகலாம்...., மாமன் மலைக்கு கீழிருந்து அருள் புரிகிறான். மருமகன் மலைக்கு மேலிருந்து அருள் புரிகிறான் என கிண்டலாக சொல்வதுண்டு.


குன்றிருக்கும் இடமெல்லாம் குமரன் இருக்கும் இடமாக கருதி கொண்டாடும் நாம் முருகனின் அறுபடைவீடுகளில் ஒன்றாக கருதப்படும் பழமுதிர்சோலைக்கு  இனி பயனமாகலாம்.  அழகர்கோவிலில் இருந்து பழமுதிர்சோலைக்கு நடந்தும் செல்லலாம் இல்ல கோவில் தரப்பில் வேன் சர்வீஸ்சும் இருக்கிறது.அதற்கு 10 ரூபாய் கட்டணமாக வசூலிக்கப்படுகிறது. நாம கால்நடையாவே சென்றால்தான் முருகனின் அருள் முழுமையாக கிடைக்கும் அத்தோடு இயற்கையை ரசிக்கலாம் என்பதால் நடைப்பயணமாக செல்லலாம். நடைப்பயணமாய் போகனும்ன்னு முடிவெடுத்தப் பின் கவனிக்கப்பட வேண்டிய விஷயம் ஒண்ணு இருக்கு. இங்கே வழிப்பறி செய்ய இங்குள்ள குரங்குகள் தனி பயிற்சி எடுத்திருக்கோ!? என்னமோ! பின்னால் வந்து நம்முடைய பைகளை வலுகட்டாயமாக பறித்துக் கொள்ளும். ஆகையால், கையில் நல்ல கம்பு வைத்துக் கொண்டும் கூட்டமாக கூட்டமாகச் செல்லுவது நலம். இனி நாம் பயணத்தை தொடரலாம்....,

நடந்து சென்றுக் கொண்டே இந்த திருக்கோவிலின் ஸ்தல வரலாற்றை பார்க்கலாம்...,  தனது, தமிழ் புலமையால் புகழின் உச்சிக்குச் சென்ற அவ்வையாருக்கு தான் என்ற அகங்காரம் தலை தூக்க ஆரம்பித்தது.  அந்த அகங்காரம் தமிழுக்கும், தமிழன்னைக்கும் நல்லதில்லைன்னு உணர்ந்த  முருகன் சிறு விளையாட்டை நடத்த விரும்பினான். 


அவ்வைப்பாட்டி  நடந்து செல்லும் இவ்வழியில் ஆடு மேய்க்கும் சிறுவனாக மாறி அங்கிருந்த ஒரு நாவல் மரத்தின் கிளை ஒன்றில் ஏறி அமர்ந்து கொண்டார். நீண்ட தொலைவு பயணம் செய்திருந்ததால் அவ்வைக்கு களைப்பும், பசியும் வரவே, சிறிது ஓய்வெடுக்க நாவல் மரத்தின் நிழலில் வந்து ஓய்வு எடுத்தார் அவ்வை பாட்டி.


நாமும் நமது மூதாதையர்களுடன் அமர்ந்து கொஞ்சம் ஓய்வெடுத்து செல்லலாம். இங்கிருப்பவர்கள் அனைவரும் நம்முடைய மூதாதையர் அல்லவா!? கொஞ்சம் கவனமாக இருப்பது நலம். சரி இனி கதையை தொடரலாம்...,


அப்போது, தற்செயலாக அந்த மரக்கிளையில் ஆடு மேய்க்கும் சிறுவன் ஒருவன் அமர்ந்திருப்பதைக் கண்டார். அந்த மரத்தில் நிறைய நாவல் பழங்கள் இருப்பதையும் பார்த்தார். உடனே அந்தச் சிறுவனிடம், "குழந்தாய்... எனக்குப் பசிக்கிறது. சிறிது நாவல் பழங்களைப் பறித்துத் தர முடியுமா?" என்று கேட்டார். அதற்கு, சிறுவனாக இருந்த முருகப்பெருமான், "சுட்டப் பழம் வேண்டுமா? சுடாத பழம் வேண்டுமா? " என்று கேட்டார்.

