ஐஸ் குச்சி போட்டோ ஃப்ரேம் - கிராஃப்ட்

வீட்டுல சும்மா இருக்க போரடிக்குது. சரின்னு டெய்லரிங் கிளாஸ் போய் வரவான்னு கேட்டேன். அப்பாடா! ரெண்டு மணிநேரம் உன் இம்சைல இருந்து தப்பிச்சிப்போம்ன்னு போய் வா தா(நா)யின்னு வூட்டுக்காரர் சொல்லவே பத்து நாளா டெய்லரிங் கிளாஸ் போய் வரேன்.அதுமில்லாம போன வாரம்லாம் கோவிலுக்குப் போறதுன்னு செம பிசி. 

ஆனாலும், நம் கடமையை மீறலாமா!? கிராஃப்ட் பதிவு போட கைவசம் படங்கள் ஏதுமில்ல. அதனால, டேய் அப்பு, எனக்கு ஒரு கிராஃப்ட் செஞ்சுத் தாடி செல்லம்ன்னு கேட்டேன். போம்மா, எனக்கு பரிட்சைக்குப் படிக்கனும்ன்னு சொன்னான். டேய் பரிட்சையாடா முக்கியம்!? அம்மாக்கு பதிவுதான் செல்லம் முக்கியம்ன்னு சொல்லி அவனை தாஜா பண்ணி செய்முறையைச் சொல்லி ஃபோட்டோ ஃப்ரேம் செய்யச் சொன்னேன். செஞ்சும் கொடுத்துட்டான்.

ஆனாலும், என் வளர்ப்பு சரியில்லப் போல!! என் பேரைக் கெடுத்துக் குட்டிச்சுவராக்கிடுவான் போல!! செய்முறையை சரியாவே படமெடுக்கல!!

தேவையானப் பொருட்கள்:

ஐஸ்குச்சி

வெள்ளைப்பசை

எதாவது படம்(என் போட்டோவை ஒட்டுடான்னு சொன்னேன். போம்மா எல்லோரையும் பயமுறுத்தாதேன்னு சொல்லிட்டான்.)

எல்லாத்தையும் எடுத்து வச்சுக்கோங்க.

ஐஸ்குச்சியின் ஓரங்களில் பசையைத் தடவி முதல் குச்சியின் பக்கத்தில் முக்கால் பாகத்தில் வருமாறு ஒட்ட ஆரம்பிங்க.

மேல இருக்கும் படத்தில் இருக்கும் மாதிரி ஒட்டிக்கோங்க. மொத்தம் 9 குச்சிகள். நடு குச்சிக்கு இந்த பக்கம் நாலு குச்சி, அந்தப்பக்கம் நாலு குச்சி ஒட்டனும்.

குச்சிகளின் மேல் படத்தை ஒட்டனும். படத்தின் மேல் சதுர வடிவில் ஐஸ் குச்சிகளை ஒட்டனும். அது படம் கீழ விழாம இருக்க. கற்கள், செயற்கைப் பூக்கள் கொண்டு போட்டோ ஃப்ரேமை அலங்கரிக்கலாம்.

ஏண்டா கற்கள், பூ எல்லாம் ஒட்டலைன்னு கேட்டதுக்கு அடிக்க வரான். என்னன்னு கேளுங்க சகோஸ்!

சென்னையும் சிவப்பு நிற கட்டிடங்களும் .மௌனச்சாட்சிகள்

கடந்த சில நாட்களாக மதராசப் பட்டணத்திலிருந்து பல்வேறு காலக்கட்டங்களில் உருமாற்றங்களை சந்தித்த சென்னையின் புகழ்பெற்ற இடங்களின், பயண பாதைகளின் வரலாற்றை மௌனசாட்சிகளில் பார்த்து வந்தோம். சில நாட்களாக, நேரமின்மைக் காரணமாக சில இடங்கள் பத்தி விரிவாக சொல்ல முடியல.அடுத்தடுத்த வாரங்களில அதைபத்தி விரிவாப் பார்க்கலாம்.

நம்ம சென்னை நகர்ல பார்த்தோம்னா நிறைய பழங்காலக் கட்டிடங்கள் எல்லாமே சிவப்பு கலரில்தான் இருக்கும். இது என்ன ட்ரேடு மார்க்ன்னு சில சமயம் புரியாது. எப்படி இப்ப இருக்கிற சில அரசு கட்டிடங்கள் பெரும்பாண்மையா மஞ்சள் கலரிலும், பச்சை கலரிலும் இருக்கிறதோ அதேமாதிரி தான் இருக்கும்ன்னு நினைச்சு கிட்டேன்.

