ஐஸ் குச்சி ப்ளவர் வாஸ் - கிராஃப்ட்

ஃப்ளவர் வாஸ் எந்த ரூபத்துல இருந்தாலும் பெண்களுக்குப் பிடிக்கும். அப்புக்கு இப்ப அரைப் பரிட்சை லீவு. அவனை சும்மா விட்டா சைக்கிள், வண்டி எடுத்துக்கிட்டு ஊரை சுத்துவான். இல்லாட்டி வீட்டுல இனியாவோடு சண்டைப் போட்டு அவளை அடிப்பான். அதனால, ஐஸ்குச்சி ஒரு பண்டல் வாங்கிக்கொடுத்து எப்படி செய்யனும்ன்னு ஐடியாவும் சொல்லிக் கொடுத்து வழக்கம்போல பதிவு தேத்த கேமராவும் கொடுத்துட்டு, நான் வேலை பார்த்துட்டு இருந்தேன். பத்து நிமிசத்துல அழகான ஒரு ஃப்ளவர் வாஸ் ரெடி பண்ணிட்டான். துணைக்கு ஒரு ஆளை வச்சுக்கிட்டு. அது யார்ன்னு பதிவின் கடைசில சொல்றேன்.

தேவையானப் பொருட்கள்:

ஐஸ்குச்சி - தேவையான அளவு

ஃபெவிக்கால் 

செயற்கை பூங்கொத்து

எல்லாப் பொருட்களையும் எடுத்து வச்சுக்கோங்க. லைட் கலர் டைல்ச் போட்ட வீடா இருந்தா கீழ ஒரு நியூஸ் பேப்பர் விரிச்சுக்கோங்க. தவறி ஃபெவிக்கால் கீழக் கொட்டிட்டா தரையெல்லாம் அழுக்காகும். அது க்ளின் பண்ணும் வேலை வேற இம்சை பண்ணும்.

முதல்ல நெடுக்கு வாக்குல சுமாரா 5செ.மீ இடைவெளில ரெண்டு குச்சி வச்சுக்கோங்க. அதுக்கப்புறம் மேலயும் கீழயும் ஒரே சீரான இடைவெளி விட்டு, கம் தடவி குறுக்கு வாக்குல குச்சி வைங்க. 

அதுக்கப்புறம் முதல்ல நெடுக்கு வாக்குல வச்ச குச்சியோட வெளி முனைக்கு நேரா வரும் மாதிரி கம் தடவி குச்சி வச்சு ஒட்டுங்க. இப்படியே குறுக்கும், நெடுக்கும் மாத்தி ஒரு பத்து அடுக்கு வைங்க. 

அதுக்கப்புறம், குச்சிகளை உள்முனை நுனில இருந்து வச்சு ஒட்டுங்க. இப்படியே பத்து அடுக்கு குச்சிகளை ஒட்டிக்கோங்க. அடுத்து வெளி நுனில இருந்து ஆரம்பிச்சு பத்து அடுக்கு குச்சிகளை ஒட்டிக்கோங்க.

இப்படியே மாத்தி மாத்தி உங்களுக்கு தேவையான உயரம் வரை ஒட்டிக்கிட்டே வாங்க. அழகான ஃப்ளவர் வாஸ் ரெடி. 

அப்புவோடு ஃப்ளவர் வாஸ் ரெடி பண்ணுனவர் இவர்தான். பேரு கௌதம். எதிர்வீட்டு குட்டி.  செம வாலு. இன்னிக்கு, இவருக்கு முதல் பிறந்த நாள். வாழ்த்துங்கள், நல்லவனா வளரட்டும்.

மீண்டும் சந்திப்போம்.