சிறுவனின் கேள்வி அவ்வைக்குப் புரியவில்லை. பழத்தில் கூட சுட்டப் பழம், சுடாத பழம் என்று இருக்கிறதா? என்று எண்ணிக் கொண்டவர், விளையாட்டாக "சுட்டப் பழத்தையே கொடுப்பா..." என்று கேட்டுக் கொண்டார். தொடர்ந்து, நாவல் மரத்தின் கிளை ஒன்றை சிறுவனாகிய முருகப் பெருமான் உலுக்க, நாவல் பழங்கள் அதில் இருந்து கீழே உதிர்ந்து விழுந்தன. அந்தப் பழங்களைப் பொறுக்கிய அவ்வை, அந்தப் பழத்தில் மணல் ஒட்டி இருந்ததால், அவற்றை நீக்கும் பொருட்டு வாயால் ஊதினார். இதைப் பார்த்துக் கொண்டிருந்த சிறுவனாகிய முருகப்பெருமான், "என்ன பாட்டி... பழம் சுடுகிறதா?" என்று கேட்டார்.

சிறுவனின் அந்த ஒரு கேள்வியிலேயே அவ்வை பாட்டியின் அகங்காரம் பறந்து போனது. தன்னையே சிந்திக்க வைத்த அந்தச் சிறுவன் நிச்சயம் மானுடனாக இருக்க முடியாது என்று கணித்த அவ்வை, "குழந்தாய்... நீ யாரப்பா? " என்று கேட்டார். மரக்கிளையில் இருந்து கீழே குதித்த சிறுவன் முருகப்பெருமான், தனது சுயஉருவத்தை காண்பித்து அவ்வைக்கு அருளினார்.
இந்தத் திருவிளையாடல் நடந்த நாவல் மரத்தின் கிளை மரம் இன்றும் சோலைமலை உச்சியில் சோலைமலை முருகன் கோவிலுக்கு சற்று முன்னதாக இருக்கிறது. 


அதோ தூரத்தில் கோவில் தெரிகிறது. உண்மையில் சொல்லனும்ன்னா, நான் முன்பு பார்த்த கோவிலின் அழகு இப்பொழுது இல்லை. எல்லாம்  மாறி  கட்டிடங்களாக அதன் இயற்கை எழிலை இழந்து நிற்கிறது.

  திருத்தணி, திருச்செந்தூர், பழனிப்  போல இக்கோவில் ஆடம்பரமில்லாம மிக எளிமையாய் இருக்கு. முன்னலாம் இக்கோவிலில் முருகனின் வேலுக்கு மட்டுமே அபிஷேக ஆராதனை உண்டாம். சமீபக்காலங்களில்தான் முருகனின் சிலை பிரதிஷ்டை செய்து வழிபாடு செய்றாங்களாம். அந்த வழிபாடுகள் கூட வேடுவர்கள், குறிஞ்சி நில மக்களின் வழிபாட்டு முறைப்படிதான் இன்றும் நடக்குதாம்.


ரொம்ப நாட்களுக்கு முன், முருகனுக்கு இத்தலத்தில் ஆட்டு ரத்தம் கலந்த அரிசி சோற்றை வேடர் குலத்தவங்க படையல் போட்டதா சொல்றாங்க. அதுக்கு ஆதாரம். நக்கீரர் பாடிய திருமுருகாற்றுப்படையில் ”கொழுவிடைக் குருதி விரைஇய தூவெள்ளரிசி சில்பலிச் செய்துஎன்ற அடியே சான்று.


பழமுதிர்சோலை முருகன் கோவிலிலிருந்து சிறிது தூரத்தில் இருக்கு. வேட்டுவர் குலத்தெய்வமான ராக்காயி கோவில் இங்கு நூபுரக கங்கை தீர்த்தம் விழுகிறது. ஆயிரம் ஆண்டுகள் பழமை வாய்ந்தது. இதன் உற்பத்தியிடம் எவ்வளவு ஆராய்ச்சிகள் செய்த போதிலும் இன்றுவரை கண்டுப்பிடிக்க  முடியவில்லை.
யானை துதிக்கைப் போல பருமனாக கோமுகியின் வழியாக மாதவி மண்டபத்தில் வந்து விழுகின்றது, இத்தீர்த்தத்தில் இரும்பு சத்தும், தாமிர சத்தும் அதிகம் இருப்பதாக ஆராய்ச்சி முடிவுகள் சொல்கிறது. இத்தீர்த்தத்தில் நீராடினால் நோய்கள் தீர்க்கும் சக்திக் கொண்டதாக இத்தீர்த்தம் விளங்குது. இத்தீர்த்தம் தெற்கு நோக்கி பாயும்போது சிலம்பாறுன்னு பேர் பெறுகிறது. 