உதராணத்திற்கு ராயபேட்டை அரசு மருத்துவமனை பழைய கட்டிடமானாலும் கம்பீரமா இருக்கும்.  அதன் வரலாற்றைப் பார்த்தோம்னா பிரிட்டிஷ்காரங்க சுத்திச் சுத்தி பீச் பக்கமாகவே இருந்ததுனால அவங்களுக்குன்னு ஒரு மருத்துவமனை தேவைபட்டப்ப, அப்ப இருந்த சென்னை பிரெசிடென்சில முக்கிய பொறுபில இருந்த மோர் என்பவர் ஒரு செட்டியிடம் கான்ட்ராக்கட் விட்டு கட்டியதாக சொல்வாங்க. வருஷம் கூட 1912 ல ஆரம்பிச்சு 1914 ல கட்டப்பட்டு திறக்கப்பட்டதாக சொல்வாங்க. 

அதேமாதிரி, பாரிமுனையில் உள்ள ஐகோர்ட், சட்டக்கல்லூரி, எழும்பூரில் உள்ள சிற்பக்கலைக் கல்லூரி, மியூசியம், கன்னிமாரா நூலகம் போன்றவைகளும் சிவப்புக் கட்டிடத்துக்கு உதாரணங்கள். கொஞ்சம் மெனக்கெட்டு ஆராய்ந்து பார்த்ததுல என் சிற்றறிவுக்கு எட்டிய சில விசயங்களைத் தெரிந்துகொள்வோம். வாங்க!

தாட்டிக்கொண்ட நம்பெருமாள் செட்டியார் என்பவர் சிறந்தக் கட்டட மேதை.  பதினெட்டாம் நூற்றாண்டின் நடுவில் வாழ்ந்தவர். மேற்கூறிய கட்டிடங்கள் எல்லாம் இவர்தான் கட்டினார். எழும்பூர் பாந்தியன் சாலையிலிருந்து, ஆரிங்டன் சாலை வரை (தற்போதைய டெய்லர்ஸ் ரோடு) உள்ள நிலப்பரப்பு முழுக்க அவருக்கு சொந்தமாக இருந்தது என சொல்லபடுகிறது. அதனால், "செட்டியார் பேட்டை' என அழைக்கப் பட்டது. நாளடைவில், "செட்டிபேட்டை' என மருவி, இன்று, "சேட்பெட்' என மாறிவிட்டது. 

அப்போது இருந்த ஆங்கிலேய அதிகாரிகள், செட்டியாரின் நிலத்தை வாங்கி, அவரையே வீடுகள் கட்டித் தரும்படி கேட்டுக் கொண் டனர். அப்பகுதியில் இன்றும் அனேக வீடுகள் ஆங்கிலேய பெயர்களாக இருக்கிறது. உதாரணமாக, ஹாரிங்டன், பாந்தியன் என.

இதுதான் பழைய சேத்துப்பட்டு கிராமம். சுமார் 200 ஆண்டுகளுக்கு முன்பு வரை இது ஒரு கிராமமாகத் தான் இருந்திருக்கிறது. பின்னர், கிழக்கிந்திய கம்பெனிக்காரர்கள் கோட்டைக்கு அருகில் இருந்த கிராமங்களை வாங்கத் தொடங்கினர். திருவல்லிக்கேணி, புரசைவாக்கம், எழும்பூர் ஆகிய கிராமங்களின் வரிசையில் மெட்ராசுடன் இணைந்ததுதான் சேத்துப்பட்டு. ஆனால் அப்போது இதன் பெயர் என்ன என்று சரிவர யாருக்கும் தெரியவில்லை.

ஏறத்தாழ 200 ஆண்டுகாலம் இந்தப் பகுதியில் நிம்மதியாக வாழ்ந்த ஆங்கிலேயர்கள் இந்தியாவிற்கு சுதந்திரம் கிடைத்தப் பிறகு கப்பல் ஏறி போயாச்சு, சுத்தமான ஊராச்சுங்கிர மாதிரி இங்கிலாந்திற்கு கப்பல் ஏறினர். அப்போது இங்கிருந்த அவர்களின் வீடுகளைச் செல்வச் சீமான்களான செட்டியார்கள் அதிகளவில் வாங்கினர். இதனால் செட்டியார்கள் நிறைந்த பகுதியாக இது மாறியதால் செட்டியார்பேட்டை அல்லது செட்டிப்பேட்டை என அழைக்கப்பட்டு அதுவே காலப்போக்கில் சேத்துப்பட்டு பெயர் வந்ததுன்னும் சொல்றாங்க. எது எப்படினாலும் அந்த காலக்கட்டங்களில் வாழ்ந்தவங்களுக்கே அதுலாம் வெளிச்சம். இன்றைக்கு நமக்கு அது வெறும் வரலாறு. அந்த சமயத்தில் அவங்களுக்கு அது போராட்டமாக இருந்திருக்கும்!!

