பொங்கல் குழம்பு - கிச்சன் கார்னர்

பொங்கல் பண்டிகையின்போது அறுவடையாகி வந்த புதுநெல், தானியங்கள், காய்கறிகள்லாம் அதிகம் இருப்பதாலோ என்னமோ பொங்கல் பண்டிகையன்னிக்கு படையலில் காய்கறிகளின் சேர்க்கை அதிகமா இருக்கும். அதுமில்லாம, முள்ளங்கி, அவரைக்காய், மொச்சைக்காய், கத்தரி, பூசணி, சுரைக்காய்ன்னு சொல்லப்படும் நாட்டு காய்களின் விளைச்சல் அதிகமா இருக்கும். முன்னலாம்  குடிசை வீடுகளில்கூட அவரை, சுரைக்காய், பூசணிக்காய் கொடிகளை வீட்டுக்கூரைமேல் ஏத்தி விட்டிருப்பாங்க. அதனால் எல்லார் வீடுகளிலும் காய்கறிகள் அதிகமா விலைஞ்சு அக்கம் பக்கத்து வீடுகளுக்கும் கொடுப்பாங்க. 

பொங்கல் பண்டிகைக்கு புதுத்துணிக்காக ஆவலோடு காத்திருக்குற மாதிரி இந்த குழம்புக்காக வருசம் முழுக்க காத்திருப்போம்.  இந்த குழம்பை செஞ்ச அன்னிக்கே, அதேவேளையில் சாப்பிட்டா ருசி குறைச்சல்தான் மறுநாள் சாப்பிடத்தான் இந்த குழம்பு நல்லா இருக்கும். சுட வச்சு, சுடவச்சு.. சுடவச்சு சாப்பிட்டாதான் இந்த குழம்பு ருசிக்கும்.

தேவையான  தானியங்கள்...

மொச்சை,

காராமணி,

வெள்ளை மூக்கடலை

சிவப்பு மூக்கடலை,

துவரை,

பச்சைபட்டாணி,

வேர்க்கடலை,

பச்சை பயறு

தேவையான காய்கறிகள்..

வெங்காயம்,

தக்காளி

கத்திரிக்காய்

அவரைக்காய்

முள்ளங்கி

பச்சை மொச்சை உரிச்சது

பீன்ஸ்,

சுரைக்காய்

மஞ்சள் பூசணிக்காய்

வெள்ளை பூசணிக்காய்

சேப்பங்கிழங்கு

பிடி கரணை கிழங்கு

கரணை கிழங்கு

சர்க்கரை வள்ளிக்கிழங்கு

மிளகாய் தூள்

மஞ்சப்பொடி

உப்பு

புளி

எண்ணெய்

கடுகு

பூண்டு

கறிவேப்பிலை கொத்தமல்லி

தானியங்களை முதல்நாள் இரவே சிலர் ஊறவச்சிடுவாங்க. ஆனா, எங்க வீட்டில் வறுத்து, குளிர்ந்த தண்ணீரில் சுடச்சுட கொட்டி கழுவி வேக வைப்பாங்க. பத்து விசில் வச்சா வெந்திடும்.

 குழம்பின் ருசிக்காக கொஞ்சம் துவரம்பருப்பை வேகவிட்டு அதில் மிளகாய்தூள், உப்பு, மஞ்சப்பொடி சேர்த்து கொதிக்கவிட்டு, பூசணிக்காய், சர்க்கரை வள்ளிக்கிழங்கு தவிர எல்லா காய்கறிகளையும் கழுவி துண்டாக்கி சேர்த்து கொதிக்க விடனும். 

 வேகவச்சிருக்கும் தானியங்களை சேர்த்து கொதிக்கவிடனும்...

மிளகாய் தூள் வாசனை போனதும், சர்க்கரை வள்ளிக்கிழங்கு, பூசணிக்காய்கள் சேர்த்து கொதிச்சதும் தேவையான அளவு உப்பும், புளிக்கரைசலும் சேர்த்து கொதிக்கவிடனும்.   முதல்லியே சர்க்கரை வள்ளிக்கிழங்கும், பூசணிக்காயும் சேர்த்தால் கரைஞ்சு இருக்க இடமே தெரியாது. 

 குழம்பு கொதிச்சு முடிச்சதும் வாணலில எண்ணெய் ஊத்தி காய்ஞ்சதும் கடுகு போட்டு பொரிஞ்சதும், பொடியா நறுக்கிய வெங்காயம், பஞ்சாய் நசுக்கிய பூண்டு, காய்ஞ்ச மிளகாய், கறிவேப்பிலை, கொத்தமல்லி சேர்த்து தாளிச்சு கொட்டி இறக்கிட்டா பொங்கல் குழம்பு ரெடி. 

இந்த குழம்பைதான் சர்க்கரை சேர்க்காம பொங்கல் பொங்கி, அதோடு பிடிகரணைக்குழம்பு, வெந்தயக்கீரை மசியலோடு படைப்போம்.  இரண்டு நாளுக்கு இதுதான் மூணு வேளைக்கும். பழையது, இட்லி, சப்பாத்தி, சாதம்ன்னு எல்லாத்துக்கும் இதுதான். என் பிள்ளைங்க, ஸ்கூல், காலேஜ், இப்ப ஆபீசுக்கும் இதையே கொண்டு போகுதுங்க. 

பொங்கல் கழிச்ச எட்டாவது நாள் மயிலாறுன்னு ஒரு பண்டிகை கொண்டாடுவோம். பொங்கல் அன்னிக்கு செஞ்ச அதே குழம்பு, காரக்குழம்பு, கீரை மசியல் மீண்டும் செஞ்சு படைப்போம். இந்த இரண்டு நாள் தவிர்த்து மீண்டும் சும்மா நாளில் இந்த குழம்பை வச்சா இந்த ருசி வரமாட்டேங்குது.

மீண்டும் இந்த குழம்புக்காக அடுத்தவருசம் வரை காத்திருக்கனும்..

நன்றியுடன்,

ராஜி