அழகரின் அடிகளை வருடிக்கொண்டு கடைசியாக ஏரிகளில் கலந்து வயல்களில் பாய்கிறது. ஆற்று நீரின் ருசியும், ஆற்று நீரால் விளையும் தானியங்களின் ருசியும் மிகுந்திருப்பதால் இதற்கு தேனாறு என்றும் பெயர்

இங்கிருக்கும் “மாதவி மண்டபத்தில் அமர்ந்துதான் இளங்கோவடிகள் சிலப்பதிகாரத்தை எழுதியதாக செவிவழி சேதியும் உண்டு. இந்தத் தீர்த்தத் தண்ணீரில்தான் புகழ் பெற்ற அழகர்கோவில் பிரசாதமான சம்பா தோசை தயார் செய்யப்படுகிறது.



இங்கிருந்து ஒன்றரை மைல் தூரத்தில் இருக்கிறது அனுமார் தீர்த்தம். இங்க ஓர் அநுமார் கோயில் இருக்கிறது. இதற்குச் சற்று மேல்கருட தீர்த்தம்கருடர் கோயில் இரண்டும் இருக்கின்றன. அதன் பக்கத்தில் பாண்டவ தீர்த்தமும் கோயிலும் இருக்கு. மலையில் வட பக்க சரிவில்பார்த்த உடனேயே பாபத்தை போக்கக் கூடிய பெரிய அருவி தீர்த்தம் இருக்கிறது. அழகர் கோயிலுக்குச் சிறிது வடக்கே போனால் இருக்கும் உத்தர நாராயண வாவி என்னும் தீர்த்ததினால் தான் கோயில் பரிவார தேவதைகளுக்கு அபிஷேகமும்சமையலும் செய்ய வேண்டும் என்பது ஐதீகம். 


அழகருடைய திருமஞ்சனத்துக்கு மட்டும் தினந்தோறும் மைல் அப்பால் உள்ள நூபுர கங்கை தீர்த்தம் கொண்டு வரவேண்டும். சைத்ரோற் சவ காலத்தில் அழகர் மதுரைக்கும் வண்டியூருக்கும் போய்த் தங்கி இருக்கும் போது கூட இந்தத் தீர்த்தமே கொண்டு வரப்படுகிறது. வேறு தீர்த்தத்தில் அழகரை நீராட்டினால் அவர் உருவம் கருத்து விடுகிறது என்பதாலேயே இப்படி செய்யப்படுகிறது. இந்த விநோதத்தின் ரகசியம் இன்றுவரை ஒருவருக்கும் புலப்படவில்லை.
மீனாட்சி சுந்தரேஸ்வரர் திருமண விருந்து தடபுடலாக தயாராகிக் கொண்டிருந்தது. தங்கள் வீட்டு விருந்து பற்றி மீனாட்சி சிவனிடம் பெருமையடித்துக் கொண்டிருந்தாள். “ உங்களோடு வந்திருப்பவர்களை உடனடியாய் சாப்பிடச் சொல்லுங்க. இங்கு பல்வேறு உணவுகள் கொட்டிக் கிடக்கின்றது. நேரத்திற்கு சாப்பிடாவிட்டால் அனைத்தும் வீணாகி விடுமே!ன்னு கிண்டலடிக்க..., இப்போது எங்கள் யாருக்கும் பசியில்லை. எனது கணங்களில் ஒன்றான குண்டோதரனுக்கு மட்டும் பசிக்கின்றதாம். அவனுக்கு மட்டும் விருந்து வைங்கள் என்று சுந்தரேஸ்வரர் சொல்லி இருக்கிறார்.

மலையளவு இருந்த விருந்து சாப்பாட்டை ஒரு நொடியில் விழுங்கி இன்னும் கொண்டா” வென வாய் பிளந்து நிற்கும் குண்டோதரனை கண்டு மீனாட்சி திக்கித்து நின்று, தன் தவறை உணர்ந்து சுந்தரேஸ்வரரிடம் தஞ்சம் புகுந்தாள். ஐயனும் அன்னப்பூரணியை அழைத்து அவன் பசியை தீர்க்கச் சொன்னார். அன்னை அளித்த உணவுகளை சாப்பிட்டு, ஏரி, குளம், வாய்க்காலில் இருந்த தண்ணீரை குடித்தும் அவன் தாகம் அடங்காமல் ஈசனிடம் முறையிட்டான். 