இதுல ஆச்சர்யம் என்னனா, நிறைய விசயங்கள் மாற்றம் அடைந்து வருகின்றன. ஆனா ஒரு பாட்டுல சொன்ன மாதிரி, மாறாதையா மாறாது! மனமும், குணமும் மாறாதுன்ற மாதிரி இந்த சம்பவம் இது 1973 ல இருந்த காலேஜ் மாணவர்கள் அப்பவே இப்படிதானான்னு கேட்கும் போது இல்ல எப்பவுமே இப்படிதான்னு சொல்கிற மாதிரி இருக்கு.

இப்பொழுதும் மாணவர்கள் செய்கிற வேலையும் கொஞ்சகூட மாறவே இல்ல. ஆனா அடுத்தவாரம் தன் தோற்றத்தையே முற்றிலுமாக மாற்றிகொண்ட ஒரு கட்டிடத்தின் வரலாற்றோட மௌன சாட்சிகளில் சந்திக்கலாம்.

கடலைப் பருப்பு அரைச்சு விட்ட குருமா- கிச்சன் கார்னர்

காலைல காரசாரமா சட்னி வச்சா வூட்டுக்காரருக்குப் பிடிக்குறதில்ல. சாம்பார் வச்சா சப்புன்னு இருக்குன்னு பசங்களுக்குப் பிடிக்க மாட்டேங்குது! டெய்லியும் இட்லிக்கு தொட்டுக்க என்னதான் செய்யுறதுன்னு மண்டையைப் பிச்சுக்காதக் குறைதான்! குருமா செய்யலாம்ன்னு நினைச்சா பட்டாணி ஊற வைக்க மறந்திருப்போம்!

என் ஓரகத்தி இந்தக் குருமாவைச் செஞ்சாங்க. நல்லா இருந்துச்சு. நானும் அதேப்போல செய்ய ஆரம்பிச்சுட்டேன்.

தேவையானப் பொருட்கள்:

கடலைப்பருப்பு - கைப்பிடி

வெங்காயம் - 2

தக்காளி - 2

ப.மிளகாய் - 2

கறிவேப்பிலை, கொத்தமல்லி - கொஞ்சம்

இஞ்சி - சிறிய துண்டு

பூண்டு - 5 பல்

தேங்காய் - கொஞ்சம்

சோம்பு -கொஞ்சம்

பட்டை- ஒரு துண்டு

கிராம்பு- 2

எண்ணெய் -2 தே.கரண்டி

கடுகு -கொஞ்சம்

மிளகாய் தூள் - தேவைக்கேற்ப

உப்பு -தேவைக்கேற்ப

வெங்காயம், தக்காளி, இஞ்சி, தேங்காயைக் கழுவி வெட்டி வச்சுக்கோங்க.

வாணலியை அடுப்பில் வச்சு சூடானதும் எண்ணெய் ஒரு டீஸ்பூன் ஊத்தி கடலைப்பருப்புப் போடுங்க.

பட்டை, சோம்பு, கிராம்புலாம் போட்டு லேசா வறுங்க. கடலைப்பருப்பு பொன்னிறமாகனும்ன்னு அவசியமில்ல.

வெட்டி வச்சிருக்கும் வெங்காயத்தில் பாதி போட்டு லேசா வதக்குங்க.

பச்சை மிளகாயை போட்டு வதக்குங்க.

வெட்டி வச்சிருக்கும் தக்காளில முக்கால் வாசி சேர்த்து ரெண்டு நிமிசம் வதக்குங்க. 

வெட்டி வச்ச இஞ்சி சேர்த்துக்கோங்க.

பூண்டு சேர்த்துக்கோங்க, தோல் உரிக்கனும்ன்னு அவசியமில்ல.

அடுத்து தேங்காய் சேர்த்து லேசா வதக்கி, அடுப்பிலிருந்து இறக்கி சூடு ஆறினதும், மிக்சில போட்டு கரகரப்பா அரைச்சுக்கோங்க.

வாணலில ஒரு ஸ்பூன் எண்ணெய் ஊத்தி காய்ந்ததும் கடுகுப் போட்டு பொரிய விடுங்க.

மிச்சமிருக்கும் வெங்காயத்தை போட்டு பொன்னிறமா வதக்கிக்கோங்க.

மிச்சமிருக்கும் தக்காளி சேருங்க.

உப்பு சேர்த்து தக்காளி வேகும் வரை வதக்கிக்கோங்க.

கறிவேப்பிலை, கொத்தமல்லி சேர்த்து வதக்குங்க.

தேவையான அளவு மிளகாய்த்தூள் சேர்த்து வதக்குங்க.

கொஞ்சம் தண்ணி ஊத்தி, மஞ்சப்பொடி சேர்த்து நல்லா கொதிக்க விடுங்க.

மிளகாய் தூள் வாசனை போகும் வரை கொதிக்க விட்டு அரைச்சு வச்சிருக்கும் கடலைப்பருப்பு விழுதை சேர்த்துக் கொதிக்க விடுங்க.

கொஞ்ச நேரம் கொதிக்க விட்டு இறக்கிடுங்க. இட்லி, தோசைக்கு நல்ல மேட்சா இருக்கும்..

டிப்ஸ்: கடலைப்பருப்புலாம் வறுத்ததால ரொம்ப நேரம் கொதிக்க விடனும்ன்னு அவசியமில்ல. ஒரு ரெண்டு நிமிசம் கொதிச்சாலே போது. சாம்பார் போல தண்ணியா இல்லாம, குருமா போல கெட்டியா இல்லாம இருந்தா நல்லா இருக்கும். க்டலைப்பருப்பு கொஞ்சமா சேர்த்துக்கோங்க. அதிகமா சேர்த்தா ரொம்ப கொழகொழன்னு இருக்கும். அரைக்கும்போது கரகரப்பா அரைச்சுக்கோங்க.

மீண்டும் அடுத்த வாரம் ஈசியான ரெசிபியோட சந்திக்கலாம்.

இங்க மட்டுமில்லாம இன்னொரு இடத்துலயும் தற்காலிகமா ஒரு வாரத்துக்கு நம்ம கடை ஓப்பன் பண்ணி இருக்கு. அங்க வந்து உங்க ஆதரவு தருமாறு கேட்டுக் கொல்கிறேன்.

பெண்கள் படி தாண்டினால வரும் விளைவு - ஐஞ்சுவை அவியல்

என்னங்க மாமா! எங்க போய்ட்டு வர்றீங்க!?

நம்ம ஊருல இருக்கும் டாஸ்மாக்கை எடுக்க சொல்லிப் போராட்டம் நடத்தலாம்ன்னு இருக்கோம். அதுக்குதான் மீட்டிங் போட்டு வரோம்.

ஏன்!? என்னாச்சு!? அது இல்லாம நம்ம ஊரு ஆம்பிள்ளைகளுக்கு பொழுது விடிஞ்சு பொழுது போகாதே!

ஸ்கூல் காம்பவுண்ட் பக்கத்துலயே டாஸ்மாக் கடை இருக்கு. காலி பாட்டில்களில் இருக்கும் மிச்சம் மீதி சரக்கை ஸ்கூல் பிள்ளைங்க சொட்டு சொட்டா சொட்டி குடிக்குறாங்க. அதுமில்லாம, கோவிலும் பக்கத்துலயே இருக்குறதால குடிமகன்களால பென்கள் கோவிலுக்கு போகவே அச்சப்படுறாங்க. 

அதுமட்டுமில்ல மாமா! போதை தலைக்கேறி சரக்கு பாட்டிலை உடைச்சு போட்டுட்டு போய்டுறதால ஸ்கூல் பிள்ளைங்க காலில் கண்ணாடி ஏறி காயம் படுதுங்க குழந்தைங்க.

ம்ம் அதனாலதான் இங்கிருந்து டாஸ்மாக்கை வேற இடத்துக்கு மாத்தச் சொல்லி போராட்டம் பண்ணப் போறோம். 

போராட்டம் நடத்துறதுல தப்பில்ல! பொதுமக்களுக்கு பாதகம் வராம போராட்டம் பண்ணுங்க. அதான் முக்கியம்.

நினைவு வச்சுக்குறேன் புள்ள. இன்னிக்கு கடைத்தெருவுக்கு போறதுக்காக வண்டில போய்க்கிட்டு இருக்கும்போது பத்து, பன்னெண்டு வயசுல ரெண்டு ஆண் குழந்தைங்க மூட்டை முடிச்சுகளோடு இருந்துச்சு. என்னன்னு கேட்டேன். அம்மா அப்பாவோட தப்பான நடவடிக்கைப் பிடிக்காம எங்கயோ போய்ட்டுதாம். இப்ப அவங்க எங்க எப்படி இருக்காங்கன்னு கூடத் தெரியாதாம். கேட்க ஆளில்லாததால அப்பனோட ஆட்டம் அதிகமாகி உடம்பு சரியில்லாம போய் செத்து போய்ட்டாராம். அதனால, பெரியவங்க யாருமில்ல வாடகை வராதுன்னு வீட்டைக் காலிப் பண்ண சொல்லிட்டாங்களாம். எங்க போறதுன்னு தெரியாம உக்காந்து இருந்த பசங்களைப் பார்க்கும்போது பாவமா இருந்துச்சு. அப்புறம், ஊர் தலைவர் கிட்ட கெஞ்சி கேட்டு இப்பத்திக்கு சமுதாயக் கூடத்துல தங்க வச்சி, கைச்செலவுக்கு கொஞ்சம் பணம் தந்துட்டு வந்திருக்கேன். இனிதான் எதாவது கருணை இல்லத்தை கேட்டு பார்க்கனும்.