உடனே, தன் சடை முடியிலிருந்த கங்கையிடம், மதுரை நகருக்கு உடனே தண்ணீர் தேவைப்படுகிறாது. நீ அங்கு செல் என கட்டளையிட்டார். குண்டோதரனிடம்..., "" நீர் வரும் திசைநோக்கி கை வை. அந்த நீரை குடித்து உன் தாகத்தை தீர்த்து கொள்,'' என்றார். இதுவே "வைகைஆனது. 

இப்படித்தான் வைகை உருவானது. நதிநீர் இணைப்பை அன்றே சிவப்பெருமான் துவக்கி வைத்துவிட்டார். நாம்தான் அதை தொடரவில்லை. காற்றுக்கு போட்டிப்போடும் வகையில் பாய்ந்து வந்ததால் இதற்கு வேகவதின்னும் பேர் உண்டு.

வைகையை பாழ்படுத்தியதோடு அழகரையே செயற்கை ஊற்றில் இறக்கி விட்டு தீராத இன்னல்களுக்கு ஆளாகிவிட்டோம். மாமன், மச்சான், மருமகனிடம் மன்னிப்புக் கேட்டு மீண்டும் வைகையில் நீர் கொணறச் செய்வோம்.

19 comments:

  1. எங்களூரைப் பற்றி நாங்களே அறியாத
    அரிய செய்திகள் அற்புதமான படங்களுடன்...
    பகிர்வுக்கும் தொடரவும் நல்வாழ்த்துக்கள்

    ReplyDelete
    Replies
    1. எல்லாமே அப்பா சொன்னதுப்பா! என் அப்பா எந்த ஊருக்கு போனாலும் அதை பற்றிய விவரங்களை கண்டிப்பாய் சொல்வார். அது எனக்கு மட்டுமில்ல என் பிள்ளைகளுக்கும் கூட தொடருது. ஒரு ஊருக்குப் போனால் அதைப் பத்தி தெரிஞ்சுக்கனும்ன்னு சொல்வார்.

      Delete
  2. வணக்கம்

    பதிவை படித்தவுடன் சென்று பார்க்கவேண்டும் என்ற உணர்வு எழுகிறது படங்கள் எல்லாம் அழகு

    -நன்றி-
    -அன்புடன்-
    -ரூபன்-

    ReplyDelete
    Replies
    1. அவசியம் தரிசிக்க வேண்டிய தலம். மாமனும், மருமகனும் அருள் புரியும் தலம்

      Delete
  3. நூபுர கங்கை வரையில்தான் போனோம். அங்கிட்டு அந்தப்பக்கம் இன்னும் மேலே ஏறிப்போகலை:(

    படங்கள் அருமை! பசங்க எல்லாம் சூப்பரா இருக்காங்க:-)))))

    ReplyDelete
    Replies
    1. அடுத்த முறை போகும்போது மற்ற தீர்த்தங்களுக்கும் போய் வாங்கம்மா!

      Delete
    2. ///படங்கள் அருமை! பசங்க எல்லாம் சூப்பரா இருக்காங்க:-)))))///

      என சகோவுக்கு அழகர் கோவிலில் குழந்தைகள் இருப்பது இங்கு துளசிம்மா சொன்ன போதுதான் எனக்கு தெரியவந்தது ஏன் ராஜிம்ம இதை எங்கிட்டே இருந்து மறச்சே

      Delete
    3. //மற்ற தீர்த்தங்களுக்கும் போய் வாங்கம்மா!///
      என்ன மதுரைத்தமிழனிடம் சொல்லுவது போல துளசியம்மாவை மதுரையில் உள்ள டாஸ்மாக் கடைகளுக்கு போய்வாங்கம்மா என்று சொல்லுறீங்க ராஜிம்ம்ம பெரியவங்களுக்கு பதில் சொல்லும் போது பார்த்து சொல்லனும் ஒகேவா

      Delete
  4. நூபுரக் கங்கை வரை சென்றிருக்கிறேன்..இன்னும் மேலே சென்றதில்லை.
    அருமையான தகவல்களுடன் அருமையான படங்கள்..

    ReplyDelete
    Replies
    1. நம் மக்கள் செய்யுறதுலாம் எதாவது ஒரு ஊருக்கு போனோமா எல்லோரும் போகும் கோவில் அல்லது இடத்துக்கு போய்ட்டு வர்றதோடு சரி. மத்தப்படி அந்த ஊரில் வேறென்ன ஸ்பெஷல்ன்னு கேட்டு போய் வர மாட்டோம்.