அதனாலதான், பொம்பளைங்க எந்த சூழ்நிலையிலயும் உணர்ச்சி வசப்படக்கூடாதுன்னு சொல்லுறது. போனவ ரெண்டு குழந்தைகளைக் கூட்டி போயிருந்தால் நல்லா இருந்துருக்கும். இப்ப பாருங்க, குழந்தைங்க திக்கு திசை தெரியாம நிக்குதுங்க. 

ம்ம்ம் அந்த பசங்க கெட்டவங்க கையில சிக்காம நல்லப்படியா இருந்தா நல்லது. அதான் என் வேண்டுதல் புள்ள.

ம்க்கும் ஊரெல்லாம் நல்லா இருக்கனும்ன்னு நினைக்குறீங்களே! பொண்டாட்டி மனசு புரிஞ்சு நடந்துக்கனும்ன்னு தெரியுதா உங்களுக்கு!?

உன் மனசு கஷ்டப்படுற மாதிரி என்ன செஞ்சுட்டேன் புள்ளா!?

ஒண்ணுமே செய்யலைன்னுதான் சொல்றேன். என் ஃப்ரெண்ட் ராஜி வீட்டுக்காரர் வாலண்டைன்ஸ் டேவுக்காக ராஜிக்கு அல்வாவும், பூவும் வாங்கி வந்து கொடுத்திருக்கார். 

அது மட்டும்தான் உன் ஃப்ரெண்ட் சொன்னாளா!? அதுக்கப்புறம் நடந்ததை சொல்லலியா!?

என்ன நடந்துச்சு!? அல்வாவையும், பூவையும் பார்த்த சின்ன பொண்ணு இனியா, டேய் அப்பு! அப்பா, 20 வருசம் கழிச்சு அம்மாக்கு அல்வா கொடுத்து காதுல பூ சுத்துறாங்கடான்னு சொன்னான். அதுக்கு அப்பு, ஆனா, அம்மா தினமும் அப்பா காதுல பூ சுத்தி அல்வா தர்றங்கன்னு சொன்னான்.

சரி, சரி, ஊரான் வீட்டு கதை நமக்கெதுக்கு!? ஒரு ஜோக் சொல்லவா!?

நீ ஆரம்பிச்சா நல்லது. நான் ஆரம்பிச்சா புரணி பேசுறதா!? சரி ஜோக் சொல்லு, சிரிச்சு தொலைக்குறேன்.

இப்படிலாம் வேண்டா வெறுப்பா கேட்டால் சொல்ல மாட்டேன்.

ஹி! ஹி!, ஹா! ஹா! இப்ப சொல்லுடி

ராமு: வெயிட்டான படிப்பு படிச்சும் என் பையனுக்கு வேலை கிடைக்கல

சோமு: அப்படியா… என்ன படிப்பு படிச்சிருக்காரு….?

ராமு:  L(kg) U(kg)pre(kg).

நல்ல வெயிட்டான படிப்புதான். நான் விடுகதை சொல்றேன் பதில் சொல்லு பார்க்கலாம்!

வெளியே உள்ளதை எறிந்து உள்ளே உள்ளதை சமைத்தான். பின் வெளியே உள்ளதை  சாப்பிட்டு விட்டு உள்ளே உள்ளதை எறிந்தான் அது என்ன?

விடையை யோசிச்சிக்கிட்டே இரு. நான் கடைத்தெருவுக்கு போய் வந்திடுறேன்.

அருள்மிகு சுப்பிரமணியசுவாமி திருக்கோயில் - புண்ணியம் தேடி ஒரு பயணம்

தந்தைக்கு மந்திரம் உபதேசித்த முருகன் திருத்தலங்கள் தமிழ்நாட்டில் மட்டுமல்லாது உலகம் முழுக்க எண்ணிடலங்காது உள்ளன. ஆறுமுகப் பெருமானின் அவதாரங்கள் ஒவ்வொன்றும் ஒவ்வொரு சிறப்புடையது. இளமை மாறாமல் இருக்கும்  முருகனது சிறப்பு வாய்ந்தத் தலங்களில் இன்று புண்ணியம் தேடி பயணத்தில் நாம் பார்க்க இருப்பது அருள்மிகு சுப்பிரமணியசுவாமி திருக்கோயில், மருங்கூர்,  நாகர்கோவில். ”குன்றிருக்கும் இடமெல்லாம் குமரன் இருக்கும் இடம்”ன்ற ஔவ்வையின் வாக்கிற்கேற்ப இந்த திருக்கோவிலும் மலைமேல் தான் இருக்கு.

தன்னை வணங்கும் பக்தர்களுக்கு மருங்கில் (நெருங்கி) வந்து அருள்பவர் என்பதால், இவ்வூர் மருங்கூர் என பெயர் வந்தது. இதுதான் திருக்கோவிலுக்குச் செல்லும் மலையடிவார நுழைவுத் தோரண வாயில். நாகர்கோவில் பஸ் ஸ்டாண்டில் இருந்து 10 கி.மீ.தொலைவில் உள்ளது இத்திருகோவில். இங்குச் செல்ல நேரடி பஸ் வசதியும் உள்ளன.

ஏறக்குறைய எண்பது அடி உயரமும், இருபத்தி இரண்டு ஏக்கர் பரப்பளவும் கொண்ட இந்த மலை திருமலை,  மங்கலமலை,  எழில்மலை, சித்தர்மலை, வேள்விமலை எனவும் அழைக்கபடுகிறது. தூரத்தில் இருந்து பார்க்கும் போது மேற்குப்புறம் உயர்ந்தும், அதன் தலை பகுதியில் திருக்கோவிலும்  கிழக்குப்புறம் நீண்டும் சரிந்தும் ஒரு ஆண் மயில் போலத் தோற்றம் அளிப்பதால் இந்த மலை மயூரகிரி, மயில்மலை எனவும் சொல்லபடுகிறது.     

படியேறி மலைமீது வந்தால் இந்த திருக்கோவிலின் நுழைவு வாயிலை அடையலாம். இந்தத் திருக்கோவிலின் உள்ளே செல்லும் முன் அதன் ஸ்தல வரலாற்றை பாப்போம்.  அகலிகை மீது ஆசைக் கொண்ட இந்திரனின் உடல் முழுவதும் கண்ணாகும்படி அவளது கணவர் கவுதம முனிவர் சபித்து விட்டார். சாப விமோசனம் பெற இந்திரன் பூலோகம் எல்லாம் அலைந்து திரிந்து இங்கு வந்தான். இவ்வூர் அருகிலுள்ள சுசீந்திரத்தில் உள்ள ஸ்ரீதாணுமாலயன் காட்சி தந்து இந்திரனுக்கு விமோசனம் கொடுத்தருளினார்.

இனிப் பிரகாரத்தை வலம் வரும்போது வலப்பக்கம் காசிலிங்கேஸ்வரரும் இடப்பக்கம் பீட வடிவில் காவல் தெய்வம் பூதத்தான் சன்னதிகளும்  உள்ளன. இந்த காசிலிங்கேஸ்வரர் சன்னதி எதிரே நந்திப் பீடம் உண்டு. இந்த இடத்தில சித்தர் ஒருவர் ஜீவசமாதியான தாகவும் சொல்லபடுகிறது இனி ஸ்தல வரலாறின் தொடர்ச்சியை பார்ப்போம்...,

இந்திரனுக்கு சாப விமோசனம் கிடைத்தவுடன் இந்திரனுடைய வெள்ளை குதிரையான உச்சைசிரவம் சாபம் கொண்ட இந்திரனைச் சுமந்ததால், தனக்கும் பாவம் ஒட்டிக்கொண்டதாகக் கருதி சிவனிடம் விமோசனம் கேட்டது. அதை ஏற்று சிவனும், சுசிந்திரத்தின் மருங்கே வடக்கிழக்கு பக்கத்தில் உள்ள இதன் பழைய காலத்துப் பெயரான சோபனாத்திரியில் உள்ள பிரம்மஷேத்திர மூர்த்தியான அருள்மிகு ஸ்ரீ சுப்பிரமணியசுவாமியை  வழிப்பட்டு அவனை அர்ச்சித்து நற்கதி அடையுமாறு அருள்பாலித்தார்.