      Delete
  5. கடந்த ஆண்டு சென்று வந்த நிலைவலைகளை மீட்டிவிட்டீர்கள்
    நன்றி சகோதரியாரே

    ReplyDelete
  6. நான் பழமுதிர் சோலை முருகனை மட்டும் பார்த்துவிட்டு வந்துவிட்டேன்.
    ஔவைக்கு அருளிய நாவல் மரம்.....!!!
    அடுத்த முறை போகும் போது உங்களின் இந்தப்பதிவின் காப்பி எடுத்துக் கொண்டு போவேன்.
    பதிவு அருமை தோழி. வாழ்த்துக்கள்.

    ReplyDelete
  7. ஆஹா ...எங்களது குடும்பப் படத்தை எவ்வளவு அழகாகப் படம்
    பிடித்துப் போட்டுள்ளீர்கள் ! கடைசியில என்னுடைய படத்தையும்
    போட்டு கலக்கீட்டீங்க போங்க ராஜிம்மா எனக்கு வெக்க வெக்கமா
    வருது :))))))))))))))))

    ReplyDelete
  8. புதிதாய் எழுதுபவர்கள் தங்களுக்கு எது தெரியுமோ அதை எழுதி விடுகிறார்கள்.உண்மையில் திருமாலிருஞ்சோலை முழுக்க வைணவ திருப்பதியாகும்.இதை பழமுடிர்சொலையாக ஆக்க நினைப்பது தவறு.முருகனின் ஆறாவது படை வீடு இலங்கையில் உள்ள கண்டி கதிர் காமமே.ஆழ்வார்களின் பல பாசுரங்களிலும் அக நானூறு போன்ற சங்க இலைக்கியங்களிலும் இதை பாடி இருக்கிறார்கள்.மேலும் இது தொடர்பான வழக்கு ஒன்று மதுரை நீதிமன்றத்தில் உள்ளது.ஆகவே அழகர் கோயில் ஒருபோதும் பழமுதிர்சோலை ஆகாது.ஊடகங்களில் இது போல் எழுதுவதை தவிர்க்கவும்.மேலும் உண்மை எது என்று விசாரித்து எழுதுங்கள்.தங்கள் படங்களும் கட்டுரைகளும் மிக அருமை.அதில் எந்த சந்தேகமும் இல்லை. நன்றி.

    ReplyDelete
    Replies
    1. Yes. This was encroachment at a later stage, which also famous in Madurai!:)

      Delete
  9. நன்றி திரு வரதராஜன் அவர்களே இந்த பதிவர் மூலம் பல கோவில்களை வாரம்தோறும் தெரிந்து கொள்கிறோம் அந்தந்த கோவில்களை பற்றிய தெரியாத ய்ஜகவல்களியும் தெரிந்துகொள்கிறோம் கடந்த பத்துஆண்டுகளுக்கு மேலாக இந்த பணியை செய்து வருகிறார் அவர் இந்த பதிவுலகதிற்கு புதியவரில்லை இரண்டாவதாக கோவில்களின் வரலாறு எனபது அந்தந்த காலகட்டங்களில் சிலரது இடை சொருகல்கள் மூலமாக கதைகள் திரிந்து போக வாய்ப்புகள் ஏராளம் முருகனுக்கு அறுபடை வீடு மட்டும் இல்லாது 9 ம் படை வீடு உண்டு என்று சொல்ல்பவர்களும் உண்டு அதேபோல் சூரபத்மன் இன்றைய ஆஸ்ட்ரேலியாவின் மன்னன் எனவும் அவனை முருக பெருமான் போரில் தோற்கடித்தார் எனவும் கதைகள் உண்டு நாம் எதை எடுத்துகொள்ள பழமுதிர் சோலைஇங்கே தமிழ் நாட்டவர்களால் அங்கீகரிக்க பட்டதாக உள்ளது ஒரு வேளைநீங்கள் சொல்வதும் உண்மை என்றால் நிச்சயம் ஆராய்ந்து பதிவிடப்பட்ட வேண்டியது முக்கியம்

    ReplyDelete
  10. அருமையான தகவல்கள்.....

    பழமுதிர்ச்சோலை பல வருடங்களுக்கு முன்னர் சென்றது.... மீண்டும் எப்போது என்று தெரியவில்லை!

    ReplyDelete
  11. அருமையான பதிவு. மனம் லயித்துப் படித்தேன்.நன்றி. என் வலைதளமும் வாருங்கள். நன்றி

    ReplyDelete