இது திருக்கோவிலின் கிழக்கு வாயில் பகுதி. இனி, ஸ்தல வரலாற்றை பார்க்கலாம். இந்த உச்சைசிரவம் என்னும் வெள்ளைகுதிரை இறைவனிடம் குதிரையாகிய என்னால் அர்ச்சிக்க முடியாதே என உள்ளம் கலங்கி முறையிட்டது. அப்பொழுது சுனந்தனையும் உடன் அழைத்து செல்லுமாறு இறைவன் அறிவுறுத்தினார். பின்னர், உச்சைசிரவம் இங்கிருந்த குன்றின் மீது முருகனை வேண்டி தவமிருந்தது. முருகப்பெருமான் அதற்கு காட்சி தந்து விமோசனம் கொடுத்தருளினாராம் குதிரை வழிபட்ட தலம் என்பதால் இதற்கு வாசிபுரம்(வாசி என்றால் குதிரை)என்றும் பெயருண்டு. எல்லா முருகன் கோவில்களிலும் மயில் மீதுதான் முருகன் வலம்வருவார். ஆனால், இங்கு குதிரை வழிபட்டத் தலம் என்பதால், இத்தல முருகன் விழாக்காலங்களில் மயிலுக்குப் பதிலாக குதிரையில் பவனிவருவார். இது இந்தக் கோவிலின் விசேஷமாகும்.  

இந்தk கோவிலின் மற்றுமொரு சிறப்பு, கந்தசஷ்டி அன்று மும்மூர்த்தி அலங்காரம் கொண்டு மும்மூர்த்தி அம்ச முருகனாகk காட்சிth தருகிறார். ஐப்பசியில் சூரசம்ஹாரம் முடிந்த மறுநாள் காலையில் முருகன் சிவப்பு வஸ்திரம் அணிந்து (சிவப்பு சாத்தி)நடராஜராகவும், மதியம் வெள்ளை (வெள்ளை சாத்தி) வஸ்திரத்துடன் பிரம்மாவாகவும், மாலையில் பச்சை (பச்சை சாத்தி) வஸ்திரம் அணிந்து விஷ்ணு சொரூபமாகவும் காட்சி தருவார். இது இந்த கோவிலின் ஒரு சிறப்பு அம்சமாகும். 

கிழக்கு வாயிலுக்கு நேரே இருக்கும் பலிபீடம் மஹா பலிபீடம் ஆகும். அதன் முன் சிறிய இந்திர பலிபீடமும், அதன் பின் பிரம்மா மற்றும் அக்னி பலிபீடங்களும் உள்ளன, இதன் சிறப்பு அம்சம் என்னனா 12 ராசிகளும் 27 நட்சத்திர குறிகளும் இருக்கு. இது ஒரு பரிகார அமைப்பு ஆகும். பிறந்த குழந்தைக்கு, முதல் அன்னம் ஊட்டும் வைபவம் இக்கோயிலில் அதிகளவில் நடக்கிறது. இந்த சடங்கை நிகழ்த்த வரும் பக்தர்கள், சுப்பிரமணியருக்கு புளிசாதம், வெண்சாதம், சர்க்கரைப் பொங்கல், உப்பு, புளி, மிளகாய் சேர்ந்த துவையல் என அறுசுவை உணவைப் படைத்து, குழந்தைக்கு ஊட்டுகின்றனர்.

பிரகார வலம் வரும்போது இங்கே ஒரு நாக சன்னதி இருக்கு. மேலும் தெற்குப் பக்கம் யம பலிபீடமும், மேற்கு பக்கம் நிர்குதி பலிபீடமும், வடமேற்கில் வருண பலிபீடமும், வடக்கே வாயு ,மகாவிஷ்ணு ,குபேரன் மற்றும் ஈசானன் முதலிய பலிபீடங்கள் உள்ளன. பிரகாரத்தில் கன்னி விநாயகர், சண்முகர், குலசேகர விநாயகர் சன்னதிகளும் உள்ளன.   கந்தசஷ்டி திருவிழா இங்கு விசேஷம். விமோசனம் கேட்டுத் தன்னை வழிபட்ட உச்சைசிரவஸுக்கு, சிவனே பாவ விமோசனம் கொடுத்தருளியிருக்கலாம். 

ஆனால், அவர் அவ்வாறு செய்யாமல் முருகனை வழிபடும்படி அதை அனுப்பி வைத்தார். தன் அம்சமான முருகனுக்கு முக்கியத்துவம் கொடுக்க வேண்டுமென்பதற்காக சிவன் இவ்வாறு செய்ததாகச் சொல்வர். இதனால் இத்தல முருகனை சிவனாகக் கருதி சிவமுருகன் என்றும் அழைக்கிறார்கள். சிவனுக்குரிய ஆகமப்படியே பூஜைகளும் நடக்கிறது.

மூலஸ்தானத்தில் முருகன் அசுர மயில் மீது அமர்ந்த நிலையில் காட்சித் தருகிறார். இவரது சிலை திருவாசி, மயிலுடன் ஒரே கல்லில் அமைக்கப்பட்டிருப்பது சிறப்பான அமைப்பு. உடன் வள்ளி, தெய்வானை இருக்கின்றனர். பக்தர்கள் தங்கள் பிரார்த்தனை நிறைவேறியப் பின் இங்குள்ள முருகனுக்கு சிவப்பு வஸ்திரம் சார்த்தி, பாலாபிஷேகம் செய்து நேர்த்திக்கடனைச் செலுத்துகின்றனர். மேற்கு தொடர்ச்சி மலையின் தென்கோடியில் இடைமலை தொண்டு என்னும் சிறு கணவாயின் நேர் எதிரே சேர சோழ பாண்டிய மன்னர்களின் எல்லை கோட்டில் இருப்பதால் மன்னர்கள் பலராலும் வணங்கப் பட்டத் திருத்தலம் என சொல்லப்படுகிறது.

கி.மு. 3ஆம் நூற்றாண்டில் இருந்த ஏராத் தோனஸ் என்ற அயல்நாட்டுப் பயணி குமரிமுனைப் பற்றிக் குறிப்பிட்டுள்ளார். கி.பி. முதல் இரண்டாம் நூற்றாண்டுகளில் வாழ்ந்த பெரிபுளூஸ், தாலமி இப்பகுதி பற்றி தமது நூல்களில் குறிப்பிட்டுள்ளனர். மதுரைத் தொடங்கிக் குமரி வரையுள்ள பகுதி ‘பாண்டி மண்டல’மாக இருந்தது. அதனால் இப்பகுதி பாண்டியர்களால் ஆளப்பட்டு வந்தது. முதலாம் இராசராச சோழன் ஆட்சிக் காலத்தில் தமிழகம் முழுவதும் சோழராட்சிக்கு உட்பட்ட வேளையில் இப்பகுதியும் சோழராட்சியின் கீழ் வந்தது. பல்வேறு மன்னர்கள் ஆண்டு வந்தற்கு சாட்சியாகவும் அவரவர்கள் பற்றிய செய்திகள் இங்கே உள்ள சுவர்களில் சின்னங்களாக காணப்படுகிறது. இந்த ஒரே கல்லில் செதுக்கப்பட்ட வாழைப்பூ போன்ற அமைப்பு பத்மநாபபுரம் அரண்மனையிலும் காணப்படுகிறது.

இந்தத் திருகோவிலின் உத்திரத்தில் மீன் உடம்பும், யானை தலையும் கொண்ட அமைப்பு இரண்டு நாடுகளின் இடையே உள்ளே தொடர்புகளையும், அவர்கள் இந்தக் கோவிலுக்கு செய்த தானங்களும் இங்கே உள்ள கல்வெட்டுக்கள் குறிப்பிடுகின்றன.

எதிரில் முருக தீர்த்தம் உள்ளது. திருமலையின் அடிவாரத்தில் காவடி மண்டபமும் உள்ளது.   உற்சவர் சண்முகர், கந்தசஷ்டி விழாவின்போது மட்டுமே புறப்பாடாவார். மற்ற நாட்களில் இவரை சன்னதிக்குள் மட்டுமே தரிசிக்க முடியும்.

திரு.நாராயணகுரு தனிமையை நாடி இங்குள்ள மருந்துவாழ் மலையில் தங்கி இருந்த போது அடிக்கடி இந்த ஸ்தலத்திற்கு வந்து தவம் செய்வாராம். ஒருநாள் நடுராத்திரியில் முதியவர் ஒருவர் பசியோடு இருந்த நாராயண குருவுடன் தான் கொண்டு வந்த உணவை உண்ண கொடுத்து, தானும் உண்டாராம். பின்னர் மறைந்து விட்டார். அது இங்குள்ள முருகன் என சொல்லப்படுகிறது. திரு நாராயணகுருவுடன் மருந்துவாழ் மலையில் தங்கி இருந்த சட்டம்பி சுவாமிகளும் திருவனந்தபுரம் அபேதானந்தசுவாமிகளும் இங்கே பல நாட்கள் தங்கி இருந்து தவம் செய்து உள்ளனர்.

மேலும் திருவஞ்சிநல்லூர் சிதம்பரம் சுவாமிகள் மற்றும் இங்குள்ள வேதாந்த சிரவண மடத்தில் தங்கி இருந்த  பல துறவிகள் ஞானபேதம்(முக்தி) அடைந்துள்ளனர். இந்த ஸ்தலத்தை சுற்றி ஆறு புண்ணிய தீர்த்தங்கள் உள்ளன எனக் கூறப்படுகிறது.

காலை 6 மணி முதல் 10 மணி வரை, மாலை 5 மணி முதல் இரவு 7.30 மணி வரை இந்தத் திருக்கோவில் நடை திறந்திருக்கும்.  மீண்டும் அடுத்த வாரம் வேற ஒரு புண்ணிய ஷேத்திரத்தில இருந்து சந்திக்கலாம்.